“Vyuma vyosena namusaka ngwenu vatu vavilinge kuli enu, nayenu nawa vilingenu kuli vakivo.”—MATEU 7:12.

1. Mwomwo ika chapwila chachilemu kupwa navilinga vyamwaza mumulimo wamuwande? Hanenu chakutalilaho. (Talenu muvwimbimbi wakulivanga.)

VALUNGA napwevo vamuFiji, vapwile nakulanya vatu mangana vakaye kuKwanuka Kufwa chaKulishitu. Vula yaputukile kunoka omu vapwile nakushimutwila namwenya zuvo haweluka. Ndumbwetu walunga ahanyine muluchi uze pwevo kaha ikiye alifwikile muluchi napuwenyi. Ava vandumbwetu vawahililile hakumona uze pwevo neza kuchilika chaKwanuka Kufwa chaKulishitu. Ahanjikile ngwenyi kanukile mazu vamwambulilileko, oloze anukile likoji vamusolwelele. Mwomwo ika ahanjikilile ngocho? Mwomwo ava vandumbwetu vasolwele vilinga vyamwaza.

2. Lushimbu muka ahanyine Yesu, kaha twatela kulukavangiza ngachilihi?

2 Yesu alwezele vaka-kumukavangiza ngwenyi: “Vyuma vyosena namusaka ngwenu vatu vavilinge kuli enu, nayenu nawa vilingenu kuli vakivo.” (Mateu 7:12) Tunahase kukavangiza ngachilihi lushimbi kanelu? Hakulinga vyuma vino vivali. Chatete, twatela kulihulisa ngwetu, ‘Nge ngwapwanga yami kachi nangusaka  vakwetu vangulingile vyuma muka?’ Chamuchivali, twatela kufwila kusolwela vakwetu vilinga vyamwaza.—Koli. 1, 10:24.

3, 4. (a) Lumbununenu ovyo lushimbi ahanyine Yesu lwatalisa kuvatu vosena. (b) Vihula muka natushimutwila muchihande chino?

3 Kakavulu tweji kukavangizanga mazu ahanjikile Yesu omu tweji kupwanga navandumbwetu. Oloze Yesu kambile ngwenyi twatela kaha kusolola vilinga vyamwaza kuli vakwetu twafwelela navo kahako, oloze ahanjikile omu twatela kutwama navatu vosena kuhakilako navaka-kole jetu. (Tangenu Luka 6:27, 28, 31, 35 Luka 6:27, 28, 31, 35.) Ngocho, chapwa chachilemu kukavangiza lushimbi kanelu omu natwambulilanga vatu, mwomwo vatu vavavulu vanahase kwitavila mujimbu wamwaza nakukawana ‘kuyoya chahaya myaka yosena.’—Vili. 13:48.

4 Natushimutwila jino vihula viwana vize twatela kwanukanga nge tuli mumulimo wamuwande. Vatu muka nguli nakwambulila? Kuchihela muka nguli nakwambulila? Lwola muka lwamwaza ngwatela kwambulila vatu? Mujila muka ngwatela kuvambulila? Omu natukumbulula vihula kanevi, natumona omu vihula kana navitukafwa tutachikize vyuma vafwila vatu kuvalingila. Kahechi nachitukafwa tutachikize jila yamwaza yakuhanjikilamo navatu mumulimo wamuwande.—Koli. 1, 9:19-23.

VATU MUKA NGULI NAKWAMBULILA?

5. Vihula muka twatela kulihulisa etu vavene?

5 Tweji kwambulilanga kala mutu natuwana mumulimo wamuwande. Tuvosena tukwechi ukalu wakulisezaseza kaha nawa twafuma kuvisemwa vyakulisezaseza. (Miji. 2, 6:29) Nge muli nakwambulila mutu, lihulisenu ngwenu: ‘Nge ngwapwa yami kachi ngunasake vakwetu vangulingile vyuma muka? Kutala nanguwahilila nge mutu mwakukulula mwakuhenga shimbu kanda angutachikize tahi? Nyi ngunakusaka angutachikize omu ngwapwa tahi?’ Kulihulisa vihula kanevi nachitukafwa tusolwelenga kala mutu vilinga vyamwaza.

6, 7. Vyuma muka twatela kulinga nge mutu natwambulila mwasulakana?

