VAKA-KULISHITU vamulikulukaji lyamyaka lyakulivanga vambulwile “mujimbu wamwaza waWangana” kuvatu vavavulu. (Mateu 24:14) Vamwe vayilenga nakumafuchi eka nakwambulula mujimbu. Chakutalilaho, kaposetolo Paulu azachililenga umishonali nakulifuchi lize vanakuvuluka makumbi ano ngwavo Turkey. * Kaha kuheta mu 2014, omu mwahichile myaka 2,000, kwapwile cheka mulimo wakulipwila wakwambulwila muTurkey. Mwomwo ika kwapwilile kwambulula kanechi chakulipwila? Kaha veya vazachile mulimo kana?

“KWAHOLA?”

MuTurkey muli vaka-kwambulula vakuzomboka 2,800, oloze mwatwama vatu jimiliyoni 79. Echi chinalumbununa nge mutu umwe atela kwambulila vatu 28,000. Hakuwana nge vaka-kwambulula vavandende, ngocho kavahashile kwambulila vatu vavavuluko. Shikaho, vanonekele mulimo wakulipwila mangana vambulile vatu vavavulu hakashimbu kakandende kaha. Ngocho vandumbwetu 550 vakufuma kumafuchi eka vaze vahanjika lilimi lyaTurkish vayile kuTurkey vakazachile hamwe navandumbwavo vakulifuchi kana. Nganyo muka yafuminemo?

Vambulilile vatu vavavulu chikuma. Vandumbwetu muchikungulwilo chimwe chamuIstanbul vasonekele ngwavo: “Omu vatumwene vatu, vatuhulishile ngwavo: ‘Uno muli nakukunguluka chakulipwila tahi? Tunakumona Vinjiho jaYehova vali nakuhitangana.’” Kaha vandumbwetu vamuchikungulwilo chamuIzmir vasonekele ngwavo: “Lunga umwe uze azachililenga hachitulilo chajiminyau ejile kuli kalama umwe nakumuhulisa ngwenyi, ‘Kwahola? Chili nakusoloka nge muli nakuzata natwima chikuma jino.’” Chikupu vene, vatu vamwene mulimo vapwile nakuzata vandumbwetu.

Steffen

Vandumbwetu vaze vafumine kumafuchi eka valivwishile kuwaha kuzata mulimo kana. Steffen wakuDenmark, ambile ngwenyi: “Hakumbi hakumbi ngwambulililenga vatu vaze kanda vachivwengaho lyehi lijina lyaYehova. Ngwalivwile ngwami nguli nakulingisa lijina lyaYehova valitachikize kuvatu.” Jean-David wakuFrance ambile ngwenyi: “Twambulwile jola jajivulu mumukwakwa umwe kaha. Chuma kana chawahile chikuma. Vatu vavavulu kavatachikijile Vinjiho jaYehovako. Hakala limbo twayilenga twawanyinenga vatu vakuwahilila, ngocho twavatalishilenga jivindiyo nakuvasela mikanda.”

Jean-David (hakachi)

Vandumbwetu 550 vaze vazachile ou mulimo wakulipwila vahanyine vatu mikanda 60,000  muvyalumingo vivali kaha. Chikupu vene, ou mulimo wakafwile vaka-kwambulula vambulile vatu vavavulu chikuma.

Vandumbwetu vapwile jino natwima chikuma. Ou mulimo wakulipwila wakunywile vandumbwetu vamulifuchi kana vazange chikuma kwambulula. Ngocho vavavulu vazangile jino kuzata mulimo washimbu yosena. Kahomu mwahichile tukweji 12, hali vapayiniya vashimbu yosena muTurkey haliwezelele veka vavahya 82.

