‘Lombenunga lika nalufwelelo, keshi nge nakuhuhwasanako.’—YAKO. 1:6.

MYASO: 81, 70

1. Vyuma muka vyalingishile Kena asakule kulinga vyuma vyavipi, kaha vyuma muka vyafuminemo?

KENA atelelele kusakula vyuma vyakulinga mukuyoya. Atelelele kuhonesa vishinganyeka vyavipi mangana apwenga nachiyoyelo chamwaza, chipwe kwitavila vishinganyeka vyavipi vimufungulule nakupwa nachiyoyelo chachipi. Oloze chaluvinda etavilile vishinganyeka vyavipi vimufungulule, ngocho ajihile songo yenyi Avele. Vyumevi asakwile kulinga Kena vyajihishile usoko wenyi naTengi.—Kupu. 4:3-16.

2. Mwomwo ika chapwila chachilemu kusakula kanawa vyakulinga?

2 Nayetu tweji kusakulanga vyakulinga mukuyoya. Vimwe vyavilemu, vyeka kavyapwa vyavilemuko. Oloze vyuma vimwe tweji kusakulanga kulinga vinahase kutunganyalisa chipwe kutunehela ukalu. Ngocho uhashi wetu wakusakula vyakulinga watela kutukafwa tusakule vyuma vize navitulingisa tuyoye kanawa mukuunda, keshi kutunehela kazulu kupwemako.—Vishi. 14:8.

3. (a) Vyuma muka twatela kufwelela hakusaka kusakula kanawa vyakulinga? (b) Vihula muka natushimutwila muchihande chino?

3 Vyuma muka navitukafwa tusakulenga kanawa vyakulinga? Twatela kufwelela chikupu ngwetu Kalunga akwechi uhashi nangolo jakutukafwa tupwenga namangana. Twatela kufwelela Mazu  aYehova, najila eji kulingilangamo vyuma, nakwitavila mazu eji kutuhuhumunanga. (Tangenu WaYakova 1:5-8.) Kachi nge natupandama kuli ikiye nakuzanga Mazu enyi, kaha natufwelela chikupu ngwetu atamo kututwaminyina. Shikaho twatela kupwa nachijililo chakukekesanga Mazu aKalunga shimbu kanda tusakule vyakulinga. Vyuma muka navihotola uhashi wetu wakusakula vyakulinga? Uno nge tunasakula vyakulinga, kaha chinalumbununa nge katweshi kuhasa kukavyalumunako tahi?

TWASAKIWA KUSAKULA VYAKULINGA MUKUYOYA

4. Vyuma muka asakwile kulinga Alama, kaha vyuma muka vyafumamo?

4 Putu vene kushikulu, vatu vanasakulanga vyakulinga. Halwola lumwe, Alama atelelele kusakula kwivwilila kuli Tengi yenyi chipwe kuli Eve. Kutala Alama asakwile kulinga vyuma vyamwaza tahi? Puwenyi wakuhuka Eve amuhungumwishile asakule vyuma vyavipi vize vyamulingishile vamuhange muPalachise nakumunehela kufwa. Vyuma asakwile kulinga vikiko vyatuhichikisamo nayetu. Oholyapwa tuli nakuyanda mwomwo yavyuma asakwile Alama.

5. Twatela kumona ngachilihi mulimo wakusakula vyakulinga?

5 Vamwe veji kushinganyekanga ngwavo chiyoyelo kachi chapwa kanawa nge Kalunga katuhanyine uhashi wakulisakwila vyakulingako. Uno omu mukiko mweji kushinganyekanga nayenu tahi? Anukenu ngwenu, Yehova atengele vatu vashinganyekenga nakusakula vyakulinga. Mbimbiliya yeji kutunangulanga kusakula vyuma vyamwaza vyakulinga. Kanda kushinganyeka ngwenu Yehova hakutuhana lisesa lyakusakula vyakulinga, asaka tusakulenga vyuma vize navituhaka muukaluko. Achitalenu vyakutalilaho vino.

6, 7. Vyuma muka vasakwile kulinga vaIsalele vakushikulu, kaha mwomwo ika chapwililile chachikalu kusakula kanawa vyakulinga? (Talenu muvwimbimbi wakulivanga.)

