“Lingenunga vyuma vyosena mujila yize nayimutohwesa Kalunga.”—KOLI. 1, 10:31.

MYASO: 34, 61

1, 2. Mwomwo ika Vinjiho jaYehova veji kuvwalilanga mujila yakavumbi? (Talenu muvwimbimbi wakulivanga.)

LIPAPILO limwe lyamijimbu lyamulilimi lyaDutch lyahanjikile kutalisa kukuliwana chavatwamina vajichachi ngwalyo: “Vatwamina vavavulu vavwalile uvwalo uze kawasolokele kanawako chikumanyi halwola luze kwazumine chikuma. Omu keshi mukiko veji kuvwalanga Vinjiho jaYehova hakukunguluka changalilako . . . Malunga vosena navanyike navakulwane veji kuvwalanga kahuma nakavwanda, kaha mapwevo vosena veji kuvwalanga uvwalo wausuku . . . mujila yakavumbi.” Chikupu vene, Vinjiho jaYehova veji kuvasangejekanga mwomwo veji kuliwahisanga “vavene nauvwalo wakutamo, mukavumbi nakushinganyeka mwamangana . . . mujila yize yatela . . . vaze valivuluka ngwavo vevwa Kalunga woma.” (Chimo. 1, 2:9, 10) Numba tuhu kaposetolo Paulu apwile nakuhanjika hali mapwevo, oloze jishimbi kana jatalisa nakuli vandumbwetu vamalunga vosena.

2 Chapwa chachilemu kuli etu vangamba jaYehova kukavangiza jindongi jahanjika hauvwalo kaha nawa japwa jajilemu kuli Kalunga tweji kulemesanga. (Kupu. 3:21) Vyuma vyahanjika Visoneka kutalisa kukuvwala nakulilenga vyasolola nge Mwata wavyuma  vyakutenga vyosena atwama najindongi jahanjika hauvwalo vatela kuvwala vaka-kumulemesa. Shikaho katwatela kusakula uvwalo chipwe kulilenga mujila yize nayitwivwisa kaha etu vavene kuwahako. Oloze shina mujila yize nayivwisa nawa Mwata Wakulitulaho Yehova kuwaha.

3. Vyuma muka natulinangula kuJishimbi jize Kalunga ahanyine vaIsalele kutalisa kuuvwalo?

3 Chakutalilaho, haJishimbi jize Kalunga ahanyine vaIsalele hapwile najishimbi jakuvakinga kuvilinga vyavipi valingilenga vaka-mafuchi aze avajingilikile. Eji Jishimbi jasolwele omu Yehova eji kwivwanga hakuvwala chize kacheshi kusolola chihandwa chauvwalo atela kuvwala lunga chipwe pwevoko. Kuvwala kana chinalisale makumbi ano. (Tangenu Lushimbi lwamuchivali 22:5.) Kweseka najishimbi jize Kalunga ahakako kutalisa kuuvwalo, tunahase kumona chikupu ngwetu Kalunga keshi kwivwa kuwaha navwaliso yize nayilingisa malunga vasoloke nge mapwevo chipwe mapwevo vasoloke nge malunga, chipwe kuvwala chize nachilingisa mutu vamuhuhwasana numba nge apwa lunga nyi pwevo.

4. Vyuma muka vinahase kukafwa vaka-Kulishitu vasakulenga kanawa uvwalo?

4 MuMazu aKalunga mwatwama jindongi jize jinahase kukafwa vaka-Kulishitu vasakulenga kanawa uvwalo wavo. Echi chazata kuli vaka-Kulishitu vosena chamokomoko nangalila vatwama, nachisemwa chavo, chipwe kwalumuka chajingonde. Kakwatela kupwa mukana wajishimbi wakutulweza uvwalo vetavisa nauze kavetavisako. Oloze tweji kukavangizanga jindongi jamuMbimbiliya jize jeji kutukafwanga hakusakula vyakulinga. Tushimutwilenu jino hajindongi jimwe jamuMbimbiliya jize najitukafwa tutachikize kanawa mwaya muchima waKalunga ngwetu “mwamwaza, mukiko vetavila, kaha mwakukupuka” hakusakula uvwalo twatela kuvwala.—Loma 12:1, 2.

“TWEJI KULIJIMBULANGA KUPWA TUVAKA-KUZACHILA KALUNGA”

5, 6. Vwaliso yetu yinahase kulingisa vatu valinge vyuma muka?

