“[Yehova] amisanyikile kufuma mumilima nakumineha mukumunyika chenyi chakukomwesa.”—PETU. 1, 2:9.

MYASO: 95, 74

1. Lumbununenu vyuma vyasolokele hakunongesa Yelusalema.

MU 607 B.C.E., maswalale vavaMbavilone vaze vatumine kuli Mwangana Nevukataneza wamuchivali valukukile nganda yaYelusalema. Mbimbiliya yavuluka vyuma vyasolokele ngwayo: “[Nevukataneza] ajihile vakweze javo napoko yamukwale muchihela chavo chajila. Katetelele vakweze jamalunga navana vamapwevo, tushinakaji chipwe vitonjiko. . . . Ochele zuvo yaKalunga wamuchano nakupuzula kembwe yaYelusalema. Ochele nawa tuposhi twayo vakukola nakunongesa vyuma vyavilemu vyosena.”—Miji. 2, 36:17, 19.

2. Yehova ahuhumwine ngachilihi vatu kutalisa kukunongesa Yelusalema, kaha vyuma muka vyasolokele kuli vaYuleya?

2 Vatu vamuYelusalema kavalikomokeleleko hakuvalukuka nakunongesa nganda yavo. Mwomwo hamyaka yayivulu, tupolofweto vaKalunga vavalwezelenga ngwavo nge navalelesa jishimbi jaKalunga, navakapwa vandungo muMbavilone myaka yosena. Vavalwezele ngwavo vaYuleya vavavulu navakavajiha napoko yamukwale, kahava navakasalaho navakavatwala muundungo muMbavilone. (Yele. 15:2) Kuyoya chapwile ngachilihi muundungo? Uno mulwola lwavaka-Kulishitu kwapwile undungo  walifwanyine nauze wamuMbavilone tahi? Nge mukiko, kaha wapwileko mwaka uka?

OMU CHAPWILE CHIYOYELO MUUNDUNGO

3. Uno undungo wavaIsalele muMbavilone walihandunwine ngachilihi naundungo wamuEjipitu?

3 Vyuma vahanjikile vapolofweto vyateselemo. Yehova ahanjikile chimweza kuhichila muli Yelemiya ngwenyi vaze navakaya muundungo vatela kukasuuluka nachiyoyelo navakawana kuze. Ambile ngwenyi: “Tungenu jizuvo [muMbavilone] nakutwamamo. Tumbenu mitondo mumilemba nakulya mihako yayo. Tondenunga kuunda changanda yize ngunamitwaleko muufunge. Yilombelenuko kuli Yehova, mwomwo kachi nge nganda kana nayipwa mukuunda, kaha nayenu namutwama mukuunda.” (Yele. 29:5, 7) Vaze vakavangijile vyuma avalwezele Kalunga vatwamine kanawa muMbavilone. Vaze vavakwachile ufunge vavetavishile kuzatako milimo yimwe yakulikafwa nayo mukuyoya. Ava vandungo vapwile nalisesa lyakulitambukila mulifuchi. MuMbavilone mwapwile kusekasana chachivulu, kaha mijimbu vanavumbula kalinwomu yinasolola nge vaYuleya valinangwile vyakusekasana, veka vapwile vitotombwe. VaYuleya vamwe vahetele luheto lwaluvulu. Undungo wavaIsalele muMbavilone kawalifwanyine naundungo uze vavakwachile muEjipituko.—Tangenu Kulovoka 2:23-25.

4. Veya vapwile nakuyanda muundungo muMbavilone, kaha ukalu muka vamwenenga hakulemesa Kalunga mujila asaka?

4 VaYuleya vapwile navyuma vyakumujimba muze muundungo, nyi ngachilihi kushipilitu? Tembele yaYehova nalijiko lyakulumbila vavyenyekele, kaha milimo yaupilishitu nawa kayapwile nakutambuka mukulongako. Havandungo kana hapwile navangamba jaKalunga vakushishika vaze kavalingile chuma chakuhenga numba chimweko, oloze navakiko vapwile nakuyanjila kumwe. Chipwe ngocho vatwalileho lika kwononoka Jishimbi jaYehova. Chakutalilaho, Ndanyele namasepa jenyi vatatu vaShatalake naMeshake naAvete-nengo valihendele kuvyakulya vize vakanyishile vaYuleya. Ndanyele alombelenga kuli Kalunga lwola lwosena. (Ndanye. 1:8; 6:10) Oloze chapwile chachikalu vaYuleya vaze vevwilenga Kalunga woma kukavangiza vyuma vyosena vavulukile muJishimbi.

