Achishinganyekenu nge vilyo vimwe vyamujimba wenu kavyeshi nakuzatako, oloze meso kaha. Ou ukiko ukalu atwama nawo yayami Jairo. Chipwe ngocho, apwa wakusuuluka mukuyoya chenyi. Shimbu kanda ngumilumbunwine ovyo vyamulingisa apwenga wakusuuluka, manenu ngumilweze vyaukalu wenyi.

Jairo asemukile namusongo weji kwenyekanga wongo vavuluka ngwavo spastic quadriplegia. * Echi chalingisa vilyo vimwe vyamujimba wenyi vihone kuzata. Wongo wenyi kaweshi kuzata kanawako, ngocho eji kulitunyanga mwamupi. Lwola lumwe, echi cheji kumulingisanga alilemeke ivene. Nahase kulemeka navatu vaze vali kwakamwihi nge kavazangamineko. Chaluvinda, kakavulu tweji kukasanga mahinji namavoko enyi kuchitwamo chakumushinjikila kuchina ponde.

UKALU NAHICHIMO JAIRO KUHETA NAKUUKULWANE WENYI

Jairo namono lamba kufuma vene hakusemuka chenyi. Omu apwile natukweji vatatu, aputukile kutunya, kahechi chamulingishile alezumukenga. Kakavulu mama amumbachilenga nakumulahisa kuchipatela hakushinganyeka ngwenyi pamo nafu.

Hakuwana nge lwola lwosena Jairo alitunyinenga nakulikonya, ngocho vifuwa vyenyi vyalyenyekele. Omu apwile namyaka yakusemuka 16, alikundumwine mutungi, kaha vamupulile mbandu yayinene. Noholyapwa nguchili nakwanuka omu Jairo apwile nakuteta miteto hakumbi hakumbi naufuku swi nomu mbandu yenyi yakangukile.

Utonji wenyi wamulingishile jino apendamine lika hali vakwavo mangana vamulingilenga vyuma vyosena vyakufwana nge kumulisa vyakulya, nakumuvwika nakumusavalika. Kakavulu tata namama vakiko veji kuzatanga milimo kana. Numba tuhu Jairo asakiwa kumukafwa kuvatu lwola lwosena, oloze visemi jetu veji kumulwezanga ngwavo kuyoya chenyi kachapendamina kaha hali vatuko, oloze nahali Kalunga.

JILA YAKULIVWASANYINAMO NAVAKWAVO NAYISOLOKA

Visemi jetu vapwa Vinjiho jaYehova, kaha vanapunga nakutangila Jairo mijimbu yamuMbimbiliya kufuma vene kuukemba. Vatachikijile ngwavo mutu nahase kusuuluka mukuyoya nge mwapwa nausoko naKalunga. Numba tuhu Jairo aviza musongo wakulitunya, oloze venjikijile ngwavo nahase kupwa nalutalililo lyakukola lwavyuma vyakulutwe. Chipwe ngocho, kakavulu vahuhwasanyinenga numba nge nahase kwivwishisa Mbimbiliya.

Likumbi limwe omu Jairo apwile kanyike, tata ambile kuli ikiye ngwenyi, “Mwanami, achinguhanjikiseko.” Ambile cheka ngwenyi, “Kachi nge wanguzanga chikupu, kaha nauhanjika nayami.” Omu  tata amulembelele ahanjike numba vene lizu limwe, Jairo asotwele masoji. Numba tuhu esekele ngwenyi ahanjike vyuma vyapwile kumuchima wenyi, oloze ahonene. Tata evwile kupihya hakulingisa Jairo alile. Chipwe ngocho, kulila chasolwele nge Jairo evwile vyuma ahanjikile tata. Ukalu apwile nawo shina wakuhona kuhanjika.

Kutwala muze, visemi jetu lwola lumwe vamwenenga Jairo mwalumuna meso washiwashi kupwa chinjikizo chakuvalweza vyuma ali nakushinganyeka. Jairo evwilenga kupihya hakuwana nge vatu kavevwishishilenga vyuma avalwezelengako. Oloze omu visemi jetu vatachikijile jino kanawa chinjikizo kana nakumulingila vyuma asakilenga, Jairo awahilililenga chikuma. Eyi yikiko yapwile jila yakusolwelamo kusakwila chenyi.

Ndotolo uze eji kukanga vatu vatwama naukalu wakuhanjika atulwezele ngwenyi, hakusaka tulivwasanenga nenyi, twatela kwimikanga mavoko osena avali mwilu hakumuhulisa vihula vize atela kukumbulula ngwenyi eyo chipwe nduma. Livoko lyachilyo lyemanyinyineko eyo, kaha lyachimoswe lyemanyinyineko nduma. Kaha akumbulwilenga hakushishika kulivoko limwe lize linemanyinako vyuma ali nakusaka.

CHUMA CHACHILEMU ALINGILE JAIRO MUKUYOYA CHENYI

Vinjiho jaYehova veji kupwanga nakukunguluka chachinene katatu mumwaka nakuvanangula vihande vyamuMbimbiliya. Jairo evwilenga kuwaha lwola lwosena kwivwilila kuchihande chalumbapachiso. Likumbi limwe omu apwile namyaka 16, tata amuhulishile ngwenyi, “Jairo, uno uli nakusaka kukumbapachisa tahi?” Hahaze vene, ashishikile kulivoko lyatata lyachilyo, kahechi chasolwele nge ali nakusaka kumumbapachisa. Kaha tata amuhulishile cheka ngwenyi, “Kutala unalombo kuli Kalunga nakumufwelelesa ngwove naumuzachilanga haya myaka yosena nyi?” Hahaze vene, Jairo ashishikile cheka kulivoko lyatata lyachilyo. Echi chasolwele hatoma nge nalihane lyehi kuli Yehova.

