Omu Mwahichile kaha chalumingo chimwe kufuma hakulimbata chetu, ami napuwami Evelyn twayile kulifuchi lyaCanada mumbaka yaHornepayne yize yatwamina kunote yaOntario. Ndumbwetu ejile nakutumbata nachimene kuchitulilo chakomboyu. Halikumbi kana kwapwile chishika chikuma. Omu twakumishile kulya chachimene ou ndumbwetu napuwenyi namwanenyi walunga twayile hamwe nakwambulula kuzuvo hizuvo. Nachingoloshi ngwahanyine chihande chami chatete mwakalama wakujinguluka mu 1957. Kukukunguluka kana twapwile kaha tuvatanu.

CHIPWE ngocho kangwapihililile ngwami vatu kavejile nakwivwilila kuchihande chamiko. Ngwapwilenga ngumutu wasonyi chikuma. Omu ngwapwile ngukanyike ngwaswaminenga nge hembo haneza vangeji numba tuhu vangeji kana ngwavatachikiza.

Munahase kulikomokela hakuwana nge milimo ngwazachilenga muliuka lyaYehova yasakiwilenga kuhanjika navatu vavavulu numba vapwa masepa chipwe vangeji. Uno ngwahashilenga ngachilihi kuzata milimo kana okunyi ngwapwile ngumutu wasonyi? Kangwahashilenga mungolo jamiko, oloze Yehova ikiye angukafwilenga numba nguzate milimo kana. Ateselemo lushiko lwenyi lwakwamba ngwenyi: “Nangukukakikanga, chamwenemwene nangukukafwanga, chamwenemwene nangukukwachisanga nalivoko lyakwoloka chami lyachilyo.” (Isa. 41:10) Jila yimwe yayinene yize Yehova nangukafwilamo shina kuhichila muli vakwetu vaka-Kulishitu. Manenu ngumilweze vandumbwetu vangukafwilenga kufuma vene kuwinyike wami.

AZACHISHILE MBIMBILIYA NAKAMUKANDA KELAVA

Nguli hembo lyetu kuOntario

Likimbi limwe lyaSondo nachimene mumwaka wa 1940, Elsie Huntingford atambukilile tanga yetu kufwamu yetu yize yapwilile kuOntario. Hakuwana nge natata apwilenga wasonyi, mama ikiye ayile kuchikolo  nakutala ngeji ejile. Ami natata twatwamine mukachi nakwivwilila vyuma vapwile nakushimutwila. Tata ashinganyekele ngwenyi ndumbu Huntingford anakulandulula vyuma vimwe, kaha alizakaminyine ngwenyi pamo mama mwalanda. Ngocho ayileko nakumulweza ngwenyi katweshi nakusaka vyuma kanako. Ndumbu Huntingford amuhulishile ngwenyi “kutala kamweshi nakusaka kulinangula Mbimbiliyako tahi?” Tata amukumbulwile ngwenyi “tuli nakusaka chikuma kulinangula Mbimbiliya.”

Ndumbu Huntingford atutambukilile halwola lwamwaza. Visemi jami vapwilenga vatu vatwima muUnited Church yamuCanada oloze halwola kana te vanafumumo. Mwomwo ika? Mwomwo mukulwane waChachi alamikile lipepa haze hapwile mukana wamajina avatu vaze vahanyine jimbongo nakuvanoneka kweseka najimbongo vahanyine. Kaha majina avisemi jami apwilenga kwishi, ngocho vatu vosena vejivile ngwavo vahanyinenga jimbongo jajindende. Numba tuhu visemi jami kavapwilenga najimbongoko, oloze mukulwane waChachi avakanjikijilenga vahane jimbongo jajivulu. Chuma chikwavo chavalingishile numba vaseze Chachi kana shina mazu ahanjikile mukulwane weka. Ambile ngwenyi nahase kumutambula ukulwane muchachi nge mwanangula vyuma vize afwelelele. Ngocho twafumine muze muchachi kana oloze te twasakile kulemesa Kalunga nakutachikiza vyavivulu.