Şirin

Vandumbwetu vaze vafumine kumafuchi eka vahanjikile omu kuzata mulimo kanou wakulipwila chavakafwile nomu vakindulukile kumembo avo. Ndumbwetu wapwevo Şirin wakuGermany, asonekele ngwenyi: “Vandumbwetu muTurkey vapwa vakukasunuka kwambulila vatu mumikwakwa. Oloze ami ngweji kwivwanga sonyi kwambulula mukutulukila. Ngocho ngwawahililile chikuma kwazana mumulimo kanou wakulipwila mwomwo kulomba nakulondezeza chakutalilaho chavandumbwetu vyangukafwile nguhamuke kuhanjika navatu. Ngwahashilenga nakwambulwila mumikwakwa yahita kwishi yamavu nakuhana vatu jitalakiti. Makumbi ano jino kangweshi nasonyi chikumako.”

Johannes

Johannes wakuGermany ambile ngwenyi: “Ngwalinangwile vyuma vyavivulu hakuzata ou mulimo wakulipwila. Vandumbwetu muTurkey vasaka kuzata nangolo javo josena vanangule vatu vavavulu muchano. Veji kwambulilanga vatu kala lwola. Ngocho omu ngwakindulukile kuGermany, ngwafwililile kulondezeza twima yavo. Kaha ngweji kwambulilanga jino vatu vavavulu kuhambakana muze ngwalingilenga hakavanga.”

Zeynep

Zeynep wakuFrance ambile ngwenyi: “Kwazana mumulimo kanou wakulipwila changukafwile ngupwenga nguwakuhamuka nakufwelela chikuma muli Yehova.”

Vandumbwetu muchikungulwilo valizangile chikuma. Vandumbwetu vakufuma kumafuchi akulisezaseza valinungile hamwe nakulizanga. Jean-David uze twavulukanga ambile ngwenyi: “Vandumbwetu vatusolwelelenga chisambo.” Ambile nawa ngwenyi: “Vatumwene kupwa tumasepa javo, kaha nawa nge tuvausoko javo. Vatusanyikilenga kujizuvo javo. Kweseka nomu ngwatangilenga mumikanda yetu, ngwatachikijile ngwami etu Vinjiho mukaye kosena twatwama mutanga yimwe. Oloze chuma kana ngwachimwene jino nameso ami kapu. Ngweji kwivwanga kuwaha hakupwa nguChinjiho chaYehova, kaha ngweji kumusakwililanga hakunguneha mutanga kaneyi.”

Claire (hakachi)

 Claire wakuFrance ambile ngwenyi: “Numba twafumine kuDenmark, kuFrance, kuGermany, chipwe kuTurkey, oloze tuvosena twapwile tuvamutanga yimwe. Chapwile kwijiva nge Kalunga nafumisako jingiza jamafuchi.”

Stéphanie (hakachi)

Stéphanie wakuFrance ambile ngwenyi: “Hakuzata mulimo wakulipwila, twalinangwile nge chuma cheji kutununganga hamwe shina zangi yakuzanga Yehova keshi chisemwa chipwe lilimi ahanjika mutuko.”

VIKUNGULWILO VYANGANYALILE MWAMUNENE

Vandumbwetu vaze vafumine kumafuchi eka vaze vazachile ou mulimo wakulipwila, vashinganyekele kukinduluka cheka kuTurkey mangana vakakafwe vandumbwavo kwambulula. Vamwe vanaluka lyehi. Ava vandumbwetu twatela kuvasangejeka chikuma.

Chakutalilaho, kwatwama lizavu limwe lyavaka-kwambulula 25 lyatwama kwakusuku nachikungulwilo. Hamyaka yayivulu, lizavu kana lyapwilenga nakalama umwe kaha. Oloze kuheta mu 2015, vandumbwetu mulizavu kana vawahililile chikuma hakutambula vandumbwavo 6 kufuma kuGermany nakuNetherlands vaze vejile nakuvakafwa.

