“[Twalenuho] kuvilika kufwa chaMwata palanga nomu mwakeza.”—KOLI. 1, 11:26.

MWASO 18 Kusakwilila Ndando yaKusokola

VYUMA NATUSHIMUTWILA *

1-2. (a) Yehova eji kumonanga ika nge mayevuyevu avatu vali kuchilika chaKulya chaMwata chaChingoloshi? (Talenu muvwimbimbi wahalipapilo lyahelu.) (b) Vyuma muka natushimutwila muchihande chino?

UNO Yehova eji kumonanga vyuma muka hamayevuyevu avatu vaze veji kwizanga kuchilika chaKulya chaMwata chaChingoloshi? Yehova keshi kutala hakuvula chavatu veji kukungulukanga kahako, oloze eji kumonanga mutu himutu uze eji kupwanga kuchilika kana. Chakutalilaho, eji kunyingililanga vaze veji kupwanga kuchilika kana mwaka himwaka. Vamwe veji kwizanga kuchilika kana chamokomoko nakuvayanjisa. Veka nawa vamona kupwa kuchilika chaKwanuka Kufwa chaKulishitu kupwa chachilemu chikuma, numba tuhu kaveza lwola lwosena kukukunguluka cheka chize tweji kupwanga nachoko. Yehova eji kumonanga nawa vaze veji kupwanga kuchilika kana halwola lwatete, pamo mwomwo yakufwila kutachikiza omwo chapwa chilika kana.

2 Chikupu vene, Yehova eji kwivwanga kuwaha kumona vatu vavavulu vanalikungulula kuchilika chaKwanuka Kufwa chaKulishitu. (Luka 22:19) Chipwe ngocho, Yehova kahaka mangana kukuvula chavatu vanakungulukako, oloze eji kufwilanga kutachikiza ovyo vyeji kuvalingisanga vafwile kupwa kuchilika kana. Muchihande chino natushimutwila chihula chino chachilemu: Vyuma muka vyeji kutulingisanga tupwenga kuchilika chaKwanuka Kufwa chaKulishitu chize cheji kupwangako kamwe mumwaka nakukukunguluka cheka chize Yehova ali nakuwahishilanga vaze vamuzanga?

(Talenu palangalafu 1-2) *

KULINYISA CHIKIKO CHEJI KUTULINGISANGA TUPWENGA KUKUKUNGULUKA

3-4. (a) Mwomwo ika tweji kupwilanga kukukunguluka? (b) Uno kupwa kukukunguluka cheji kusololanga ika hali etu? (c) Kweseka nachisoneka chaWavaka-Kolinde 1, 11:23-26, mwomwo ika twatela kufwila kupwa kuchilika chaKwanuka Kufwa chaMwata?

3 Tweji kupwanga kukukunguluka chachikungulwilo mwomwo yapwa hijila yimwe yakulemeselamo Yehova. Kaha nawa tweji kuyanga mangana Yehova atunangule. Vatu vakulivwimba  vamona ngwavo kavasakiwa kuvanangulako. (Yowa. 3, 9) Oloze etu twasaka kutunangula kuli Yehova naliuka lyenyi lize ali nakuzachisa.—Isa. 30:20; Yowa. 6:45.

4 Kupwanga kukukunguluka cheji kusololanga nge twapwa tuvakulinyisa, kaha nawa twasaka kutunangula. Haufuku waKwanuka Kufwa chaYesu, tweji kupwanga kuchilika kana mwomwo twachimona kupwa chachilemu, kaha nawa twasaka kwononoka lushimbu lwaYesu lwakwamba ngwenyi: “Lingenunga lika ngocho mungwanukilengaho ami.” (Tangenu Wavaka-Kolinde 1, 11:23-26.) Kukunguluka kana cheji kutukafwanga tuzamise lutalililo lwetu, nakutwanukisa nawa omwo yatohwa zangi yaYehova yakutuzanga etu. Chipwe ngocho, Yehova atachikiza ngwenyi twasakiwa kutukolezeza nakutujikijisa mapapa kakavulu mumwaka. Shikaho eji kutuwahishilanga kukunguluka chalumingo hichalumingo nakutukolezeza tupwenganga kukukunguluka kana. Kulinyisa chikiko cheji kutulingisanga tupwenga kukukunguluka kana. Chalumingo hichalumingo tweji kuwahishilanga chimweza vyakukunguluka nakupwa kukukunguluka kana.

