Mutu umwe uze atalile chimweso chakwamba ngwavo “Photo-Drama” mu 1914, ambile ngwenyi: “Ou anakusoloka nge Ndumbu Russell, oloze nawa nge keshi ikiyeko.”

UNO mwaka echi chimweso chakwamba ngwavo “Photo-Drama of Creation,” chinambate jino myaka 100, kufuma haze vachitungile mangana chikafwe vatu vafwelele muMbimbiliya kupwa Mazu aKalunga. Chimweso kanechi chakafwile vatu vafwelele ngwavo Yehova apwa Tengi mwomwo halwola luze vatu vafwelelele nge vyuma vyalijilile vivene, kaha nawa vapwile namilingu nakalelesa. Evi vyalingishile vatu vavavulu vahone kufwelela muli Yehova.

Charles T. Russell, uze atwaminyinyinenga Vaka-Kulinangula Mbimbiliya atondelenga jijila jamwaza jakutandakanyishilamo washi muchano wamuMbimbiliya. Halwola kana te Vaka-Kulinangula Mbimbiliya vanazachisanga mikanda hakwambulula hamyaka yakuhambakana 30. Vawanyine jino jila yayihya yakukunywilamo vatu. Jila kana shina kutalisa mivwimbimbi.

KUTANDAKANYISA MUJIMBU WAMWAZA KUZACHISA MIVWIMBIMBI

Muji 1890, vaputukile kutalisa jivindiyo jamivwimbimbi jakuzeneka mazu. Mu 1903, sinima yavaka-kwitava vayitalishile muchachi yamuNganda yaNew York. Mu 1912, ndumbu Russell aputukile kuwahisa chimweso chakwamba ngwavo “Photo-Drama,” halwola kana te mivwimbimbi yamazu te kanda yichipweko. Atachikijile ngwenyi eyi mivwimbimbi yinahase kunangula muchano wamuMbimbiliya kuhambakana kuzachisa mikanda.

Echi chimweso chambachilenga jola 8 numba chikume. Vachitalishilenga muvihanda viwana kaha chapwilenga navihande vyamuMbimbiliya vyavihi vyakukopa mazu vize ahanjikilenga mutu uze vatachikijile chikuma lizu. Chimweso kana chapwilenga namyaso mukusoloka chachivulu. Vandumbwetu vamalunga vaze vejivile mwakuzachishila makina kana vahakilenga mazu namyaso yize vakopelenga hamivwimbimbi, nakuyinungasana hamwe nachivumo namivwimbimbi yamijimbu yamuMbimbiliya.

“Echi chimweso chapwile namivwimbimbi yakusolola vatanganyika naChiyulo chaKulishitu chaMyaka Likombakaji.”—F. Stuart Barnes, apwile namyaka 14 mu 1914

Mivwimbimbi yayivulu yamuchimweso kana vayitambwile kujikapani jakukopa mivwimbimbi. Vakuluwa mumulimo wakufunjejeka mivwimbimbi vamuPhiladelphia, New York, Paris, naLondon vafunjejekele mivwimbimbi yimwe. Lizavu lyavaka-Mbetele vaze valinangula  mulimo wakufunjejeka, vakwichilenga ulombo nakuwahisa mivwimbimbi yize kayapwile nakusoloka kanawako chipwe yize yafuvalilenga. Kaha nawa vamwe vamutanga yaMbetele vavakopelenga kwakamwihi nanganda yaYonkers, yamuNew York, omu vahemenenga muvihela vyaApalahama naIsaka nakangelo uze akanyishile Apalahama kulumba mwanenyi.—Kupu. 22:9-12.

