OMWO CHALUMBUNUKILA

Kutachikiza mutu kachalumbununa kwijiva kaha lijina lyenyi nomu asolokako. Oloze chasakiwa kutachikiza vyuma afwelela mutu, navyuma afwila kulinga navilinga vyenyi. Shikaho kutachikiza mutu chalumbununa kwijiva vyuma vyosena hali mutu.

OVYO CHAPWILA CHACHILEMU

Kulitachikiza enu vavene omu mwapwa, nachimikafwa mulinge vyuma mwafwelela kuhambakana kukavangiza kaha vyuma navamilweza vakwenu.

“Vatu vamwe tunahase kuvafwanyisa kuvatu vamalengeso vaze tweji kumonanga kuvitanda. Ava vatu vamalengeso kavalisakwila vavene vyakuvwalako, oloze veji kuvasakwilangavyo.”—Adrian.

“Ngunalinangula jino mwakulingila vyuma vyakwoloka numba tuhu shimbu jimwe chapwa chachikalu kulinga ngocho. Ngweji kutachikizanga masepa jami vamuchano kachi nge navavumbika vyuma ngwazanga.”—Courtney.

LUSHIMBI LWAMUMBIMBILIYA: “Kanda namwitavila katwamino kamyaka yino kamyalumuneko, oloze alumukenu hakulingisa vishinganyeka vyenu kupwa vyavihya.”—Wavaka-Loma 12:2.

VYUMA MWATELA KULINGA

Fwilenu kukekesa kanawa omu mwapwa, nomu mwafwila kukapwa kulutwe, mangana mutachikize oho mwajikijila, noho mwazeyela, navyuma mwafwelela. Chuma nachimikafwa kulinga ngocho shina kulihulisa enu vavene vihula vinakavangizaho.

Hakumina ngolo Jenu: Wana nauhashi muka ngwatwama nawo? Ngwajikijila haka? (Chakutalilaho: Kutala ngweji kulamanga lwola tahi? Uno ngwatwama namuchima wakulikanyisa tahi? Ngweji kuzatanga nangolo tahi? Uno ngwatwama namuchima wakuhana tahi?) Vyuma muka vyamwaza ngweji kulinganga?

VYUMA VIZE NAVIMIKAFWA: Uno mweji kuchiwananga kupwa chachikalu kutachikiza vyuma vyamwaza mwahanjikile nakulinga kunyima tahi? Hulisenu chisemi chipwe sepa lyenu uze mwafwelela chikuma amilweze oho mwajikijila novyo nahanjikila ngocho.

LUSHIMBI LWAMUMBIMBILIYA: “Mutu himutu akekese vilinga vyenyi, kaha mwawahilila navyuma vyenyi ivene, keshi hakulyesekesa kumutu mukwavoko.”—Wavaka-Ngalesha 6:4.

Kuhehela chenu: Vilinga muka ngwatela kuzachilaho chikuma? Vyuma muka vize vyeji kungulingisanga ngwingile mucheseko? Muvyuma muka ngwatela kufwila chikuma kupwa namuchima wakulikanyisa?

LUSHIMBI LWAMUMBIMBILIYA: “Kachi nge natwamba ngwetu, ‘Etu katweshi nashiliko,’ kaha tuli nakulyonga etu vavene.”—WaYowano 1, 1:8.

Vyuma Mwafwelela: Jishimbi muka ngweji kukavangizanga, kaha mwomwo ika? Uno ngwafwelela Kalunga tahi? Unjiho muka ngwatwama nawo uze wasolola nge Kalunga kwatwama? Vyuma muka ngwamona kupwa vyakuhenga, kaha mwomwo ika? Vyuma muka ngwafwelela vize navikasoloka kulutwe?

LUSHIMBI LWAMUMBIMBILIYA: “Uhashi wakushinganyeka naukukinganga. Uhashi wakukekesa vyuma nawa naukulamanga.”—Vishimo 2:11.