6 Kakweshi mutu asaka kumuvuluka ngwavo “mutu wamupiko.” Chakutalilaho, etu vaka-Kulishitu tweji kusakanga kukavangiza lushimbi lwamuMbimbiliya lwakwamba ngwavo, mazu etu “apwenganga akukokweza shimbu yosena.” (Kolo. 4:6) Hakuwana nge katwakupuka mwosenako, tweji kuhanjikanga vyuma vimwe vize tweji kuliveyanga kulutwe. (Yako. 3:2) Nge tunahanjika mazu amapi kuli mukwetu, tweji kufwelelanga ngwetu mutu kana mwatachikiza ngwenyi omu keshi mukiko twapwa lwola lwosenako. Katweshi nakusaka atumone nge twatwama “namuchima waupiko.” Kwijiva vyuma kanevi nachitukafwa tutachikize ngwetu navatu vaze veji kutwambanga mwamupi veji kuliveyanga.

7 Nge mutu uze muli nakwambulila mwasulakana, kutala munahase kutachikiza vyuma vinamulingisa asulakane tahi? Kutala ali navyuma vyavivulu vyakulinga kumilimo chipwe kushikola tahi? Kutala ali nakuviza musongo waunene tahi? Vatu vavavulu vaze veji kupihililanga hakuvatambukila kuli Vinjiho jaYehova veji kwalumukanga nge navavambulila mujila yayivwovu nakuvavumbika.—Vishi. 15:1; Petu. 1, 3:15.

8. Mwomwo ika twatela kwambulila “vatu vakulisezaseza vosena”?

8 Tweji kwambulilanga vatu vakulisezaseza. Mumyaka yakalinwomu, muKaposhi Kakutalila munasolokanga mijimbu yakuhambakana ha 60 yize yinakupwanga muchihande chakwamba ngwavo, “Mbimbiliya Yeji Kwalumunanga Kuyoya chaVatu.” Vihande kanevi vinakuhanjikanga havatu vaze vapwilenga veji, vitakwa, mazavu akulikanga navasamalyamba. Veka vapwile vaka-mapolitiki, vatwamina vamukwitava chamakuli, kaha veka vahakilenga kaha milimo yavo kulutwe. Kaha veka vapwile vaka-ujila. Oloze vosena vetavilile mujimbu wamwaza nakwitavila vavanangule Mbimbiliya nakuseza vilinga vyavo vyavipi nakwiza mumuchano. Echi  chasolola nge katwatela kushinganyeka ngwetu vatu vamwe kaveshi kuketavila mujimbu wamwazako. (Tangenu Koli. 1, 6:9-11.) Ngocho, twatela kwanuka ngwetu “vatu vakulisezaseza vosena,” vanahase kwitavila mujimbu wamwaza.—Koli. 1, 9:22.

KUCHIHELA MUKA NGULI NAKWAMBULWILA?

9. Mwomwo ika twatela kuvumbikanga membo avakwetu?

9 Kakavulu tweji kwambulilanga vatu omu veji kupwanga hembo. (Mateu 10:11-13) Limbo lyapwa lyalilemu, ngocho tweji kwivwanga kuwaha nge vakwetu navavumbika limbo navyuma vyetu. Tweji kusakanga limbo kupwa hichihela chakutukinga namwakulamina vyuma vyetu. Nge tuli mumulimo wakuzuvo hizuvo, kaha twatela kuvumbikanga membo avakwetu.—Vili. 5:42.

10. Twatela kulihenda kuvyuma muka vize vinahase kulingisa vatu vatushinganyekele?

10 Kaye kano kanazale naulyanyi, ngocho venya zuvo veji kushinganyekelanga vangeji ngwavo pamo vihwanga. (Chimo. 2, 3:1-5) Katwatela kulinga vyuma vize navilingisa vatu vatushinganyekeleko. Chakutalilaho nge munangongomweza kuchikolo kaha naumwe nakumbulula wauchi, pamo namutonda kufwila kunonoka hanjanena chipwe kujinguluka kusenge mangana mutonde okwo ali mwenya zuvo. Kutala mungalila mwatwama chuma kana chinahase kwivwisa mwenya zuvo kupihya kumuchima tahi? Kutala vatu vaze alihata navo navashinganyeka ika? Chikupu vene twatela kwambulila vatu vosena. (Vili. 10:42) Twafwila kutandakanyisa mujimbu wamwaza mangana vatu vatachikize muchano. (Loma 1:14, 15) Oloze twatela kupwa vakuzangama nakuhona kulinga vyuma vize navilingisa vatu vatushinganyekele. Kaposetolo Paulu asonekele ngwenyi: “Etu katweshi nakulinga chuma numba chimwe chakuhukanyisako, mangana mulimo wetu vazeneke kuuwanyina katenga.” (Koli. 2, 6:3) Nge natuvumbikanga membo navyuma vyavatu vamungalila tweji kwambulilanga, kaha vilinga vyetu vinahase kulingisa vatu valinangule muchano.—Tangenu WaPetulu 1, 2:12.

Lwola lwosena tufwilenu kusolola kavumbi havyuma vyamwenya zuvo (Talenu palangalafu 10)

LWOLA MUKA LWAMWAZA NGWATELA KWAMBULILA VATU?