5 Kaposetolo Paulu vamuhwiminyinyine asoneke mazu amalemu atwama hali Wavaka-Kolinde 2, 6:4. (Tangenu.) Jila tweji kusolokelangamo yasolola omwo twapwa. Vatu vavavulu vanahase kuhanjika chipwe kutushinganyekela mwomwo veji “kutalanga omu asoloka mutu.” (Samwe. 1, 16:7) Hakuwana nge twapwa tuvaka-kuzachila Kalunga, ngocho uvwalo wetu kawatela kupwa uze nautwivwisa kaha kuwaha etu vaveneko. Jindongi jize tunalinangula muMazu aKalunga jatela kutulingisa tuhone kuvwala uvwalo uze nautukwata chikuma, nauze wazwalala chipwe uze naulingisa vakwetu vevwenga peha. Ngocho katwatela kuvwala uvwalo uze nautusolola nge tuli useleseleko. Katwatela kuhukanyisa vakwetu chipwe kuvalingisa vatale kweka mwomwo yakuvwala chetuko.

6 Nge natusolokanga unyoji nakuvwala mukavumbi nakulilenga kanawa, kaha vatu navatuvumbika hakupwa tuvaka-kuzachila Mwata Wakulitulaho Yehova. Echi chinahase kulingisa vatu vazachile Kalunga tweji kulemesanga. Kaha nawa kuvwala mujila yakavumbi cheji kusololanga omwo lyapwa liuka lyetu. Echi cheji kulingisanga vatu vavavulu vevwilile kumujimbu waulemu tweji kwambululanga.

7, 8. Lwola muka twatela kuvwala mukavumbi?

7 Hakuwana nge twazanga Kalunga wajila, navandumbwetu navatu tweji kwambulilanga, ngocho vwaliso yetu yatela kupwa yakavumbi mangana tumone mulimo tweji kuzatanga kupwa waulemu nakutohwesa Yehova. (Loma 13:8-10) Tweji kuvwalanga mukavumbi chikumanyi hakuzata milimo yakushipilitu yakufwana nge kuya kukukunguluka, chipwe nge tunakuzata mulimo wakwambulula. Twatela kuvwala “mujila yize yatela [vatu] vaze valivuluka ngwavo vevwa Kalunga woma.” (Chimo. 1, 2:10)  Chipwe ngocho, chinahase kupwa chakutamo kuvwala uvwalo umwe kungalila yimwe oloze kungalila yikwavo kacheshi kupwa chakutamoko. Oloze vatu jaYehova mukaye kosena vafwila kuvumbika jishimbi jamulifuchi vatwama mangana vahone kuhukanyisa vakwavo.

Uno vwaliso yenu yasolola kavumbi kuli Kalunga mweji kuzachilanga tahi? (Talenu palangalafu 7 na 8)

8 Tangenu Wavaka-Kolinde 1, 10:31. Kachi nge tunakuya kukukunguluka chachihanda chipwe changalila, twatela kuvwala mujila yakavumbi keshi kulondezeza vwaliso yavaka-kayeko. Omu natukayanga kuvisakano twatela kukavwalanga nakulilenga kanawa. Numba tuhu hakuya kuvihela vyangana tweji kuvwalanga kala uvwalo, oloze twatela kwanuka ngwetu uvwalo wetu watela kukasoloka kanawa, kaha nawa wakavumbi, keshi kuvwala mujila yauhayiko. Nge natukavangiza jindongi kaneji, kaha natusolola ngwetu twapwa tuVinjiho jaYehova. Chuma kana chinahase kutukafwa twambulile vatu mujimbu wamwaza.

9, 10. Uno mukanda Wavaka-Fwilipi 2:4 watukafwa ngachilihi kutalisa kuvwaliso yetu?

9 Tangenu Wavaka-Fwilipi 2:4. Mwomwo ika chapwile chachilemu kuli vaka-Kulishitu kusakula kanawa uvwalo? Chuma chimwe shina vatu jaKalunga veji kuzatanga nangolo mangana vakavangize lushimbi lwamuMbimbiliya lyakwamba ngwavo: “Shikaho jihenu vilyo vyenu vyamujimba vize vili hamavu vyakufwila ujila, namajilo, napeha yayipi yakusaka kulisavala.” (Kolo. 3:2, 5) Katweshi nakusaka kulingisa vandumbwetu vachiwane kupwa chachikalu kukavangiza lushimbi kaneluko. Vandumbwetu vamwe vaze vanalitwamina kulinga ujila, vanakuzata nangolo mangana vechenga vilinga vyavipi. (1 Koli. 1, 6:9, 10) Katweshi nakusaka tuvahake mukilika yakulipika naukalu kanako.

