Ndikishonali yimwe yamba ngwayo lizu sayasi lyalumbununa “kulinangula kanawa vyuma vyakutenga nomwo vyazata, hakuvitala nakuvyeseka, nakuvipima.” Mulimo kana wapwa waukalu kaha nawa weji kwivwisanga chipekete. Vaka-sayasi veji kuhundangananga havyalumingo, chipwe hatukweji, chipwe hamyaka yayivulu hakwesejeka vyuma vanalinangula vamone nge navizata kanawa. Shimbu jimwe kukilikita chavo cheji kuyanga mwangana vene, oloze kakavulu cheji kunganyalisanga vatu. Tuchitalenu havyakutalilaho vino.

Kapani yimwe yamuEurope yeji kuzachisanga mapapilo andundu najinyungo jimwe jakulipwila hakutunga chinoma chize cheji kutomesanga meya kuchina vatu navakwachiwa misongo hakunwa meya amajilo. Vinoma vyangana vanavizachisanga nge kunasoloka ukalu wakulijila wakufwana nge mundenda uze wahichile muHaiti mu 2010.

Vaka-sayasi vatunga nawa likina lyakukafwa vatu vatachikize okwo vali nakuya lize vavuluka ngwavo Global Positioning System (GPS). Numba tuhu likina kana valitungilile vaka-kwasa jita, oloze lyeji kukafwanga nawa vanyamutekenya, navaka-kutambukisa jindeke najimbopolo, navinyanga, navatu veka mangana vatachikize okwo vali nakuya. Twatela kusakwilila vaka-sayasi hakutunga likina kana mwomwo lyeji kukafwanga vatu.

Uno mweji kuzachisanga shinga, chipwe kopyuta, chipwe Internet tahi? Kutala munalikangula jino kumujimba mwomwo yakunwa vitumbo vyakuchipatela tahi? Uno mweji kutambukilanga mundeke nyi? Nge mukiko, kaha muli nakunganyala kuvyuma vize vatunga vaka-sayasi. Chikupu vene sayasi yili nakumikafwa mujijila jajivulu.

VAKA-SAYASI KAVEJIVA VYUMA VYOSENAKO

Vaka-sayasi makumbi ano vali nakuhehwojola chikuma mangana vatachikize vyuma vyakutenga vyavivulu vyatwama hano hamavu. Vamwe vali nakufwila kutachikiza omu jazata jiatomu, kaha veka vali nakusandasanda vawane omu melu namavu vyaputukile. Hakutwalaho lika kuhehwojola navyuma vize vahona kumona nameso, vaka-sayasi vamwe vashinganyeka ngwavo nge Kalunga uze vavuluka muMbimbiliya kwatwama, kaha vanahase kumuwana.

Vaka-sayasi vaze vaya fuma chikuma navaze valinangula mangana autu vali nakutwalaho lika kusandasanda hachihande kana. Vakundwiza muka-sayasi umwe Amir D. Aczel uze “anehele chihande chakuvuluka nge Kalunga katwamako.” Chakutalilaho, muka-sayasi umwe uze aya fuma ambile ngwenyi “kakweshi unjiho numba umwe uze wasolola nge kwatwama Kalunga uze atengele vyuma vyosenako.” Kaha veka vahanjika ngwavo vyuma alinga Kalunga uze vavuluka muMbimbiliya vyapwa kaha “hivisava.” *

Oloze tunahase kuhulisa ngwetu: Uno vaka-sayasi vanalinangula vyuma vyosena vyakutenga numba vakukulule mujila kaneyi tahi? Nduma. Numba tuhu  chinyingi chasayasi chili nakuzovoloka, oloze vaka-sayasi vavavulu vetavila ngwavo kuli vyuma vyavivulu vize kanda vatachikize, kaha vyeka kaveshi kukavitachikizako. Mutu alinangula chikuma vyasayasi Steven Weinberg ambile ngwenyi, “Katweshi kukatachikiza vyuma vyosena vyakutengako.” Kaha nawa muka-kulinangula vyamumelu Martin Rees wamuGreat Britain asonekele ngwenyi: “Kwatwama vyuma vize vatu kaveshi kukatachikizako.” Pundu vene, kuli vyuma vyavivulu vize vaka-sayasi vahona kutachikiza kuputukila vene kutumaselusi twatundende nakuheta kuvyuma vyavinene vatanga mumelu nahamavu. Achitalenu havyakutalilaho vino:

  • Vaka-sayasi vaze valinangula omwo vyazata vyuma vyakuyoya kavatachikiza kanawa omwo maselusi eji kuzatangako. Kavatachikiza kanawa omwo maselusi eji kukumisanga ngolo mumujimba, nomwo eji kutunganga kulya chakukolesa mujimba, nomwo eji kulihandununangako.

  • Ngolo jamavu jakukoka vyuma vavuluka ngwavo gravity jeji kutukafwanga hakumbi hakumbi. Oloze vaka-sayasi kavatachikiza kanawa omwo jazatako. Kavatachikiza omwo ngolo kana jeji kuhilwisanga mutu hamavu nge natumbuka nomwo jeji kulingisanga kakweji kanyengumuke lika kaye.

  • Vaka-kulinangula vyamuutangatanga vamba ngwavo kuli vyuma vatanga mumelu nahamavu vyakuheta kafwe kujipaseti 95 vize kavamona chipwe kuviwana namakina avoko. Shikaho vahandununa kaha vyuma kana muvihanda vivali vavuluka ngwavo dark matter nadark energy. Vihanda kanevi nou avitachikiza vene wauchi.

Kwatwama vyuma vikwavo vize vyeji kukomwesanga vaka-sayasi. Mwomwo ika? Muka-kusoneka vyasayasi umwe asonekele ngwenyi: “Vyuma vize katwatachikizako vyapwa vyavivulu kuhambakana vize twatachikiza. Ami ngunamono nge mutu atela kulikomokela hakulinangula vyasayasi nakumulingisa afwile kutachikiza vyavivulu muchishishisa chakuhamikanga kaha vyuma vanashinganyeka vakwavo.”

Shikaho nge muli nakushinganyeka ngwenu sayasi yapwa yayilemu chikuma kuhambakana Mbimbiliya, ngocho nayilingisa vatu vakane kufwelela Kalunga, kaha shinganyekenu hachishina chino: Kachi nge vaka-sayasi vachinyingi namakina avo angolo vanahono kutachikiza vyuma vyosena vatenga, kutala nachipwa chamangana kukana washiwashi vyuma vize vanahono kuwana tahi? Mukanda waEncyclopedia Britannica uze wahanjika hamijimbu yakushikulu nahavyuma vyamumelu wakukulula ngwawo: “Numba tuhu vatu vanalinangula vyuma vyamumelu hamyaka kafwe 4,000, oloze vyuma vatanga vyamumelu nahamavu hanga vyapwila nge muze vavimwenenga vaka-Mbavilone.”

Etu Vinjiho jaYehova twavumbika lisesa vatwama nalyo vatu lyakulisakwila vavene vyuma vatela kulinga hachihande kanechi. Tweji kukavangizanga lushimbi lwamuMbimbiliya lwakwamba ngwavo: “Vatu vosena vamone ngwavo mwapwa muvaka-kwashiwisa muchima.” (Wavaka-Fwilipi 4:5) Ngocho tuli nakumikolezeza mukekese vyuma enu vavene mangana mumone omwo sayasi naMbimbiliya yalitombola havihande vimwe.

^ par. 9 Vatu vamwe kavetavila vyuma yahanjika Mbimbiliyako mwomwo yavyuma vyakuhenga vanangula mujichachi. Vanangula ngwavo mavu atwama hakachi nakachi kavyuma vatanga mumelu, chipwe ngwavo Kalunga atengele mavu mumakumbi kaha 6 ajiola 24.—Talenu lipwata lyakwamba ngwavo “ Mbimbiliya naUnjiho Vawana Vaka-sayasi.”