SATANA ali nakuzata nangolo jenyi josena mangana aminyemukile. Ali nakuzachisa mijimbu yakumbembejeka mangana amihungumwise nakwenyeka vishinganyeka vyenu.

Kaposetolo Paulu atachikijile tufuta twa Satana twakumbembejeka, oloze keshi mukiko chapwile nakuli vandumbwenyi vaka-Kulishitu vosenako. Chakutalilaho, vamwe muKolinde vapwile namuchima wakulifwelela vavene nakushinganyeka ngwavo vazamine mumuchano, kaha kaveshi kuhasa kulimbukako. (Koli. 1, 10:12) Echi chikiko chalingishile Paulu avalweze ngwenyi: “Nguli nawoma, ngwami pamo nge muze linoka atangishile Eve nakulunguluka chenyi, mukiko pamo munavalumbula navishinganyeka vyenu nawa vifume kukushishika nakukutoma vize vyatela Kulishitu.”—Koli. 2, 11:3.

Mazu aPaulu asolola nge katwatela kulifwelela chikuma etu vaveneko. Shikaho hakusaka muhonese kafuta kaSatana kakumbembejeka, mwatela kutachikiza ponde yinahase kufuma hakwivwilila kumijimbu kana nakulihendako.

PONDE MUKA YATWAMA HAKWIVWILILA KUMIJIMBU YAKUMBEMBEJEKA?

Uno mijimbu yakumbembejeka yapwa chuma muka? Vatu veji kuhanjikanga mijimbu yakumbembejeka mangana vongenga vakwavo. Mukanda waPropaganda and Persuasion wamba ngwawo mijimbu yakumbembejeka yapwa “yayipi mwomwo yinahase kujihisa mutu.” Vatu vamwe valumbununa mijimbu yakumbembejeka ngwavo yapwa kwonga, chipwe kutangisa, chipwe kuhungumwisa.

Mijimbu yakumbembejeka yapwa yayipi nganomu wapwa ulembe, mwomwo yeji kwenyekanga chivezu chamutu. Hakuwana nge kachapwa chachashi kutachikiza mijimbu kanako,  Vance Packard uze alinangula havilinga vyavatu, ambile ngwenyi: “Vatu veji kuvahungumwisanga kumijimbu kana.” Mutu umwe alinangula chikuma, ambile ngwenyi: “Vatu vavavulu veji kuvahungumwisanga valinge vyuma vyavipi” vyakufwana nge, ‘kulijihila hamiyachi, nakuzunga jijita, nakuyanjisa vatu mwomwo yachikova chavo.’—Easily Led—A History of Propaganda.

Kachi nge vatu vanahase kutumbembejeka, nyi ngachilihi Satana? Kufuma vene kukutenga chavatu, Satana atachikiza omu vyapwa vilinga vyavatu. Kano “kaye kosena” katwama mungolo jenyi, shikaho nahase kuzachisa vyuma vyatwamamo mangana amihungumwise. (Yowa. 1, 5:19; Yowa. 8:44) Satana ‘nelavisanga vishinganyeka vyavatu’ ngocho ali “nakuhungumwisa vatu vosena hamavu.” (Koli. 2, 4:4; Kuso. 12:9) Uno namuhasa kulikinga ngachilihi kumijimbu yenyi yakumbembejeka?

ZAMISENU LUFWELELO LWENU

Yesu ahanjikile jila yakulikingilamo kumijimbu yakumbembejeka ngwenyi: “[Tachikizenu] muchano, kaha muchano naumilingisa kupwa vakulihehwa.” (Yowa. 8:31, 32) Liswalale ali mujita atela kutachikiza kwakuwana mijimbu yamuchano kuchina vaka-kole jenyi navamuhungumwisa nakumufungulula. Jino mijimbu yamuchano namuyiwana kulihi? Yehova atuhana Mazu enyi Mbimbiliya, muze mwatwama mijimbu yakutukafwa tufungulule makuli aSatana.—Chimo. 2, 3:16, 17.

Chipwe ngocho, Satana atachikiza ngwenyi Mbimbiliya yinahase kutukafwa. Shikaho, eji kuzachisanga vyuma vyamuno mukaye vituhonese kuyitanga nakulinangulayo. Oloze kamwatela kumwitavisa amihungumwise natufuta twenyiko. (Efwe. 6:11) Mwatela “kumona kanawa” mwalumbunukila muchano. (Efwe. 3:18) Echi chasakiwa kuzata nangolo. Kaha mwatela nawa kwanuka mazu ahanjikile muka-kusoneka mikanda Noam Chomsky ngwenyi: “Kakweshi mutu mwahasa kuhaka muchano mutulo yenuko. Mwatela kulitondelawo enu vavene.” Shikaho, ‘litondelenuwo enu vavene’ hakukekesanga “kanawa Visoneka hakumbi hakumbi.”—Vili. 17:11.

