“Ngwapwa nguwakuunda, [kaha nawa] nguwakuhola.”—SAMU 131:2.

MYASO: 128, 129

1, 2. (a) Muka-Kulishitu nahase kwivwa ngachilihi nge vyuma vinalumuka mukuyoya chenyi? (Talenu muvwimbimbi wakulivanga.) (b) Kweseka naSamu 131, muchima muka nautukafwa tutwaleho lika kupwa vakuunda?

Lloyd napuwenyi Alexandra vaze vazachilile haMbetele hamyaka 25 vahombele chikuma omu vavalwezele kuya kwimbo. Lloyd ambile ngwenyi: “Ngwamwenenga ngwami mulimo wahaMbetele ukiko wangutelelele kuhambakana milimo yeka. Ngwejivile vene ngwami kwalumuka kana chapwile chamwaza, oloze omu mwahichile vyalumingo vyavindende, ngwevwile kwijiva nge vanangukane kuli Yehova. Ngwevwile namumutwe ngo. Lwola lumwe ngwapwilenga nguwakusuuluka, oloze lwola lukwavo ngwahombelenga.”

2 Nge vyuma vinalumuka mukuyoya chetu, tunahase kuhomba nakuzeya muvishinganyeka. (Vishi. 12:25) Ngocho, chinahase kutukaluhwila kwitavila kwalumuka kana. Jino muchima muka nautukafwa tupwenga ‘vakuunda kaha nawa vakuhola’? (Tangenu Samu 131:1-3.) Tushimutwilenu havyakutalilaho vyavatu vamuMbimbiliya nava vamakumbi ano vaze vasolwele muchima wakuunda omu vyalumukile vyuma mukuyoya chavo.

 “KUUNDA CHAKALUNGA” CHEJI KUKAFWANGA

3. Ukalu muka amwene Yosefwe?

3 Omu Yosefwe apwile namyaka yakusemuka 17, vandumbwenyi vamulanjishile muundungo mwomwo yakumwivwila lwiso. Yosefwe ikiye mwana vazangile chikuma kuli ise. (Kupu. 37:2-4, 23-28) Yosefwe ayanjile hamyaka 13 muEjipitu. Avangililile kupwa ndungo, kufumaho vamukashile mukamenga. Kaha nawa hamyaka yosena eyi, kamwenenga Ise Yakovako. Jino chuma muka chakafwile Yosefwe atwaleho lika kupwa wakuunda nakutalilila kuli Yehova?

4. (a) Yosefwe ashinganyekelenga hachuma muka omu apwile mukamenga? (b) Yehova akumbulwile ngachilihi kulomba chaYosefwe?

4 Omu Yosefwe apwile mukamenga, ashinganyekelenga hajila apwile nakumukafwilamo Yehova. (Kupu. 39:21; Samu 105:17-19) Vilota alotele kuunyike wenyi pamo vikiko vyamukafwile atalilile kuli Yehova. (Kupu. 37:5-11) Pamo alombelenga kuli Yehova mapapa kakavulu. (Samu 145:18) Yehova akumbulwile kulomba chaYosefwe hakumukafwa afwelele ngwenyi ‘mwapwanga nenyi’ lwola lwosena.—Vili. 7:9, 10. *

5. Uno “kuunda chaKalunga” nachitukafwa ngachilihi tutesemo vyuma vyakushipilitu twalitomena?

5 Numba tuhu natumonanga ukalu wakufwana ngachilihi, oloze tunahase kumona omu “kuunda chaKalunga” chinahase kukinga vishinganyeka vyetu. (Tangenu Wavaka-Fwilipi 4:6, 7.) Shikaho nge tunalizakamina, kaha twatela kulombanga Yehova mangana atukafwe tutesemo vyuma vyakushipilitu twalitomena chakuzeneka kuzeya. Tushimutwilenu havyakutalilaho vyavandumbwetu vamakumbi ano vaze Yehova nakafwenga vatesemo vyuma valitomenenene.

LOMBENUNGA YEHOVA AMIKAFWE MUPWENGA VAKUUNDA

6, 7. Uno kuvuluka vyuma tuli nakusaka hakulomba nachiunjisa ngachilihi michima yetu? Hanenu chakutalilaho.