5. Vyuma muka Yehova ashikile vatu jenyi, kaha mwomwo ika lushiko kana lwapwile lwalulemu?

5 Uno vaIsalele vafwelelele ngwavo navakeza kasokoka nakulemesa Kalunga mujila yize asaka tahi? Halwola kana chasolokele nge kaveshi kukasokokako. Vaka-Mbavilone kavasokwelenga vandungo javoko. Oloze omu keshi mukiko ajinyine Yehova Kalungako. Ashikile ngwenyi vatu jenyi navakasokoka, kaha mukiko vene, vasokokele. Jishiko jaKalunga jeji kutesangamo lwola lwosena.—Isa. 55:11.

UNDUNGO WACHIFWANYISA MAKUMBI ANO

6, 7. Mwomwo ika chinapwila chakutamo kuwana ulumbunwiso wauhya hachihande chavangamba jaKalunga chakwingila muundungo?

6 Kutala vaka-Kulishitu vahitaho lyehi muundungo ngana muze chapwile kuli vaIsalele muMbavilone tahi? Hamyaka yayivulu Kaposhi Kakutalila navulukanga nge vaka-kuzachila Kalunga vamakumbi ano vengilile muundungo muMbavilone yachifwanyisa mu 1918 kaha vavalowelemo mu 1919. Vyuma natushimutwila muchihande chino nechi nachikavangizaho navihanjika haulumbunwiso wauhya.

7 Chakutalilaho: Mbavilone Yayinene yapwa chiyulo chakaye chakwitava chamakuli. Shikaho nge vatu jaKalunga vapwile muundungo muMbavilone mu 1918, kaha vatelele kukundwiza kwitava chamakuli muvyuma  vimwe. Oloze chasoloka nge mumyaka yakukokela kuJita yaKaye yatete, vatu jaKalunga vakuwavisa vaputukile kufuma muMbavilone Yayinene keshi kwingila muundungoko. Numba tuhu vawavisa vavayanjishile mujita yakaye yatete, vaka-jifulumende vakiko vavayanjishilenga keshi Mbavilone Yayineneko. Echi chasolola nge vatu jaKalunga kavengilile muundungo waMbavilone Yayinene mu 1918.

MWAKA UKA VENGILILE MUUNDUNGO WAMBAVILONE?

8. Lumbununenu omu kwitava chamuchano vachipihishile. (Talenu muvwimbimbi wakulivanga.)

8 HaPendekoseta 33 C.E., vaYuleya navaze valumukile kupwa vaYuleya vavawavishile nashipilitu yajila. Ava vaka-Kulishitu vavahya vapwile ‘vatu vasakula, vapilishitu vawangana, muyachi wajila, vatu aheta Kalunga kupwa luheto lwakulipwila.’ (Tangenu WaPetulu 1, 2:9, 10.) Vaposetolo vazakaminenga vikungulwilo vyavatu jaKalunga hamyaka vayoyelenga. Oloze omu vafwile vaposetolo, malunga vamwe vahanjikilenga ‘vyuma vyakuhingama mangana vakoke tumbaji vavakavangizenga vakiko.’ (Vili. 20:30; Teso. 2, 2:6-8) Ava malunga vamwe vapwile tulama ‘navambishopu’ muvikungulwilo. Vatwamina vamukwitava chamakuli vaputukile jino kuvula, numba tuhu Yesu alwezele vaka-kumukavangiza ngwenyi: “Muvosena mwapwa muvandumbu.” (Mateu 23:8) Vaka-kunangula vaze vayile puho vazangile kunangula chaAristotle naPlato, kaha vaputukile kunangula vyuma vyamakuli nakujimbangana kunangula chamuchano chamuMazu aKalunga.

