“Pandamenu kuli Kalunga, kaha mwapandama kuli enu.”—YAKO. 4:8.

1. Vatu vasaka vyuma muka, kaha iya nahase kuvalingila vyuma kana?

VATU vatwama namuchima wakupandama kuli vakwavo. Vatu veji kupandama kuli vakwavo nge “navalizanga navakwavo nakulitachikiza kanawa.” Tweji kwivwanga kuwaha nge vausoko namasepa navatuzanga, nakutuvumbika, nakutwivwishisa. Oloze mutu uze twatela kuzanga chikuma shina tengi yetu Yehova.—Kwambu. 12:1.

2. Yehova atufwelelesa vyuma muka, oloze vatu vavavulu vashinganyeka vyuma muka?

2 Yehova atukolezeza ‘tupandame’ kuli ikiye, kaha nawa atufwelelesa ngwenyi nge natupandama kuli ikiye, “kaha mwapandama kuli” etu. (Yako. 4:8) Mazu kana atukolezeza chikuma. Oloze vatu vavavulu vashinganyeka ngwavo Kalunga keshi kuhasa kupanda kuli etuko; mwomwo ngwavo katwatamo kupandama kuli ikiye, kaha nawa atwama kwakusuku. Kutala tunahase kupandama kuli Yehova tahi?

3. Muchano muka twatela kutachikiza kutalisa kuli Yehova?

3 Chapwa chachashi kupandama kuli Yehova “mwomwo ikiye kapwa kwakusuku nayetu tuvosena mutu himutuko.” (Tangenu  Vilinga 17:26, 27; Samu 145:18.) Kalunga ajina ngwenyi navatu vakuhona kukupuka mwosena vanahase kupandama kuli ikiye, kaha nawa asaka tupwenga tumasepa jenyi. (Isa. 41:8; 55:6) Muka-kwimba jisamu asonekele kutalisa kuli Yehova ngwenyi: “Ove weji kwivwililanga kulomba, vakwechi mijimba vosena navakeza kuli ove. Natokwou nausakula nakupandamisa kuli ove.” (Samu 65:2, 4) Tutalenu omu Mwangana Asa wamulifuchi lyaYuta apandamine kuli Yehova, nomu Yehova apandamine kuli ikiye.

VYUMA MUKA NATULINANGULA KULI MWANGANA ASA

4. Mwangana Asa ahanyine chakutalilaho muka kuli vatu vamuYuta?

4 Mwangana Asa akundwijile kulemesa chamuchano hakufumisa vaka-ujila navaka-kulemesa makombelo vaze vapwile mutembele vaze valisalile mulifuchi. (Vamya. 1, 15:9-13) Asa akolezezele vatu “vamusakasakenga Yehova, Ou Kalunga kavakakuluka javo, valingenga mwaya jishimbi nomu vanavalweze.” Yehova akiswile Asa mangana ayule mukuunda hamyaka 10. Asa atachikijile ngwenyi kuunda kana chafumine kuli Yehova, ngocho alwezele vatu ngwenyi: “Lifuchi lichili kumeso etu, mwomwo tunamusakesake Kalunga ketu Yehova, shikaho. Tunamusakesake kaha natuhane lyehi kunoka kwosena jingulwishi ndo.” (Miji. 2, 14:1-7) Tutalenu vyuma vyakavangijileho.

5. Vyuma muka vyasolwele nge Asa apendaminyine hali Kalunga, kaha vyuma muka vyafuminemo?

5 Achishinganyekenu nge yenu mwapwanga Asa. Zela kaEchopa ejile namaswalale 1,000,000 namatemba ajita 300 mangana valukuke Yuta. (Miji. 2, 14:8-10) Munahase kulinga ngachilihi hakumona lizavu lyalinene lyamaswalale vali nakwiza nakulukuka nganda yenu? Maswalale jenu vavandende vakuheta kaha ku 580,000. Kutala namuhulisa Kalunga ovyo netavishila vamilukuke tahi, nyi namusaka kuhonesa ukalu kana kupendamina hachinyingi chenu? Muchima asolwele Asa wasolwele nge apendaminyine hali Yehova nakufwelela ikiye. Ngocho alombele kuli Yehova ngwenyi: “Ove Kalunga ketu Yehova, tukafweko, mwomwo tunakundamina kuli Ove, kaha tuneza kuliyongomeneli mulijina lyove. Ove Yehova, Ove yove Kalunga ketu, vatu kanda vapwanga nangolo kuli Oveko.” Uno Kalunga akumbulwile ngachilihi kulomba chaAsa? “Yehova avazakwile vaEchopa.” Maswalale javaEchopa vosena vafwile kujita.—Miji. 2, 14:11-13.