Hakushimutwila nenyi mijimbu yamuMbimbiliya mapapa kakavulu, chasolokele cheka hatoma nge Jairo evwishishile lumbapachiso lwavaka-Kulishitu. Shikaho kuheta mu 2004, akumbulwile chihula chachilemu mukuyoya chenyi chakwamba ngwavo, “Uno unalihane ove ivene kuli Yehova mangana ulingenga mwaya muchima wenyi nyi?” Jairo akumbulwile echi chihula hakutala mwilu. Eyi yikiko jila akumbulwililemo ngwenyi eyo. Shikaho vamumbapachishile nakupwa Chinjiho chaYehova omu apwile namyaka yakusemuka 17.

KUSHISHIKA MESO HAVYUMA VYAKALUNGA

Mu 2011, Jairo awanyine jila yikwavo yakulivwasanyinamo navatu. Jila kana yapwile yakuzachisa kopyuta yize yeji kusokolokanga kuzachisa meso. Jairo eji kusokololanga vyuma vili hakopyuta kweseka nomu keji kutambukanga katutu kaliso lyenyi. Kukemwina  chipwe kushishika chikuma hachuma chili hakopyuta cheji kupwanga nge muze veji kunyachikanga hakopyuta nakusokolola vyuma viliho. Hakopyuta yenyi vamuhakilaho mivwimbimbi yakumukafwa kushimutwila navatu. Nge mwatala hamuvwimbimbi umwe nakukemwina, uze muvwimbimbi weji kusokolokanga, kaha hinakwivwakana lizu.

Omu Jairo azovolokele nakupwa nachinyingi chachivulu chamuMbimbiliya, afwililile kunangula vakwavo Mbimbiliya. Omu tweji kupwanga nachilongesa chaMbimbiliya chatanga, eji kutalanga kuli ami nakukopyuta yenyi shimbu yosena. Eyi yapwa jila yakungwanukishilamo nge ngwatela kumusonekela vyuma mwakakumbulula kukukunguluka.

Kaha nge tuli kukukunguluka, eji kusokololanga vyuma vamusonekelanga hakopyuta yenyi, kaha hinakwivwakana lizu. Lwola lwosena eji kumwesamwesa nge nakumbulula nakukolezeza vandumbwenyi muchikungulwilo. Alex, sepa lyaJairo ambile ngwenyi, “Ngweji kwivwanga kuwaha nge nangwivwa Jairo mwakumbulula hakukunguluka.”

Jairo eji kukumbululanga hakukunguluka nakwambulila vakwavo vyuma afwelela kuzachisa kopyuta yize yeji kusokolokanga kuzachisa meso nakulingisa nawa lizu lyenyi livwakane.

Jairo eji kuzachisanga nawa meso hakulweza vatu vyuma afwelela. Eji kulinganga ngocho hakusokolola mivwimbimbi hakopyuta yize yeji kusololanga vatu vamiyachi yakulisezaseza natunyama vali hamwe mukuunda. Hakusokolola mivwimbimbi kana, kweji kwivwakananga lizu lyakwamba ngwalyo, “Mbimbiliya yatufwelelesa nge mavu nawakapwa palachise muze kamweshi kukapwa kukola nakufwako, Kusoloka 21:4.” Nge vaze mwalweza vanevu kuwaha, eji kunyachikanga cheka hakopyuta yenyi kuzachisa meso, kaha kweji kwivwakananga jino lizu lyakwamba ngwavo, “Kutala nausaka ulinangule Mbimbiliya nayami tahi?” Twalikomokelele hakuwana nge kaka etavilile kumunangula Mbimbiliya. Tweji kwivwanga kuwaha hakumona Jairo vali nakumukafwa kuli mukwavo Chinjiho anangule kaka Mbimbiliya. Ocho kuwaha kana twevwile hakumona kaka navamumbapachisa muAugust 2014 hakukunguluka changalila muMadrid!

Navalongeshi hashikola atangila Jairo veji kumonanga muchima atwama nawo wakulihana kuli Kalunga. Rosario, ndotolo uze eji kumukanga ambile ngwenyi: “Nge nangukasaka kupwa muliuka limwe lyakwitava, kaha nangukasakula kupwa nguChinjiho chaYehova. Ngunamono omu lufwelelo lwaJairo lunamulingisa apwenga wakuwahilila mukuyoya numba tuhu eji kumonanga ukalu.”

Jairo eji kuwahililanga nge nangumutangila lushiko lwamuMbimbiliya lwakwamba ngwavo: “Haze vene numba muka-kumbilikita akatumbwojoke nge kapaji, kaha malimi atumama hinawakatwa jingunda.” (Isaya 35:6) Numba tuhu lwola lumwe eji kuhombanga, oloze apwa wakusuuluka mwomwo yakuzachila Kalunga nakupwa navandumbwenyi vaka-Kulishitu. Kuwahilila chenyi nalufwelelo lwenyi lwakukola vyasolola nge kuzachila Yehova cheji kukafwanga mutu apwenga wakuwahilila numba tuhu ali nakumona ukalu.

^ par. 5 Musongo kanou weji kwenyeka wongo nakulingisa mutu atwame muluuta. Unahase nawa kulingisa mutu aputuke kutunya, nakuhona kulya chipwe kuhanjika kanawa. Musongo waSpastic quadriplegia wapwa waupi chikuma, kaha unahase kulingisa mavoko namahinji amutu alikonyachile. Weji kulingisanga nashingo yilehuke.