10 Omu natupwanga hamwe navandumbwetu, twatela kufwila kumona ngwetu vwaliso yetu nayisolola nge chikungulwilo chetu chapwa  chitoma. Twatela kulinga ngocho nge tuli kukukunguluka chipwe kuvihela vyasanga. Tukwechi lisesa lyakusakula uvwalo twatela kuvwala. Chipwe ngocho, tuvosena twatela kuvwala uvwalo uze naulingisa vakwetu vapwenga lika navilinga vyamwaza, natwamiso yamwaza navishinganyeka vyamwaza nahanjikiso yamwaza nakulama nawa jishimbi jaYehova jize japwa jajila. (Petu. 1, 1:15, 16) Zangi yamuchano “kayeshi kulinga mwakuhingamako, kayeshi kufwila vyuma vyayo yiveneko.”—Koli. 1, 13:4, 5.

KUVWALA KANAWA HALWOLA LWAKUTAMO NAKUCHIHELA CHAKUTAMO

11, 12. Vyuma muka twatela kushinganyeka hakusakulanga vyakuvwala?

11 Hakusakula vyakuvwala, vangamba jaKalunga vatela kwanuka ngwavo “kuli lwola lwamulimo himulimo nalwola lwakulinga chuma hichuma.” (Kwambu. 3:1, 17) Twatachikiza ngwetu kwalumuka chajingonde cheji kutulingisanga tuvwale uvwalo wakulisezaseza. Kaha nawa kuvihela twatwama, navyuma tweji kulinganga vyalisezaseza. Oloze jishimbi jaYehova kajalumuka mwomwo yajingondeko.—Mala. 3:6.

12 Mungonde yanonga, chinahase kupwa chachikalu kuvwala uvwalo uze nausolola kavumbi nakusolola nawa nge tweji kushinganyekanga mwamangana. Ngocho vandumbwetu vanahase kwivwa kuwaha kachi nge natuhonanga kuvwala uvwalo uze wakutukwata chikuma hamujimba chipwe uze wazwalala. (Yopa 31:1) Kaha nawa nge tuli nakusana kulwiji navakwetu, uvwalo wetu wakusanyisa watela kusolola kavumbi. (Vishi. 11:2, 20) Numba tuhu vatu vavavulu mukaye veji kusanyisanga uvwalo uze unakusolola nge vali uselesele, etu vaka-kuzachila Yehova twatela kuvwala mujila yakavumbi mwomwo twazanga Kalunga uze apwa wakujila.

13. Uno mukanda Wavaka-Kolinde 1, 10:32, 33 watukafwa ngachilihi kutalisa kukusakula uvwalo?

13 Kuli nawa chuma chikwavo chachilemu chize nachitukafwa tusakulenga kanawa vyakuvwala. Chuma kana shina kuzakama vivezu vyavakwetu numba vapwa vandumbwetu chipwe nduma. (Tangenu Wavaka-Kolinde 1, 10:32, 33.) Shikaho twatela kulihenda kuuvwalo uze nauhukanyisa vakwetu. Paulu asonekele ngwenyi: “Etu tuvosena mutu himutu asuulwisenga mukwavo hakumulingila vyuma vyamwaza vyakumutunga.” Kaha ambile cheka ngwenyi: “Mwomwo numba Kulishitu kalisuulwishile iveneko.” (Loma 15:2, 3) Pundu vene, Yesu azakaminenga vakwavo muchishishisa chakulinganyalisa ivene. Amwene ngwenyi kukafwa vatu chapwile kulinga mwaya muchima waKalunga. Shikaho kachi nge natusaka kaha kuvwala mujila yize nayitwivwisa kuwaha, chinahase kuhukanyisa vatu vaze tweji kwambulwilanga.

14. Visemi vanahase kukafwa ngachilihi vana vavo vatohwese Kalunga kuhichila muvwaliso yavo?

14 Visemi vavaka-Kulishitu vatwama namulimo wakunangula jitanga javo kukavangizanga jindongi jamuMbimbiliya. Echi chasakiwa vakiko navana vavo kufwila kuvwala nakulilenga mujila yize nayivwisa Kalunga kuwaha. (Vishi. 22:6; 27:11) Visemi vanahase kukafwa vana vavo kuvumbikanga Kalunga wajila hakuvahana chakutalilaho chamwaza nakuvanangulanga mujila yazangi. Chapwa chamwaza visemi kunangula vana vavo vavandende mwakusakwila uvwalo wamwenemwene noku vatela kuulanda. Echi chasakiwa kuvalweza vasakule uvwalo uze nauneha kavumbi hali Yehova Kalunga keshi uze navazanga kahako.

ZACHISENUNGA KANAWA LISESA LYENU LYAKULISAKWILA VYAKULINGA

15. Vyuma muka vyatela kutukafwa tusakule kanawa uvwalo?

15 Mazu aKalunga atuhana jishimbi jize jinahase kutukafwa tusakule kanawa vyakulinga vize navitohwesa Kalunga. Chipwe ngocho,  tweji kusakulanga uvwalo uze tunasake etu vavene. Vyuma tweji kusakulanga vyalihandununa, ngana muze tweji kulinganga vyuma vyakulihandununa kweseka najimbongo tuli najo. Oloze uvwalo wetu watela kupwa waunyoji, wakavumbi kweseka namilimo tunakuzata kaha nawa kweseka nangalila twatwama.

