MUMWAKA wa 1870, kalizavu kavatu vamwe muPittsburgh (Allegheny), muPennsylvania, U.S.A., kaputukile kuhehwojola muVisoneka. Ava vatu vavatwaminyinyine kuli Charles Taze Russell. Valinangwile chihande chandando yakusokola yaKulishitu, kaha vawanyine nge chihande kana chapwile chachilemu chikuma havyuma vize ajina Yehova. Vawahililile chikuma hakulinangula nge ndando yakusokola yikiko yalingisa vatu vakavalwile, numba vene vaze kanda vachivwengaho lyehi vyaYesu. Ngocho vashinganyekele kwanukanga kufwa chaYesu mwaka himwaka mangana vasolole kusakwilila chavo.—Koli. 1, 11:23-26.

Ndumbwetu Russell aputukile kusoneka mangazini yaZion’s Watch Tower, yize yasolwelenga hatoma nge ndando yakusokola hijila yayinene yize Kalunga asolwelamo zangi yenyi. Ou Kaposhi Kakutalila avulukilenga lwola lwaKwanuka Kufwa chaKulishitu ngwenyi “ngonde yakulipwila chikuma,” kaha akolezezelenga vaka-kutanga vakeze kuchilika kanechi muPittsburgh chipwe kuchihela cheka kuze valikungulwililenga vatu. Ou kaposhi ambilenga ngwenyi: “Kuze vanalikungulwila vatu valufwelelo lwolumwe vavali chipwe vatatu, numba vene umwe, navalinunga hamwe mumuchima naMwata.”

Mwaka himwaka, mayongomena avatu vayilenga kuPittsburgh kuchilika chaKwanuka Kufwa chaMwata. Halipapilo lyakulanyinaho vatu hapwilenga mazu ano ngwavo: “Natumitambula nachisambo.” Pundu vene, Vaka-Kulinangula Mbimbiliya vatambwilenga vandumbwavo vakushipilitu nakuvahana vyakulya. Mu 1886, kwapwile “Kuliwana Chachinene” chize chambachile makumbi amavulu mungonde kaneyi yaKwanuka Kufwa chaMwata. Kaposhi Kakutalila ambile ngwenyi: “Twayenu mwomwo mwazanga chikuma Mwata, navandumbwenyi, namuchano wenyi.”

Chati yakusolola omu vahichishilenga vifwanyisa vyahachilika chaKwanuka Kufwa chaMwata muTavanaku yakuLondon

Hamyaka yayivulu, Vaka-Kulinangula Mbimbiliya muPittsburgh vawahishilenga kukunguluka changalila chavaze vafwelelele mundando yakusokola vaze vejilenga kuchilika chaKwanuka Kufwa chaMwata. Omu Vaka-Kulinangula Mbimbiliya vaputukile kuvulilako, nakuvula chavatu vaze vejilenga kuKwanuka Kufwa chaMwata nawa chatohwele mukaye kosena. Ndumbwetu Ray Bopp uze apwile muchikungulwilo chaChicago ambile ngwenyi muji 1910, kuhichisa vifwanyisa mulizavu lyavatu vakungulukile chambachilenga jiola jajivulu mwomwo kafwe vosena vapwile nakulya vifwanyisa.

Uno vifwanyisa muka vazachishilenga? Numba tuhu vatachikijile ngwavo Yesu azachishile vinyo haKulya chaMwata chaChingoloshi, oloze halwola luze Kaposhi Kakutalila ambile ngwenyi vandumbwetu vazachisenga mwemwe yamihako yamivinyo vanahele kalinwomu, chipwe kuzachisa musoji wakufuma kumihako yamivinyo yaumu yize vanateleka, mangana vahone kuhaka mucheseko “vaze kavajikizako.” Oloze vaze vakakachilile ngwavo Yesu “azachishile vinyo vivene vyakuhya kanawa” vavahanyinenga vinyo. Kutwala muze, Vaka-Kulinangula Mbimbiliya vatachikijile ngwavo vinyo vichila vyakuzeneka kusanga vikiko vatela kuzachisa mangana vimanyineko manyinga aYesu.

