“Enu vana vami vavandende, kanda tuzanganga chakuhanjika kahako, chipwe chalilimi kahako, oloze shina navilinga vyetu namumuchano.”—YOWA. 1, 3:18.

1, 2. (a) Ukalu muka veji kumonanga vatu mujitanga jimwe, kaha vihula muka veji kulihulisanga? (b) Uno visemi vanahase kukumisa ngachilihi ukalu wavo?

CHINAHASE kukola kumuchima hakuwana nge visemi jenu vaze vapwilenga nangolo nakulikilikichila vyavo oholyapwa jino vanazeye. Vamwe visemi javo vanahokoka mahinji, veka vali nakuhanjika vyakutangula chipwe kupwa navilinga vyaunyike, kaha veka vanavawane namisongo yayinene. Tushinakaji nawa vanahase kuchiwana kupwa chachikalu kwitavila ngwavo kaveshi jino nangolo jakulimanyinako. (Yopa 14:1) Chuma muka tunahase kulinga? Mujila muka tunahase kuvalaminamo?

2 Chihande chimwe chize chahanjika hakuzakama tushinakaji chavuluka ngwacho: “Numba tuhu chapwa chachikalu kushimutwila hachihande chaushinakaji, oloze jitanga jize jeji kushimutwilanga hachihande kana nakuwana mwakulingila, jeji kuchiwananga chachashi kukumisa ukalu uze unahase kwiza.” Kushimutwila kana cheji kunganyalisanga nge tunatachikiza ngwetu katweshi kuhasa kuhonesa ukalu uze weji kwizanga mwomwo yaushinakajiko. Chipwe ngocho tunahase kuwahisa vyuma hakulivanga kusakula vyakulinga. Tutalenu jino omu jitanga jinahase kulivwasana mangana vawane mwakukumishila ukalu kana.

 KULIWAHISHILA CHIMWEZA ‘VYAMAKUMBI AMAPI’

3. Vyuma muka vize tanga yatela kulinga nge visemi vatushinakaji vali nakusakiwa kuvakafwa? (Talenu muvwimbimbi wakulivanga.)

3 Omu vatu veji kupwanga tushinakaji, veji kuhetanga haseteko yakuhona kulizakama vavene. Ngocho veji kusakiwanga kuvazakama. (Tangenu Muka-kwambulula 12:1-7.) Nge visemi vatushinakaji kaveshi jino nangolo jakulitala vaveneko, vakivo navana vavo vakukola vatela kuwana jila yamwaza yayashi yakuvakafwilamo. Chapwa chachilemu nge tanga nayitwama hamwe hamavu nakushimutwila omu vanahase kuzachila hamwe, navyuma vili nakusakiwa namwakuvilingila. Vosena vatela kwazana mukushimutwila kanechi, chikumanyi visemi vatela kuhanjika hatoma vishinganyeka vyavo nakuhanjika vyuma vili nakusakiwa. Vatela kushimutwila numba nge visemi vanahase tuhu kutwama hembo lyavo nakuvakafwangako mujijila jikwavo. * Nge chiku, kaha vanahase kumona omu kala mutu mutanga nahase kuzachisa ngolo jenyi nakukafwa tushinakaji twavo. (Vishi. 24:6) Chakutalilaho, vamwe vanahase kuvakafwanga hakumbi hakumbi, kaha veka vanahase kunehangako jimbongo jakulikafwa najo. Vosena vatela kutachikiza mulimo vali nawo, kaha mulimo kana unahase kwalumuka mukuhita chamakumbi. Kaha nawa vanahase kulihana makumbi akutala kashinakaji.

4. Kulihi kuze vatu vamutanga vanahase kuya vavakafwe?

4 Omu namuputuka kukafwa, wanenuko lwola lwakulinangula mangana mutachikize kanawa misongo yavisemi jenu. Nge visemi jenu vali namusongo waunene uze uli nakutohwelako lika kaha tachikizenu vyuma navikasoloka kulutwe. (Vishi. 1:5) Yenu kumauka afulumende aze eji kuzakamanga tushinakaji. Hulisenu vamilweze nge kwatwama jijila jimwe jamungalila yenu jakumikafwilamo mangana muzakame tushinakaji twenu mujila yamwaza. Vyuma vinahase kwalumuka mutanga vinahase kumilingisa muhombe nakulivwa nge mwavindama. Lwezenuko sepa lyenu uze mwafwelela ukalu wenu. Chachinenenyi lombenu kuli Yehova. Kaha mwamihana kuunda chize nachimikafwa muhase kuwana mwakulipikila naukalu wenu.—Samu 55:22; Vishi. 24:10; Fwili. 4:6, 7.