Hakusaka mufungulule vyuma vize vinahase kwenyeka vishinganyeka vyenu, mwatela kutachikiza ponde yatwama hakwivwilila kumijimbu yakumbembejeka, nakuwana mwakulikingila

Tachikizenu ngwenu, Satana kasaka mushinganyekenga mujila yamwazako. Mwomwo ika tunahanjikila ngocho? Mukanda umwe wamba ngwavo, mijimbu yakumbembejeka “yeji kuhungumwisanga vatu vavavulu, chikumanyi nge vatu kaveshi nakushinganyeka kanawa  havyuma vimweko.” (Media and Society in the Twentieth Century) Shikaho kanda namwitavilanga kala mijimbu namwivwangako, oloze mwatela kuhunananaho mutachikize mashina namasongo. (Vishi. 14:15) Zachisenu uhashi wenu wakushinganyeka kanawa numba mwitavile.—Vishi. 2:10-15; Loma 12:1, 2.

PWENUNGA VAKULINUNGA

Maswalale veji kumbembejekanga vaka-kole javo hakusaka kuzeyesa twima yavo. Echi cheji kuvalingisa vapwenga muchimbalanganyi nakulizungisa mwavomwavo. Mukulwane umwe wamaswalale wakuGermany ambile ngwenyi, lifuchi lyavo valifungulwile haJita yaKaye yatete mwomwo vatu vahungukilile kumijimbu yamakuli. NaSatana eji kunehanga chimbalanganyi hali vaka-Kulishitu mangana vahone kulivwasana navakwavo. Eji kuvalingisanga nawa valilamine jikoko, ngocho cheji kuvalingisanga jino vaseze liuka lyaYehova.

Kanda kwitavila Satana amyongeko. Oloze itavilenu Mazu aKalunga amitwaminyinenga. Chakutalilaho, hakusaka mulinunge navandumbwenu, Mbimbiliya yahanjika ngwayo “likonekelenunga navakwenu namuchima wakusuuluka,” nakukumisanga washi vikokojola. (Kolo. 3:13, 14; Mateu 5:23, 24) Yatuhuhumuna nawa tuhonenga kulihandula kuchikungulwilo. (Vishi. 18:1) Likekesenu mumone nge namuhasa kufungulula Satana hakulihulisa ngwenu: ‘Uno halwola ngwapwile mucheseko, vishinganyeka vyami vyapendaminyine haka? Kutala vyapendaminyine hashipilitu yakaye nyi hashipilitu yaKalunga?’—Ngale. 5:16-26; Efwe. 2:2, 3.

FWELELENUNGA LIKA VAZE VANAKUMITWAMINYINA

Nge liswalale keshi kushishika kuli twamina yenyiko, kaha keshi kuhasa kuzunga kanawa jitako. Shikaho vaka-kumbembejeka veji kwonganga maswalale vahone kufwelela vatwamina javo. Vanahase kuvalweza ngwavo: “Kanda kufwelela twamina yenuko,” chipwe ngwavo “Kanda kwechelela vamijihiseko.” Vaka-kumbembejeka vanahase nawa kukunyula maswalale hakuvuluka tutenga twavatwamina javo. Omu mukiko eji kulinganga naSatana. Eji kusakanga muhone kufwelela vaze ali nakuzachisa Yehova hakumitwaminyina.

Uno namulikinga ngachilihi? Fwilenu kukakachila kuliuka lyaYehova nakwononoka vaze  vali nakumitwaminyina chamokomoko natutenga twavo. (Teso. 1, 5:12, 13) Kanda “namuluwangana washiwashi muvishinganyeka vyenuko” nge vali nakumimbembejeka kuli vaka-kulikanga kuli Kalunga chipwe kuvatu veka, numba tuhu vyuma navahanjika navisoloka kupwa vyamuchano. (Teso. 2, 2:2; Chitu. 1:10) Mwatela kukavangiza mazu valwezele Chimoteu. Lamenu muchano mwalinangwile nakwanuka vaze vaminangwilewo. (Chimo. 2, 3:14, 15) Kuli unjiho wauvulu wakumikafwa mufwelele vaze nazachisanga Yehova hakututwaminyina kumuchano kafwe hamyaka 100 yinahichimo.—Mateu 24:45-47; Hepe. 13:7, 17.

