TWEJI kuzachilanga Yehova mangana atwivwile uselewa. Uno Kalunga eji kwivwilanga uselewa vatu muka? MuMbimbiliya mwatwama mijimbu yavatu vamwe vaze Kalunga evwililile kuwaha numba tuhu hakavanga valimbenjelenga. Vasonekamo nawa vatu veka vaze vapwilenga navilinga vyamwaza oloze Kalunga kavevwililile kuwahako. Shikaho tunahase kulihulisa ngwetu: “Vyuma muka asaka Yehova kuli etu?” Kukumbulula natuchiwana mumujimbu waLehovowame, mwangana wavaYuta.

KUPUTUKA CHACHIYULO CHENYI

Solomone ise yaLehovowame ayulile vaIsalele hamyaka 40. (Vamya. 1, 11:42) Kaha kuheta mu 997 B.C.E afwile. Omu Solomone afwile Lehovowame afumine kuYelusalema nakuya jino kuShekeme mangana vakamuwavise kupwa mwangana. (Miji. 2, 10:1) Lehovowame pamo alizakaminyine ngwenyi keshi kuhasa kulinga vyuma alingilenga Ise Solomone uze apwile namangana chikumako. Kaha nawa ashinganyekele ngwenyi keshi kuhasa kuyula vihande ngana muze alingilenga iseko.

Lehovowame pamo amwene mulimo kana kupwa waukalu chikuma. Mukuhita chalwola vatu vayile kuli ikiye mangana vakamulweze vishinganyeka vyavo. Vambile kuli ikiye ngwavo: “Iso atuyanjishilenga. Oloze nge ove kaweshi kutuyanjisako, kaha nawa kaweshi kutuzachisa nge muze atuzachishilenga isoko, kaha natukuzachilanga.”—Miji. 2, 10:3, 4.

Lehovowame pamo apwile mucheseko. Nge alingile vyuma vamulwezele vatu, kachi ikiye, natanga yenyi, navilolo jenyi kavapwile naluheto chikumako mwomwo kachi vatu kavamuhanyinenga milambu yayivuluko. Kaha nawa nge akanyine kuvalingila vyuma kana kachi vatu valikangile kuli ikiye. Vyuma muka atelelele kulinga? Ou mwangana ahulishile vakulwane vaze vazachililenga Solomone. Ashinganyekele nawa kwihula vakwavo vakweze muvakolelelenga. Lehovowame akavangijile vyuma vamulwezele vakwavo vakweze, ngocho akumbulwile vaze vamuhulishile ngwenyi: “Nangumiyanjisa chikuma nakumimwenesa makava. Tata amizangamishilenga namingweji, oloze ami nangumizangamisanga namingonga.”—Miji. 2, 10:6-14.

Vyuma muka natulinangula kuli Lehovowame? Chikupu vene, chapwa chachilemu kwivwilila kuli vakulwane vakuhya kushipilitu. Hakuwana nge vakulwane kana vatachikiza vyavivulu, vanahase kutachikiza ukalu naufuma muvyuma natusakula kulinga, ngocho vanahase jino kutukafwa.—Yopa 12:12.

 “VOSENA VONONOKELE MAZU AYEHOVA”

Lehovowame apihililile, kaha alongesele lizavu lyavaka-kwasa jita. Oloze Yehova atumine kapolofweto Shemaya kuya nakulweza mwangana ngwenyi: “Kanda namuya nakuzungisa vandumbwenu vaIsaleleko. Mutu himutu akinduluke kuzuvo yenyi mwomwo ami yami ngunalingisa chuma kana chisoloke.”—Vamya. 1, 12:21-24. *

Lehovowame pamo kasuulukileko hakumukanyisa kuya nakulwa jita. Jino vatu kachi vashinganyekele vyuma muka hali mwangana uze avalwezele ngwenyi mwavazangamisa “namingonga,” oloze kutwala muze himwalumuna muchima? (Esekesenuko Mijimbu 2, 13:7.) Oloze ou mwangana namaswalale jenyi “vosena vononokele mazu aYehova, kaha vakindulukile kumembo avo nge muze avalwezele Yehova.”

Vyuma muka natulinangulako? Chapwa chamwaza kwononoka Kalunga numba tuhu kulinga ngocho chinahase kutwivwisa sonyi. Shikaho nge natwononoka Kalunga, kaha mwatwivwila uselewa nakutukisula.—Lushi. 28:2.

Vyuma muka alingile Lehovowame? Akanyine kuya nakulwa jita namuyachi wauhya uze vatungile, nakufwila jino kuputuka kutunga jinganda mujingalila jamuyachi wavaYuta navaMbenjamine yize ayulilenga. Jinganda kana “ajikingile chikuma.” (Miji. 2, 11:5-12) Kaha nawa ononokele kujishimbi jaYehova. Omu miyachi 10 yamuwangana wavaIsalele yize vayulilenga kuli Yelovowame yaputukile kulemesa tuponya, vatu vavavulu ‘vakundwijile Lehovowame’ hakuya kuYelusalema mangana vakalemese Kalunga wamuchano. (Miji. 2, 11:16, 17) Hakuwana nge Lehovowame ononokele, ngocho wangana wenyi wazamine.