5. Mwomwo ika vatu vakulinyisa veji kusololanga ngwavo vetavila kuvanangula kuli Yehova?

5 Mwaka himwaka vatu vakulinyisa vavavulu veji kwitavilanga kwiza kuli Yehova mangana avanangule. (Isa. 50:4) Kakavulu vatu kana veji kuvangilanga kupwa kukukunguluka chaKwanuka Kufwa chaKulishitu, numba jino vaputuke kwiza kukukunguluka cheka chize tweji kupwanga nacho. (Zeka. 8:20-23) Tuvosena tweji kwivwanga kuwaha kutunangula nakututwaminyina kuli Yehova uze apwa ‘muka-kutukafwa, kaha nawa muka-kutupululula.’ (Samu 40:17) Chikupu vene, chapwa chachilemu kwitavila vatunangule kuli Yehova naMwanenyi Yesu uze azanga chikuma.—Mateu 17:5; 18:20; 28:20.

6. Uno kulinyisa chakafwile ngachilihi lunga umwe apwenga kuchilika chaKwanuka Kufwa chaMwata?

6 Mwaka himwaka tweji kuzatanga nangolo mangana tulanye vatu vavavulu kuchilika chaKwanuka Kufwa chaYesu. Vatu vakulinyisa vavavulu vaze veji kwitavilanga vananganyala mwamunene. Chakutalilaho, mwaka umwe kunyima, lunga umwe vamuhanyine lipapilo lyakumulanya kuchilika chaKwanuka Kufwa chaYesu. Ikiye alwezele ndumbwetu uze amulanyine ngwenyi keshi kuhasa kupwako koko. Oloze omu lyahetele likumbi lyachilika kana, uze ndumbwetu alikomokelele chikuma hakumona uze lunga ali nakwingila muZuvo yaWangana. Uze lunga evwile kuwaha chikuma kumona vandumbwetu navamutambula nachisambo. Nakushimbula chiku aputukile kukunguluka. Kaha atwalileho lika kukunguluka mwaka wosena wamuundu, oloze mapapa katatu kaha kakiko ahonene kupwa kukukunguluka. Vyuma muka vyamukafwile alumune vishinganyeka vyenyi? Muchima wakulinyisa ukiko wamukafwile. Mukuhita chalwola, uze ndumbwetu amulanyine ambile ngwenyi: “Ou lunga apwa wakulinyisa.” Chikupu vene, Yehova ikiye akafwile ou lunga mangana aputuke kumulemesa, kaha oholyapwa ngana apwa jino ndumbwetu wakumbapachisa.—Samwe. 2, 22:28; Yowa. 6:44.

7. Uno vyuma tweji kulinangulanga kukukunguluka, navize tweji kutanganga muMbimbiliya navitukafwa ngachilihi tupwenga vakulinyisa?

7 Vyuma tweji kulinangulanga kukukunguluka navize tweji kutanganga muMbimbiliya vinahase kutukafwa tupwenga vakulinyisa. Kakavulu nge kunasale vyalumingo vyavindende nakupwa kuchilika chaKwanuka Kufwa chaKulishitu, tweji kulinangulanga chikuma hachakutalilaho chaYesu namuchima wakulinyisa asolwele hakwecha mwono wenyi kupwa ndando yakusokola. Kaha nawa vatukolezeza tutangenga mijimbu yamuMbimbiliya yize yahanjika hakufwa chaYesu nahakusanguka chenyi, shimbu kanda chilika kana chihete. Vyuma tweji kulinangulanga kukukunguluka namijimbu tweji kutanganga muMbimbiliya vyeji kutukafwanga tusakwilile chikuma Yesu hakulisuula kwiza nakutufwila. Echi cheji kutukafwanga tufwile kupwa vakulinyisa ngana mwaikiye nakulinga vyuma ajina Yehova chamokomoko nakukaluhwa chavyuma.—Luka 22:41, 42.