Eli lipapilo nasonekeso vavitwalile mukapete hikapete kakamenga muNicaragua mangana vasonekeho kuvula chavatu vapwile kuKwanuka Kufwa chaMwata

Kwanuka Kufwa chaYesu chakafwilenga vatu vawane lwola lwakulihulika nakushinganyeka. Oloze muvikungulwilo vimwe, vatu vapwile nakulishona, kaha omu vakumishilenga kulinga chilika, vosena valimwangilenga  chakuzeneka kushimutwila navakwavo. Oloze mukanda vavulukile ngwavo Jehovah uze walovokele mu 1934 wambile ngwawo, lwola lwachilika chaKwanuka Kufwa chaMwata keshi nge hilwola “lwakulishona” kufwa chaYesuko, oloze hilwola “lwakuwahilila” mwomwo Yesu hiMwangana uze aputukile kuyula mu 1914.

Vandumbwetu valikungulwilile mukamenga kuMordvinia, muRussia mangana valinge chilika chaKwanuka Kufwa chaMwata mu 1957

Mu 1935 kwapwile kwalumuka chimwe chize chakwachile nahachilika chaKwanuka Kufwa chaMwata, mwomwo mumwaka kana mukiko valumbunwine kanawa “liyongomena lyalinene” lize vavuluka hali Kusoloka 7:9. Shimbu kanda 1935, vangamba jaYehova vamwenenga eli liyongomena ngwavo lyemanyinako vaka-Kulishitu vawavisa vaze kavapwile natwimako. Oloze mumwaka kanou valumbunwine ngwavo eli liyongomena lyemanyinako vangamba jaKalunga vakushishika vaze vatalilila kukayoyela mupalachise hano hamavu. Omu ndumbwetu Russell Poggensee evwile vyumevi valumbunwine, atwamine hamavu nakulikekesa kanawa, kaha ambile ngwenyi: “Ami ngunamono ngwami Yehova kuhichila mushipilitu yenyi yajila kanguhana lutalililo lwakukayoyela mwiluko.” Ndumbwetu Poggensee navandumbwetu veka vakushishika valitwaminyinyine kulya vifwanyisa, oloze vatwalileho lika kupwanga kuchilika chaKwanuka Kufwa chaMwata.

‘Mungonde eyi yakulipwila’ mwapwilenga jikapeni jakulipwila jakwambulula jize jakafwile vosena vasolole kusakwilila chavo handando yakusokola. Mulimo Wetu waWangana wamu 1932 walwezele vaka-Kulishitu nge kavatelelele kaha kupwa “vaka-kujila hachilika chaKwanuka Kufwa chaMwata” nakulya vifwanyisa kahako, oloze vatelelele kupwa “vaka-kuzata natwima” nakwambulula mujimbu wamuchano. Mu 1934, ou Mulimo Wetu waWangana wavulukile ‘vyavapayiniya vakukafwa’ nakwihula ngwawo: “Kutala kunahase kupwa vandumbwetu 1,000 navalisonekesa mulwola lwaKwanuka Kufwa chaMwata nyi?” Ou Mulimo Wetu waWangana wahanjikile hali vandumbwetu vawavisa ngwawo: “Vawavisa navapwa vakuwahilila chikuma kachi nge navazana mumulimo wakuvilika Wangana.” Kutwala muze, omu mukiko chapwile nakuli vaze vapwile nalutalililo lwakukayoyela hano hamavu. *

Omu Harold King apwile mukamenga kauka, asonekele tushimutwiji namyaso yahanjikile hachilika chaKwanuka Kufwa chaMwata

Vatu jaYehova vosena vamona likumbi lyaKwanuka Kufwa chaMwata kupwa hilikumbi lyajila chikuma mumwaka. Veji kulinganga chilika kanechi numba vene vali muukalu. Mu 1930, ndumbwetu wapwevo Pearl English nasongo yenyi Ora, vatambukile jikilomita kafwe 80 hakuya kuchilika chaKwanuka Kufwa chaMwata. Omu ndumbwetu wakamishonali Harold King apwile mukamenga kauka muChina, asonekele tushimutwiji namyaso yahanjikile hachilika chaKwanuka Kufwa chaMwata, kaha azachishile vyuma vimwe vilava naloso kupwa vifwanyisa. Kuputuka vene kuEurope nakuAmerica nakuheta kuAfrica, vaka-Kulishitu vakuhamuka vanalinginga chilika chakwanuka kufwa chaYesu halwola lwajita nahalwola luze mulimo wavo vanaukanyisanga kufulumende. Kala kweshokwo tuli chipwe kala ukalu tuli nakuhitamo, tweji kulikungululanga hamwe nakwalisa Yehova Kalunga naYesu Kulishitu mungonde yakulipwila yaKwanuka Kufwa chaMwata.

^ par. 10 Mulimo Wetu waWangana vauvulukilenga ngwavo Bulletin, kaha kutwala muze ngwavo Informant.