Kushikulu, vaIsalele valwilenga jijita mulijina lyaYehova Kalunga kavo. Uno echi chili nakulumbununa nge Kalunga eji kukundwizanga jijita vanakulwa makumbi ano tahi?

Mwomwo ika vaIsalele vakushikulu vazungililenga jijita?

VYUMA VEJI KUHANJIKANGA VATU

 

VaIsalele valemeselenga “kalunga uze azangile jijita” nakujiha vatu.

VYUMA YAHANJIKA MBIMBILIYA

 

Mafuchi aze vafungulwilenga vaIsalele azalile navyuma vyavipi vyakufwana nge ulyanyi, nakulisavala natunyama, nakulisavala navausoko, nakulumba vana. Hamyaka yayivulu vaka-mafuchi kana vavalwezele valumune vilinga vyavo oloze kavevwililileko. Ngocho Kalunga ambile ngwenyi: “Evi vikiko vinapihisa vaka-mafuchi vaze nanguhanga kumeso enu.”—VyavaLevi 18:21-25; Yelemiya 7:31.

“Oloze havilinga vyavo vyavipi hakiko mwavahangila Yehova Kalunga kenu kumeso enu.”—Lushimbi lwamuchivali 9:5.

Kutala Kalunga eji kukundwizanga jijita vanakulwa makumbi ano tahi?

NAYENU PAMO MUNATACHIKIZA

 

Mujijita jajivulu, vakulwane vamukwitava vaze vanazanangamo vanahanjikanga ngwavo Kalunga eji kupwanga navakiko. Mukanda vavuluka ngwavo The Causes of War wamba ngwawo, “mauka akwitava anakundwizanga jijita jize vanazungunga vatu.”

VYUMA YAHANJIKA MBIMBILIYA

 

Vaka-Kulishitu kavavalweza kuzunga jita navaka-kole javoko. Kaposetolo Paulu akolezezele vaka-Kulishitu ngwenyi: “Kachi nge chinahase, kweseka nomu namuhashila, twamenunga mukuunda navatu vosena. Enu ngwazanga, kanda namulinga sambanjingako.”—Wavaka-Loma 12:18, 19.

Yesu kalwezele tumbaji twenyi vayenga kujitako, oloze avalwezele ngwenyi: “Zangenunga lika vaka-kole jenu nakulombelako vaze vali nakumiyanjisa mangana mupwenga muvana vaSenu uze ali mwilu.” (Mateu 5:44, 45) Hakuwana nge vaka-Kulishitu ‘kavapwa vaka-kayeko,’ ngocho kavatela kwazana mujita numba nge vatu vamulifuchi lyavo navaya nakuzunga jita. (Yowano 15:19) Kachi nge Kalunga asaka vaka-kumulemesa vosena vazange vaka-kole javo nakuhona kupwa vaka-kaye, kutala nahase kuvakundwiza nge navasaka kuya nakuzunga jita tahi?

“Wangana wami kaweshi wamukaye kanoko. Kachi nge Wangana wami wapwanga wamukaye kano, kachi vaka-kungukafwa vanalu mangana vazeneke kungutwala kuli vaYuleya. Olozenyi Wangana wami kaweshi wamukaye kanoko.”Yowano 18:36.

 Uno jita nayikakuma tahi?

VYUMA VEJI KUHANJIKANGA VATU

 

Katweshi kuhasa kuhonesa jijitako. Mukanda vavuluka ngwavo War and Power in the 21st Century wambile ngwawo: “Vatu vamwe vafwelela ngwavo jijita najitwalaho lika mulikulukaji lyamyaka yino.”

VYUMA YAHANJIKA MBIMBILIYA

 

Jijita najikakuma omu vatu kaveshi kukashinganyeka cheka vyakulwa jitako. Wangana waKalunga uze wapwa fulumende yize yili nakuyula mwilu kalinwomu uhokojole vitwa vyosena vyajita hano hamavu nakukafwa vatu vosena vatwame mukuunda. Mbimbiliya yatufwelelesa ngwayo Kalunga: “Mwakasungamisa vyuma muli vaka-mafuchi angolo aze ali kwakusuku, jipoko javo jamikwale navakajifululula nakupwa matemo akulimisa, makunga avo navakawafululula nakupwa jipoko jakunongesa kumitondo. Lifuchi limwe kalyeshi kukakajila lifuchi likwavo jipoko jamikwaleko, Kaha kaveshi kukalinangula cheka jitako.”—Mika 4:3.

Mbimbiliya yanangula ngwayo, muWangana waKalunga kamweshi kukapwa jifulumende jize najikasaka kulinganyalisa jivene, nakuhakako jishimbi jajipi jize najikalingisa vatu valikange chipwe kumona vakwavo ulumbi uze unakuneha vijindoko. Ngocho jijita najikakuma. Kalunga atushika ngwenyi: “Kaveshi kukenyekako chipwe kupihisako, mwomwo hamavu hosena nahakazala nachinyingi chakumutachikiza Yehova nge muze kalungalwiji azala nameya.”—Isaya 11:9.

“Mwakumisa jijita hamavu hosena. Mwahokwojola mata amanana nakuchika makunga. Mwocha matemba ajita nakakahya.”—Samu 46:9.