Ukalu wamukuyoya unahase kutuhombesa. Unahase kutulingisa tushinganyekenga kaha haukiko, nakutuzeyesa, nakumona kuyoya mujila yayipi. Mwangana Ndavichi wamuIsalele ahichile mumakava amavulu. Awahonesele ngachilihi? Ndavichi akumbulula musamu yenyi ngwenyi: “Nguli nakuteta nalizu lyami kuli Yehova, nguli nakumulembelela Yehova nalizu lyami. Nguli nakuhingununa kuyayavala chami kumeso enyi, Nguli nakwambulula luyando lwami kumeso enyi. Omu yazeyele shipilitu yami muli ami, Ove watachikijile jila yami.” Chikupu vene Ndavichi alyononwene nakulomba kuli Kalunga amukafwe.—Samu 142:1-3.

Omu Ndavichi apwile nakuhita muukalu, alombele kuli Yehova amukafwe

Musamu yikwavo, Ndavichi embile ngwenyi: “Kuli chuma chimwe ngunalombo kuli Yehova, chikiko vene nanguchitondanga, ngwami, ngutwamenga muzuvo yaYehova makumbi osena nanguyoya, mangana ngutalenga upahu waYehova, ngwihwojolenga mutembele yenyi.” (Samu 27:4) Ndavichi kapwile kaLeviko, oloze achishinganyekenu nemana kuweluka wachipango chajila kwakamwihi natembele. Muchima waNdavichi wafwililile kutwama kwakamwihi natembele makumbi enyi osena mangana ‘atalenga upahu waYehova.’

Lizu lyamuchiHepeleu valumuna haSamu 27:4 ngwavo “upahu” lyatalisa “kukwivwila vyuma kuwaha.” Lwola lwosena Ndavichi evwilenga kuwaha kutala vyuma awahishile Kalunga kutalisa kukumulemesa. Tunahase kulihulisa ngwetu, ‘Kutala ngweji kwivwanga ngana muze evwile Ndavichi tahi?’

SHINGANYEKENUNGA HAVYUMA AWAHISA KALUNGA

Makumbi ano, kuhanjika naYehova kachapendamina hakuya kuzuvo yenyi yakumulemeselako. Oloze chapendamina hajila awahisa yakulemesa chamuchano, yikiko tembele yayinene yaKalunga yakushipilitu. * Nge natushinganyeka havyuma awahisa Kalunga, kaha ‘natutalanga upahu waYehova.’

Tutalenu halijiko lyaunengu lyakulumbila mawana lize lyapwile kuchikolo chatavanaku. (Kulo. 38:1, 2; 40:6) Lijiko lyemanyinyineko muchima waKalunga wakwitavila kuyoya chaYesu chahano hamavu kupwa chimuna wakuvatula. (Hepe. 10:5-10) Uno echi chalumbununa ika? Kaposetolo Paulu asonekele ngwenyi: “Twapwilenga tuvaka-kole vatuwanyishile naKalunga kuhichila mukufwa chaMwanenyi.” (Loma 5:10) Kufwelela mumanyinga aYesu aze amwangalile nachitukafwa tulivwise kuwaha nakupwa masepa jaKalunga. Kulinga ngocho cheji kutukafwa tupwenga “nausepa wakukola naYehova.”—Samu 25:14, NW.

‘Lwola lwakuhizumuna lweji kwizanga kufuma kuli Yehova lyavene’ mwomwo ‘jishili jetu vajijimbangana’ lyehi. (Vili. 3:19) Kuyoya chetu chinalifwane nachize chafunge uze mwaliveya havilinga vyenyi vyakunyima nakwecha vilinga vyenyi vyavipi omu ali nakuvandamina lwola lwakumujiha. Omu Muka-kuyula wakeke mwamona ngwenyi funge ali navilinga vyamwaza, mwamukonekela nakuhona kumujiha. Ou funge mwawahilila chikuma hakumukonekela. Ngana mwayou muka-kuyula, Yehova eji kutalanga vaze vanapihilila nakwalumuka nakuvakonekela milonga yavo nakuvasokola kukufwa.