KUZACHILA KUZE KUNAKUSAKIWA VAKA-KWAMBULULA

Vandumbwetu vaze vanazachilanga muTurkey veji kwivwanga ngachilihi hachiyoyelo chavo mulifuchi kana? Numba tuhu lwola lumwe chapwa chachikalu kutwama mulifuchi lyeka, oloze kuya nakuzachila kuze kunakusakiwa vaka-kwambulula cheji kunehanga nganyo yayinene. Achitalenu omu vahanjikile vandumbwetu vamwe:

Federico

Federico wakuSpain uze ambata, wamyaka 41, ambile ngwenyi: “Kuhona kupwa navikumba vyavivulu cheji kungukafwanga ngupwenga nguwakulihehwa, nakupwa nalwola lwakulinga vyuma vyavilemu chikuma.” Kutala Federico nahase kukolezeza vakwavo vazate mulimo kana tahi? Eyo, ambile ngwenyi: “Mulimo kana wamwaza. Nge namuya kulifuchi lyeka mangana mukanangule vatu vyaYehova, kaha nachisolola nge mwapendamina hali ikiye amikafwe. Ngocho namumona chikupu ngwenu Yehova ali nakumizakama chikuma.”

Rudy

Rudy wakuNetherlands uze ambata, wamyaka 57, ambile ngwenyi: “Kuya nakuzachila kuze kuli nakusakiwa kukafwa nakunangula vatu muchano uze kanda  vachivwengaho lyehi cheji kusuulwisanga chikuma. Cheji kwivwisanga nawa kuwaha hakumona vatu vanetavila muchano.”

Sascha

Sascha wakuGermany uze ambata, wamyaka 42 ambile ngwenyi: “Kala lwola ngweji kupwanga muwande, ngweji kuwananga vatu vaze kanda vachivwengaho lyehi muchano. Ngocho kuvanangula vatachikize Yehova cheji kungusuulwisanga.”

Atsuko

Atsuko wakuJapan uze asomboka, wamyaka 36 ambile ngwenyi: “Kunyima ngwalombelenga ngwami Alamangetone yizenga washi. Oloze kwiza nakuzachila kuTurkey changulingisa ngusakwilile Yehova hakutalilila vatu chikoki. Kumona omu Yehova ali nakutwaminyina mulimo wakwambulula mukaye kosena cheji kungulingisanga ngufwile kupandama chikuma kuli ikiye.”

Alisa wakuRussia, uze ali namyaka 31, ambile ngwenyi: “Kuzachila Yehova mumulimo kana chinangukafwe ngumakile kuwaha chenyi chosena.” (Samu 34:8) Ambile nawa ngwenyi: “Yehova kapwa kaha Tatako, oloze apwa nawa Sepa lyami wahamuchima, kaha ngweji kupendaminanga hali ikiye lwola lwosena. Ngwapwa nguwakuwahilila mukuyoya chami, kaha ngweji kulivwisanga kuwaha vyuma vyavivulu hakuzata mulimo kana.”

‘TALENU MANDE’

Mulimo wakulipwila wapwile muTurkey walingishile vatu vavavulu vevwenga mujimbu wamwaza. Chipwe ngocho, kuli jingalila jajivulu kuze kanda kuhete mujimbu kana. Vatu vosena vaze veji kuyanga kuTurkey veji kwambulilanga vatu vaze kanda vachivwengaho lyehi vyaYehova. Kutala namusaka kuzachila kungalila yakufwana ngana tahi? Nge mukiko, kaha tuli nakumikolezeza ngwetu: “Andulenu meso enu mutale mande, kaha namumona ngwenu anatomasana lyehi, anatemo kwaha.” (Yowa. 4:35) Kutala namulisuula kuya nakuzachila kukala lifuchi kuze mande “anatomasana lyehi, anatemo kwaha” tahi? Nge mukiko, kaha putukenu kuliwahisa mangana mutesemo vyuma kana. Tachikizenu ngwenu, kuzata chikuma nakutandakanyisa mujimbu wamwaza “kuvihela vyakwakusuku vyahamavu” nachiminganyalisa mwamunene chikuma.—Vili. 1:8.

^ par. 2 Talenu mbuloshuwa yakwamba ngwavo “See the Good Land,” mafwo 32-33.