6. Tunahase kulondezeza ngachilihi chakutalilaho chaAsa?

6 Vyuma muka vyakafwile Asa afwelele ngwenyi Kalunga mwamutwaminyina nakumukinga? Mbimbiliya yahanjika ngwayo: “Asa alingilenga muze mwasungamine kumeso aYehova” kaha nawa “muchima waAsa wapwilenga wakukupuka mwosena naYehova.” (Vamya. 1, 15:11, 14) Nayetu twatela kuzachila Kalunga namuchima wetu wosena. Chapwa chachilemu kuzachila Kalunga mwomwo nachitukafwa tupwenga nausoko wakukola naikiye oholyapwa nakulutwe. Tweji kwivwanga kuwaha chikuma hakuwana nge Yehova atupandamisa kuli ikiye nakutukafwa tuzamise lika usoko wetu naikiye. Tutalenu jijila jivali jize Kalunga atupandamisa kuli ikiye.

YEHOVA ATUPANDAMISA KULI IKIYE KUHICHILA MUNDANDO YAKUSOKOLA

7. Vyuma muka vize Yehova alinga mangana tupandame kuli ikiye? (b) Jila muka yayinene yize Kalunga apandama kuli etu?

7 Yehova azangile vatu hakututengela mavu mangana tutwamengaho. Eji kutusolwelanga nawa zangi hakutuhana vyuma vyakutukafwa mukuyoya chetu. (Vili. 17:28; Kuso. 4:11) Chikumanyi Yehova eji kutuzakamanga kushipilitu. (Luka 12:42) Atufwelelesa nawa ngwenyi mwakumbululanga kulomba chetu. (Yowa. 1, 5:14) Oloze jila yayinene yize  Kalunga eji kupandamanga kuli etu nayize tweji kupandamanga kuli ikiye shina kuhichila mundando yakusokola. (Tangenu WaYowano 1, 4:9, 10, 19.) Yehova atumine “mwanenyi umwe kaha wakulipwila” kwiza hano hamazu mangana atusokole kushili nakukufwa.—Yowa. 3:16.

8, 9. Mulimo muka atwama nawo Yesu muvyuma ajina Yehova?

8 Yehova akafwa navatu vaze vapwileko shimbu kanda Kulishitu ezenga hano hamavu mangana vanganyale kundando yakusokola. Halwola vene luze Yehova ahanjikile upolofweto kana, kuli yavene chafwanyine nge nafwete lyehi ndando yakusokola mwomwo kakweshi vyuma navimwe vinahase kuhonesa kujina chenyiko. (Kupu. 3:15) Omu mwahichile myaka, kaposetolo Paulu asakwililile Kalunga “mukuvakula nandando yakusokola yaKulishitu Yesu, chinapu chawana wakanyombo.” Ambile nawa ngwenyi: “Apwile nakuvatalilila chikoki nakuvakonekela jishili javo jize vavulumwine lyehi kushikulu.” (Loma 3:21-26) Yesu atwama namulimo waulemu hakutupandamisa kuli Kalunga.

9 Vatu vakulinyisa vanahase kutachikiza Yehova nakupandama kuli ikiye kuhichila muli Yesu. Uno Visoneka vyashindakanya ngachilihi muchano kanou? Paulu asonekele ngwenyi: “Kalunga asolola lyehi zangi yenyi kuli etu, mwomwo shimbu twachipwilenga tuvaka-shili, Kulishitu atufwilile.” (Loma 5:6-8) Yesu ahanyine ndando yakusokola, keshi nge mwomwo twapwile tuvavalemuko, oloze mwomwo atuzanga. Yesu ambile ngwenyi: “Kakweshi mutu mwahasa kwiza kuli amiko kuvanga vanamukoko kuli Tata uze angutumine. . . . Mutu naumwe wauchi mweza kuli Tata kuvanga ahichile muli ami.” (Yowa. 6:44; 14:6) Yehova eji kuzachisanga shipilitu yenyi yajila mangana tupandame kuli ikiye kuhichila muli Yesu nakutukafwa tutwaleho kupwa muzangi yenyi nakupwa nalutalililo lwakukayoya haya myaka yosena. (Tangenu WaYuta 20, 21.) Tutalenu jila yikwavo yize Yehova apandama kuli etu.

