Gianni naMaurizio vanapunga masepa hamyaka 50. Oloze halwola lumwe usepa wavo wapwile muponde. Maurizio ambile ngwenyi, “Omu ngwapwile muukalu, ngwavulumwine milonga yayivulu yize jino yalingishile tulihandunune nasepa lyami.” Gianni ahanjikile ngwenyi: “Maurizio ikiye angunangwilenga Mbimbiliya. Angukafwilenga chikuma kushipilitu. Kangwashinganyekele ngwami mwalinga vyuma vize alingileko. Ngwevwile kupihya chikuma mwomwo ngwatachikijile ngwami katweshi kupwa cheka masepako. Changuvijile chikuma.”

MUTU eji kwivwanga kuwaha nge ali namasepa vamwenemwene, oloze kuwana sepa kana kachapwa chachashiko. Kachi nge sepa lyenu nalingi vyuma vize navimilingisa mulihandunune, kaha chuma muka mwatela kulinga mangana usepa wenu utwaleho lika? Natulinangula vyavivulu kuvatu vamwe vasoneka muMbimbiliya vaze vapwile namasepa vamwenemwene, oloze kutwala muze usepa wavo wapwile muponde.

NGE SEPA LYENU NALIMBENJE

Ndavichi, uze apwile kafunga kaha nawa mwangana apwile namasepa vamwenemwene. Sepa lyenyi umwe tunahase kwanuka shina Yonatane. (Samwe. 1, 18:1) Oloze apwile namasepa veka vakufwana nge, kapolofweto Natane. Mbimbiliya kayavuluka lwola waputukile usepa wavoko. Oloze halwola lumwe Ndavichi alwezelenga Natane kala mijimbu yakusweka ngana muze mwalinga mutu kuli sepa lyenyi. Ndavichi alwezele Natane ngwenyi anakufwila kutungila Yehova zuvo. Mwangana afwelelele vyuma amulwezele Natane, lunga uze vatwaminyinyinenga nashipilitu yaYehova.—Samwe. 2, 7:2, 3.

Chipwe ngocho kwapwile vyuma vyasolokele vize vyahakile usepa wavo muponde.  Mwangana Ndavichi alingile ukoji naMbate-sheva, kufumaho ajihishile nalunga lyenyi Uliya. (Samwe. 2, 11:2-21) Hamyaka yayivulu, Ndavichi ononokelenga Yehova nachiyulo chenyi chakwoloka. Oloze alingile jino shili yayinene. Ika yalingishile ou mwangana wamwaza alinge shili kana? Uno kejivile ngwenyi kulinga chuma kana nachineha ponde yayineneko tahi? Kutala ashinganyekele ngwenyi nahase kusweka mulonga kana kuli Kalunga tahi?

Uno Natane alingile ngachilihi? Kutala aholele kulu nakushinganyeka ngwenyi vatu veka navalweza mwangana chihande kana tahi? Vatu veka nawa vatachikijile vyuma alingile Ndavichi mangana ajihe Uliya. Pamo kachi ashinganyekele ngwenyi kacheshi kupwa chakutamo ikiye kulinga chuma chize nachijihisa usepa wavoko. Kuhanjika chihande kana kuli Ndavichi kachi chamujihishile. Halwola kana nawa Ndavichi hanajihi lyehi Uliya chakuhona mulonga.

Oloze kapolofweto Natane apwile muka-kuhanjikilako Kalunga. Atachikijile ngwenyi nge mwahola kulu, usepa wenyi naNdavichi naufwa, kaha chivezu chenyi nawa nachimuyanjisanga. Sepa lyenyi Ndavichi alingile vyuma vize ahunga Yehova. Ou mwangana asakiwile kumukafwa mangana usoko wenyi naYehova utwaleho lika. Chapundu vene, asakiwile sepa wamwenemwene halwola kana, kaha Natane apwile chikupu sepa wamwenemwene. Azachishile chakutalilaho chize chakwachile kumuchima waNdavichi, uze apwilenga kafunga kuunyike. Natane ambulwile mazu amulwezele Kalunga, mujila yize yakafwile Ndavichi amone kutohwa chashili alingile, nakumulingisa azachileho.—Samwe. 2, 12:1-14.