 KUMIKA CHIKIKO CHEJI KUTULINGISANGA TUPWENGA KUKUKUNGULUKA

8. Uno Yesu asolwele ngachilihi muchima wakumika?

8 Tuvosena twafwila kulondezeza muchima waYesu wakumika. Achishinganyekenu hamuchima wakumika asolwelele omu apwile kwakamwihi nakumujiha. Yesu atachikijile ngwenyi vaka-kole jenyi navamwivwisa sonyi, nakumuveta, nakumusukika. (Mateu 20:17-19) Oloze atwalileho lika kupwa wakumika. Omu lwola lwakumukwata lwapandamine, alwezele vaposetolo jenyi vakushishika vaze apwile navo muNgetesemane ngwenyi: “Katukenu, tuyenu. Talenu! Muka-kungusolola napandama kwakamwihi.” (Mateu 26:36, 46) Kahomu vaka-kole vejile mangana vamukwate, ikiye apandamine kuli vakiko nakulijimbula ivene, nakulweza vaze maswalale ngwenyi vatelelele kwecha vaposetolo jenyi valiyile tuhu. (Yowa. 18:3-8) Chikupu vene, echi chapwile kumika chachinene chize asolwele Yesu. Uno vaka-Kulishitu vawavisa namikoko veka navakiko vali nakufwila kulondezeza muchima waYesu wakumika makumbi ano?

Kupwanga kukukunguluka lwola lwosena cheji kukolezezanga vandumbwenu (Talenu palangalafu 9) *

9. (a) Mwomwo ika kupwa kukukunguluka chasakiwa kupwa vakumika? (b) Uno kupwa chetu vakumika chinahase kukafwa ngachilihi vandumbwetu vaze vanakase mwomwo yavyuma vafwelela?

9 Hakusaka tupwenganga kukukunguluka lwola lwosena, twatela kupwa vakumika chamokomoko naukalu tuli nakuhitamo. Vandumbwetu vamwe veji kuyanga nakukunguluka chamokomoko nakufwisa, nakuvafumbukila chipwe misongo. Veka nawa veji kuyanga nakukunguluka chamokomoko nakuvayanjisa kuli vaka-tanga yavo chipwe vaka-fulumende. Tachikizenu ngwenu kumika chetu chinahase kukafwa vandumbwetu vaze vanakase mutumenga mwomwo yavyuma vafwelela. (Hepe. 13:3) Chakutalilaho, kachi nge navevwa ngwavo tuli nakutwalaho lika kuzachila Yehova chamokomoko navyeseko, kaha lufwelelo lwavo naluzama, nakupwa vakumika nakulama nawa kulonga chavo. Omu mukiko chapwile nakuli Kaposetolo Paulu. Omu vamukashile mukamenga muLoma, lwola lwosena awahilililenga omu evwilenga ngwavo vandumbwenyi vapwile nakuzachila Kalunga nakashishi. (Fwili. 1:3-5, 12-14) Omu kwasalile makumbi amandende nakulovoka mukamenga, nyi pamo omu hahichile makumbi amandende kufuma haze Paulu alovokelemo, asonekelele vaHepeleu mukanda. Mumukanda kana akolezezele vaka-Kulishitu vakushishika mangana ‘zangi yavo yakuzanga vandumbwavo yitwaleho lika’ nakuhona nawa kwecha kulikungulwila hamwe.—Hepe. 10:24, 25; 13:1.

10-11. (a) Vatu muka twatela kulanyanga kuKwanuka Kufwa chaMwata? (b) Kweseka namukanda Wavaka-Efwesu 1:7, mwomwo ika chapwila chachilemu kupwa kuchilika kana?

10 Tweji kusololanga nawa ngwetu twapwa tuvakumika hakulanya vausoko wetu, navakwetu mutwazachila, navaze twalihata navo mangana vezenga kuKwanuka Kufwa chaMwata. Mwomwo ika tweji kuvalanyinanga? Kutachikiza ngwetu Yehova naYesu vatulingila vyuma vyamwaza chikuma, chikiko cheji kutulingisanga tulanyeko navakwetu. Twasaka navakiko valinangule omu vanahase kunganyala ‘kulikoji lyaYehova lyalinene’ lize atusolwela kuhichila mundando yakusokola.—Tangenu Wavaka-Efwesu 1:7; Kuso. 22:17.

11 Kupwa kukukunguluka cheji kusololanga  nge tukwechi muchima wakumika. Kaha nawa tweji kusololanga chuma cheka chachilemu chize Kalunga eji kusololanga mujila yakulipwila hamwe naMwanenyi.

ZANGI YEJI KUTULINGISANGA TUPWENGA KUKUKUNGULUKA

12. (a) Uno kukunguluka cheji kutukafwanga ngachilihi tuzange chikuma Yehova naYesu? (b) Uno mukanda Wavaka-Kolinde 2, 5:14, 15 watukafwa tulinge vyuma muka mangana tulondezeze Yesu?

