ASTROLOGY

Kuzachisa vatanganyika yapwa hijila yimwe yakutahilamo. Jila kana yasakiwa kuzachisa kakweji, najipulaneti, navatanganyika nakuvifwelela nge vyuma kana vyeji kwalumunanga chiyoyelo chavatu hano hamavu. Vaka-kuzachisa vatanganyika veji kwambanga ngwavo kunyengumuka chavyuma kanevi halwola mwasemuka mutu chikiko cheji kusololanga vilinga vyamutu nachiyoyelo chenyi chakulutwe.

Numba tuhu kuzachisa vatanganyika chafuma kuMbavilone yakushikulu, oloze namakumbi ano hanga kuchili. Kuhehwojola chimwe chapwile muUnited States mumwaka wa 2012, vawanyine nge vamwe vafwelelele ngwavo kuzachisa vatanganyika chapwa nge “hijila yimwe veji kuzachisanga vaka-sayasi.” Kaha veka vafwelela ngwavo “yapwa vene sayasi.” Uno awa mazu amuchano tahi? Nduma. Talenu vyuma tunambila ngocho.

  • Jipulaneti navatanganyika kavyatwama navyuma vimwe vize vinahase kukwata hakuyoya chavatuko.

  • Kakavulu vyuma veji kuhanjikanga kutalisa kuvyuma vyakulutwe vinahase kusoloka kuli kala mutu.

  • Vaka-kuzachisa vatanganyika makumbi ano vafwelela vyuma vize vashinganyekele vatu kushikulu ngwavo jipulaneti jeji kunyengumukanga kupulaneti yetu yamavu. Oloze kuhanjika muchano jipulaneti jeji kunyengumukanga kulikumbi.

  • Havyuma vyakulutwe veji kuhanjikanga vaka-kuzachisa vatanganyika ngwavo navikasoloka kumutu youmwe kavyalitombolako.

  • Vaka-kuzachisa vatanganyika nawa veji kuhandununanga vatu muvihanda 12, chipwe ngwetu vinjikizo vavuluka ngwavo zodiac kweseka namakumbi avo akusemuka. Hakuwana nge kunyengumuka chamavu cheji kwalumukanga mukuhita chamyaka yayivulu, ngocho makumbi aze alitombola navinjikizo vyazodiac vyalimbalaka namajina avatanganyika veji kuzachisanga.

Kaha nawa vamba ngwavo vinjikizo vavuluka ngwavo zodiac vyeji kuvakafwanga vejive omu mwakapwa mutu. Kaha nawa vatu vaze vasemukile halikumbi limwe kavatwama navilinga vyovimweko, ngocho likumbi asemukile mutu kalyasolola omu mwakapwa mutuko. Mukutela kumona omu apwa mutu, vaka-kuzachisa vatanganyika veji kuhanjikanga vyuma vyamakuli kutalisa kuvilinga vyavatu. Uno echi kachapwa kumona vatu ulumbiko tahi?

 KULYONGELA UPOLOFWETO

Putu vene kushikulu vatu vanahulisanga vaka-kulyongela upolofweto. Vatu vamwe vaze veji kulinganga visava veji kuzachisanga mijingwa, namakindwila navihanda vyeka vyavatu natunyama, chipwe kumona omu ndemba yakasumbi eji kulilangamo manona. Veka nawa veji kuzachisanga mihaki yamafwo, namikoswa yakofi. Makumbi ano vatu veji kuzachisanga jikati jakutahisa vavuluka ngwavo tarot cards, navyuma vyeka vyakulisezaseza. Uno twatela kufwelela vyuma veji kuhanjikanga vaka-kulyongela upolofweto kutalisa kuchiyoyelo chakulutwe tahi? Nduma, katwatela kulinga ngochoko. Tushimutwilenu jino ovyo katwatela kufwelela vyuma kanako.

Kulimbalaka chavyuma veji kuhanjikanga. Jijila veji kuzachisanga vaka-kulyongela upolofweto jalimbalaka najijila jize veji kuzachisanga vakwavo. Numba tuhu vaka-kulyongela upolofweto veji kuzachisanga jijila jojimwe, oloze vyuma veji kuhanjikanga vyeji kulimbalakanga. Chakutalilaho, nge mutu umwe mwahulisa vaka-kulyongela upolofweto chihula chochimwe kuzachisa jikati jakutahisa jakulifwana, eji kushinganyekanga ngwenyi vyuma navamulweza navilitombola, oloze vyeji kulimbalakanga.

Vatu jino vanaputuka kuhuhwasana vaka-kulyongela upolofweto, najijila veji kuzachisanga. vaka-kufwefulula vamba ngwavo jikati jakutahisa japwa jamokomoko. Vaka-kulyongela upolofweto veji kufwilanga kutachikiza vishinganyeka vyamutu keshi jijila veji kuzachisangako. Chakutalilaho, muka-kulyongela upolofweto wakwipangweji eji kuhulisanga mutu vihula vimwe mujila yakuzangama mangana atachikize vyuma ali nakushinganyeka mutu kana. Ngocho eji kutachikizanga jino muchano wosena hali uze mutu nomu ali nakwivwa chakuzeneka mutu yivene kutachikiza. Echi chalingisa vaka-kulyongela upolofweto vakunyule vatu nakuvafweta jimbongo jajivulu.

VYUMA YAHANJIKA MBIMBILIYA

Kuzachisa vatanganyika nakulyongela upolofweto vyasolola nge kuyoya chetu chakulutwe vachitongola lyehi. Uno omu mukiko tahi? Mbimbiliya yahanjika ngwayo, etu vatu tukwechi lisesa lyakulisakwila etu vavene vyuma tunahase kufwelela, chipwe kulinga vyuma vize vinahase kukwata hachiyoyelo chetu chakulutwe.—Yoshuwa 24:15.

Vaka-kulemesa Kalunga vakwechi lisesa lyakukana vaka-kuzachisa vatanganyika navaka-kulyongela upolofweto, ngocho ava vaka-kulemesa Kalunga vahunga jijila josena jakutahilamo. Mbimbiliya yamba ngwayo: “Muli enu kanda mukapwa . . . muka-kutaha ngombo, chipwe muka-kulinga visava, chipwe muka-kutahisa vitaho, chipwe muka-kupanda, chipwe muka-kuhelama vakwavo, chipwe muka-kutahisa vashipilitu, chipwe muka-kulweza vyuma vyakulutwe, chipwe muka-kwihula vafuko. Weshowo mwalinga vyuma kanevi napu waunyengwe kumeso aYehova. Kaha vyuma kanevi vyaunyengwe vikiko Yehova Kalunga kenu mwahangila vaka-mafuchi kumeso enu.” *Lushimbi lwamuchivali 18:10-12.

^ par. 17 Lijina lyayou “Wakulitulaho Chikuma hamavu hosena.”—Samu 83:18.