6 Ryan napuwenyi Juliette vazachilenga upayiniya wakulipwila washimbu yayindende. Oloze omu vavalwezele kwecha kuzata upayiniya, vahombele chikuma. Ryan ambile ngwenyi: “Omu vatulwezele mujimbu kana, twalombele kuli Yehova. Twatachikijile ngwetu elu lwapwile lwola lwamwaza twatelelele kusolola lufwelelo lwetu. Halwola kana, vandumbwetu vavavulu muchikungulwilo vapwile vavahya mumuchano, shikaho twalombele Yehova atukafwe mangana tuvahane chakutalilaho chamwaza.”

7 Uno Yehova akumbulwile kulomba chavo tahi? Ryan ambile ngwenyi: “Omu twakumishile kulomba, twevwile nakumuchima hwo, kaha katwahombele chekako. Kuunda chaKalunga chakingile michima yetu navishinganyeka vyetu. Twamwene jino ngwetu, nge natutwalaho lika kumona vyuma mujila yamwaza, kaha Yehova mwatwalaho lika kutuzachisa.”

8-10. (a) Uno shipilitu yaKalunga yinahase kutukafwa ngachilihi nge tunalizakamina? (b) Nge natuzata nangolo milimo yakushipilitu, kaha Yehova mwatukisula ngachilihi?

8 Shipilitu yaKalunga yinahase nawa kutukafwa tuwane visoneka vize navitukafwa tuhakenga vyuma vyakushipilitu kulutwe. (Tangenu Yowano 14:26, 27.) Tuchitalenu chakutalilaho chaPhilip napuwenyi Mary vaze vazachilile haMbetele myaka kafwe 25. Mutukweji vawana, vosena vavali vafwishile manevo nakausoko weka. Kaha nawa vapwile namulimo wakuzakama ise yaMary uze atwama namusongo wakuwongo.

9 Philip ambile ngwenyi: “Hakavanga ngwashinganyekelenga ngwami ngwapwile nalukakachila, oloze kachapwile ngochoko, kwapwile chuma chimwe ngwatelelele kulinga. Omu ngwatangile chihande chimwe muKaposhi Kakutalila wakulinangula, ngwawanyinemo chisoneka chaWavaka-Kolose  1:11 chize changukafwile ngumone ngwami ngwatelelele ‘kukakachila chikuma namuchima wakutalilila chikoki nakuwahilila.’ Echi chisoneka changukafwile ngumone ngwami kangwatela kupwa kaha wakuwahilila nge vyuma vili kanawako, oloze shina hakutachikiza ngwami shipilitu yaKalunga yili nakungukafwa.”

10 Hakuwana nge Philip napuwenyi Mary vatwalileho lika kuzata milimo yakushipilitu, ngocho Yehova avakiswilenga mujijila jajivulu. Chakutalilaho, omu vafumine haMbetele vawanyine vatu vaze vafwilililile kulinangula Mbimbiliya mapapa kakavulu muchalumingo. Mary ambile ngwenyi, “Kupwa navilongesa chatwivwishile kuwaha nakutulingisa twivwenga kwijiva nge Yehova ali nakutulweza ngwenyi vyuma navipwa kaha kanawa.”

KILIKITENU MANGANA YEHOVA AMIKISULE

Natuhasa kulondezeza ngachilihi Yosefwe chamokomoko naukalu tuli nakuhitamo? (Talenu palangalafu 11-13)

11, 12. (a) Vyuma muka alingile Yosefwe numba Yehova amukisule? (b) Uno Yosefwe vamukiswile ngachilihi hakumika chenyi?

11 Nge vyuma vinalumuka mukuyoya chetu, kaha tunahase kulizakamina chikuma havyuma navikasoloka kulutwe. Oloze omu keshi mukiko chapwile kuli Yosefweko. Ikiye amwenenga vyuma mujila yamwaza numba tuhu amwenenga ukalu, ngocho Yehova amukiswile. Nahalwola apwile mukamenga azachilenga kala milimo vamuhanyinenga kuli mukulwane wakamenga ngana muze alingilenga muzuvo yaPotefwale.—Kupu. 39:21-23.