SHILI NAMUCHIMA WAKUPIHILILA NAKWALUMUKA

Omu wangana wenyi wazamine, Lehovowame alingile cheka chuma chikwavo chachikalu. Alitwaminyinyine kukavangiza jishimbi jaYehova nakuputuka kulemesa tulunga vamakuli. Mwomwo ika? Pamo mwomwo yakumuhungumwisa kuli naye uze apwile kaAmone. (Vamya. 1, 14:21) Numba tuhu katwatachikiza chuma chamulingishile alikangeko, oloze chuma alingile chalingishile muyachi wosena umukundwize. Echi chalingishile Yehova etavise Shishake mwangana waEjipitu mangana alukuke jinganda javaYuleya jajivulu, numba tuhu Lehovowame ajikingile.—Vamya. 1, 14:22-24; Miji. 2, 12:1-4.

Lehovowame amwene jino ngwenyi ali muukalu omu Shishake ahetele muYelusalema munganda yize ayulililenga. Kapolofweto Shemaya jino alwezele Lehovowame navilolo jenyi mazu amulwezele Kalunga ngwenyi: “Munanguseze, shikaho ngunamihane mumavoko aShishake.” Uno Lehovowame alingile ngachilihi? Mbimbiliya yamba ngwayo: “Vilolo javaIsalele namwangana valinyishile kumeso aKalunga, vambile ngwavo: ‘Yehova apwa wakwoloka.’” Ngocho Yehova ayowele Lehovowame nakuhona kunongesa nganda yaYelusalema.—Miji. 2, 12:5-7, 12.

Kufumaho, Lehovowame atwalileho kuyula wangana wakusulo. Shimbu kanda Lehovowame afwenga apangilile vana venyi uswana wauvulu, kuchina vatu navalikanga kuli ndumbwavo Aviya uze amuswanyine. (Miji. 2, 11:21-23) Chuma alingile chasolwele nge apwile wakunangakana.

ALINGILENGA VYUMA VYAMWAZA NYI VYAVIPI?

Numba tuhu Lehovowame alingilenga vyuma vyamwaza shimbu jimwe, oloze kavamwivwililile uselewa kuli Kalungako. Mbimbiliya yamba ngwayo: “Alingilenga vyuma vyavipi” Mwomwo ika? “Mwomwo kafwililile kutondatonda Yehova namuchima wenyi wosenako.”—Miji. 2, 12:14.

Lehovowame ahonene kulondezeza chakutalilaho chaMwangana Ndavichi, mwomwo katungile usoko wakukola naYehovako

Shimbu jimwe Lehovowame ononokelenga Kalunga, kaha nawa alingililenga vatu jaYehova vyuma vyamwaza. Chipwe ngocho, ahonenenga kutunga usoko wakukola naYehova nakumwivwisa kuwaha kumuchima. Ngocho echi chamulingishile aputuke kulinga vyuma vyavipi nakulemesa makombelo. Munahase kulihulisa ngwenu: ‘Uno Lehovowame ononokelenga Kalunga mwomwo yakukavangiza  kaha vakwavo nyi mwomwo apihililile nakwalumuka nakufwila kwivwisa Kalunga kuwaha tahi? (Miji. 2, 11:3, 4; 12:6) Kutwala muze, aputukile cheka kulinga vyuma vyavipi. Lehovowame alihandunwine chikuma nakaka yenyi Mwangana Ndavichi. Numba tuhu lwola lumwe Ndavichi alimbenjelenga, oloze twamutachikiza kupwa mutu uze azangilenga Yehova nakuhakwila kwitava chamuchano, kaha nawa apihililile nakwalumuka kuvilinga vyenyi vyavipi.—Vamya. 1, 14:8; Samu 51:1, 17; 63:1.

Tunahase kulinangula vishina vyavilemu kumujimbu waLehovowame. Chapwa chamwaza vatu kuzakama vaka-tanga yavo chipwe kulingila vakwavo vyuma vimwe vyavilemu. Oloze hakusaka Kalunga atwivwile uselewa, twatela kuzanga kwitava chamuchano nakuchikundwizanga lwola lwosena.

Tunahase kulinga ngocho kachi nge natuzanga chikuma Yehova. Ngana muze tweji kusambizanga hajiko mangana kakahya katwaleho lika kukwata, nayetu twatela kuzamisa zangi yetu yakuzanga Kalunga, hakulinangula mazu enyi lwola lwosena, nakushinganyekaho, nakulomba. (Samu 1:2; Loma 12:12) Kuzanga chikuma Yehova nachitukafwa tufwile kumwivwisanga kuwaha mukala vyuma natulinganga nakutulingisa nawa tupihilile nakwalumuka nge tunalimbenje. Katwasaka kupwa ngana mwaLehovowameko mwomwo twafwila kutwalaho kukundwiza kwitava chamuchano.—Yuta 20, 21.

^ par. 9 Hakuwana nge Solomone katwalilileho kupwa wakushishikako, ngocho Kalunga ahanjikile chimweza ngwenyi wangana wenyi navakauhandununa.—Vamya. 1, 11:31.