5. Mwomwo ika chapwila chachilemu kulivanga kutondatonda mwakukafwila visemi vatushinakaji?

5 Tushinakaji vamwe najitanga javo veji kulivanganga kutondatonda jijila jakuvalaminamo. Jijila kana shina chisemi kutwama hamwe namwanenyi, chipwe kumutwala kumembo akulamina tushinakaji, chipwe kuzachisa jila yeka yakuvakafwilamo. Nge navalinga ngocho, kaha navapwa vakulizanga ‘vyakilika naluyando’ vize vyeji kwizanga mwomwo yaushinakaji. (Samu 90:10) Chaluvinda jitanga jajivulu kajeshi kuliwahishila chimwezako, kaha nge ukalu unepuka hakiko jino navasakula vyakulinga. Mutu umwe uze alinangula chikuma ambile ngwenyi, “lwola kana lwapwa lwalukalu kusakula vyakulinga.” Nge navasakula vyakulinga muwashiwashi kaha vatu mutanga veji kupihililanga nakulikokojwesa. Oloze kuliwahishila chimweza shimbu kanda ukalu umiwane, cheji kukehesangako ukalu mutanga.—Vishi. 20:18.

Tanga yinahase kutwama hamavu nakushimutwila mwakukafwila chisemi (Talenu palangalafu 6-8)

6. Uno visemi navana vanahase kunganyala ngachilihi hakushimutwila havyuma vize vanahase kulingila visemi javo?

6 Munahase kuchiwana chachikalu kuhanjika navisemi jenu kupandama kuchiyoyelo chavo navyuma vinahase kwalumuka muchiyoyelo chavo. Vamwe vanamono nganyo yatwama hakushimutwila hachihande kana. Mwomwo ika? Mwomwo vapwile nalwola lwamwaza lwakulivwasana hachihande kanechi mumeso akuunda.  Vawanyine nge kulivwasana havyuma vyakulutwe mujila yazangi nalikoji yalingishile chipwenga chachashi kusakula vyakulinga. Numba tuhu tushinakaji navasaka kutwama ukawavo nakulizakama vavene, oloze nachipwa chachilemu kushimutwila navana vavo vawane mujila vanahase kukavalaminamo nge kunasoloka ukalu.

7, 8. Vishina muka vize jitanga jatela kushimutwilaho, kaha mwomwo ika?

7 Enu visemi, nge muli nakushimutwila hachihande kanechi navana venu, kaha valwezenu vyuma munakufwila najimbongo muli najo, najijila muli nakusaka kumikafwilamo. Echi nachikafwa vana venu vasakule kanawa vyakulinga nge kulutwe kamweshi kukapwa nangolo jakulimanyinako. Vana venu navamona vishinganyeka vyenu kupwa vyavilemu nakumyecha muliyoyele enu vavene kweseka nomu munasake. (Efwe. 6:2-4) Chakutalilaho, kutala muli nakusaka mwanenu amilamine kukanda yenyi tahi nyi muli nakusaka jila yeka? Oloze tachikizenu ngwenu keshi nge vosena mutanga navamona vyuma mujila muli nakuvimwena enuko, kaha nawa chinahase kumbata lwola numba chisemi chipwe mwana kwalumuna vishinganyeka vyenyi.

8 Vosena vatela kwijiva ngwavo ukalu veji kuuhonesanga hakulivwasana. (Vishi. 15:22) Chasakiwa nawa kushimutwila mwakukila misongo najijila namusakula enu vavene. Halwola kanelu munahase kushimutwila vishina vyatwama mukati yaDurable Power of Attorney (DPA) yize veji kuzachisanga Vinjiho jaYehova. Mutu himutu akwechi lisesa lyakwitavila chipwe kukana vitumbo chipwe jila yakumukilamo. Kati yakulumbununa vyaManyinga yasolola vyuma vize ali nakusaka mutu. Mahako jenyi navakamwimanyinako nakumusakwila vyakulinga nge kunasoloka misongo. Mwatela kufwatula mapapilo amwe nakuhana mahako jenyi pamo navakawatonda. Veka vanahanenga lipapilo lyajishiko jamufu, namapapilo aishuwalesi, namapapilo ajimbongo namapapilo akuya nawo kujiofesi jafulumende, naeka.

KULIPIKA NAUKALU HAKWALUMUKA CHAVYUMA

9, 10. Lwola muka visemi vatela kuvakafwa chikuma kuli vana vavo?