Kaha nawa halwola kana Vinjiho vavakanyishile kwambulula mujimbu mulifuchi lyaCanada. Ngocho kavahashilenga kwambulula hatomako. Hakavanga omu ndumbu Huntingford ejilenga nakutunangula ambachilenga kaha kamukanda kakandende mulivoko naMbimbiliya. Kutwala muze omu amwene ngwenyi katweshi kuhasa kumwambulula kuli vaka-fulumendeko, aputukile jino kutuhana mikanda yahanjika haMbimbiliya. Twaswekelenga mikanda kana nge twakumisa kulinangula. *

Visemi jami vetavilile muchano, kaha vavambapachishile mu 1948

Chamokomoko naluyanjisa, ou ndumbwetu Huntingford ambulwilenga mujimbu natwima. Twima yenyi yangukolezezele chikuma kaha ngwashinganyekele kuzachila Yehova. Visemi jami vavambapachishile mu 1948. Kaha mwaka wakavangijileho vangumbapachishile muma muze vanwinyinyinenga vimuna meya. Halwola kana ngwapwile namyaka yakusemuka 17. Kufuma vene haze ngwafwililile kuzata mulimo washimbu yosena.

 YEHOVA ANGUKAFWILE NGUPWENGA WAKUMIKA

Ngwevwile kuwaha omu vangusanyikile kuzachila haMbetele mu 1952

Ngwevwile woma kuputuka kuzata upayiniya hahaze vene mwomwo ngwashinganyekele ngwami ngwatelele kuvangila kutonda jimbongo jakukalikafwa najo muupayiniya. Oloze hakupwa ngukanyike, ngwalile jimbongo josena ngwawanyine. Oloze ndumbwetu Ted Sargent angukolezezele ngumike nakufwelela muli Yehova. (Miji. 1, 28:10) Mazu kana angukolezezele chikuma, kaha ngwaputukile kuzata upayiniya muNovember 1951. Halwola kana ngwapwile kaha najindola 40, nakinga yamwaka, nangonga yamikanda. Chipwe ngocho, Yehova anguzakamine muvyuma vyosena. Ngweji kusakwililanga ndumbu Ted hakungukolezeza nguzate upayiniya. Vyuma vyamwaza vyavivulu vyejile hakuzata mulimo kana.

Likumbi limwe nachingoloshi, haAugust 1952 ngwatambwile shinga yakufuma kuToronto, Canada. Vangusanyikile nguyenga nakuzachila haMbetele kuputuka mukakweji waSeptember. Numba tuhu ngwapwile chikuma nasonyi, oloze ngwawahililile nakuya mwomwo vapayiniya vamwe vangulwezele kuwaha chatwama hakuzachila haMbetele. Omu ngwahetele kuze ngwevwile kuwaha chikupu.

“LISOLOLE KULI VANDUMBWOVE NGWOVE WAVAZANGA”

Omu ngwahetele haMbetele, kangwashimbwileko, kaha vangutongwele kuzata milimo yamuka-kuwanyisa lizavu lyavakulwane muchikungulwilo chimwe chamuToronto. Ngwashishile ndumbu Bill Yacos uze apwile mukulwane kaha nawa ejivile kanawa milimo kana. Oloze ami ngwapwile kaha namyaka 23, kaha ngwevwile woma ngwami kangweshi kuhasa kuzata milimo kanako. Ndumbu Yacos alisuwile nakungulweza mwakulingila kaha Yehova angukafwile.

Ndumbu Yacos uze apwile wamwihi kaha nawa wakulishita, lunga wamiselo apwile wachisambo chikuma navakwavo vatu. Azangile vandumbwetu, kaha navakivo nawa vamuzangile. Lwola lwosena amenekelelenga vandumbwenyi numba vene nge kavapwile naukaluko. Bill Yacos angukolezezele nayami ngulingenga mwomumwe nakuzata hamwe navandumbwami vamalunga nava vamapwevo mumulimo wamuwande. Ambile ngwenyi: “Ken, lisolole kuli vandumbwove ngwove wavazanga. Nge mulinganga ngocho, kaha nauvulyamanga tutenga twavo.”

PUWAMI ASOLOLA ZANGI YAMWENEMWENE KULI YEHOVA NAKULI AMI

Kufuma vene muJanuary 1957, Yehova nangukafwenga mujila yakulipwila. Mukakweji kana mukiko ngwambachile Evelyn uze apwile muShikola yaNgileyate yakusokesa 14. Shimbu kanda tulimbate, awile nakuzachila mungalila muze vazachishilenga chiFrench muQuebec. Hamakumbi kana, ngalila yaQuebec yapwilenga mumavoko aChachi yaLoma Katolika. Ngachize, Evelyn apwilenga namulimo waukalu, oloze atwalilileho lika kuzata nakupendamina hali Yehova.