WAHILILENUNGA MUKULEMESA CHAMUCHANO

Vyuma vimwe vize Ndavichi amwenenga hazuvo yaYehova vyakulemesa chamuchano shina kulikungulwila hamwe chavaIsalele, nakutanga nakulumbununa jishimbi , kwocha vyalivumba lyamwaza nakulumba vimuna kuli vapilishitu nava Levi. (Kulo.  30:34-38; Kula. 3:5-8; Lushi. 31:9-12) Vyuma kanevi vyapwile mukulemesa chavaIsalele kuvili namakumbi ano.

Ngana muze chapwile kunyima, nayetu makumbi ano twetavila mazu akwamba ngwavo: “Omwo chawaha nomwo chayema Vatu vamuwana-wakwavo kutwama hamwe namuchima umwe!” (Samu 133:1) Tuli nakuvulilako lika ‘muwanawakwetu’ mwahita kaye kosena. (Petu. 1, 2:17) Mazu aKalunga veji kuwatanganga nakuwalumbununa kuvatu vosena kukukunguluka chetu. Kuhichila muliuka lyenyi, Yehova nawahisa jijila jamwaza jakutulongeselamo. Tuli nakulya chakushipilitu chachivulu kuhichila mumikanda yamuliuka yize tuli nakuzachisanga hakulinangula chahauka nachatanga. Ndumbwetu umwe wamuLizavu Lyakutwaminyina ambile ngwenyi: “Kuhunanana haMazu aKalunga, nakushinganyeka omu alumbunukila, nakuhehwojola mangana nakunangakana, vyangukafwile ngupwenga naluheto lwakushipilitu nakupwa nawa wakusuuluka mukuyoya.” Chikupu vene ‘chinyingi cheji kwivwisanga kuwaha myono yetu.’—Vishi. 2:10.

Makumbi ano Yehova eji kwivwililanga kulomba chavangamba jenyi hakumbi hakumbi. Kulomba kana Yehova achimona kupwa nge vyuma vyalivumba lyamwaza. (Samu 141:2) Tweji kwivwanga kuwaha mumyono yetu hakwijiva ngwetu Yehova eji kuwahililanga omu tweji kulombanga kuli ikiye mukulinyisa.

Mose alombele ngwenyi: “Upahu waMwata Kalunga ketu utwamenga hali etu. Uzamishile vilinga vyamavoko etu hali etu.” (Samu 90:17) Yehova mwakisula mulimo wetu omu natutwalaho lika kwambulula mujimbu wamwaza. (Vishi. 10:22) Pamo tunakafwe vamwe valinangule muchano. Kaha nawa Pamo tunomikanga hamyaka yayivulu mumulimo wamuwande chamokomoko nakututoleka, misongo, vishinganyeka nakutuyanjisa. (Teso. 1, 2:2) Kutala katweshi ‘nakutala upahu waYehova’ nakumona ngwetu Setu wamwilu eji kwivwa kuwaha hamilimo tweji kukilikitanga tahi?

Ndavichi embile ngwenyi: “Yehova Ikiye chazano chauswana wami nachechi chamulupasa lyami, Ove weji kuzamisangocho chami chakusakula natutachikijilo. Ngiza vanangwesekelayo muma mwakwivwisa kuwaha.” (Samu 16:5, 6) Ndavichi asakwililile Yehova hakumuhana “chazano” chenyi, kulumbununa kupwa nausoko wakukola naYehova nakutokwa chakumuzachila. Ngana mwaNdavichi, nayetu tweji kumonanga ukalu wauvulu oloze tukwechi vyuma vyamwaza vyavivulu vyakushipilitu. Ngachize, tutwalenuho lika kupwa vakuwahilila hakukundwiza kwitava chamuchano nakushinganyeka hatembele yaYehova yakushipilitu.

^ par. 6 Talenu Kaposhi Kakutalila waJuly 1, 1996, lifwo 14-24.