YEHOVA EJI KUPANDAMANGA KULI ETU KUHICHILA MUMAZU ENYI

10. Mbimbiliya yinahase kutukafwa ngachilihi tupandame kuli Kalunga?

10 Muchihande chino tunashimutwila visoneka 14 vyakulisezaseza vyamuMbimbiliya. Chakuhona Mbimbiliya, katweshi kuhasa kupandama kuli Tengi yetuko. Chakuhona Mbimbiliya katweshi kuhasa kulinangula vyandando yakusokola navyakupandama kuli Yehova kuhichila muli Yesuko. Yehova azachishile shipilitu yenyi mangana akafwe vatu vasoneke Mbimbiliya muze mwatwama vilinga vyenyi vyamwaza navyuma ajina. Chakutalilaho, hali Kulovoka 34:6, 7, Yehova alilumbunwine kuli Mose kupwa “Kalunga wakeke, Muka-kutetela, wakushipwokela kutenuka, walikoji namuchano vyavivulu, eji kulamanga likoji hamakombakaji avatu, eji kukonekelanga kuhenga nomu vanazomboka jishimbi, nashili.” Mutu muka mwakana kupandama kuli mutu wamuyachouko? Yehova atachikiza ngwenyi nge natulinangula chikuma Mbimbiliya, kaha natumumona kupwa mutu nahenyi nakupandama chikuma kuli ikiye.

11. Mwomwo ika twatela kufwila kulinangwila vilinga vyaYehova? (Talenu muvwimbimbi wakulivanga.)

11 Kumaputukilo amukanda waPandama kuli Yehova walumbununa ngwawo: “Kala weshowo usepa natulikwata namutu watela kuzama hachinyingi chakumwijiva kanawa mutu kana, nakuzanga chikuma vilinga vyenyi vyakulipwila. Shikaho vilinga vyaKalunga najijila jenyi, vize vavuluka muMbimbiliya, hivyuma vyavilemu chikuma twatela kulinangula.” Tweji kusakwilila chikuma hakutachikiza ngwetu Yehova atuhana Mazu enyi aze asoneka mujila yize kala mutu mwahasa kwivwishisa.

12. Mwomwo ika Yehova azachishile vatu vasoneke Mbimbiliya?

12 Yehova kachi azachishile vangelo vasoneke  Mbimbiliya. Vangelo vasaka vatu namilimo veji kuzatanga. (Petu. 1, 1:12) Vangelo kachi vasonekele Mbimbiliya mujila yakwoloka. Oloze kutala kachi vamwene vyuma kweseka namuze veji kuvimonanga vatu tahi? Kutala kachi vahashile kutachikiza vyuma twasaka nakuhehela chetu tahi? Nduma, Yehova atachikijile ngwenyi vangelo valihandununa navatu. Echi chikiko chalingishile Yehova azachise vatu vasoneke Mbimbiliya. Tunahase kwivwishisa omu vaka-kusoneka Mbimbiliya vevwilile nomu vapwile nakushinganyeka. Nge natutanga ukalu wavo, nawoma, natutenga vapwile natwo, kaha nachitulingisa tutachikize omu vapwile nakwivwa. Kahomu natutanga nawa lwola luze vapwilenga nakuwahilila nachitulingisa tuwahilile nakufukila. Ngana mwakapolofweto Elija navakwavo vosena vaze vasonekele Mbimbiliya, vevwilenga nganomu “tweji kwivwanga nayetu.”—Yako. 5:17.

Uno mujimbu waYona naPetulu watukafwa ngachilihi tupandame kuli Yehova? (Talenu palangalafu 13, 15)

13. Uno kulomba chaYona chinamilingisa mwivwenga ngachilihi kumuchima?

13 Chakutalilaho Yehova ahanyine Yona mulimo waulemu, oloze Yona achinyine. Kachi nge kangelo ikiye asoneke mujimbu kanou, kachi kahashile kulumbununa omu Yona evwileko. Chapwile chakutamo Yehova kulweza Yona asoneke mujimbu wenyi, kuhakilako nakulomba chenyi omu apwile kwishi yameya. Alombele ngwenyi: “Mwono wami omu wazeyele muli ami ngwamwanukile Yehova.”—Yona 1:3, 10; 2:1-9.

14. Mwomwo ika twatela kwivwishisa vyuma asonekele Isaya hali livene?

14 Achitalenu nawa omu Yehova alwezele Isaya asoneke mujimbu wenyi livene. Omu ou kapolofweto amwene chakumwenesa chaupahu waKalunga, chamulingishile ahanjike hajishili jenyi ngwenyi: “Mama lelo hali ami! Ngunafu vene! Mwomwo ngumutu ngukwechi mivumbo yayipi, kaha ngwatwama muli vatu vakwechi mivumbo yayipi, mwomwo meso ami anamumono Mwangana, Yehova  wamayongomena.” (Isa. 6:5) Nge apwile kangelo kachi kahanjikile mazu kanako, oloze Isaya awahanjikile. Hakuwana nge katwakupuka mwosenako ngana mwaIsaya, twatela kumwivwishisa omu evwile.

