“Zangamenu navyuma vyakupanda, nauloji, navandemone, navaka-kulovola vandemone vize vinalisale mukaye.” —Mangazini vavuluka ngwavo “The Wall Street Journal.”

VANYIKE navakulwane vaze vapwa vaka-visava, navaloji namivwimbimbi yamisalu, vanakulinga vyuma vyakukomwesa vize vakundwiza kuvandemone vize vinalisale chikuma mumikanda, namujivindiyo namukuhema chahamakina chize chakundwiza uloji. Mwomwo ika vatu vanakwivwilanga kuwaha vyuma vyakupanda? *

Claude Fischer uze alinangula vyachiyoyelo chavatu asonekele ngwenyi: “Kunyima, mulifuchi lyaAmerica vatu vavandende kaha vakiko vafwelelele muvyuma vyakupanda, oloze oholili ngana vatu vavavulu vafwelela muvyuma kana.” Ambile nawa ngwenyi: “Vakweze vavavulu mulifuchi kaneli vanayinga nakutaha chikuma kuhambakana vakulwane, kaha nawa vafwelela muvyuma vyakupanda, nakwivwa woma jizuvo jize jatwama namangizangiza.”

Chaluvinda, makumbi ano mijimbu yavandemone yinalisale chikuma kuvatu, kaha yinakuvevwisa woma. Michael Calia asonekele mumangazini yaThe Wall Street ngwenyi: “Vihande vyavandemone vinalisale chikuma muvisemwa vyavivulu vize vyakundwiza chikuma kupanda kuhambakana kumyaka yakunyima.”

Mujimbu umwe wamba ngwawo, “mukaye kosena vatu vaze vafwelela muvyuma vyakupanda vanakuvulilako lika, kaha vyuma kana vanakuvisoneka chikuma mumikanda yamuvisemwa vyavivulu.” Kweseka nakuhehwojola chaChristopher Bader naCarson Mencken vaze valinangula vyachiyoyelo chavatu vawanyine nge, “vatu vavavulu muAmerica vali nakufwelela chikuma muvyuma vyakupanda.”

Uno kwazana muvyuma vyakupanda nevi vyauloji chapwa hicheseke kaha tahi?

^ par. 4 Ndikishonali yaMerriam-Webster’s Learner yalumbununa vyuma vyakukomwesa vakundwiza vandemone ngwayo, “vyapwa vyuma vimwe vize kavahasa kulumbununa vatu navaka-sayasiko.”