16. Mwomwo ika chapwile chachilemu kusakulanga kanawa vyakuvwala?

16 Twatela kutachikiza ngwetu kachapwa chachashi kusakula vyuma vize navitusolola nge tweji kushinganyekanga mwamwangana, kaha nawa vize navisolola nge tweji kukavangizanga jindongi jamuMbimbiliyako. Muvitanda vyavivulu veji kulanjisanga uvwalo uze unalisale mukaye, shikaho cheji kumbatanga lwola hakusakula kanawa uvwalo uze naupwa wakavumbi chipwe kusakula jisuti jize kajeshi kukwata chikuma hamujimbako. Vandumbwetu navawahilila kachi nge natuzata nangolo tusakulenga uvwalo wakutamo. Hakuwana nge tweji kuvumbikanga Setu wamwilu, shikaho twatela kusakulanga uvwalo uze nauneha kavumbi kuli ikiye.

17. Vyuma muka vinahase kulingisa ndumbwetu alame wevu chipwe kuuteula?

17 Nyi ngachilihi vandumbwetu vaze veji kulamanga wevu? Jishimbi jaMose jetavishile malunga kulama wevu. Oloze vaka-Kulishitu kavatwama muJishimbi jaMose chipwe kukavangiza Jishimbi kanako. (Levi 19:27; 21:5; Ngale. 3:24, 25) Muvisemwa vimwe, malunga vanahase kuvetavisa kulama wevu chikalu kaha nge vali nakuulama mujila yaunyoji, kaha nawa kacheshi kulingisa vatu vahone kwivwilila kumujimbu wamwaza waWanganako. Navandumbwetu vatongola veji kulamanga wevu. Chipwe ngocho, vandumbwetu vamwe vanahase kuteula wevu. (Koli. 1, 8:9, 13; 10:32) Muvisemwa vimwe chipwe mujingalila jimwe, vamona wevu kupwa chuma chize kavatela kulama vaka-Kulishituko. Shikaho chinahase kulingisa ndumbwetu umwe ahone kutohwesa Kalunga mwomwo yavwaliso nakulilenga chenyi, chipwe kupwa nachuma chakumuhanyina mulonga.—Loma 15:1-3; Chimo. 1, 3:2, 7.

18, 19. Uno mukanda waMika 6:8 watukafwa ngachilihi hakusakula uvwalo uze nauneha kavumbi kuli Kalunga?

18 Twasakwilila chikuma Yehova hakuhona kutuhana mukana wajishimbi jakutalisa kuuvwalo nakulilenga chetu. Oloze natwitavisa tuzachise lisesa lyetu lyakulisakwila vyakulinga mangana tusakule kanawa vyuma kweseka najindongi jamuMbimbiliya. Ngocho kuvwala nakulilenga vyatela kusolola nge tuli nakufwila ‘kutambuka naKalunga ketu mukulinyisa.’—Mika 6:8.

19 Kupwa vakulinyisa chalumbununa nge twatela kulinyisa hakulyesekesa najishimbi jaYehova jitoma, jajila, mwomwo twapendamina kaha hali ikiye mangana atutwaminyine. Kulinyisa nawa chalumbununa kuvumbika vishinganyeka vyavakwetu navyuma vasaka. Shikaho tweji ‘kutambukanga naKalunga mukulinyisa’ hakutwama kweseka najishimbi jenyi nakuvumbika vishinganyeka vyavakwetu.

20. Kuvwala nakulilenga chetu vyatela kulingisa vakwetu valinge vyuma muka?

20 Lisesa lyetu lyakusakula uvwalo, kalyatela kulingisa vakwetu vatuhuhwasane numba nge twapwa vaka-kulemesa Yehova nyi chiku. Vandumbwetu navatu veka vatela kumona chikupu ngwavo, tweji kwimanyinako Kalunga wakwoloka. Jishimbi jenyi japwa jakwoloka, kaha twafwila kujikavangiza. Tweji kusangejekanga vandumbwetu vaze veji kuvwalanga mukavumbi, nakupwa navilinga vyamwaza vize vinakulingisa vatu vavavwovu michima vetavile mujimbu wamwaza nakutohwesa Yehova. Kusakula kanawa uvwalo nachitulingisa tutwaleho lika kutohwesa Kalunga uze eji kuvwalanga “ukelenga naluvaji.”—Samu 104:1, 2.