Mwomwo ika muMbimbiliya vasonekelamo upolofweto?

Mwomwo ika mbimbiliya yavulukilile chimweza vyuma vili nakusoloka makumbi ano?—Luka 21:10, 11.

MuMbimbiliya mwatwama upolofweto wauvulu. Kakweshi mutu nahase kupolofweta vyuma navikasoloka kulutweko. Ngocho upolofweto wamuMbimbiliya uze watesamo wasolola chikupu nge Mbimbiliya yapwa mukanda waKalunga.—Tangenu Yoshuwa 23:14; WaPetulu 2, 1:20, 21.

Upolofweto uze watesamo lyehi watulingisa tufwelele Kalunga. (WavaHepeleu 11:1) Watulingisa nawa tufwelele ngwetu vyuma atushika Kalunga navikatesamo. Eyo, upolofweto wamuMbimbiliya watuhana lutalililo lwamwenemwene.—Tangenu Samu 37:29; Wavaka-Loma 15:4.

Uno upolofweto weji kutukafwanga ngachilihi?

Upolofweto umwe weji kuhuhumunanga vangamba jaKalunga valinge vyuma vimwe. Chakutalilaho, omu vaka-Kulishitu vamulikulukaji lyamyaka lyakulivanga vamwene upolofweto umwe unatesamo, vafumine muYelusalema. Kutwala muze, vaka-kole vanongesele nganda kana mwomwo vatu vavavulu vapwilemo vakanyine Yesu. Oloze vaka-kulishitu vayovokele mwomwo yakufuma munganda kana.—Tangenu Luka 21:20-22.

Makumbi ano upolofweto uze watesamo wasolola nge kalinwaha Wangana waKalunga unongese mawangana osena avatu najifulumende javo. (Ndanyele 2:44; Luka 21:31) Shikaho tuvosena twatela kuzata nangolo oholyapwa mangana Yesu Kulishitu Mwangana uze vatongola kuli Kalunga atwivwile kuwaha.—Tangenu Luka 21:34-36.