Namulinga ngachilihi nge sepa lyenu navulumuna mulonga waunene chipwe nalingi shili yayinene? Pamo munahase kushinganyeka ngwenu kumulweza vyuma nalingi chipwe kulweza vakulwane kuchikungulwilo mangana vamukafwe kushipilitu, nachijihisa usepa wenu. Uno namulinga ngachilihi?

Gianni uze twavulukanga hakavanga, ambile ngwenyi: “Ngwamwene ngwami vyuma vimwe vinalimbenje. Maurizio kapwile wakukasunuka ngana muze apwilenga hakavangako. Ngwashinganyekele kuhanjika nenyi numba tuhu chapwile chachikalu kulinga ngocho. Ngwalihulishile ngwami: ‘Vyuma muka nangumulweza vize katachikizako? Ngwashinganyekele ngwami pamo nahase kungufutulula.’ Oloze hakwanuka vyuma twalinangwilenga changukafwile nguhamuke kuhanjika nenyi. Ngwanukile nawa omu Maurizio angukafwilenga nge nguli muukalu. Hakuwana nge ngwamuzangile chikuma, ngocho ngwasakile kumukafwa mangana usepa wetu utwaleho lika.”

Maurizio ambile ngwenyi: “Gianni asolwele muchima wakeke. Ngwejivile ngwami ukalu ngwamwene wapwile wakulikokela ami yivene, keshi Gianni chipwe Yehovako. Shikaho ngwetavilile kunguzangamisa, kaha mukuhita chalwola ngwalikangwile cheka kushipilitu.”

NGE SEPA LYENU ALI MUUKALU

Ndavichi apwile namasepa veka nawa vaze vamukafwilenga. Umwe shina Hushai, uze vavuluka muMbimbiliya ngwavo, “sepa lyaNdavichi.” (Samwe. 2, 16:16; Miji. 1, 27:33) Hushai pamo apwile chilolo chamwangana uze nawa apwile sepa lyenyi. Kaha nawa atachikijilenga vihande vyakusweka vyamwangana.

Omu Avasalome mwanaNdavichi asakile kutambula litanda lyawangana, vaIsalele vavavulu vamukundwijilenga, oloze Hushai kalingile ngochoko. Halwola Ndavichi apwile nakuchina, Hushai ayile kuli ikiye. Ndavichi evwile kupihya chikuma hakumufumbukila kuli mwanenyi wakulisemena nakuli vatu vaze afwelelele chikuma. Oloze Hushai ashishikile lika kuli Ndavichi, nakuhaka chiyoyelo chenyi muponde hakuzata mulimo vamulwezele wakuhonesa vyuma vyavipi ajinyine kulinga Avasalome. Hushai azachile mulimo kana mwomwo apwile wakushishika kaha nawa sepa wamwenemwene.—Samwe. 2, 15:13-17, 32-37; 16:15–17:16.

 Tweji kwivwanga kuwaha hakumona vandumbwetu makumbi ano vali nakulinunga hamwe, chamokomoko namilimo veji kuzatanga muchikungulwilo. Vilinga vyavo vyeji kusoloka nge vanakuhanjika ngwavo, “Wapwa usepa lyami mwomwo uwamulemu kuli yami.”

Omu mukiko chapwile kuli ndumbwetu Federico. Sepa lyenyi Antonio amukafwile, ngocho ahashile kuhonesa ukalu ahichilemo mukuyoya chenyi. Federico ambile ngwenyi: “Omu Antonio anungulukilile kuchikungulwilo chetu, twalikachile usepa. Tuvosena twapwile vaka-kuzachila, ngocho twalivwishilenga kuwaha kuzachila hamwe muchikungulwilo. Nakushimbula chiku, sepa lyami vamutongwele kupwa kalama. Ngocho apwile nawa chakutalilaho chami kumilimo yakushipilitu.” Federico alingile vyuma vyavipi. Numba tuhu apihililile nakwalumuka, oloze katelemo kupwa payiniya chipwe muka-kuzachilako. Uno Antonio evwile ngachilihi?

