Kulizakamina chapwa muvali, chimwe chamwaza chikwavo chachipi. Mbimbiliya yatulumbunwina kulizakamina chosena chivali.

Uno chapwa chakwoloka kulizakamina tahi?

EYO

Mutu nahase kulizakamina mwomwo yawoma chipwe sonyi. Kaha nawa ukalu wamuno mukaye kakapi unahase kutulingisa tulizakamine.

VYUMA YAHANJIKA MBIMBILIYA

Mwangana Ndavichi asonekele ngwenyi: “Nangulizakaminanga nakulyonyinga mumuchima wami hakumbi hakumbi palanga nakumwaka uka?” (Samu 13:2) Chuma muka chakafwile Ndavichi afungulule ukalu kana? Alombele kuli Kalunga namuchima wosena nakufwelela mulikoji lyenyi lyakwilila. (Samu 13:5; 62:8) Kaha nawa Kalunga ahanjika ngwenyi tumulweze ukalu wetu. Hali WaPetulu 1, 5:7 vatulweza ngwavo: “Mbilenu kulizakamina chenu chosena hali [Kalunga], mwomwo amizakama.”

Kulingila vakwetu vyuma vyamwaza cheji kukafwa mutu ahone kulizakamina

Hakusaka tuhonesa kulizakamina, twatela kulingako vyuma vimwe. Chakutalilaho, omu Paulu “alizakaminyine havikungulwilo vyosena,” avendejekele vandumbwenyi nakukolezeza vaze alizakaminyine. (Wavaka-Kolinde 2, 11:28) Kulizakamina chenyi chapwile chamwaza mwomwo chamulingishile akafwe vakwavo. Nayetu twatela kupwa namuchima wakufwila kukafwa vakwetu, muchishishisa chakupwa nakanengauli chipwe kalelesa.—Vishimo 17:17.

“Kanda kuhakanga kulutwe vyuma mwasaka enu kahako, oloze navyuma vasaka vakwenu nawa.” Wavaka-Fwilipi 2:4.

 Vyuma muka mwatela kulinga nge munalizakamina chikuma?

VYEJI KUNEHANGA KULIZAKAMINA

Vatu vanahase kulizakamina havyuma vyavipi valimbenjele kunyima, hachiyoyelo chakulutwe chipwe hajimbongo. *

VYUMA YAHANJIKA MBIMBILIYA

Kulizakamina havyuma vyavipi twalingile kunyima: Shimbu kanda vatu vamwe vapwenga vaka-Kulishitu mulikulukaji lyamyaka lyakulivanga, valingilenga vilinga vyavipi vyakufwana nge kupenda, ujila, kulyapula, nawiji. (Wavaka-Kolinde 1, 6:9-11) Omu valumukile nakumbila vilinga kana, vetavilile Kalunga nakufwelela ngwavo navakonekela. Mukanda waSamu 130:4 wahanjika ngwawo: “[Ove Kalunga] wapwa umuka-kukonekela, mangana vakwivwenga woma.”

Kulizakamina haukalu unahase kusoloka hamene: Yesu ambile ngwenyi: “Kanda namulizakamina vyalikumbi lyahameneko, mwomwo likumbi lyahamene nalikapwa navyalyo vyakulizakamina.” (Mateu 6:25, 34) Mazu ahanjikile alumbununa nge, mutu atela kushinganyeka kaha haukalu ali nawo halwola kana. Nge mutu ali nakushinganyeka haukalu walelo nakulunjikilaho naukalu wahamene uze kanda usoloke, kaha nahase kuviza nakuhona kushinganyeka kanawa. Anukenu ngwenu, mutu nahase kulizakamina havyuma vimwe, oloze kakavulu vyuma kana kavyeshi kusolokako.

Kulizakamina hajimbongo: Lunga umwe wamangana alombele ngwenyi: “Kanda naunguhutwisa, chipwe kunguhetesa luhetoko.” (Vishimo 30:8) Ou lunga asakile kupwa navyuma vyavindende vyakumukafwa ayoye kanawa nakuzachila Kalunga. Hali WavaHepeleu 13:5 vavuluka ngwavo: “Kutwama chenu chipwenga chakuzeneka kuzanga jimbongo, oku munasuuluka navyuma muli navyo. Mwomwo [Kalunga] nambe ngwenyi: ‘Kangweshi kukakusezako, kangweshi kukakumbilako.’” Enga, jimbongo japwa jamwaza vene, oloze jeji kukumanga kumutu. Kalunga keshi kuseza vosena vaze vanashiwisa chiyoyelo chavo nakumufwelelako.

“Kanda ngumonengaho lyehi muka-kwoloka vanamusuvilila, chipwe kumona vana venyi navalombalomba mboloko.”—Samu 37:25.

Uno kulizakamina nachikakuma tahi?

VYUMA VEJI KUHANJIKANGA VATU

Harriet Green asonekele mulipapilo lyamijimbu lyaThe Guardian mu 2008 ngwenyi, “Makumbi ano, vatu jino vanakuyoyela mumyaka yakulizakamina.” Kaha Patrick O’Connor asonekele mulipapilo lyamijimbu lyaThe Wall Street Journal mu 2014 ngwenyi, “Makumbi ano vatu vamulifuchi lyaAmerica vali nakulizakamina chikuma kuhambakana kunyima.”

VYUMA YAHANJIKA MBIMBILIYA

“Kulizakamina chamutu nachilemuwisa muchima wenyi, oloze mazu amwaza nawahizumuna muchima wenyi.” (Vishimo 12:25) ‘Mazu amwaza akuhizumuna’ atwama ‘mumujimbu wamwaza waWangana.’ (Mateu 24:14) Ou Wangana wapwa fulumende yaKalunga, uze naukafumisako kulizakamina chosena kuvatu kuhakilako vene namisongo nakufwa, vyuma vize kaveshi kuhasa kufumisako vaka-jifulumende javatuko. Mbimbiliya ngwayo: [Kalunga] mwakahunda masoji osena kumeso [etu], kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.”—Kusoloka 21:4.

“Kalunga uze eji kuhananga lutalililo amilingise muwahilile chikuma nakumihana kuunda hakumufwelela.”—Wavaka-Loma 15:13.

^ par. 10 Vatu vaze vali naukalu wakulizakamina vatela kuya nakumona vandotolo. Mumangazini yaTonenu! kavasonekamo jindongi chipwe kulweza vatu vitumbo vatela kunwako.