12 Likumbi limwe, Yosefwe vamutongwele kupwa muka-kulama vakwavo vafunge vavali vaze vazachililenga kuchipango chamwangana Fwalo shimbu kanda vavakase. Ava malunga vatachikijile ngwavo Yosefwe apwile mutu walikoji ngocho vamulwezele vilota valotele. (Kupu. 40:5-8) Yosefwe katachikijile ngwenyi kushimutwila navo nachimunehela nganyo yayineneko. Omu mwahichile myaka yivali, Yosefwe vamufumishile mukamenga, kaha halikumbi vene lize vamutongwele kupwa muhato kuli Fwalo.—Kupu. 41:1, 14-16, 39-41.

13. Vyuma muka twatela kulinga numba Yehova atukisule chamokomoko naukalu natumona?

13 Ngana muze chapwile kuli Yosefwe, nayetu tunahase kumona ukalu uze katweshi kuhasa kukumisa mungolo jetuko. Oloze nge natupwa namuchima wakutalilila chikoki nakuzata nangolo, kaha Yehova mwatukisula mwamunene. (Samu 37:5) Numba tuhu lwola lumwe tunahase “kukakasana,” olozenyi ‘katweshi kuhombako’ ngana muze asonekele Paulu. (Koli. 2, 4:8; kwinyikila chamwishi) Awa mazu ahanjikile Paulu anahase kutesamo nakuli yetu chikumanyi nge natuhaka muchima kumulimo wakwambulula.

HAKENUNGA MUCHIMA KUMULIMO WAKWAMBULULA

14-16. Uno Fwilipu asolwele ngachilihi nge ahakile muchima kukwambulula chamokomoko nakwalumuka chavyuma?

14 Twatela kulondezezanga Fwilipu uze ambulwilenga mujimbu wamwaza natwima  chamokomoko nakwalumuka chavyuma. Lwola lumwe omu alingile Setefwano nafu lyehi, vaka-Kulishitu vaze vapwile muYelusalema vavayanjishilenga. * Halwola kana Fwilipu atwalileho lika kuzata mulimo wakwambulula natwima. (Vili. 6:1-6) Omu vaka-kukavangiza Kulishitu valimwangile, Fwilipu kalitwaminyinyine kwambululako. Ayile nakwambulwila munganda yaSamaliya muze vatu vapwile nakusakiwa kwivwa mujimbu wamwaza.—Mat 10:5; Vil 8:1, 5.

15 Fwilipu alisuwile kuya nakwambulwila kwosena kuze shipilitu yaKalunga yamutwaminyinyinenga. Shikaho Yehova amuzachishile mangana ayenga nakwambulwila kuvihela kuze kwapwile vatu vasakiwile kuvambulila mujimbu wamwaza. Vaka-Samaliya vasuulukile namuchima asolwele Fwilipu wakuhona kutala vatu kumeso mwomwo vavamwenenga ulumbi kuli vaYuleya. Kahechi chalingishile vatu vavavulu vetavile mujimbu wamwaza ‘nakulinunga hamwe.’—Vili. 8:6-8.

16 Shipilitu yaKalunga yatwaminyinyine cheka Fwilipu kuya nakwambulwila kunganda yaKesaliya naAzotu kuze kwavulile vaka-mafuchi eka. (Vili. 8:39, 40) Omu mwahichile myaka 20 kufuma haze ayile nakwambulwila kuSamaliya, chiyoyelo chenyi chalumukile cheka. Apwile jino hichisemi ngocho atwamine munganda yimwe nakuzachilamo mulimo wakwambulula chakuzeneka kutambwojoka ngana muze alingilenga hakavanga. Chamokomoko nakwalumuka chavyuma, Fwilipu atwalileho lika kwambulula natwima. Kahechi chalingishile Yehova amukisule natanga yenyi.—Vili. 21:8, 9.

17, 18. Uno kuhaka muchima kumulimo wakwambulula nachitukafwa ngachilihi nge vyuma vinalumuka?

17 Vandumbwetu vavavulu vaze vatwama mumulimo washimbu yosena vanahase kwitavila chikupu ngwavo, kuzata mulimo wakwambulula natwima chinavakafwe vahone kuzeya chamokomoko nakwalumuka chachiyoyelo. Chakutalilaho, omu ndumbwetu Osborne napuwenyi Polite vamuSouth Africa vafumine haMbetele, vashinganyekele ngwavo navawana washi milimo nazuvo yakutwama. Oloze Osborne ambile ngwenyi: “Chaluvinda katwawanyine washi milimo ngana muze twashinganyekeleko.” Puwenyi nawa ambile ngwenyi: “Chikupu vene, wapwile hiukalu waunene mwomwo mwahichile tukweji vatatu chakuzeneka kuwana milimo, kaha nawa katwapwile najimbongoko.”