Vaka-kuzachisa makina vanungasanyine vindiyo yakusuhwa jikilomita 3.2 najifonongalafu (jitepu jamyaso) 26, navihanda vyamivwimbimbi 500 mulwola lwakutamo

Mutu uze azachililenga hamwe naNdumbu Russell alwezele vaka-kwazana mijimbu ngwenyi echi chimweso “nachikafwa vatu vavavulu vazange Visoneka kuhambakana jijila jize vanazachisanga vaka-kwitava kunyima.” Kutala vatwamina vamukwitava chamakuli vakundwijile chimweso kanechi chakukafwa vatu vavavulu vaze vapwile nazala yakushipilitu tahi? Nduma, oloze vatwamina vamuKulishitendomu vahungile echi chimweso ‘chaPhoto-Drama,’ kaha veka vazachishile jijila jakuhoneselamo vatu kutala chimweso kana. Muchihela chimwe vapwile nakutalishila chimweso kana, lizavu lyavatwamina vamukwitava vajimine kakahya kakezi.

Vandumbwetu vakufuma kuvikungulwilo vahanyine vatu mikanda yayivulu yahanjikile hamivwimbimbi yapwile muchimweso ‘chaPhoto-Drama’ chakuzeneka kuvafwetesa.

Vaze vapwile nakutala vindiyo yachimweso kana vavahanyine tutachikijilo twapwile namuvwimbimbi wakanyike Yesu. Tutachikijilo kanetu twanukishile vaze vatuvwalile nge vatela kupwa “vana vakuunda”

Chipwe ngocho, vatu vavavulu vejilenga nakutala chimweso ‘chaPhoto-Drama’ chakuzeneka kuvafwetesa. MuUnited States, mujinganda jakuheta ku 80 hakumbi hakumbi vatalilenga chimweso chakwamba ngwavo “Photo-Drama.” Vatu vavavulu vaze vayitalilenga lwapwile hilwola lwatete lwakutala ‘mivwimbimbi yize yapwile namazu.’ Mivwimbimbi yakulikavasana yalingishile vatu vatale mwana kasumbi omu eji kutetukanga muliulu nomu jitemo jeji kusamwinanga. Mivwimbimbi yakutalisa kumijimbu yasayasi vatalile halikumbi kana yalumbunwine mangana aYehova akulipwila. Ngana muze twahanjikanga hakuputuka chachihande chino, mutu umwe uze atalile Ndumbwetu Russell havindiyo ali nakujimbula chimweso ‘chaPhoto-Drama,’ ambile ngwenyi, ou anakusoloka nge Ndumbu Russell, oloze nawa nge keshi ikiyeko.”

CHINOMA CHACHILEMU CHIZE CHANANGWILE VATU MBIMBILIYA

Vindiyo yachimweso ‘chaPhoto-Drama,’ yize vatalishile chatete haJanuary 11, 1914, muNganda yaNew York vayitungile kuliuka lyaInternational Bible Students Association

Muka-kusoneka mukanda Tim Dirks uze alinangula vyakushikulu, alumbunwine ngwenyi eyi vindiyo yachimweso ‘chaPhoto-Drama’ “chikiko chatete kupwa namazu akukopa, namivwimbimbi yakutambuka hamwe kaha naulombo wamwaza.” Mivwimbimbi yakunyima yize yapwileko shimbu kanda “Photo-Drama” nayikiko yazachishilenga vyuma kanevi numba tuhu kavahashile kuhakamo mivwimbimbi, namazu, naulombo, chikumanyi mivwimbimbi yize yahanjikilenga hachihande chamuMbimbiliyako. Eyi vindiyo ‘yaPhoto-Drama’ yikiko kaha vatalilenga vatu vakuheta ku 9 miliyoni muNorth America, Europe, Australia, naNew Zealand mumwaka umwe.

Vindiyo yachimweso ‘chaPhoto-Drama,’ vayitalishile chatete haJanuary 11, 1914, muNganda yaNew York. Omu mwahichile tukweji 7, Jita yaKaye 1 yepukile. Oloze vatu vatwalilileho lika kulikungulula nakutala evi vindiyo kana yize yavavendejekelenga hakusolola vyuma naukatulingila Wangana waKalunga kulutwe. Numba tuhu mwaka wa 1914 wapwile wakulipwila, oloze chimweso ‘chaPhoto-Drama’ chapwile chakulipwila kaha chavendejekele vatu.

Vikasha vyakuheta ku 20 vyakutalisa vindiyo ‘yaPhoto-Drama’ vajitalishilenga muNorth America