Ami napuwami Evelyn twalimbachile mu 1957

Evelyn nangukafwenga chikuma. (Efwe. 5:31) Lwola lumwe chapwilenga chachikalu kulinga ngocho. Chakutalilaho, omu mwahichile likumbi limwe kufuma hakulimbata chetu, ofesi yamutango yangulwezele nguyenga kuMbetele yakuCanada ngukapwe kukuliwana chapwileko chize chambachile chalumingo chamuundu. Echi kuliwana chaluwanganyishile ungeji wetu wakuya kuFlorida, U.S.A. Chipwe ngocho, ami naEvelyn twasakile kulinga kala vyeshovyo Yehova atulwezele kulinga. Muchalumingo kana  chize ikiye apwile nakuzata mulimo wakwambulula kwakamwihi namutango. Numba tuhu ngalila kana yalihandunwine nayakuQuebec, oloze azachile nangolo jenyi josena.

Kusongo yachalumingo chize, vangulwezele kuya nakuzachila kunote yaOntario mwakalama wakujinguluka. Ngwapwile wamuhya muulo, kaha nawa ngwapwile kaha namyaka yakusemuka 25 kaha nawa kangwejivile vyavivuluko. Oloze twapendaminyine hali Yehova, kaha twayile. Twanyinyine komboyu yatambukile ufuku wosena muCanada muze mwapwile chishika chikuma. Mukomboyu kana twapwilemo natulama vakujinguluka vakuhya vavavulu vaze vapwile nakukinduluka kuvihela vazachililenga. Vatukolezezele chikuma. Ndumbwetu umwe kasakile tutwame muchitwamo ufuku wosenako, ngocho atulwezele tusavale mukapete kenyi kapwile nakahela mukomboyu kaze afwetelele chimweza. Omu kwachele, twatambukilile lizavu muHornepayne lize ngwavulukanga kumaputukilo achihande chino. Lwola kana te tunatwame kaha makumbi 15 muulo.

Omu mwahichile myaka yayindende, kuyoya chetu chalumukile cheka. Kusongo yamwaka wa 1960 omu ngwapwile nakuzata mwakalama wangalila, vangusanyikile kuya kuShikola yaNgileyate yakusokesa 36 yize yaputukile muFebruary 1961 muBrooklyn, New York. Ngwawahililile chikuma hakungulweza nguyenga kushikola nakulinangula Mbimbiliya mutukweji likumi. Chipwe ngocho, ngwahombele mwomwo puwami kavamulwezele ayenga nayamiko. Oloze ngana mwavandumbwetu vamwe vamapwevo, Evelyn vamulwezele asoneke mukanda wakusolola nge netavila tuliseze hatukweji likumi. Numba tuhu alilile hakushinganyeka kumuseza hatukweji vosena vaze likumi, oloze awahililile ngwenyi nangukalinangula vyuma vyavilemu kushikola yaNgileyate.

Halwola ngwapwile kuBrooklyn, Evelyn apwile nakuzachila haMbetele yamuCanada. Apwile nakutokwa chakutwama muzuvo yimwe nandumbwetu wapwevo vawavisa Margaret Lovell. Chipwe ngocho ami napuwami twevwilenga uli hakuhona kutwama hamwe. Yehova atukafwile hakuzata milimo atuhanyine. Evelyn alisuwile mwomwo yaYehova, kaha echi changukwachile kumuchima.

Omu ngwapwile kaha natukweji vatatu mushikola yaNgileyate, ngwatambwile mukanda kufuma kuli Ndumbu Nathan Knorr uze apwile nakutwaminyina mulimo wakwambulula mukaye kosena. Angulwezele ngukinduluke kuCanada mangana ngukanangule muShikola yaMulimo waWangana. Angulwezele ngwenyi kaveshi kukangusanyika cheka kushikola yaNgileyateko nge ngunakumisa kunangula Shikola yaMulimo waWangana. Ndumbu Knorr angulwezele ngwenyi ngunahase kusakulaho ami livene ovyo ngunasake. Ambile ngwenyi ngunahase kutwalililaho lika naShikola yaNgileyate nakukangutuma mumulimo waumishonali nge ngunayikumisa. Angulwezele nguvangile kushimutwila napuwami shimbu kanda ngusakule vyakulinga.