6 Omu vaIsalele vahetele muLifuchi lyaLushiko, vatelelele kusakula vyakulinga. Vatelelele kusakula kulemesa Yehova chipwe tulunga veka. (Tangenu Yoshuwa 24:15.) Vyuma vavalwezele kulinga vyasolokele nge vyavyashi. Oloze vyuma vasakwile vyatelele kuvanehela kuyoya chipwe kufwa. Hamakumbi aVaka-kuyula, vaIsalele vasakwilenga kulinga vyuma vyavipi. Vasele Yehova nakulemesa tulunga vamakuli. (Kuyu. 2:3, 11-23) Halwola lukwavo nawa, vatu jaKalunga vavahanyine lisesa lyakusakula vyakulinga. Kapolofweto Elija avalwezele vasakule kuzachila Yehova chipwe kalunga wamakuli Mbale. (Vamya. 1, 18:21) Oloze vakiko vakakasanyinenga, ngocho Elija avatenukilile. Munahase kushinganyeka ngwenu chapwile chachashi kusakula kuzachila Yehova mwomwo chapwa chakwoloka kulinga ngocho. Kaha nawa kakweshi mutu wakulumbunuka mwevwila kuwaha kulemesa Mbaleko. Oloze vaIsalele vapwile ‘nakukakasana.’ Ngocho Elija avalwezele vasakule kulemesa Yehova uze apwa Kalunga wamuchano.

7 Mwomwo ika vaIsalele vahonene kusakula kulinga vyuma vyamwaza? Chatete, lufwelelo lwavo muli Yehova lwakivile, kaha vakanyine kwivwilila mulizu lyenyi. Kavapwile nachinyingi chakwoloka chipwe mangana akufuma kuli Kalungako, kaha nawa kavafwelelele muli Yehovako. Kachi nge valingile vyuma kweseka namwayile chinyingi chakwoloka, kachi chavakafwile vasakule kulinga vyuma vyamwaza. (Samu 25:12) Kaha nawa vetavishile vatu veka vavahungumwise nakuvasakwila vyakulinga. Vatu vamulifuchi kana kavalemeselenga Yehovako, ngocho vahungumwishile vaIsalele vakavangize vilinga  vyavo vyavipi. Yehova avahuhumwinyine chimweza haponde yakulikata navatu kana.—Kulo. 23:2.

UNO VAKWENU VATELA KUMISAKWILA VYAKULINGA TAHI?

8. Mujimbu wavaIsalele watunangula vyuma muka kupandama kukusakula vyakulinga?

8 Vyakutalilaho tunashimutwila vyatunangula nge mutu himutu atela kulisakwila yivene vyakulinga, kaha chinyingi chakwoloka tunahase kuchiwana muMbimbiliya. Hali Wavaka-Ngalesha 6:5 vatulweza ngwavo: “Mutu himutu mwalimbachila vyuma vyenyi ivene.” Katwatela kulweza vakwetu vatusakwile vyakulingako. Oloze twatela kutachikiza vyuma amona Kalunga kupwa vyakwoloka, nakulinga vyuma kana.

9. Mwomwo ika chapwila chaponde kwitavisa vakwetu vatusakwile vyakulinga?

9 Uno vakwetu vanahase kutusakwila ngachilihi vyakulinga? Masepa vanahase kutushinyinyika tusakule kulinga vyuma vyavipi. (Vishi. 1:10, 15) Numba vatushinjila tuhu ngachilihi, twatela kulisakwila etu vavene vyakulinga kweseka nachivezu chetu vanangula naMbimbiliya. Kachi nge natwitavilanga vatu vatulweze vyakulinga, kaha natusolola nge tunakuvakavangiza. Chuma kana chapwa chaponde.

10. Paulu ahuhumwine vaka-Ngalesha vyuma muka?

10 Kaposetolo Paulu ahuhumwine vaka-Ngalesha haponde yatwama hakwitavila vakwetu vatusakwile vyakulinga. (Tangenu Wavaka-Ngalesha 4:17.) Vatu vamwe muchikungulwilo vasakilenga kusakwila vakwavo vyakulinga mangana vavafumise kuli vaposetolo. Mwomwo ika? Vatu kana vapwile nakutonda ulemu. Vazachishile lisesa lyavo mujila yakuhenga, nakuhona kuvumbika lisesa lyavandumbwavo lyakulisakwila vavene vyakulinga.

