VATU vakwechi vishinganyeka vyavivulu kaha nawa vyakulisezaseza kutalisa kukuyoya nakukufwa. Vamwe vashinganyeka ngwavo nge vanafu navatwalaho lika kuyoyela mukala chuma chipwe kuchihela cheka. Veka vashinganyeka ngwavo vanahase kusemukila lika muvyuma vyakulisezaseza. Kaha veka nawa ngwavo kufwa chapwa makumishilo akuyoya.

Nayenu munahase kupwa navishinganyeka vyakulihandununa hachihande kana kweseka najila vamilelelelemo chipwe chisemwa chenu. Hakuwana nge vatu vakwechi vishinganyeka vyakulisezaseza kutalisa kuvyuma vyeji kusolokanga kumutu nge nafu, kutala kuliko mutu umwe chipwe vyuma vimwe vinahase kutukafwa tuwane kukumbulula chamwenemwene tahi?

Hamyaka yayivulu vatwamina vamukwitava chamakuli vananangulanga ngwavo mwono wamutu kawafwako. Vatu vavavulu vamukwitava chavaka-Kulishitu, nachavaHindu, nachavaYuleya, nachavaMuzilemu nakwitava cheka, vafwelela ngwavo mwono kawafwako, kaha nawa ngwavo mwono weji kuyovokanga muli uze nafu nakupwa jino mutu wakushipilitu. Kaha nawa vatu vamukwitava chaBuddhism vafwelela ngwavo mutu nge nafu eji kusemwojoka lika, kahechi cheji kulingisanga mutu kana akasokoke kukuyanda hakutwama muchihela vavuluka ngwavo Nirvana.

Mwomwo yakunangula kanechi chinalingisa vatu vavavulu mukaye vafwelele jino ngwavo kufwa cheji kulingisanga mutu ayenga nakuyoyela mukaye kamwaza kakuunda. Vatu vavavulu vamona kufwa kupwa hijila yikwavo yayilemu mukuyoya chamutu kaha nawa yapwa hikujina chaKalunga. Uno Mbimbiliya yahanjika vyuma muka hachihande kanechi? Tunamilombo mutange chihande chinakavangizaho. Munahase kulikomokela chikuma havyuma yakumbulula Mbimbiliya.