9 Kakavulu vosena mutanga veji kusaka visemi javo vatushinakaji vatwaleho lika kuliyoyela. Nge vali nangolo jakuteleka, kukomba, kunwa vitumbo, nakulivwasana kanawa, kaha vana vavo kaveshi kufwila kuvalingila vyuma vyosena mukuyoya chavoko. Oloze kutwala muze pamo visemi vanahase kuhona kutambuka nakuya kumande chipwe kuvitanda, chipwe vanaputuka kuvulyajama, kaha vana vavo vatela kuwana mwakulingila.

10 Tushinakaji vanahase kuhomba. Vanahase kuputuka kujika matwitwi, kufwa meso, kuvulyama vyuma, nakuhona kuzachisa kanawa chimbushu. Nge ukalu kanou unaputuka kusoloka, kaha vana vatela kuvatwala washi kuchipatela shimbu kanda ukalu kana utohwe. Vana  vanahase kunoneka makumbi akutwala visemi kuchipatela nakuvalingila vyuma vikwavo. Hakusaka visemi vavoke kanawa, vana vatela kuvahanjikilako kuli ndotolo nakuvatwalanga kuchipatela.—Vishi. 3:27.

11. Vyuma muka munahase kulinga mangana chipwenga chachashi kuli visemi kwalumuna chiyoyelo chavo?

11 Nge visemi jenu vali namisongo yakuhona kuka, kaha mwatela kwalumunako jila yakuvazakaminamo nakuvawahishilako vyuma vimwe kuzuvo yavo. Numba tuhu vyuma namuvawahishila vyavindende, oloze vinahase kuvakafwa. Nge mwatwama kwakusuku navisemi jenu, kaha munahase kulweza ndumbwenu chipwe mutu valihata nenyi avatambukilanga nakumilweza omu vali nakutwamina. Kutala vali nakusakiwa kuvakafwa kuhika chipwe kukomba nakuvakoselako uvwalo tahi? Kutala vyuma munavawahishila hembo navivalingisa vahase kutambuka nakusana nakulinga vyuma vyeka tahi? Pamo vanahase kutwama ukawavo chikalu kaha nge vali namutu wakuvalama. Oloze nge kaveshi kuhasa kutwama ukawavoko, kaha mwatela kuwana jila yambwende yakuvalaminamo lwola lwosena. Kala mweshomwo chili, oloze wanenu nge mungalila yenu mwatwama mauka afulumende akukafwa tushinakaji. *Tangenu Vishimo 21:5.

OMU VAMWE VEJI KUHONESANGA UKALU

12, 13. Uno vana vakukola vaze vatwama kwakusuku navisemi javo vanavumbikanga ngachilihi visemi javo nakuvazakama?

12 Twasaka visemi jetu vayoye kanawa mwomwo twavazanga. Nge natwijiva ngwetu visemi jetu tuli nakuvazakama, kaha natupwa namuchima wakuunda. Chipwe ngocho, vana vakukola vavavulu kavatwama hamwe navisemi javoko. Ngachize, vana vamwe veji kuzachisanga lwola lwakunoka kumilimo hakuya nakutala visemi javo nakuvazachila milimo yize kaveshi nakuhasangako. Vana veji kusololanga ngwavo vazanga visemi javo hakuvatuminanga jishinga kuswakumwe nakuvasonekelanga mikanda.—Vishi. 23:24, 25.

13 Numba tuhu tanga yenu yatwama kwakusuku, oloze mwatela kutachikiza vyuma vyahakumbi hakumbi vize vyasakiwa kuli visemi jenu. Nge kamwatwama hakamwihi navakivoko kaha nawa visemi jenu vapwa Vinjiho jaYehova, kaha hanjikenu navakulwane vamuchikungulwilo chavo vamikafwe mwakulingila. Chachinenenyi lombenu kuli Yehova amikafwe. (Tangenu Vishimo 11:14.) Numba tuhu visemi jenu kavapwa Vinjihoko, oloze mwatela ‘kuvumbika masenu namanenu.’ (Kulo. 20:12; Vishi. 23:22) Chipwe ngocho, keshi nge jitanga josena najisakula kulinga vyuma vyovimweko. Vana vamwe veji kufwila kumbata visemi javo vatushinakaji mangana vatwame navo hamwe chipwe kuvaneha vatwame kwakamwihi navakivo. Oloze chuma kana kachapwa chachashi lwola lwosenako. Visemi vamwe kavasaka kutwama hamwe navana vakukola najitanga javoko. Vasaka kutwama ukawavo nakuhona kuhana chiteli vana vavo. Visemi vamwe vanahase kulizakama vavene ngocho vanahase kusaka kutwama hembo lyavo.—Kwambu. 7:12.