KANDA NAMWIVWA WOMAKO

Tachikizenu ngwenu Satana keshi kutweseka mukuswamana kahako. Lwola lumwe eji kutwivwisanga woma hakutulweza mijimbu yakumbembejeka. Mukanda umwe wamba ngwawo, ‘aka kakiko kafuta nazachisanga hamyaka yayivulu.’ (Easily Led—A History of Propaganda) Chakutalilaho, mutu alinangula chikuma Philip M. Taylor wakuBritain ambile ngwenyi, vaAsulya vafungulwilenga vaka-kole javo hakuvambembejeka namazu akuvevwisa woma. NaSatana asaka mwivwenga woma wavatu, nawoma waluyanjisa, nawoma wakufwa, nawoma wavyuma vyeka mangana mulitwamine kuzachila Yehova.—Isa. 8:12; Yele. 42:11; Hepe. 2:15.

Kanda kwechelela Satana amivwise woma mangana azeyese lufwelelo lwenu chipwe kuhokola kulonga chenuko. Yesu ambile ngwenyi: “Kanda namwivwa woma vaze navajiha mujimbako, kaha kufumaho kaveshi kuhasa kulinga chuma chekako.” (Luka 12:4) Fwelelenu muli Yehova mwomwo ashika ngwenyi mwamilamanga nakumihana “ngolo jakuhambakana jize javatu” nakumikafwa muhonese kala vyeseko namumona.—Koli. 2, 4:7-9; Petu. 1, 3:14.

Shimbu jimwe munahase kumona vyeseko vize navimivwisa woma nakumizeyesa. Oloze mwatela kwanuka mazu ahanjikile Yehova kuli Yoshuwa ngwenyi: “Umika, jikiza. Kanda naulizuzukila chipwe kwivwa womako, mwomwo Yehova Kalunga kove ali nayove kweshokwo nauyanga.” (Yoshu. 1:9) Kachi nge munalizakamina, kaha lombenu kuli Yehova nakumulweza ukalu wenu wosena. Fwelelenu ngwenu “kuunda chaKalunga . . . nachikinga michima yenu navishinganyeka vyenu” mangana muhase kufungulula makuli aSatana.—Fwili. 4:6, 7, 13.

Kutala munakwanuka mazu amakuli ahanjikile Lavashake, temesa wavaAsulya hakumbembejeka vatu jaKalunga tahi? Ambile ngwenyi, vaIsalele kavapwile namuka-kuvakinga kuli vaAsulyako, kaha nawa ngwenyi numba Kalunga kavo Yehova keshi kuvakingako. Kufumaho ambile ngwenyi: ‘Yehova ikiye natutumu twizenga nakunongesa lifuchi lino.’ Uno Yehova alingile ngachilihi? Ambile kuli Hezekiya ngwenyi: “Kanda nawivwa woma wamazu unevu awa vanangusaula vangamba jamwangana waAsulyako.” (Vamya. 2, 18:22-25; 19:6) Kaha atumine kangelo nakunongesa vaAsulya 185,000 haufuku umwe kaha.—Vamya. 2, 19:35.

IVWILILENUNGA KULI YEHOVA

Kutala mwamonaho lyehi mutu ali nakulweza mukwavo vyuma vize munatachikiza ngwenu vyamakuli tahi? Nge mukiko, kaha pamo mwalyambile mumuchima wenu ngwenu: ‘Kanda kumwivwililako, ali nakukwonga.’ Navangelo veji kwambanga mwomumwe kuli yenu ngwavo: “Likwachiseko, kanda kwitavila Satana akuhungumwiseko.”

Kamwatela kwivwililanga kumijimbu yaSatana yakumbembejekako. (Vishi. 26:24, 25) Oloze ivwililenunga kuli Yehova nakupendamina hali ikiye muvyuma vyosena namulinganga. (Vishi. 3:5-7) Ononokenunga mazu enyi akwamba ngwenyi: “Ove mwanami, pwako namangana, ungwivwisenga kumuchima kuwaha.” (Vishi. 27:11) Nge namulinga ngocho, kaha namufungulula vyuma vize vinahase kwenyeka vishinganyeka vyenu.