DANIEL NAMIRIAM valimbachile muSeptember 2000, kaha vatwaminenga munganda yaBarcelona, muSpain. Daniel ambile ngwenyi: “Twayoyelenga chiyoyelo chauhando. Twapwilenga najimbongo jajivulu, ngocho twayilenga nakulya vyakulya kujizuvo jakulila jandando yayinene. Twavwalililenga uvwalo wandando yayinene chikuma, nakutambwojokela kumafuchi eka. Kaha nawa twazachilenga muwande shimbu yosena.” Oloze vyuma vyalumukile.

Hakukunguluka changalila mu 2006, Daniel evwile kuwaha chihande ahanjikile ndumbwetu uze ahulishile ngwenyi: “Kutala tuli nakuzata nangolo jetu josena mangana tukafwe vaze vali ‘nakutalyangila nakuya kukufwa’ vawane jila yakuya kukuyoya chahaya myaka yosena tahi?” (Vishi. 24:11) Chihande kana chashindakanyine hakulema chakwambulula mujimbu wamuMbimbiliya wakuyovola vatu. (Vili. 20:26, 27) Daniel ambile ngwenyi, “Ngwevwile kwijiva nge Yehova apwile nakuhulisa yami.” Ndumbwetu kana ahanjikile nawa ngwenyi nge natuzata chikuma muwande, kaha natupwa vakuwahilila. Daniel amwene ngwenyi mazu kana amuchano. Halwola kana Miriam apwile lyehi payiniya kaha apwilenga wakuwahilila mwomwo yakuzata mulimo kana.

Daniel ambile ngwenyi: “Ngwamwene jino ngwami ngwatelelele kwalumunako vyuma.” Akeheseleko jola jakuzata kumilimo, kaha aputukile kuzata upayiniya. Ashinganyekele ngwenyi nge navaya napuwenyi nakuzachila kuze kuli nakusakiwa vaka-kwambulula Wangana, navakalivwisa kuwaha chikuma.

VAMWENE UKALU NAKUPWA JINO VAKUWAHILILA

Kuheta muMay 2007, Daniel naMiriam vechele milimo yavo nakuya kuPanama, kulifuchi lize vatambukilile lwola lumwe. Kungalila yaBocas del Toro Archipelago kukalungalwiji waCaribbean, kwatwama matungu amavulu, kaha kwapwilenga chikuma vatu vaze vahanjikilenga lilimi lyaGuaymi. Daniel naMiriam vashinganyekele ngwavo vanahase kutwama kuze hatukweji 8 kweseka najimbongo valamine.

Vatambukilenga hajikinga nakuzauka tulwiji mumato. Veji kwanukanga tunda yajikilomita 32 vatambukile halwola lwatete, kaha vakandukilenga mikinya yayisuku chikuma nakuwema namusana. Ngocho vazeyele chikuma, kaha Daniel asakile nakulezumuka. Oloze omu vaputukile kwambulwila mungalila kana, vatu vavasolwelelenga chisambo, chikumanyi omu vaputukile kuhanjika lilimi lyavatu kana. Nakushimbula chiku, vaputukile kutetekela vilongesa vyaMbimbiliya 23.

Oloze vahombele omu jimbongo vapwile najo jakumine. Daniel ambile ngwenyi: “Twaputukile kulinyenga hakuwana nge twatelelele jino kukinduluka kuSpain. Kaha twatelelele kuseza vilongesa vyetu, ngocho twevwile chikuma kupihya.” Oloze omu mwahichile kaha kakweji umwe, vatambwile mujimbu wamwaza. Miriam ambile ngwenyi: “Vatutongwele tuzate upayiniya wakulipwila. Twawahililile chikuma mwomwo twatwalilileho lika kutwama mungalila kana nakuzata mulimo wetu.”

CHUMA CHAVEVWISHILE KUWAHA CHIKUMA

Mu 2015, hakuwana nge liuka lyakeheseleko vatu vakuzata mulimo wakulipwila, Daniel naMiriam vavalwezele vechenga upayiniya wakulipwila nakuzata jino upayiniya washimbu yosena. Vyuma muka valingile? Vafwelelele mazu atwama hali Samu 37:5 akwamba ngwavo: “Itavila Yehova akutwaminyine mujila yove. Pendamina hali ikiye, kaha mwakukafwa.” Vawanyine milimo yize yavakafwilenga kuwanako jimbongo jakulikafwa najo, kaha makumbi ano vali nakuzachila muchikungulwilo chamungalila yaVeraguas, muPanama.

Daniel ambile ngwenyi: “Shimbu twapwile muSpain, katwashinganyekele ngwetu tunahase kuyoya chakuhona jimbongo jajivuluko. Oloze oholyapwa kacheshi chachikaluko, kaha nawa vyuma vyavilemu vyasakiwa mukuyoya tuli navyo.” Uno vyuma muka vyavalingisa vawahilile chikuma? Vahanjikile ngwavo: “Kukafwa vatu vamichima yamwaza valinangule vyaYehova chikiko chuma chatulingisa tuwahilile.”