Yelemiya atalishile mulihi hakuhanjika ngwenyi Lakele apwile nakulila vana venyi?

Hamukanda waYelemiya 31:15 tweji kutanganga ngwavo: “Yehova nambe ngwenyi, kuLama kunevwakana lizu, kuli kwimba lungungu, kulila chachisasu, Lakele mwalila vana venyi, nakane kulivendejeka hali vana venyi, mwomwo vauchi, shikaho.’”

Vana vaLakele vamalunga vavali kavafwile shimbu kanda nevo afwengako. Ngachize, mazu aYelemiya aze asonekele hamyaka 1, 000 hanyima yakufwa chaLakele anahase kusoloka kupwa akuhenga.

Mwana Lakele watwatwa apwile Yosefwe. (Kupu. 30:22-24) Kutwala muze, Lakele asemene mwana mukwavo uze alukile ngwenyi Mbenjamine. Oloze Lakele afwile omu apwile nakusema Mbenjamine. Ngachize, tulihulisenu ngwetu: Mwomwo ika mukanda waYelemiya 31:15 wahanjikila ngwawo Lakele alilile mwomwo vana venyi vamalunga “vauchi”?

Yosefwe apwile navana vamalunga vavali, Manase naEfwalime. (Kupu. 41:50-52; 48:13-20) Omu mwahichile myaka, muyachi waEfwalime ukiko wapwile najingolo chikuma muwangana wavaIsalele wakunote, kaha nawa wemanyinyineko miyachi 10 yawangana wakunote. Miyachi 10 yize yasemukile kuli mwanaLakele walunga Mbenjamine yapwile kuwangana wakusulo wavaYuta. Shikaho echi chasolola nge Lakele emanyinyineko mapwevo vosena vamuIsalele, vamuwangana wakunote namuwangana wakusulo.

Halwola vasonekele mukanda waYelemiya, wangana wavaIsalele wakunote wapwile hivanaufungulula lyehi kuli vaAsulya, kaha vatu vavatwalile muufunge. Oloze vaka-tanga yaEfwalime vamwe vachinyinyine kuYuta. Kaha mumwaka wa 607 B.C.E, vaka-Mbavilone vafungulwile miyachi yivali yawangana waYuta wakusulo. Vatu vavavulu vamuwangana kana vavatwalile kunganda yaLama yize yapwililile kunote yaYelusalema jikilomita 5. (Yele. 40:1) Veka pamo vavajihilile mungalila yaMbenjamine muze vafunjile Lakele. (Samwe. 1, 10:2) Shikaho, Lakele alilile pamo mwomwo yaushona evwile hakufwa chavaMbenjamine chipwe vaze vajihililile kuLama. Kaha nawa tunahase kwamba ngwetu mazu aYelemiya atalisa kuli mapwevo vamuIsalele vosena vaze vapwile nakulila kufwa chipwe kutwala vatu jaKalunga muufunge.

Twatela kutachikiza ngwetu mazu aYelemiya akutalisa kukulila chaLakele hali vana venyi vamalunga apolofwetele vyuma vize vyasolokele omu mwahichile myaka likulukaji omu Yesu apwile kemba. Mwangana Helote ahanyine lushimbi ngwenyi vana vamalunga vosena vaze vapwile namyaka yakusemuka yivali vamuMbetelema kusulo yaYelusalema vatela kuvajiha. Ngocho, manevo javaze vana valilile chikuma mwomwo vana vavo vavajihile, chipwe ngwetu vapwile “vauchi.” Kulila kana pamo chevwakanyine nakuLama, kunote yaYelusalema.—Mateu 2:16-18.

Ngachize, mulwola lwaYelemiya namulwola lwaYesu, kulila chaLakele hali vana venyi chalumbunwine kulishona chamapwevo vavaYuleya hali vana vavo. Oloze vaze vafwile nakuya “mulifuchi lyavaka-kole,” vanahase kukasanguka kuvafu omu nakukapwa kusanguka.—Yele. 31:16; Koli. 1, 15:26.