NDUMBWETU ERNST * uze ali namyaka yakusemuka yamuji 70 ambile ngwenyi: “Misongo yami yapwile nakuvulilako lika.” Kutala chuma kana chinapu chaungeji kuli enu tahi? Nge muli nakushinakajiwa, kaha nawa ngolo jili nakukuma nakuhona jino kupwa vakulikangula, kaha muli nakumona vyuma vahanjika mumukanda waMuka-kwambulula kapetulu 12. Muvesi 1, makumbi aushinakaji vawavuluka ngwawo “makumbi aluyando.” Chipwe ngocho, kamweshi kuyandanga likako, oloze munahase kupwa vakusuuluka mukuyoya chenu nakuzachila Yehova namuchima wakuwahilila.

PWENUNGA NALUFWELELO LWAKUKOLA

Enu vandumbwetu vatushinakaji, kamweshi nakuhita muukalu uka wenuko. Navangamba jaYehova vakushikulu vatushinakaji vamwenenga ukalu woumwe. Chakutalilaho, Isaka, naYakova, naAhiya kavapwile nakumona kanawako mwomwo yaushinakaji. (Kupu. 27:1; 48:10; Vamya. 1, 14:4) Sala nawa apwile ‘hanazeye lyehi.’ (Kupu. 18:11, 12) Mwangana Ndavichi nawa “kevwilenga yukuko.” (Vamya. 1, 1:1) Mbalajilai lunga waluheto kevwilenga kuyema chavyakulyako chipwe kwivwa kuwaha chamyasoko. (Samwe. 2, 19:32-35) Kaha Apalahama naNowemi vapwile naushona wakufwisa vaka-mahyavo.—Kupu. 23:1, 2; Lute 1:3, 12.

Vyuma muka vyakafwile mutu himutu apwenga wakushishika kumeso aYehova nakupwa lika wakuwahilila? Omu Apalahama apwile kashinakaji, afwelelele mulushiko lwaKalunga, ngocho “akwachile ngolo halufwelelo lwenyi.” (Loma 4:19, 20) Nayetu nawa twatela kupwa nalufwelelo lwakukola. Lufwelelo kana kalwapendamina hamyaka yakusemuka ali nayo mutu, chipwe hauhashi, chipwe kwalumuka chavyuma vimwe muchiyoyelo chenyiko. Chakutalilaho, omu Yakova azeyele, nomu apwile kapuputa, nakupwa muluuta, apwile lika nalufwelelo lwakukola mujishiko jaKalunga. (Kupu. 48:1-4, 10; Hepe. 11:21) Makumbi ano, ndumbwetu walijina lyaInes wamyaka yakusemuka 93 uze aviza musongo wakuchikima mwomwo yaushinakaji, ambile ngwenyi: “Yehova eji kungukafwanga chikuma hakumbi hakumbi. Ngweji kushinganyekanga kaha vyaPalachise hakumbi hakumbi. Chuma kana cheji kunguhananga lutalililo.” Ou himuchima wamwaza twatela kupwa nawo.

Kulombanga, nakulinangulanga Mazu aKalunga, nakupwanga kukukunguluka chavaka-Kulishitu cheji kuzamisanga lufwelelo lwetu. Kapolofweto wakashinakaji Ndanyele alombelenga mapapa katatu hakumbi hakumbi nakulinangula Mazu aKalunga. (Ndanye. 6:10; 9:2) Ana uze apwile tuliwe wakashinakaji “ejilenga shimbu yosena kutembele.” (Luka 2:36, 37) Nge namupwanga kukukunguluka lwola lwosena nakwazanangamo chikuma, kaha namulikolezeza enu vavene nakukolezezanga nawa vosena vaze vanakunguluka. Yehova eji kwivwanga kuwaha nge namulomba kuli ikiye, numba tuhu kamweshi kuhasa kumuzachila milimo yayivulu yize mwazachilenga kunyimako.—Vishi. 15:8.

