CHISHINA CHACHILEMU: ‘Likonekelenunga navakwenu namuchima wakusuuluka numba tuhu mutu umwe ali nachuma chimwe chakumulingisa ayayavale hali mukwavo. Nge muze Yehova amikonekelele namuchima wakusuuluka, nayenu mwatela kulinga mwomumwe.’—Wavaka-Kolose 3:13.

Uno kukonekela chalumbunukila mulihi? Mbimbiliya yafwanyisa shili kumukuli, kaha kukonekela vachifwanyisa kukujima mukuli nakuuvulyama. (Luka 11:4) Mukanda umwe wamba ngwawo lizu lyachiHelase lyamuVisoneka lize valumuna ngwavo “kukonekela” lyalumbununa “kukonekela mutu ali namukuli wetu nakulitwamina kumukala.” Ngocho nge tunakonekela mutu uze atupihisanga, kaha katwatela kulinga vyuma vize navisolola nge tuchili lika nakusaka atufweteko. Kukonekela mutu namuchima wakusuuluka kachalumbununa nge twasaka vyuma vyavipi nalingi chipwe kulelesa ukalu uneza mwomwo yavilinga vyenyiko. Oloze chasolola nge katwasaka kulamina mutu kana kokoko numba vene nge tunamono ngwenu chinatemo “kuyayavala.”

Uno kukonekelanga vakwetu nachitukafwa ngachilihi makumbi ano? Hakuwana nge katwakupuka mwosenako, tuvosena tweji kulinganga shili. (Wavaka-Loma 3:23) Ngocho chapwa chachilemu kukonekelenga vakwetu mwomwo nayetu nawa kulutwe navakatukonekela nge tunapihisa. Kaha nawa nge natukonekelenga vakwetu, nayetu tunahase kunganyala. Mujila muka?

Nge natukwachila vakwetu matoto nakoko, nakuhona kuvakonekela, natulinehela ukalu etu vavene. Nachitulingisa tuhone kupwa vakuwahilila, nakuhomba, nakukaluhwisa chiyoyelo chetu. Chinahase nawa kutunehela misongo. Ndotolo Yoichi Chida naAndrew Steptoe uze alinangula vilinga navishinganyeka vyavatu vasonekele muMangazini yaAmerican College of Cardiology ngwavo: “Vyuma vanahehwojola kalinwaha vinasolola nge kupwa namatoto nakoko cheji kunehanga musongo wamuchima.”

Tutalenu jino hanganyo yatwama hakukonekela vakwetu. Nge natukonekelanga vakwetu namuchima wakusuuluka, kaha natulinunga nakutwama navakwetu mukuunda, nakutunga usoko wamwaza. Chachilemu chikumanyi, natulondezeza Kalunga uze eji kukonekelanga vaka-shili vaze navapihilila nakwalumuka uze asaka nayetu tulingenga mwomumwe.—Mako 11:25; Wavaka-Efwesu 4:32; 5:1.