11. Tunahase kukafwa ngachilihi vakwetu omu navasakulanga vyuma vyakulinga?

11 Paulu ahanyine chakutalilaho chamwaza hakuvumbika lisesa vatwama nalyo vandumbwenyi lyakulisakwila vyakulinga. (Tangenu Wavaka-Kolinde 2, 1:24.) Makumbi ano tulama vatela kukavangiza chakutalilaho kana hakukafwa vandumbwavo vasakule  vyakulinga. Veji kwivwanga kuwaha kukafwa vandumbwavo kuzachisa Mbimbiliya. Chipwe ngocho tulama vasaka vandumbwavo valisakwile vavene vyakulinga, mwomwo vyuma navikafumamo mwakalimwenavyo mutu yivene. Chishina chachilemu shina echi: Numba tuhu natukafwa vakwetu kuzachisa Visoneka, oloze twatachikiza ngwetu vakwechi lisesa lyakulisakwila vavene vyakulinga. Nge navasakula kanawa vyakulinga, kaha navanganyala. Twatela kulihenda kukushinganyeka ngwetu tukwechi lisesa lyakusakwila vandumbwetu vyakulinga.

Tulama veji kukafwanga vandumbwavo valisakwile vavene vyakulinga (Talenu palangalafu 11)

KANDA KUSAKULA VYAKULINGA NGE MUNAPIHILILAKO

12, 13. Ponde muka yatwama hakusakula vyakulinga nge tunapihilila chipwe nge tunahombo?

12 Vatu vavavulu veji kwambanga ngwavo: Linga munayi muchima wove. Oloze chuma kana chapwa chaponde. Kaha Visoneka nawa kavyahanjika ngochoko. Mbimbiliya yatukanyisa kulinga munayi muchima wetu. (Vishi. 28:26) Mijimbu yamuMbimbiliya yasolola ponde yasolokele kuli vaze valingile mwayile michima yavo. Muchima wamutu wakuhona kukupuka “wapwa uka-kutangisa kuhambakana vyuma vyosena, kaha wafwila kulinga cheshocho unasake.” (Yele. 3:17; 13:10; 17:9; Vamya. 1, 11:9) Jino vyuma muka navisoloka kachi nge natukavangiza muchima wetu?

13 Muchima wapwa waulemu kuli muka-Kulishitu, mwomwo vatulweza kuzanga Yehova namuchima wetu wosena nakuzanga vakwetu nganomu twalizanga etu vavene. (Mateu 22:37-39) Oloze Visoneka vanenyikilako mupalangalafu yinafumuho vinasolola ponde yatwama hakulinga vyuma kweseka nomu unasake muchima wetu. Chakutalilaho, vyuma muka vinahase kusoloka kachi nge natusakula vyakulinga oku tunapihilila? Kachi nge twalingaho lyehi vyuma kana, kaha tunahase kutachikiza ukalu watwamaho. (Vishi. 14:17; 29:22) Nyi kutala tunahase kusakula kanawa vyakulinga kachi nge tunahombo tahi? (Kula. 32:6-12; Vishi. 24:10) Tachikizenu ngwenu Mazu aKalunga atulweza kuwaha chatwama hakupwa ‘vandungo kujishimbi jaKalunga.’ (Loma 7:25) Chikupu vene, tunahase kusakula kulinga vyuma vyakuhenga kachi nge natusakula vyuma oku tunapihilila chipwe tunahombo.

OVYO NAVITULINGISA TWALUMUNE VYUMA TWASAKWILE

14. Tunatachikiza ngachilihi ngwetu mutu nahase kwalumuna vyuma vize asakwile kulinga?

14 Twatela kusakulanga kanawa vyakulinga. Oloze echi kachalumbununa nge katweshi kuhasa kwalumuna vyuma twasakwile kulingako. Shimbu jimwe tunahase kukekesa vyuma twasakwile nakwalumunako. Achitalenu havyuma alingile Yehova kuli vaka-Nyineve mumakumbi aYona. “Omu Kalunga wamuchano amwene vyuma valingile hakuseza jijila javo jajipi, alumwine vishinganyeka vyenyi halupi luze ambile kuvanehela. Ngocho kaluneheleko.” (Yona 3:10) Omu Yehova amwene vaka-Nyineve vanapihilila nakwalumuka kuvilinga vyavo, alumwine vishinganyeka vyenyi, kaha kavanongeseleko. Ngocho asolwele nge apwa wakulinyisa nakutetela nakwashiwisa muchima. Kaha nawa Kalunga keshi kulusuka kulinga vyuma numba tuhu napihilila, ngana muze valinga vatu vavavuluko.