9. Lumbununenu omu kwitava chamakuli vachikundwijile kuchiyulo chavaka-Loma, kaha vyuma muka vyafuminemo?

9 Mumwaka wa 313 C.E., kwitava kanechi chamakuli vachitavishile muchiyulo chaMwangana wavaLoma Constantine. Kufuma vene haze, chachi najifulumende jazachililenga hamwe. Chakutalilaho, omu chakumine Chiwanyino chakuNicaea, mwangana Constantine uze nayikiye apwile kuchiwanyino kana ahanyine lushimbi lwakukasa kapilishitu Arius nakumutwala muundungo, mwomwo akanyine kuvuluka Yesu ngwenyi Kalunga. Kufumaho muchiyulo chamwangana Theodosius I (379-395 C.E.), Chachi yaKatolika yikiko yapwile jino kwitava chaWangana wavaLoma yize vapihishile nakwitava chamakuli. Vatu valinangula vyakushikulu vamba ngwavo vaka-Loma valumukile nakupwa “vaka-Kulishitu vamakuli” mulikulukaji lyamyaka lyamuchiwana. Halwola kana hakiko vaka-Kulishitu vamakuli vengilile mumauka akwitava chaWangana wavaLoma nakupwa jino Mbavilone Yayinene. Chipwe ngocho, vaka-Kulishitu vawavisa vavandende vaze vemanyinyineko tiliku, vazachile nangolo nakulemesa Kalunga mujila yamuchano, oloze kavevwakanyine chikumako. (Tangenu Mateu 13:24, 25, 37-39.) Chapundu vene, vapwile muundungo muMbavilone Yayinene.

10. Vyuma muka vyalingishile vatu vamwe vakane kunangula chamuchachi?

10 Chipwe ngocho, omu mwahichile myaka yayivulu kufuma hakufwa chaYesu, vatu vavavulu vatangile Mbimbiliya muchiHelase namuLatinyi. Ngocho, vahashilenga kukekesa Mazu aKalunga nakuwesekesa kukunangula chamuchachi. Vatu vamwe vakanyine kunangula chamuchachi, mwomwo yavyuma valinangwilenga muMbimbiliya. Oloze chapwile chachikalu kuhanjika hatoma vyuma kana, mwomwo vavajihilenga.

11. Vyuma muka valingile vatwamina vamukwitava kuMbimbiliya?

11 Mukuhita chalwola vatu vavavulu  kavevwishishilenga Mbimbiliyako, mwomwo lilimi vayisonekelelemo lyapwile lyalikalu. Oloze omu vatu vasakile kuyalumuna mulilimi lyalyashi, vaka-chachi vavakanyishilenga. Shikaho vatwamina navaze vatanga chikuma vakiko kaha vatangilenga Mbimbiliya, numba tuhu vamwe kavatachikijile kutanga nakusoneka kanawako. Vosena vaze vakanyinenga vyuma vanangwilenga muchachi, vavazangamishilenga. Vangamba jaKalunga vawavisa vakushishika valiwanyinenga mumazavu amandende mukusweka. Ngana muze chapwile kuli vangamba jaKalunga muundungo muMbavilone, ‘navapilishitu vawangana’ vakuwavisa kavazachilenga vyuma mukulongako. Chapundu vene Mbavilone Yayinene yahakile vatu muundungo.

NAKUPWA KUMUNYIKA

12, 13. Vyuma muka vivali vyalingishile vatu jaKalunga vaputuke kusokoka kuMbavilone Yayinene? Lumbununenu.

12 Uno vaka-Kulishitu vamuchano vashinganyekele ngwavo navakahasa kulemesa Kalunga hatoma tahi? Eyo. Kumunyika chakushipilitu chaputukile chindende chindende mwomwo yavyuma vivali vyavilemu. Chatete, mulikulukaji lyamyaka lyakusokesa 15 kwapwile makina amahya aze avakafwile kusoneka mikanda. Shimbu kanda makina kana, Mbimbiliya vayisonekelenga namavoko. Ngocho yapwile yayikalu kuyiwana, kaha nawa yandando yayinene. Mwahichilenga tukweji 10 numba muka-kusoneka wakwipangweji akumise kusoneka Mbimbiliya yimwe. Kaha nawa mapapilo vazachishilenga apwile andando yayinene. Oloze muka-kusoneka namakina asonekelenga mapapilo 1,300 halikumbi.