Likolezezenunga navakwenu

Enu vandumbwetu vavavulu vakushishika, mwafwila kumona nakutanga nakusakanga kupwa kukukunguluka lwola lwosena, oloze mweji kuchiwananga kupwa chachikalu kulinga ngocho. Kaha vyuma muka mwatela kulinga? Esekenu kulinga vyuma vize namuhasa kweseka noho hakumina ngolo jenu. Vandumbwetu vavavulu vaze kaveshi kuhasa kuya kukukungulukako veji kwivwililanga kuvihande hashinga. Chamokomoko naukalu wakuhona kumona kanawa mwomwo yaushinakaji, ndumbwetu Inge wamyaka yakusemuka 79 veji kumupulitilanga mapapilo aze eji kupwanga navasona vavanene kuli ndumbwetu muchikungulwilo.

Enu munahase kupwa nalwola luze navasaka kupwa nalwo vakwenu. Munahase kuzachisa lwola kana hakwivwilila kuMbimbiliya, nakumikanda, nakuvihande, nakuvimweso vize vakopa. Munahase nawa kutumina shinga ndumbwenu mangana mushimutwile vyuma vyakushipilitu vize ‘navimikolezeza’ muvosena.—Loma 1:11, 12.

ZATENUNGA MILIMO YAKALUNGA NATWIMA

Ambululenunga mazu

Christa wamyaka yakusemuka 80 ambile ngwenyi: “Cheji kukolanga chikuma kumuchima nge kaweshi kuhasa kuzata nangolo nge muze walingilenga hakavangako.” Uno tushinakaji vanahase kupwa ngachilihi vakuwahilila mumilimo yavo? Ndumbwetu Peter wamyaka  yakusemuka 75 ambile ngwenyi: “Kupwa namuchima wamwaza chikiko cheji kunehanga kuwahilila, keshi kushinganyekanga havyuma vize kamweshi kuhasa kulinga oholyapwako.”

Kutala munahase kuwana jijila jize munahase kwambulwilamo tahi? Ndumbwetu Heidi keshi kuhasa kuya nakwambulwila kuzuvo hizuvo ngana muze alingilengako. Omu apwile namyaka yakuhambakana 80, alinangwile kuzachisa kopyuta mangana asonekenga mikanda. Vaka-kwambulula vamwe vatushinakaji veji kuputukanga kushimutwila navatu vihande vyamuMbimbiliya kuvihela kuze kweji kwimananga jiminyau nakuvihela vyeka vyasanga. Nge mwatwama hachihela chakulamina tushinakaji, munahase kwambulwila kuli vaze veji kumihananga vitumbo nakuli vatu mwatwama navo.

Pwenunga namuchima wakuhana

Mwangana Ndavichi atwalileho kukundwiza kulemesa chamuchano nahalwola apwile kashinakaji. Ahanyine jimbongo nakulongesa kanawa vyuma mangana vatunge tembele. (Miji. 1, 28:11–29:5) Nayenu nawa munahase kufwila kutachikiza vyuma vili nakulingiwa mumulimo waWangana mukaye kosena. Munahase nawa kukundwiza vapayiniya chipwe vaka-kwambulula veka vatwima muchikungulwilo chenu hakuhanjika mazu akuvakolezeza, chipwe kuvahanako tuvyuma tumwe, chipwe kuvasanyika mulyenga navo vyakulya. Mukulomba chenu munahase kuvulukangamo navakweze, najitanga, navaze vali mumulimo washimbu yosena, navaze vali nakuviza, navaze vali namilimo yayivulu muchikungulwilo.

Enu vandumbwetu vatushinakaji, mwapwa muvavalemu chikuma hohamwe namilimo yenu. Setu wamwilu keshi kukamimbilako. (Samu 71:9) Yehova amizanga chikuma nakumizakama. Kaha nawa kalinwomu tuvosena tushinakajiwe chakuzeneka kumona ukalu chipwe vihuli. Oloze natukapwanga vakulikangula nakupwa nangolo chikuma jakutwalaho lika kuzachila Kalunga ketu wazangi Yehova.

^ par. 2 Majina amwe vanawalumuna.