11. Mwomwo ika tweji kwivwilanga kuwaha nge vakwetu navavumbika lwola lwetu?

11 Hakupwa tuvaka-Kulishitu, twatwama navyavivulu vyakulinga. Ngocho hakusaka tutesemo milimo yetu, tweji kunonekanga kanawa vyakulinga. (Efwe. 5:16; Fwili. 1:10) Nge kuliko vyuma vimwe vize naviluwanganyisa vyuma vize tunanoneka kulinga, kaha tweji kwivwanga kupihya. Shikaho tweji kwivwanga kuwaha nge vakwetu navavumbika lwola lwetu nakwijiva ngwavo katweshi kupwa nalwola lwaluvulu lwakushikama navakivoko. Kushinganyeka hamazu aYesu akusolola vilinga vyamwaza nawatukafwa ngachilihi tusolole kavumbi kuli vaze tweji kwambulilanga?

12. Tunahase ngachilihi kutachikiza lwola lwamwaza lwakwambulila vatu vamungalila yetu?

12 Twatela kutachikiza lwola lwamwaza lwakwambulwila vatu. Uno mungalila tweji kwambulilanga, lwola muka vatu veji kupwanga hamembo avo? Lwola muka vanahase kwivwilila kanawa? Nachipwa chamwaza nge natwalumunako lwola lwakwambulula. Kuvihela vimwe, lwola lwamwaza lwakwambulwila kuzuvo hizuvo shina chingoloshi. Nge omu mukiko chapwa nakungalila yenu, kaha kutala munahase kuzachisako lwola lumwe mangana mwambululenga nachingoloshi mumulimo wakuzuvo hizuvo tahi? (Tangenu Wavaka-Kolinde 1, 10:24.) Chikupu vene Yehova nahase kutukisula hakulisuula chetu hakwazana mumulimo wakwambulula halwola lwamwaza kweseka nangalila yetu.

13. Tunahase kusolola ngachilihi ngwetu twavumbika mutu tuli nakwambulila?

13 Tunahase kusolola ngachilihi ngwetu twavumbika mutu tuli nakwambulila? Nge tunawane mutu ali nakusaka kwivwilila, twatela kumwambulila, oloze katwatela kushimbula  chikumako. Pamo mwenya zuvo ali navyeka vyakulinga vize amona kupwa vyavilemu. Nge mwamba ngwenyi ali namilimo, kaha pamo tunahase kumulweza ngwetu katweshi kushimbulako, ngocho twatela kulama lushiko lwetu. (Mateu 5:37) Hakukukulula kushimutwila chetu, twatela kuhulisa mwenya zuvo atulweze lwola lwamwaza lwakukakindulukilako mangana tukashimutwile cheka. Vaka-kwambulula vamwe veji kulwezanga mwenya zuvo ngwavo: “Nangukevwa kuwaha kumitambukila cheka. Kutala chinahase kupwa chamwaza nge nangumitumina shinga chipwe kumitumina mujimbu shimbu kanda ngukatuke tahi? Nge natuvumbika lwola lwavaze tuli nakwambulila mungalila yetu, kaha natukavangiza chakutalilaho chaPaulu uze ambile ngwenyi kasakile ‘alinganyalise lyaveneko, oloze ngwenyi anganyalise vavavulu, mangana vakahase kuvalwila.’—Koli. 1, 10:33.

MUJILA MUKA NGWATELA KUVAMBULILA?

14-16. (a) Mwomwo ika twatela kulweza mwenya zuvo vyuma tunakatukila? Hanenu chakutalilaho. (b) Jila muka yamwaza yize kalama umwe wakutambwojoka eji kuzachisanga hakuputuka kushimutwila?

14 Achishinganyekenu munatambula shinga, oloze kamwejivile mutu uze natumuko. Mutu kana kamwamutachikizako, kaha mwamihulisa mumulweze vyakulya vize mwazanga. Namulizakamina chikuma mwomwo mutu kana hingeji, kaha nawa kamwejivile ovyo namihulishilako. Hakusaka kumusolwela kavumbi, munahase kuhanjika nenyi, oloze kamweshi kushimbulako. Achitalenu nge mutu uze natumu nalijimbula ivene nakumilweza ngwenyi milimo yenyi yatala havyakulya vatela kulya vatu, kaha mwamilweza ngwenyi ali namijimbu yimwe yize yinahase kumikafwa. Chikupu vene munahase kumwivwilila. Mwomwo etu vatu twasaka  vatu vaze navatulweza washi vyuma vanakatukila mujila yamwaza. Jino tunahase ngachilihi kusolola kavumbi kuli vatu natuwana muwande?