14. Ukalu muka vanahase kumona vaze veji kuzakamanga chikuma visemi?

14 Mujitanga jajivulu vana vaze vatwama navisemi javo hamwe vakivo veji kupwanga namulimo waunene wakuzakama visemi. Oloze ava vana vatela kupezalisa kanawa vyuma mangana vazakame najitanga javo. Mutu himutu eji kuzeyanga kaha nalwola lwenyi nawa lweji kukumanga. Ngocho, nge vyuma vinalumuka mukuyoya chauze ali nakuzakama visemi, kaha tanga yatela kutwama cheka hamavu nakuwana mwakulingila. Kutala umwe mutanga ikiye ali nakuzata milimo yayivulu kutalisa kuli visemi tahi? Kutala vana vakwavo vatela kuzata nangolo  nakulishisashisa navakwavo mangana vazakame visemi tahi?

15. Uno vaka-kulama visemi vanahase kuvakafwa ngachilihi numba vahone kuzeya?

15 Nge chisemi wakashinakaji mwasakiwa kumukafwa lwola lwosena, kaha uze ali nakumulama mwamona kilika. (Kwambu. 4:6) Vana vasaka kuzata nangolo javo josena mangana vazakame visemi javo, oloze lwola lumwe veji kuzeyanga. Ava vana vatela kwijiva hakumina ngolo javo nakulomba vavakafwe. Kuvakafwanga kuswa kumwe chinahase kulingisa muka-kulama chisemi ahone kuzeya.

16, 17. Ukalu muka vanahase kumona vana omu navazakama visemi vatushinakaji, kaha vanahase kulipika ngachilihi naukalu kana? (Talenu lipwata lyakwamba ngwavo, “Kuzakama Chize Cheji Kusololanga Kusakwilila.”)

16 Munahase kwivwa kupihya hakumona visemi jenu vali nakuyanda mwomwo yaushinakaji. Vaka-kulama visemi vavavulu veji kuhombanga, nakulizakamina, nakupihilila, nakulihana mulonga chipwe kujinda vakwavo. Lwola lumwe kashinakaji nahase kuhanjika mazu amapi chipwe kuhona kusakwilila vaze vali nakumukafwa. Nge chuma kana chinamisolokela, kaha kamwatela kupihililako. Mutu umwe uze alinangula vyamisongo yakuwongo ambile ngwenyi nge tunapihilila, kaha twatela chatete kwitavila ngwetu tunasulakana, kufumaho katwatela kwivwa kupihya hakusulakana chetuko. Shimutwila ukalu kana namuka-mahyove, chipwe kausoko kove, chipwe sepa lyove uze wafwelela. Vyuma namushimutwila navikukafwa wijive muchima wove nakumona vyuma mujila yamwaza.

17 Kunahase kupwa lwola luze tanga nayihona kupwa navyuma vyakutwalililaho lika kukafwa kashinakaji. Mumafuchi muze mwatwama membo akulamina tushinakaji, jitanga jimwe jeji kutwalanga tushinakaji twavo kumembo kana vakavalamineko. Ndumbwetu umwe wapwevo atambukililenga naye uze apwile hembo lyakulamina tushinakaji kafwe hakumbi hakumbi. Ambile ngwenyi: “Katwahashile kuzakama mama hakumbi hakumbiko. Kachapwile chachashi kutwala mama vakamulamine kumembo akulamina tushinakajiko. Chatuvijile chikuma. Oloze yapwile jila yamwaza yize etavilile nayivene, kaha yamukafwile hatukweji vavavulu shimbu kanda afwenga.”

18. Vaka-kuzakama tushinakaji vavafwelelesa vyuma muka?

18 Mulimo wakuzakama visemi vatushinakaji unahase kupwa waukalu nakulingisa vaze vali nakuvalama vahombe. Omu namuzakama tushinakaji, kakweshi jijila jize najizata kuli tushinakaji vosenako. Oloze nge namuwahisa kanawa vyakulinga, nakuzachila hamwe natanga, nakushimutwila kanawa, nakulomba kuli Yehova, kaha namutesamo kanawa mulimo wenu wakuvumbika visemi jenu vatushinakaji. Nge namulinga ngocho, kaha namusuuluka hakutachikiza ngwenu muli nakuvazakama mujila yamwaza. (Tangenu Wavaka-Kolinde 1, 13:4-8.) Chachinenenyi fwelelenu ngwenu navamikisula kuli Yehova nakupwa namuchima wakuunda.—Fwili. 4:7.

^ par. 3 Vyuma vanahase kusakula kulinga visemi navana vinahase kupendamina hangalila vatwamamo. Kuvihela vimwe chapwa chakutamo vausoko kutwama halimbo limwe.

^ par. 11 Nge visemi jenu vatwama hembo, kaha vaka-kuvalama vatela kupwa najisapi javo mangana vahasenga kwingila muzuvo nge kunasoloka ukalu wakukasumuka.