Kutala munalivwisanga kuwaha kutanga jimangazini jakalinwaha jaKaposhi Kakutalila nyi? Nge mukiko, kaha tumonenu omu namuhasa kukumbulula vihula vino vinakavangizaho:

Vyuma muka viwana navitukafwa twimbenganga kanawa?

Vyuma navitukafwa shina kukwachila mukanda wetu wamyaso helu, nakukoka peho yakutamo. Nge natwasamanga mukanwa nakwimbila helu, kaha tunahase kwimbanga nakutambakana.—w17.11, li. 5.

Vyuma muka vinamivwisa kuwaha hakushinganyeka hajijila jakuya kujinganda jakuswamamo jamuIsalele nakuvihela kuze japwililile?

Kwapwile jinganda 6 jakuswamamo, kaha jijila jakuya kujinganda kana japwile jamwaza. Echi chalingishilenga mutu ahete washi kujinganda kana.—w17.11, li. 14.

Mwomwo ika wana wandando yakusokola atuhana Kalunga kuhichila muli Yesu wapwila waulemu chikuma?

Yatukafwa tupwenga nalutalililo lwakuyoya chahaya myaka yosena, nakusokoka kushili nakukufwa. Hakuwana nge Kalunga azangile vana vaAlama, ngocho atumine Yesu kwiza nakutufwila shimbu twapwilenga tuvaka-shili.—wp17.6, mafwo 6-7.

Uno chisoneka chaSamu 118:22 chavulukile ngachilihi vyakusanguka chaYesu?

Yesu vamukanyine ngwavo kapwile Meshiyako, kaha nawa vamujihile. Oloze hakusaka apwenga “lilolwa lyalinene lyamumbango,” vatelelele kumusangula.—w17.12, mafwo 9-10.

Uno Meshiya atelelele kusemukila kaha muli vatwatwa tahi?

Shimbu jimwe, chisaka chaYesu chahichilile muli vatwatwa, oloze lwola lukwavo kachapwilenga ngochoko. Chakutalilaho, Ndavichi uze apwile mwana Yese kapwile twatwako, oloze Meshiya asemukilile muli Ndavichi.—w17.12, mafwo 14-15.

Jindongi muka jamuMbimbiliya jize jinahase kutukafwa tulikinge kumisongo?

Mujishimbi jaMose, vaze vavijilenga misongo yimwe yayipi vatelelele kupwa kwakusuku navakwavo. Kaha nawa nge mutu nakwate chivimbi, atelelelenga kusana kumavoko. Majilo amujimo nawa vatelelele kuwashikila. Mwana walunga nawa vatelelele kumujihana halikumbi lyakusokesa 8 mangana manyinga alikonde washi.—wp18.1, li. 7.

Uno chapwa chakuhenga mutu kulizanga yivene tahi?

Nduma, mwomwo Mbimbiliya ngwayo twatela kuzanga vakwetu nganomu twalizanga etu vavene. (Mako 12:31) Malunga vaze vambata vatela “kuzanganga mapwevo javo nganomu vazanga mijimba yavo.” (Efwe. 5:28) Chipwe ngocho, mutu katela kulizanga chikuma iveneko.—w18.01, li. 23.

Vyuma muka twatela kulinga mangana tuzovoloke kushipilitu?

Twatela kulinangulanga Mazu aKalunga nakushinganyekaho nakuzachisa vyuma natulinangula. Twatela kwitavilanga shipilitu yajila yitutwaminyine nakwitavila vakwetu vatukafwe.—w18.02, li. 26.

Mwomwo ika vaka-kuzachisa vatanganyika nakulyongela upolofweto vahonena kutachikiza vyuma vyakulutwe?

Kuli vyuma vyavivulu vyalingisa chipwenga ngocho, oloze Mbimbiliya yahunga vyuma kana.—wp18.2, mafwo 4-5.

Vyuma muka twatela kulinga nge vanatusanyika kuli vandumbwetu?

Nge tunetavila kuya kuzuvo yandumbwetu, kaha twatela kutesangamo lushiko kana. (Samu 15:4) Ndumbwetu nahase kuwahisa vyakulya vyavivulu, ngocho nachipihya chikuma kachi nge katweshi kuyako.—w18.03, li. 18.

Uno malunga vatongola navalinangula vyuma muka kuli Chimoteu?

Chimoteu azakaminenga vatu nakuhaka vyuma vyakushipilitu kulutwe. Azachile nangolo mumulimo wajila nakuzachisa vyuma alinangwile. Alinangwilenga ivene nakupendamina hashipilitu yaYehova. Shikaho tulama navaka-kuzachila vatela kulondezeza chakutalilaho chenyi.—w18.04, mafwo 13-14.