Omu Federico apwile muukalu alwezele sepa lyenyi Antonio, kaha amwivwililile nakumukolezeza

Federico ambile ngwenyi: “Ngwamwene ngwami Antonio evwilenga kupihya chikuma. Anguvendejekelenga nakungukafwa kuchina nanguhomba kushipilitu. Angukolezezelenga nguzate nangolo mangana nguzate cheka natwima milimo yakushipilitu.” Antonio ahanjikile ngwenyi: “Ngwashikaminenga chikuma naFederico. Ngwasakile apwenga wakukasunuka kuhanjika nayami hakala chuma, numba vene omu evwilenga havyuma alimbenjele. Mukuhita chalwola, Federico azamine cheka kushipilitu, kaha vamutongwele cheka kupwa payiniya namuka-kuzachila. Antonio ambile ngwenyi: “Numba tuhu oholyapwa katweshi muchikungulwilo chimweko, oloze hanga twalikachila.”

UNO NAMWIVWA KUPIHYA TAHI?

Uno namwivwa ngachilihi nge sepa lyenu uze mwazanga chikuma mwahona kumikafwa halwola muli muukalu? Namwivwa kupihya chikuma. Uno namumukonekela tahi? Kutala usepa wenu naupwa lika wakukola tahi?

Achishinganyekenu vyuma vyasolokele kuli Yesu hamakumbi amakumishilo akuyoya chenyi hano hamavu. Alikachile navaposetolo jenyi vakushishika hatando yayisuku, ngocho vapwile vakulinunga. Yesu avavulukilenga  ngwenyi masepa jenyi. (Yowa. 15:15) Jino vyuma muka vyasolokele omu Yesu vamukwachile kuli vaka-kole? Vaposetolo vachinyine. Petulu ahanjikile hatoma ngwenyi keshi kukaseza Mwata wenyiko, oloze haufuku vene uze, alihamikile ngwenyi kamutachikiza Yesuko.—Mateu 26:31-33, 56, 69-75.

Yesu atachikijile ngwenyi mwakapwa uka wenyi halwola mwakahita mucheseko chamakumishilo. Chapwile chakutamo kuli Yesu kupihilila. Oloze mazu ahanjile kuli tumbaji twenyi omu alingile hanasanguka lyehi asolwele hatoma nge kapihililile navoko. Yesu kavalaminyinyine koko hamilonga vavulumwineko, kuhakilako vene navyuma valingile haufuku uze vamukwachile kuli vaka-kole.

Yesu ahanyine Petulu navaposetolo veka jindongi jamwakuzachila mulimo waulemu chikuma mukuyoya chavatu, chuma chize chasolwele nge avafwelelele. Yesu achipwile lika nakumona vaposetolo kupwa masepa jenyi. Zangi avasolwelele yavakolezezele chikuma. Tumbaji vazachile jino nangolo nakukavangiza vyuma avalwezele Mwata wavo. Ngocho vateselemo mulimo ahanyine vaka-kumukavangiza vosena.—Vili. 1:8; Kolo. 1:23.

Ndumbwetu wapwevo Elvira eji kwanukanga omu valimbalakile nasepa lyenyi Giuliana. Elvira ambile ngwenyi: “Omu sepa lyami angulwezele ngwenyi evwile kupihya havyuma ngwalingile, changuvijishile kumuchima. Chapwile chakutamo ikiye kupihilila, oloze ngwalikomokelele mwomwo shimbu yosena alizakaminyinenga havyuma navisoloka kuli yami kweseka navilinga vyami. Ngweji kumusakwililanga hakuhona kushinganyeka haupi ngwamulingile, oloze alizakaminyine kaha haponde ngwalinehelelele ami yivene. Ngwasakwililile Yehova hakunguhana sepa uze anguzakaminenga chikuma.

Uno sepa wamwenemwene eji kulinganga ngachilihi nge usepa wavo uli muponde? Eji kufwilanga kuhanjika chihande kana nasepa lyenyi mujila yalikoji. Mutu kana mwapwa ngana mwaNatane, naHushai vaze vapwile lika vakushishika namulwola lwaukalu. Mwapwa nawa ngana mwaYesu uze akonekelelenga masepa jenyi. Kutala mukiko mwapwa nayenu tahi?