TUVOSENA twapendamina hakakahya kakezi nahamaji tweji kuzachisanga mujiminyau jetu. Kakahya kakezi tweji kukazachisanga milimo yakulisezaseza, kaha nawa tweji kuzachisanga maji mujiminyau jetu. Oloze vatu vavavulu mukaye vanakuchiwana kupwa chachikalu kuzachisa kanawa kakahya kakezi.

Gary wamuSouth Africa ambile ngwenyi: “Ndando yamaji yili nakutohwa chikuma.” Kaha Jennifer wamuPhilippines ambile ngwenyi: “Hakuwana nge kakahya kakezi kanakujimajima, ngocho ngwakulizakamina chikuma.” Fernando wamuEl Salvador naikiye ambile ngwenyi, “ngunalizakamina chikuma hakumonomu vatu vali nakwenyeka vyuma vyakutenga.” Kuvihela vyavivulu muno mukaye, vyuma veji kuzachisanga vatu hakuneha kakahya kakezi vyeji kwenyekanga jingalila.

Shimbu jimwe munahase kulihulisa ngwenu, ‘Uno nanguhasa ngachilihi kulipika naukalu kanou?

Tuvosena tunahase kuzachisa kanawa kakahya kakezi. Kuzachisa kanawa kakahya kakezi chinahase kutunganyalisa. Kuzachisa kakahya kamweseke, chinahase kutukafwa tulame kanawa jimbongo. Kaha nawa chinahase kukinga jingalila nakukehesako seteko yakakahya kaze vatela kuzachisa vatu.

Tushimutwilenu omu tunahase kuzachisa kanawa kakahya kakezi, mujizuvo jetu, namuvikilikita vyahakumbi hakumbi, najiminyau.

MUJIZUVO

Zachisenu kanawa kakahya kakezi kumakina mweji kuzachisanga. Kuhehwojola chimwe chapwile mulifuchi lyaEurope chasolwele hatoma nge kuhona kuzachisanga chikuma kakahya kakezi kumakina akuzumisa chipwe akutuchisa mujizuvo chinahase kumikafwa. Derek wamulifuchi lyaCanada ambile ngwenyi: “Kuvwala uvwalo wachishika cheji kutukafwanga tuhone kusokololanga awa makina, kahechi cheji kutulingisanga tuhone kuzachisa chikuma kakahya kakezi.”

Omu mukiko mwatela kulinganga namungonde yanonga. Rodolfo wamuPhilippines eji kuzachisanga kanawa likina lyenyi lyakutuchisa muzuvo hakuhona kulizachisa hatando yayisuku mangana ahone kuzachisa chikuma kakahya kakezi. Mwomwo ika? Ambile ngwenyi: “Kulinga chuma kana cheji kutukafwanga tulame jimbongo nakuzachisa kanawa kakahya kakezi.”

Sokenunga jinjanena navikolo halwola munakuzachisa makina akutuchisa chipwe kuzumisa muzuvo. * Tunahase kuzachisa kanawa kakahya kakezi hakusokanga kuvikolo vyetu halwola tuli nakuzachisa makina kana kuchina yize peho yizuma chipwe yituta nayilovokamo. Chakutalilaho, kuhona kusoka vikolo mulwola lwachishika chinahase kumbata lwola lwalusuku numba jino likina lizumise muzuvo, kahechi nachimilingisa muzachise kakahya kakezi kakavulu.

 Muchishishisa chakusoka kaha jinjanena navikolo, vatu vamwe veji kuzachisanga kakahya kakezi kamweseke hakujika kujinjanena nandundu.

Zachisenu manongo aze eji kuzachisanga kakahya kakezi kamweseke. Jennifer uze twavulukanga kumaputukilo ambile ngwenyi: “Twatela kuzachisanga manongo aze eji kulamanga kakahya kakezi kamweseke.” Manongo kana eji kuzachisanga kakahya kamweseke halwola ali nakuzata, ngocho anahase kumikafwa mulame jimbongo.

JIMINYAU

Zachisenunga jiminyau jahamukwakwa nge chinahase. Andrew wamuGreat Britain ambile ngwenyi: “Shimbu jimwe ngweji kuzachisanga masuwa chipwe kinga nge nguli nakuya kumilimo.” Mukanda wakwamba ngwavo Energy: What Everyone Needs to Know wahanjika ngwawo: “Jiminyau jimwe jajindende jeji kuzachisanga maji amavulu kuhambakana jisacha namasuwa yize nayitambuka tando yayindende.”

Longesenu kanawa ungeji wenu. Kushinganyekela chimweza maungeji namutambuka chinahase kumikafwa mukeheseko kutambwojoka nakuzachisa maji amweseke mangana mulame jimbongo nalwola.

Jethro wamuPhilippines eji kulongeselanga chimweza jimbongo jakulanda maji amuminyau yenyi. Kaha ambile ngwenyi, “Kulinga chuma kana cheji kungukafwanga ngulongese kanawa maungeji ami.”

VIKILIKITA VYAHAKUMBI HAKUMBI

Kamwatela kuzachisanga chikuma meya azumako. Kuhehwojola chimwe chapwile mujinganda jamuAustralia chasolwele nge “meya azuma chikuma eji kukokanga chikuma kakahya kakezi.”

Hakuwana nge kuzumisa meya cheji kukokanga chikuma kakahya kakezi, ngocho twatela kukehesangako kuzumisa chikuma meya. Victor wamuSouth Africa ambile ngwenyi: “Katwasana meya azuma chikumako.” Steven Kenway uze alinangula chikuma vyasayasi ambile ngwenyi, “kukehesako chikuma meya azuma chapwa chamwaza chikuma mwomwo cheji kutukafwanga tuhone kuzachisa chikuma kakahya kakezi.”

Jimenunga vyuma vize kamweshi nakuzachisako, vyakufwana nge manongo, najiTV, najikopyuta, navyuma vyeka. Vaka-kulinangula vamwe navakiko vetavila ngwavo, makina amwe numba nge munawajimi eji kukokanga kakahya, shikaho mwatela kusomonanga jitambo jize jeji kutwalanga kakahya kumakina kana. Fernando uze twavulukanga hakavanga ambile ngwenyi, naikiye “eji kusomonanga jitambo jamakina aze keshi nakuzachisako.”

Numba tuhu shimbu jimwe etu katwafwetela kakahya kakeziko, oloze kuzachisa kanawa kakahya kana nachitukafwa. Vatu vavavulu mukaye vali nakuwana jijila jakuzachishilamo kanawa kakahya kakezi. Chikupu vene, kuzachisa kanawa kakahya kana chasakiwa kushinganyeka kanawa, kaha nawa cheji kunganyalisanga. Valeria wamuMexico ambile ngwenyi, “ngweji kuzachisanga kanawa kakahya kakezi mangana ngulame jimbongo nakukinga ngalila.”

^ par. 10 Twatela kutanganga mukanda wajindongi veji kutuhananga vaka-kutunga makina akuzumisa chipwe akutuchisa mujizuvo. Chakutalilaho, makina amwe tweji kuzachisanga hakusaka muzuvo mupwenga peho yituta chipwe yizuma asakiwa kusokolola kuvikolo chipwe jinjanena.