15 Mujingalila jimwe, chapwa chamwaza kulijimbula etu vavene navyuma tunakatukila shimbu kanda tuputuke kushimutwila navo. Chikupu vene tukwechi mujimbu waulemu uze vatela kutachikiza vatu. Oloze achitalenu nge natuhona kulijimbula etu vavene nakuputuka kaha kushimutwila hakumuhulisa chihula ngwetu: “Nge mwapwile nangolo jakufumisa ukalu wamuno mukaye, kachi ukalu muka munahase kufumisako?” Tweji kuhulisanga chihula kana mangana tutachikize vyuma ali nakushinganyeka mutu mangana tumulweze omu Mbimbiliya yahanjika hachihula kana. Mwenya zuvo nahase kulizakamina nakushinganyeka ngwenyi, ‘Uno mutu muka vene ou, kaha mwomwo ika nanguhulishila chihula kana? Vyuma muka ali nakusaka kutachikiza?’ Ngachize, twatela kulingisa mwenya zuvo evwenga kuwaha kushimutwila nayetu. (Fwili. 2:3, 4) Uno tunahase kulinga ngachilihi ngocho?

16 Kalama umwe wakutambwojoka awanyine jila yimwe yakuputukilamo kuhanjika navatu. Hanyima yakulimeneka namwenya zuvo, eji kumbatanga talakiti yakwamba ngwavo Uno Unakusaka Kutachikiza Muchano Tahi? nakwamba ngwenyi: “Lelo tuli nakuhana kalipapilo kana aka kuli vakwetu vamungalila yetu. Kanakumbulula vihula 6 vize vatu vavavulu veji kulihulisanga. Wahenu kalipapilo kenu.” Ou ndumbwetu ambile ngwenyi vatu vavavulu veji kuundanga muchima nge natuvalweza vyuma tunakatukila. Cheji kupwanga jino chachashi kushimutwila navo. Kufumaho ou kalama wakutambwojoka eji kuhulisanga mwenya zuvo ngwenyi: “Kutala washinganyekaho lyehi havihula kanevi tahi? Nge mwenya zuvo nasakulaho chihula chimwe, kaha ou ndumbwetu eji kupandumunanga mutalakiti nakumulweza omu Mbimbiliya yakumbulula chihula kana. Nge kasakwileko, kaha ou ndumbwetu eji kusakulanga chihula chimwe nakutwalaho kushimutwila nenyi chakuzeneka kumushinyinyika. Kuli jijila jajivulu jakuputukilamo kushimutwila navatu. Kuvihela vimwe, chasakiwa kukavangiza visemwa vimwe hakumeneka vatu shimbu kanda tuvalweze ovyo tunakatukila. Ngachize, chapwa chachilemu kwalumunako jila yamwakuputukila kushimutwila mangana vatu vevwilile kumujimbu natuvambulila.

TWALENUHO LIKA KUSOLOLA VILINGA VYAMWAZA MUMULIMO WENU WAKWAMBULULA

17. Ngana muze vanahanjika muchihande chino, jijila muka jimwe jize tunahase kusolwelamo vilinga vyamwaza?

17 Jijila jimwe muka tweji kusololanga vilinga vyamwaza mumulimo wakwambulula? Tweji kusolwelanga kala mutu vilinga vyamwaza. Tweji kuvumbikanga membo avatu tweji kwambulilanga navikumba vyavo. Tweji kufwilanga kwambulula halwola luze vatu veji kupwanga hamembo nakupwa namuchima wakusaka kutwivwilila. Kaha nawa tweji kujimbulanga mujimbu wetu kweseka nachisemwa chamungalila yetu.

18. Nganyo muka yeji kwizanga hakusolwela vatu vamungalila yetu vilinga vyamwaza ngana muze natusaka yetu vatusolwelevyo?

18 Nge natusolola vilinga vyamwaza kuli vatu vamungalila yetu nakuvashinganyekelako, kaha natusolola nge tweji kukavangizanga jishimbi jamuMbimbiliya, nakuhana kavumbi kuli Setu wamwilu. (Mateu 5:16) Vatu vavavulu veji kwivwililanga kumujimbu wamwaza nge natuvavumbika. (Chimo. 1, 4:16) Numba nge vatu vaze tweji kwambulilanga navetavila mujimbu waWangana chipwe chiku, oloze natupwa vakusuuluka hakwijiva ngwetu tunazate mulimo wakwambulula nangolo jetu josena. (Chimo. 2, 4:5) Ngachize, tulondezezenu kaposetolo Paulu uze asonekele ngwenyi: “Ngweji kulinganga vyuma vyosena mwomwo yamujimbu wamwaza, mangana nguwazane kuvatu veka.” (Koli. 1, 9:23) Tuvosena tusololenunga vilinga vyamwaza mumulimo wetu wakwambulula.