Makina amahya navaka-kwalumuna Mbimbiliya vakuhamuka vyakafwile vatu jaKalunga vaputuke kusokoka kuMbavilone Yayinene (Talenu palangalafu 12 na 13)

13 Chamuchivali, kwapwile malunga vakuhamuka mulikulukaji lyamyaka lyakusokesa 16 vaze vaputukile kwalumuna Mbimbiliya mulilimi lyalyashi lize vevwishishilenga vatu. Malunga kana vahakile kuyoya chavo muponde, mwomwo vaka-chachi vakanyishile  mulimo kana. Makumbi aze, nge mutu vanamuwane naMbimbiliya, vamuzangamishilenga chikuma chipwe vene kumujiha. Kutwala muze jiMbimbiliya javulile kuvatu kaha vaputukile kujitanga. Omu vayitangilenga, vahulishilenga ngwavo: ‘Uno halihi muMazu aKalunga vasoneka pakatole, chipwe kuhana mawana kuvafu, chipwe kuhana mawana popu namihato jenyi?’ Kuhulisa vatwimina vamukwitava vihula kana chapwile kasautu. Vatu vavazangamishilenga hakukana vyuma vanangwilenga muchachi vize vyapendaminyine hakunangula chamakuli chaAristotle naPlato, vaze vapwileko shimbu kanda Yesu Kulishitu asemuke. Ngocho chachi yasopeselenga vatu, kaha vaka-fulumende vajihilenga vatu kana. Valingilenga ngocho mangana vevwise woma vatu valitwamine kutanga Mbimbiliya nakuhona kuvahulisa vihula. Jila kana yazachile hakavanga, oloze kutwala muze vatu vakuhamuka vatwalileho lika kulinangula Mbimbiliya numba tuhu vavakanyishile kuli vatwamina vamuMbavilone Yayinene. Vamwene kuwaha chaMazu aKalunga, kaha vasakile kulinangula vyavivulu. Kufuma vene aha vatu jaKalunga vaputukile kusokoka kukwitava chamakuli.

14. (a) Vyuma muka vyalingishile vatu vamwe vatachikize muchano wamuMbimbiliya muji 1800? (b) Lumbununenu vyuma alingile Ndumbwetu Russell hakutondatonda muchano.

14 Vatu vavavulu vaze vasakile kulinangula muchano vachinyinyine kumafuchi eka kuze kavakanyishile kulinangula Mazu aKalungako. Vasakile kutanga nakulinangula Mbimbiliya nakushimutwila navakwavo chakuzeneka wakuvashinyinyika. Chakutalilaho, muUnited States mukiko Charles Taze Russell navakwavo vaputukile kulinangula Mbimbiliya muji 1800. Ndumbwetu Russell apwile nakukekesa awane kwitava chize chapwile nakunangula muchano. Akekesele kwitava chosena kuhakilako vene nachize kachapwa chavaka-Kulishituko. Kaha awanyine nge kakwapwile kwitava chize chanangwilenga muchano wamuMazu aKalungako. Halwola lumwe Russell namasepa jenyi valiwanyine navatwamina vamukwitava mangana vavalumbunwine muchano wamuMbimbiliya uze vawanyine, kaha vashinganyekele ngwavo navetavila vyuma vavalwezele nakuvinangula vatu javo mujichachi. Oloze vaze vatwamina vamukwitava vakanyine. Vaka-Kulinangula Mbimbiliya valikashile ngwavo: Katweshi kulifutula navatu vaze vakundwiza kwitava chamakuliko.—Tangenu Wavaka-Kolinde 2, 6:14.

15. (a) Lwola muka vaka-Kulishitu vengilile muundungo waMbavilone Yayinene? (b) Vihula muka navakumbulula muchihande chinakavangizaho?

15 Tunawane jino nge vaka-Kulishitu vamuchano vengilile muundungo wachifwanyisa muMbavilone omu vaposetolo vosena vafwile. Oloze tunahase kulihulisa ngwetu: Vyuma vyeka muka vyasolola nge vaka-Kulishitu vawavisa vaputukile kusokoka muundungo waMbavilone Yayinene mumyaka yakukokela ku 1914? Uno Yehova apihililile navangamba jenyi hakuhona kuzata natwima mumulimo wakwambulula halwola lwaJita yaKaye yatete tahi? Kutala kwapwile vandumbwetu vamwe vaze vazanyine muvihande vyalifuchi nakwivwisa Yehova kupihya tahi? Kachi nge vaka-Kulishitu vengilile muundungo wakwitava chamakuli mulikulukaji lyamyaka lyamuchivali, kaha mwaka uka vasokokele? Vihula kana vyamwaza, kaha navavikumbulula muchihande chinakavangizaho.