15, 16. (a) Mwomwo ika twatela kwivwishisa omu veji kwivwanga vakwetu vatu? Hanjikenu vyakutalilaho. (b) Vyuma muka navitukafwa tupandame kuli Yehova?

15 Vangelo kachi kavalimwene kupwa ‘vakuhona kutamo’ ngana muze alimwene Yakova chipwe kulimona kupwa ‘vaka-shili’ ngana muze alimwene Petuluko. (Kupu. 32:10; Luka 5:8) Vangelo kachi kavevwile “woma” ngana muze vevwile tumbaji twaYesuko. Vangelo kachi kavasakiwile kupwa natwima hakwambulula mujimbu wamwaza hakumona luyanjisa ngana muze alingile Paulu navakwavoko. (Yowa. 6:19; Teso. 1, 2:2) Vangelo vapwa vakukupuka mwosena, kaha nawa vatwama nangolo kuhambakana vatu. Echi chikiko chalingishile Yehova azachise vatu vakuhona kukupuka mwosena mangana twivwishise omu vapwilenga nakwivwa vakwetu vatu. Omu natutanga vyuma vize vasonekele muMbimbiliya, nachitulingisa ‘tuwahilile navaze veji kuwahililanga; nakulila navaze veji kulilanga.’—Loma 12:15.

16 Nge natushinganyekanga omu Yehova azakamine vangamba jenyi kunyima, kaha natutachikiza vyuma vyavivulu kupandama kuli Kalunga. Natutachikiza omu apandamine kuli vangamba jenyi mujila yazangi nakuvatalilila chikoki. Nge natutachikiza chikuma Yehova nakumuzanga chikuma, kaha natupandama kuli ikiye.—Tangenu Samu 25:14.

TUNGENU USOKO WAKUKOLA NAKALUNGA

17. (a) Vyuma muka vize Azaliya ahuhumwine Asa?(b) Uno Asa ahonene ngachilihi kukavangiza mazu amuhuhumwine Azaliya, kaha vyuma muka vyafuminemo?

17 Omu Mwangana Asa afungulwile maswalale vaEchopa, kapolofweto kaYehova Azaliya ahuhumwine Asa ngwenyi: “Yehova ali nayenu shimbu muli nenyi enu. Kachi nge namumusakasaka, kaha namumuwana, oloze nge namukamuseza, kaha mwakamisezenu.” (Miji. 2, 15:1, 2) Kutwala muze Asa ahonene kukavangiza mazu vamukafwile. Omu wangana wakunote wavaIsalele wafumbukilile Yuta, Asa ayile kuli vaSulya mangana vamukafwe. Muchishishisa chakupendamina hali Yehova amukafwe, oloze ikiye apendaminyine hali ava vaSulya vakuhona kwitava. Kaha Yehova alwezele Asa ngwenyi: “Hoho vene unahulamina, mwomwo kufumisoholili naumonanga jijita.” Omu mukiko chapwile. (Miji. 2, 16:1-9) Vyuma muka natulinangula kumujimbu kanou?

18, 19. (a) Vyuma muka twatela kulinga nge katwapandamine chikuma kuli Kalungako? (b) Tunahase kupandama ngachilihi kuli Yehova?

18 Katwatela kusosoloka kuli Yehovako. Nge tuli nakuhona kupandama kuli Yehova ngana muze twapandamine kuli ikiye kulwola lwakunyima, kaha twatela kulinga ngana muze wahanjika mukanda waHozeya 12:6 ngwawo: “Alumukilove kuli Kalunga kove. Lamanga likoji nachiyulo, umuvandaminenga Kalunga kove makumbi osena.” Ngachize, tupandamenu chikuma kuli Yehova hakushinganyeka handando yakusokola nakutanganga Mbimbiliya naunyongochima.—Tangenu Lushimbi lwamuchivali 13:4.

19 Muka-kwimba jisamu asonekele ngwenyi: “Chinawahe kuli ami kupandama kuli Kalunga.” (Samu 73:28) Tuvosena tutwalenuho lika kulinangulanga vyuma vyavihya vyaYehova nakumuzanga chikuma mwomwo yavyuma vyavivulu vize ali nakutulingila. Nge natupandama chikuma kuli Yehova, kaha mwapandama chikuma kuli etu oholili nahaya myaka yosena.