Becky, wamuCalifornia, mu U.S.A ambile ngwenyi: “Hamyaka yayivulu, ngwatachikijile ngwami Mike apwa Chinjiho chaYehova. Oloze vyuma vafwelela muliuka lyavo kangwavivwishishilengako. Ngwalihulishilenga ngwami, Yehova apwa iya? Mwomwo ika Vinjiho jaYehova kaveshi kulinga viwanyino vyamakumbi akunokako? Kutala Mike apwile mukaliuka kakuhanduka tahi?”

Zenon, wamuOntario, mulifuchi lyaCanada ambile ngwenyi: “Omu vakwetu vaputukile kulinangula Mbimbiliya naVinjiho jaYehova, ngwalihulishilenga ngwami: ‘Uno lijina lyakwamba ngwavo Vinjiho jaYehova lyalumbununa ika? Lijina kana omwo lyahingama.’”

Kent, wamuWashington, mu U.S.A ambile ngwenyi: “Twashinganyekelenga napuwami ngwetu Vinjiho jaYehova vatutambukililenga mangana vatutoleke mwomwo katwayilenga kuchachiko. Kaha nawa twashinganyekelenga ngwetu nge jichachi jakufumana chikuma kajanangwilenga vyuma vyakutusuulwisako, kaha naliuka lyaVinjiho jaYehova vene kalyeshi kuhasako.”

Cecilie, wamuEsbjerg, mulifuchi lyaDenmark ambile ngwenyi: “Kuhanjika muchano, Vinjiho jaYehova kangwavatachikijileko. Navyuma vafwelela vene kangwavijivileko.”

Pamo mweji kumonanga omu Vinjiho jaYehova veji kwambulwilanga kuzuvo hizuvo chipwe kuvihela vyasanga nakuhana vatu mikanda yize yahanjika haMbimbiliya, nakunangula vatu Mbimbiliya hawana wakanyombo. Nayenu pamo mwatambulaho lyehi mangazini yino kuvatu kana. Chipwe ngocho, pamo muchili lika nakuhuhwasana Vinjiho jaYehova. Pamo mweji kushinganyekanga ngana mwavatu tunashimutwila helu.

Nge nayenu mweji kuhuhwasananga nakuhulisa vihula kana, kaha kulihi munahase kuwana kukumbulula? Uno munahase kutachikiza ngachilihi vyuma vafwelela Vinjiho jaYehova, nokwo kweji kufumanga jimbongo jakukundwiza mulimo wavo wakwambulula navihela vyavo vyakukungulukila, novyo veji kumitambukilanga hamembo enu nakuvihela vyeka?

Cecilie uze twavulukanga hakavanga ambile ngwenyi, “Ngwatangilenga mijimbu yayivulu yize yahanjikile hali Vinjiho jaYehova haInternet. Ngwevwilenga mangwavo amavulu hali vatu kana, kaha ngwetavilile mangwavo kana. Echi changulingishile nguvamone nge hivatu vavapi.” Kutwala muze, Cecilie ahulishile Vinjiho jaYehova, kaha vakumbulwile kanawa vihula vyenyi.

Kutala muli nakusaka vamikumbulule kanawa vihula mweji kulihulisanga hali Vinjiho jaYehova tahi? Tuli nakumikolezeza muhulise Vinjiho jaYehova vavene, vaze veji kusonekanga mangazini yino. (Vishimo 14:15) Twafwelela ngwetu vihande vinakavangizaho navimikafwa mutachikize omwo twapwa, navyuma twafwelela namulimo tweji kuzatanga.