YESU alwezele vaka-kumukavangiza ngwenyi navakalivwisa kuwaha mulimo wakwaha mumakumbi akukuminyina. (Mateu 9:37; 24:14) Mazu enyi ali nakutesamo chikupu mungalila yaTranscarpathia, muUkraine. Jimbaka jitatu hajimbaka jize jatwama mungalila kana muli vikungulwilo vyakuheta ku 50 navaka-kwambulula vakuzomboka 5,400. * Mungalila kana Vinjiho jaYehova vapwile nakuvulilako chikuma.

Uno vatu vamungalila kana vapwa ngachilihi? Ndumbwetu Vasile uze atwama mungalila kana ambile ngwenyi: “Vatu vatwama mungalila kana vavumbika vyuma yanangula Mbimbiliya, vazanga chiyulo, veji kutwamanga mukuunda najitanga javo, kaha nawa vasaka kulikafwa umwe namukwavo.” Ambile nawa ngwenyi: “Numba tuhu kakavulu kavetavila vyuma twafwelelako, oloze nge mutu mwavalweza vyamuMbimbiliya veji kwivwililanga kanawa.”

Chipwe ngocho, vandumbwetu cheji kuvakaluhwilanga kwambulwila mungalila yize yatwama navaka-kwambulula vavavulu kuhambakana vatu vakwambulwila. Chakutalilaho, chikungulwilo chimwe chili navaka-kwambulula 134, oloze ngalila yavo yakwambulwila yili najizuvo jakwambulwila 50 kaha. Vaka-kwambulula veji kuhasanga ngachilihi kuzata mulimo wakwambulula?

Vandumbwetu vavavulu veji kushinganyekanga kuya nakuzachila kuze kuli nakusakiwa vaka-kwambulula. Ndumbwetu Ionash wamyaka yakusemuka 90 ambile ngwenyi: “Kweseka nangalila yetu yize tweji kwambulwilanga ,kuzuvo hizuvo kweji kuyanga vaka-kwambulula vavali. Nayami ngweji kwambulwilanga mungalila kana, kaha nawa ngwatambukilenga tunda yajikilomita 160 kuya nakwambulwila mungalila muze vahanjikilenga lilimi lyaHungarian muze kamwapwile vaka-kwambululako. Oloze misongo yinangulingisa nguhone kuzata kanawa.” Vaka-kwambulula vatela kulisuula kuya nakwambulwila kujingalila jeka. Ionash ambile ngwenyi: “Ngwahindukilenga nalwola lwa 04:00 kuya nakunyina masuwa, kaha ngwambulwilenga swi nomu yejilenga masuwa nalwola lwa 18:00 nakukinduluka jino kwimbo. Ngwalingilenga ngocho kavali chipwe katatu muchalumingo.” Kutala vyuma alingile vyamwivwishile kuwaha tahi? Ambile ngwenyi: “Ngwalivwishilenga kuwaha kwazana mumulimo kana mwomwo ngwakafwile tanga yimwe yilinangule muchano.”

Twatela kutachikiza ngwetu vandumbwetu vamwe muvikungulwilo vyamungalila kana kavahasa kuya nakwambulwila kuvihela vyakwakusukuko. Chipwe ngocho, vandumbwetu vosena kuhakilako natushinakaji veji kufwilanga kwambulwila mungalila vavahana kwambulwila. Kuheta mu 2017, vatu vejile kuKwanuka Kufwa chaMwata mujingalila eji jitatu vapwile vavavulu chikuma kuhambakana vaka-kwambulula. Shikaho, kala kwosena okwo tuli nakuzachila ‘tupwenunga navyuma vyavivulu vyakuzata mumulimo waMwata.’—Koli. 1, 15:58.

^ par. 2 Majina ajimbaka kana shina Hlybokyy Potik, naSerednye Vodyane, naNyzhnya Apsha.