Uno mazu vavuluka hali Ezekele kapetulu 37 aze ahanjika vyakuwanyisa vitondo vivali hamwe alumbununa ika?

Yehova alwezele Ezekele mazu aze asolwele nge muyachi waIsalele naukalinunga cheka omu naukakinduluka muLifuchi lyaLushiko. Mazu kana asolwele nawa omu vatu jaKalunga navakalinunga hamwe hamakumbi akukuminyina.

Yehova alwezele kapolofweto Ezekele asoneke havitondo vivali. Amulwezele asoneke hachitondo chimwe ngwenyi, “Chitondo chaYuta navaIsalele vaze ali navo,” kaha hachitondo chikwavo ngwenyi, “Chitondo chaYosefwe, hichitondo chaEfwalime navakuzuvo yaIsalele vosena vaze ali navo.” Vize vitondo vivali vyatelele kupwa “chitondo chimwe” mulivoko lyaEzekele.—Ezeke. 37:15-17.

Lizu “Efwalime” lyemanyinako ika? Yelovowame mwangana wakulivanga wawangana wamiyachi likumi wakunote,  apwile wakumuyachi waEfwalime, uze wapwile muyachi waunene. (Lushi. 33:13, 17; Vamya. 1, 11:26) Ou muyachi wafumine kuli Efwalime mwana Yosefwe. (Kula. 1:32, 33) Yosefwe vamukiswile kuli ise Yakova. Shikaho chapwile chakutamo chize chitondo chemanyinyineko wangana wamiyachi likumi kuchivuluka ngwavo “hichitondo chaEfwalime.” Halwola Ezekele asonekele ou upolofweto wavitondo vivali, vatu vamuwangana wavaIsalele wakunote vavatwalile muundungo kuli vaAsulya mu 740 B.C.E. (Vamya. 2, 17:6) Ngocho vaIsalele vavavulu valimwangile muWangana Wavaka-Mbavilone uze washishile Wangana wavaAsulya.

Kaha mu 607 B.C.E., wangana wamiyachi yivali wakusulo navatu vamuwangana wakunote vaze vasalileho vavatwalile muundungo muMbavilone. Vamyangana vakuchisaka chaYuta vayulilenga eyi miyachi yivali, kaha vapilishitu nawa vafumine kumiyachi kana mwomwo vazachililenga mutembele muYelusalema. (Miji. 2, 11:13, 14; 34:30) Shikaho chapwile chakutamo kwamba ngwetu ou wangana wamiyachi yivali wemanyinyineko chize chitondo “chaYuta.”

Uno evi vitondo vivali vyachifwanyisa vaviwanyishile mwaka uka? Vaviwanyishile mu 537 B.C.E., omu vaIsalele vakindulukile kuYelusalema nakutungulula tembele. Vatu vamuwangana wamiyachi yivali navaze vakumiyachi likumi vafuminyine hamwe muundungo. VaIsalele vosena valinungile hamwe. (Ezeke. 37:21, 22) Halwola kana vaIsalele valinungile nakulemesela hamwe Yehova mukuunda. Echi kulinunga vachihanjikile nawa chimweza kuli kapolofweto Isaya naYelemiya.—Isa. 11:12, 13; Yele. 31:1, 6, 31.

Muchano muka wakupandama kukulemesa chamuchano vanasolola muupolofweto kanou? Yehova mwakalingisa vatu jenyi vakalinunge hamwe. (Ezeke. 37:18, 19) Kutala upolofweto kana unatesamo makumbi ano tahi? Eyo. Upolofweto kana waputukile kutesamo mu 1919, omu vatu jaKalunga vavalongesa nakuvanunga hamwe. Satana asakile kuhandununa vatu jaKalunga nakuvanongesa, oloze kahashileko.

Halwola kana vatu vavavulu vamulizavu kana vapwile nalutalililo lwakukayula naYesu mwavamyangana navapilishitu mwilu. (Kuso. 20:6) Vapwile nge chitondo chaYuta. Oloze mukuhita chalwola, vatu vavavulu vaze vapwile nalutalililo lwahamavu vaputukile kulinunga hamwe navaYuleya vakushipilitu. (Zeka. 8:23) Vapwile nge chitondo chaYosefwe, kaha kavapwile nalutalililo lwakukayula hamwe naKulishituko.

Makumbi ano, awa mazavu avali azachila hamwe mwavatu jaYehova hakuvatwaminyina kuli Mwangana umwe Yesu Kulishitu uze vavuluka muupolofweto ngwavo “ngamba yami Ndavichi.” (Ezeke. 37:24, 25) Yesu alombele ngwenyi vaka-kumukavangiza vosena navakapwa ‘umwe, nganomu Ise alikata nayikiye, kaha ikiye nawa naIse.’ * (Yowa. 17:20, 21) Yesu ahanjikile nawa ngwenyi, utanga wamikoko waundende wavaze vawavisa “namikoko veka” navakapwa “utanga umwe.” Vosena navakapwa “nakafunga umwe.” (Yowa. 10:16) Mazu ahanjikile Yesu alumbununa kanawa kulinunga chavatu jaYehova makumbi ano, chamokomoko nalutalililo vatwama nalwo.

^ par. 6 Jila Yesu alumbunwinyinemo vyuma vyakusolola kupwako chenyi yapwa yamwaza chikuma. Chatete, ahanjikile hali “ndungo wakushishika wakuzangama,” kalizavu kakandende kavandumbwenyi vawavisa vaze navakatetekela mulimo wakuzakama vakuzuvo yenyi. (Mateu 24:45-47) Kaha ahanjikile hali vosena vaze vatwama nalutalililo lwakukayoyela mwilu. (Mateu 25:1-30) Chamakumishilo, ahanjikile hali vaze vatwama nalutalililo lwakukayoyela hamavu, veji kukundwizanga vandumbu jaKulishitu. (Mateu 25:31-46) Chochimwe nawa, kutesamo chaupolofweto waEzekele makumbi ano, chavuluka chatete vyuma navikasoloka kuli vaze vatwama nalutalililo lwamwilu. Numba tuhu uze wangana wamiyachi likumi kawemanyinako vaze navakayoyela hamavuko, oloze vyuma vavuluka muupolofweto kanou vyasolola kulinunga chavawavisa namikoko veka.