18 Jino vyuma muka vyavakafwile omu vapwile muukalu kana? Osborne ambile ngwenyi: “Kwazana mumulimo wakwambulula hamwe navandumbwetu  chatukafwile tumone vyuma mujila yamwaza. Twazachilenga mulimo wakwambulula natwima muchishishisa chakutwama kaha nakulizakamina, kahechi chatukafwile tupwenga vakuwahilila. Twatwalileho kutondatonda milimo, kaha kutwala muze twayiwanyine.”

TALILILENUNGA KULI YEHOVA NAMUCHIMA WOSENA

19-21. (a) Chuma muka nachitukafwa tupwenga vakuunda? (b) Uno kumona vyuma mujila yamwaza nge chiyoyelo chinalumuka nachitunganyalisa ngachilihi?

19 Vyakutalilaho tunashimutwila vinatukafwe tutachikize ngwetu, kachi nge natuzatanga nangolo nakufwelela Yehova halwola navyalumuka vyuma, kaha natupwa vakuunda. (Tangenu Mika 7:7.) Nachitukafwa nawa tumone nganyo yeji kufumanga hakumona vyuma mujila yamwaza. Polite uze tunavuluka lyehi ambile ngwenyi: “Kutulweza tufume haMbetele nakuya kwimbo chinangukafwe ngumone ovyo chapwila chachilemu kupendamina hali Yehova numba nge chiyoyelo chinakaluhwa. Oholyapwa jino ngunatungu usoko wakukola naYehova.”

20 Mary uze twavulukanga kumaputukilo achili lika nakulama ise,kaha nawa ali lika nakuzata upayiniya. Ambile ngwenyi: “Ngwalinangula jino ngwami kachi nge ngunahombo, kaha ngwatela kulombanga kuli Yehova nakwecha kulizakamina. Ngunalinangula nawa nge, kachi nge nangulwezanga Yehova ukalu wami wosena, kaha nachikangukafwa nakulutwe.”

21 Lloyd napuwenyi Alexandra vaze twavulukanga kumaputukilo vambile ngwavo, kwalumuka chavyuma mukuyoya chavo chesekele lufwelelo lwavo mujijila jize kavashinganyekeleko. Oholyapwa jino veji kwambanga ngwavo: “Cheseko kana chinatukafwe tumone numba nge tukwechi lufwelelo lwakukola nangolo jakutukafwa tutwaleho lika kupwa vakumika mulwola lwalukalu nyi chiku. Oholyapwa jino twapwa vakuwahilila.”

Kwalumuka chavyuma mukuyoya chinahase kutunehela jikisu jajivulu (Talenu palangalafu 19-21)

22. Uno kuzata nangolo nge vyuma vinalumuka mukuyoya nachitukafwa ngachilihi?

22 Kachi nge kuyoya chenu chinalumuka pamo mwomwo yavyuma vanalumunako muliuka, chipwe mwomwo yamisongo, chipwe ukalu wamutanga, kaha mwatela kwanuka ngwenu Yehova mwamizakama nakumikafwa halwola lwakutamo. (Hep 4:16; Petu. 1, 5:6, 7) Shikaho, oholyapwa twalenuho lika kuzata nangolo numba nge vyuma vinalumuka. Lombenunga nakupendamina hali Yehova. Kulinga ngocho nachimikafwa mupwenga vakuunda chamokomoko nakwalumuka chavyuma mukuyoya chenu.

^ par. 4 Omu Yosefwe afumine mukamenga, amwene jino ngwenyi Yehova namuvendejeka hakumuhana mwana walunga. Ngocho amulukile ngwenyi ikiye Manase mwomwo ambile ngwenyi, “Kalunga nangulingisa nguvulyame malwa ami osena.”—Kupu. 41:51, kwinyikila chamwishi.

^ par. 14 Talenu chihande chakwamba ngwavo “Uno Mwatachikiza Tahi?” mumangazini yino.