15. Vyuma muka vinahase kutulingisa twalumuneko vyuma twasakwile?

15 Shimbu jimwe tunahase kwalumunako vyuma twasakwile, kachi nge kunasoloka vyuma vimwe. Yehova alumwinenga vishinganyeka  vyenyi halwola lumwe omu vyuma vyalumukile. (Vamya. 1, 21:20, 21, 27-29; Vamya. 2, 20:1-5) Kaha nawa tunahase kwalumunako vyuma twasakwile kulinga nge kuliko unjiho umwe tunatambula. Mwangana Ndavichi vamulwezele mijimbu yamakuli hali muzukulu waSaulu Mefwivoshete. Oloze omu Ndavichi atambwile mijimbu yamuchano, alumwine vishinganyeka vyenyi. (Samwe. 2, 16:3, 4; 19:24-29) Shikaho, chinahase kupwa chakwoloka shimbu jimwe kulinga vene ngocho nayetu.

16. (a) Jindongi muka najitukafwa kusakula kanawa vyakulinga? (b) Twatela kulinga ngachilihi havyuma vimwe twasakwile, kaha mwomwo ika?

16 Mazu aKalunga atuhuhumuna ngwawo katwatela kulusukako kachi nge tunakusakula kulinga vyuma vyavilemu. (Vishi. 21:5) Oloze twatela kuvangila kukekesa kanawa vyuma mangana tusakule kanawa vyakulinga. (Teso. 1, 5:21) Mutwe watanga atela kuvangilanga kukekesa Visoneka namikanda yetu yavaka-Kulishitu nakwivwilila munayi vishinganyeka vyavakwavo mutanga, numba jino asakule vyakulinga. Anukenu ngwenu Kalunga alwezele Apalahama evwilile kumazu apuwenyi. (Kupu. 21:9-12) Vakulwane muchikungulwilo navakiko vatela kuvangilanga kuhehwojola muvisoneka numba vasakule vyakulinga. Nge navapwa vakulikehesa, kaha kaveshi kwivwa sonyi kwalumunako vyuma vimwe vasakwile kachi nge kuneza jindongi jajihya jize vatela kukavangiza. Vatela kupwa vakukasunuka kwalumunako vishinganyeka vyavo navyuma vasakwile, kaha tuvosena twatela kulondezeza chakutalilaho chavo. Echi nachineha kuunda nakulinunga muchikungulwilo.—Vili. 6:1-4.

LINGENU VYUMA MUNASAKULA

17. Vyuma muka navitukafwa tusakulenga kanawa vyakulinga?

17 Vyuma vimwe tweji kusakulanga mukuyoya vyapwa vyavilemu kuhambakana vikwavo. Hakusakula vyuma kanevi vyavilemu chasakiwa kulomba nakuhunananaho kanawa halwola lwalusuku. Chakutalilaho, kusakula kutwama ujike chipwe kwingila muulo, namutu wakulimbata nenyi, vyapwa hivyuma vyavilemu atela kusakula muka-Kulishitu. Chuma chikwavo chachilemu atela kusakula mutu shina, kusakula kuzata mulimo washimbu yosena. Shikaho, shimbu kanda mutu asakule kulinga vyuma kanevi, atela kufwelela ngwenyi Yehova mwamukafwa kuhichila mujindongi jenyi. (Vishi. 1:5) Ngachize chapwa chamwaza kupendamina haMbimbiliya nakulomba Yehova atukafwe. Kaha twatela kufwelela ngwetu Yehova mwatukafwa tutesemo vyuma tunasakula kweseka namwaya muchima wenyi. Kachi nge munakusaka kusakula vyuma vyavilemu mukuyoya, mwatela kulihulisa ngwenu: ‘Uno chuma ngunakusaka kulinga nachisolola nge ngwazanga Yehova tahi? Kutala tanga yami nayiwahilila hachuma kana nakutwama mukuunda tahi? Uno nachisolola nge ngwatwama namuchima wangachilihi?’

18. Mwomwo ika Yehova asaka tulisakwilenga yetu vavene vyakulinga?

18 Yehova keshi kutushinjila tumuzange nakumuzachilako. Echi chapwa chakulisakwila mutu yivene. Hakuwana nge atuhana lisesa lyakulisakwila vyakulinga, ngachize atwitavisa ‘tulisakwile’ yetu vavene kumuzachila chipwe nduma. (Yoshu. 24:15; Kwambu. 5:4) Oloze asaka tuvangilenga kukekesa hajindongi jenyi omu natusakulanga vyakulinga mukuyoya. Chapundu vene, nge natufwelela muli Yehova hakulinga vyuma, nakukavangiza jindongi jenyi, kaha natusakulanga kanawa vyuma vyakulinga mukuyoya chetu.—Yako. 1:5-8; 4:8.