UKALU

“Kakavulu ngwemanyinenga kunjanji nakutala omu jalihangasanyinenga jimasuwa, kahechi changukafwile ngukeheseko kushinganyeka chikuma haukalu wami.”—Leon *

“Ngwanyinyinenga hamalolwa amasuku nakulimbila mumeya, kaha ngwevwilenga nakumuchima hwo hakatando kakandende. Kakavulu ngwalivwishilenga kuwaha oloze shimbu jimwe ngwevwilenga woma.”—Larissa.

Ngana mwaLeon naLarissa, vakweze vavavulu navakiko vazanga kuhema chize chinahase kuvengisa muponde. Kutala nayenu mwasaka kuhema kana tahi? Nge mukiko, kaha chihande chino nachimikafwa.

VYUMA MWATELA KUTACHIKIZA

Kuhema kana chinahase kupwa chachikalu kulitwaminacho. Kuhema kana chinahase kumisuulwisa hakatando kakandende, nakumilingisa jino mufwile kwazanamo chikuma. Ngana mwaLeon, Marco naikiye emanyinenga kunjanji nakutala omu jimasuwa jalihangasanyinenga, kaha ambile ngwenyi: “Numba tuhu jize jimasuwa jasolokele nge najineha ponde oloze ngwawahililile hakatando kakandende. Chipwe ngocho echi changulingishile ngutwaleho lika kutalanga kuhema kana.”

Justine uze avwalilenga jisapato jatufumbo nakwazana mukuhema chakuselwojoka mujiminyau ambile ngwenyi, “kuwaha chize ngwevwile hakuhema kana changulingishile ngufwile kwazanamo lika shimbu yosena. Ngwasakile kuya chikuma fuma, chaluvinda ngwalivulumwine nakukahindukila kuchipatela.”

Vyuma navamishinjila vakwenu kulinga vinahase kumingisa muponde. Mukweze walijina lyaMarvin ambile ngwenyi: “Masepa jami vangushinjilile ngunyine hazuvo yayisuku nakungulweza ngwavo: ‘Nyina lika, kalinwomu uhete.’ Oloze ngwevwile woma, kaha ngwapwile nakuchikima omu ngwapwile nakunyina haze hazuvo.” Larissa uze twavulukanga hakavanga ambile ngwenyi: “Nayami ngwalingilenga vyuma vize valingilenga vakwetu. Kaha ngwatwalilileho lika kulinga ngocho.”

Vatu vamwe veji kuzachisanga Internet mangana vashinjile vakwavo hakwalisa vaka-kwazana mukuhema nakulingisa vatu vamone nge kuhema kana kachatwama napondeko. Kachi nge vindiyo yavaka-kuhema vanayihake haInternet, veji kuyitalanga kuvatu vavavulu.

Chakutalilaho, jivindiyo jimwe jize vatachikiza chikuma vatu jeji kusololanga vatu vaze veji kwazananga mukuhema chakutumbwojoka jizuvo, najimbango navyuma vyeka vyavisuku chakuzeneka kuzachisa kala vyuma vyakuvakinga. Jivindiyo kana jinahase kumilingisa  mukukulule ngwenu: (1) Kuhema kana kachatwama naponde chikumako, (2) Kaha nawa vatu vosena vali nakwazananga mukuhema kana. Echi chinahase kumilinga nayenu mwazane mukuhema chize nachihaka kuyoya chenu muponde.

Kuli jijila jamwaza jakukingiwa jize najimikafwa. Mbimbiliya yahanjika ngwayo: “Kulilongesa kumujimba cheji kunganyalisanga kaha chindende.” (WaChimoteu 1, 4:8) Oloze Visoneka vyatuhuhumuna nawa ngwavyo, “tupwenga tuvaka-kushinganyeka mwamangana.” (WaChituse 2:12) Munahase kulinga ngachilihi ngocho?

VYUMA MWATELA KULINGA

Tachikizenu ponde yatwamamo. Mbimbiliya yahanjika ngwayo: “Mutu wakuzangama eji kuzatanga nachinyingi, oloze chileya eji kusololanga uleya wenyi.” (Vishimo 13:16) Shimbu kanda mwazane mukala kuhema, mwatela kutachikiza ponde yatwamamo. Lihulisenu ngwenu, ‘Uno kuhema kanechi chinahase kungunehela ponde yayinene chipwe kufwa tahi?’—Lushimbi lwamuMbimbiliya: Vishimo 14:15.

Sakulenunga masepa vaze vamona kuyoya kupwa chachilemu. Masepa vamwenemwene kaveshi kuhasa kumilweza mulinge vyuma vize navihaka kuyoya chenu muponde chipwe kulinga vyuma vize kamwazangako. Larissa ambile ngwenyi: “Masepa vamwenemwene vangukafwilenga ngusakule kanawa kuhema chamwaza. Masepa kana vangukafwile ngwalumune kuyoya chami.”—Lushimbi lwamuMbimbiliya: Vishimo 13:20.

Lihulisenu ngwenu: ‘Uno kuhema kanechi chinahase kungunehela ponde yayinene chipwe kufwa tahi?’

Azanenunga mukuhema chize kacheshi napondeko. Mukanda wakwamba ngwavo Adolescent Risk Behaviors wahanjika ngwawo: “Mutu ivene atela kutachikiza vyuma vize atela kulinga navize katela kulingako,” omu mukiko chapwa kuyoya. Munahase kuhemena muchihela chamwaza nakuzachisa vyuma vize navimikinga kuponde.

Lingenu vyuma vize navimilingisa vamivumbike. Vatu vanahase kumivumbika nge navamona munakulipika naukalu mujila yamwaza, keshi kufwila kwazananga kaha muvyuma vyakuhemahemako. Larissa ambile ngwenyi: “Kwazananga mukuhema chakunyina hamalolwa amasuku nakulimbila mumeya chambile kwenyeka chiyoyelo chami. Kachi chawahile nge kangwazanyinenga mukuhema kanako.”

Chuma chachilemu: Muchishishisa chakwazana mukuhema chize chinahase kuhaka kuyoya chamutu muponde, mwatela kusakula kanawa kulihizumuna mujila yamwaza.—Lushimbi lwamuMbimbiliya: Vishimo 15:24.

^ par. 4 Majina amwe ali muchihande chino vanawalumuna.