KUFUMA vene kunyima, vaka-kulemesa Kalunga vamuchano vamona kuhana mawana kupwa chachilemu. VaIsalele vahanyinenga mawana avimuna, kaha vaka-Kulishitu veji kuhananga Kalunga “chimuna wakuvatula wakumwalisa.” (Hepe. 13:15, 16) Vatu vaze veji kulisuulanga nakuhana mawana veji kupwanga vakuwahilila kaha nawa Kalunga eji kuvakisulanga. Tutalenu havyakutalilaho vyavatu vamwe vaze vakiswile mwomwo yakulisuula kuhana mawana.

Hana ngamba yaKalunga wakushikulu afwililile kupwa namwana, oloze apwile mumba. Ashikile Yehova mukulomba ngwenyi nge mwasema mwana walunga kaha mwakamuhana kuli ‘Yehova akamuzachilenga mukuyoya chenyi chosena.’ (Samwe. 1, 1:10, 11) Mukuhita chalwola, Hana emichile, kaha asemene mwana walunga nakumuluka ngwenyi ikiye Samwele. Omu asumukile Samwele, amutwalile kutavanaku, ngana muze ashikile. Yehova akiswile Hana hamuchima wenyi wakulisuula. Ngocho asemene vana veka vatanu, kaha Samwele apwile kapolofweto kaha nawa muka-kusoneka Mbimbiliya.—Samwe. 1, 2:21.

Navaka-Kulishitu makumbi ano veji kulisuulanga kuzachila Tengi yavo ngana muze alingile Hana naSamwele. Yesu atushika ngwenyi natukatambula fweto hakulisuula chetu kuzachila Yehova.—Mako 10:28-30.

Mulikulukaji lyamyaka lyakulivanga, kwapwile muka-Kulishitu umwe walijina lyaNdokase uze “azachilenga milimo yamwaza yayivulu nakuhananga mawana akutetela” kuli vakwavo. Chaluvinda Ndokase “avijile, kaha afwile,” ngocho vandumbwenyi vosena muchikungulwilo vahombele. Omu vandumbwenyi vevwile ngwavo Petulu apwile muze mungalila, vayile nakumulembelela ezenga. Achishinganyekenu ocho kuwaha vevwile omu Petulu asangwile Ndokase! Ou ikiye apwile mutu watete kusangula kuli kaposetolo. (Vili. 9:36-41) Kalunga kavulyamine milimo azachilenga Ndokaseko. (Hepe. 6:10) Mujimbu wenyi wakusolola muchima wakuhana vausoneka muMbimbiliya mangana tulinanguleko nakufwila kumulondezeza.

Kaposetolo Paulu nayikiye atusela chakutalilaho chamwaza chakupwa namuchima wakulisuula hakuzachisa kanawa lwola lwenyi nakuzachila vakwavo. Ngocho asonekelele vandumbwenyi vamuKolinde ngwenyi: “Ami kwami nanguwahilila chikuma kuzachisa vyuma vyami nakulihana ami ivene mwosena hali enu.” (Koli. 2, 12:15) Paulu alinangwile nge kulisuula kuzachila vakwavo cheji kunehanga kuwahilila, chikumanyi cheji kwivwisanga Yehova kuwaha.—Vili. 20:24, 35.

Chapundu vene, Yehova eji kwivwanga kuwaha nge natuzachisa lwola lwetu nangolo jetu mangana tukundwize Wangana nakukafwa vandumbwetu. Uno kuliko jijila jeka jize tunahase kukundwijilamo mulimo wakwambulula tahi? Eyo. Tunahase kusolola ngwetu twavumbika Kalunga hakuhana kala vyuma tuli navyo. Mawana kana veji kuwazachisanga hakukafwa vamishonali navandumbwetu veka vaze vazata mulimo washimbu yosena. Veji kuwazachisanga nawa kukusoneka nakwalumuna mikanda nakutunga jivindiyo, nakukukafwa vandumbwetu vaze veji kupwanga muukalu wakulijila, nakukutunga jiZuvo jaWangana. Twafwelela chikupu ngwetu “muka-kuhana navakamukisula.” Shikaho nge natuhana wana wetu kuli Yehova, kaha natusolola chikupu ngwetu twamuvumbika.—Vishi. 3:9; 22:9.