Hakuwana nge Evelyn angulweza lyehi omu twatela kumona milimo yaKalunga, ngocho hahaze vene ngwalwezele Ndumbu Knorr ngwami, “Kala milimo navatulweza kuzata muliuka lyaYehova natuyizata.” Lwola lwosena twashinganyekele ngwetu  tunahase kuya kala kweshokwo liuka lyaYehova nalitutuma.

Ngocho kuheta muApril 1961, ngwafumine kuBrooklyn nakukinduluka kuCanada nakunangula muShikola yaMulimo waWangana. Kutwala muze vatulwezele kuzachila haMbetele. Ngwalikomokelele omu vangulwezele ngwavo nanguya kushikola yaNgileyate yakusokesa 40 yize yapwileko mu 1965. Evelyn vamulwezele nawa asoneke mukanda wakusolola nge netavila tuliseze nayami hatukweji nangupwa kushikola. Oloze omu mwahichile vyalumingo vyavindende, puwami atambwile mukanda wakumulweza nge nayikiye mwaya kushikola kana. Twawahililile chikuma.

Omu twahetele kuShikola yaNgileyate, ndumbwetu Knorr ambile ngwenyi vaka-shikola vaze navapwa mushikola navazachisa lilimi lyaFrench, ngana mwayetu, navakavatuma kulitungu lyaAfrica. Oloze hakukumisa shikola, vatutumine kuya nakuzachila kuCanada. Vangutongwele kupwa kalama wamutango uze vali nakuvuluka makumbi ano ngwavo muka-kuwanyisa Komiti yaMutango. Ngwalwezele Ndumbu Knorr ngwami “nguchili ngukanyike,” nguli kaha namyaka yakusemuka 34. Oloze angukolezezele. Kaha putu vene kumaputukilo, ngwavangililile kuhulisa vandumbwetu vakukola vaze vatachikijile vyavivulu haMbetele shimbu kanda ngusakule vyakulinga.

MBETELE HICHIHELA CHAKUNANGULA NAKULINANGULA

Kuzachila haMbetele chinangukafwe ngulinangule vyavivulu kuli vakwetu. Ngwavumbika chikuma vakwetu vamuKomiti yaMutango. Ngwalinangula nawa vyavivulu kufuma kuli vandumbwami vanyike navakulwane vaze ngunawane hano haMbetele navamuvikungulwilo vyakulisezaseza vize tunazachilanga.

Nguli nakutwaminyina chisoneka chalikumbi haMbetele yamuCanada nachimene

Kuzachila haMbetele nawa chinangukafwe ngunangule vakwetu nakuvakolezeza kulufwelelo. Kaposetolo Paulu alwezele Chimoteu ngwenyi: “Twalaho lika nakukavangiza vyuma vize walinangwile.” Ambile nawa ngwenyi: “Vyuma vize wevwile kuli ami vize vanakundwiza nakuli vinjiho vavavulu, valwezevyo vatu vakushishika vaze navakivo nawa navakatamo kunangula vakwavo.” (Chimo. 2, 2:2; 3:14) Lwola lumwe vakwetu vaka-Kulishitu veji kunguhulisanga vyuma vimwe vize ngunalinangula haMbetele hamyaka 57 ngunazachilaho. Ngweji kuvakumbululanga ngwami, “Kulisuula kuzata kala milimo yamuliuka lyaYehova nakupendamina hali Yehova.”

Nguchili nakwanuka likumbi ngwahetele haMbetele. Ngwapwile nasonyi kaha nawa ngukanyike. Hamyaka yoseneyi Yehova nangukafwenga. Kakavulu Yehova nazachisanga vandumbwami vangukafwe. Kaha eji kungufwelelesanga ngwenyi: “Kanda wivwa womako, Ami nangukukafwangako.”—Isa. 41:13.

^ par. 10 HaMay 22, 1945, fulumende yaCanada yetavishile Vinjiho jaYehova kwambulula.