12 Kuzanga Yehova naYesu nachikiko cheji kutulingisanga tufwile kupwa kukukunguluka. Kaha nawa vyuma tweji kulinangulanga kukukunguluka vyeji kutulingisanga tuzange chikuma Yehova naMwanenyi. Lwola lwosena nge tuli kukukunguluka, veji kutwanukisanga vyuma vize vatulingila. (Loma 5:8) Chakutalilaho, chilika chaKwanuka Kufwa chaMwata cheji kutukafwanga twanuke ngwetu Yehova naMwanenyi vatuzanga chikuma, kuhakilako vene navaze kanda vatachikize kulema chandando yakusokola. Kutachikiza vyuma kana cheji kutulingisanga tufwile kulondezeza Yesu hakumbi hakumbi. (Tangenu Wavaka-Kolinde 2, 5:14, 15.) Cheji kutulingisanga nawa tusakwilile chikuma Yehova hakutuhana ndando yakusokola. Jila yimwe tunahase kusolwelamo kusakwilila chetu shina yakukumbululangaho nge tuli kukukunguluka.

13. Tunahase kusolola ngachilihi ngwetu twazanga chikuma Yehova naMwanenyi? Lumbununenu.

13 Tunahase nawa kusolola ngwetu twazanga chikuma Yehova naMwanenyi hakupwa namuchima wakulisuula. Kakavulu kupwa kukukunguluka chasakiwa kulisuula. Vikungulwilo vyavivulu vyeji kupwanga nakukunguluka chimwe mukachi kachalumingo nachingoloshi halwola luze etu vavavulu tweji kuzeyanga. Kukunguluka chikwavo nawa cheji kupwanga kusongo yachalumingo halwola luze vatu vavula kutwama nakunoka. Kutala Yehova eji kutumonanga omu tweji kuyanga nakukunguluka oku tunazeye tahi? Eyo. Yehova eji kusakwililanga chikuma hakutumona natulikaka nakuya nakukunguluka mwomwo tweji kusololanga ngwetu twamuzanga.—Mako 12:41-44.

14. Chakutalilaho muka chamwaza atusela Yesu?

14 Yesu atusela chakutalilaho chamwaza chakusolwela vakwetu zangi yamwenemwene. Yesu kasolwele kaha zangi kana hakufwila tumbaji twenyiko, oloze nahakuvazakama nawa mukuyoya chavo chahakumbi hakumbi. Chakutalilaho, akolezezelenga vaka-kumukavangiza nahalwola azeyelenga chipwe omu alyonyingilenga mumuchima. (Luka 22:39-46) Ahakilenga mangana kuvyuma vize atelelele kulingila vakwavo, keshi nge vize vatelelele kumulingilako. (Mateu 20:28) Shikaho kachi  nge twazanga Yehova navandumbwetu, kaha nachitukafwa tuzate nangolo mangana tupwenganga kuKulya chaMwata chaChingoloshi nakukukunguluka cheka chosena.

15. Vatu muka twasaka kukafwa chikuma?

15 Tuvosena twatwama mutanga yimwe yavaka-Kulishitu vamuchano, ngocho tweji kwivwanga kuwaha kulanyako vakwetu navakiko vezenga mutanga kana. Chipwe ngocho, twasaka kukafwa chikuma vaze “twalikata navo mulufwelelo,” oloze vazeya kaha kushipilitu. (Ngale. 6:10) Tweji kuvasolwelanga zangi hakuvakolezeza vapwenganga kukukunguluka, chikumanyi kuKwanuka Kufwa chaMwata. Tweji kuwahililanga chikuma kumona ndumbwetu uze azeyele kushipilitu mwakinduluka kuli Yehova Setu wazangi uze nawa apwa kafunga ketu. Yehova naYesu navakiko veji kwivwanga mwomumwe.—Mateu 18:14.

16. (a) Uno tunahase kulikolezeza ngachilihi navandumbwetu, kaha kukunguluka nachitukafwa ngachilihi? (b) Mwomwo ika lwola lwachilika chaKwanuka Kufwa chaMwata lwapwila lwalulemu chikuma kwanuka mazu ahanjikile Yesu hali Yowano 3:16?

16 Muvyalumingo vili nakwiza kulutwe, tukilikitenu nangolo mangana tukalanye vatu vavavulu kuchilika chaKwanuka Kufwa chaMwata chize nachikapwako lyaChitanu nachingoloshi April 19, 2019. (Talenu lipwata lyakwamba ngwavo: “ Kutala Namuvalanya Tahi?”) Shikaho, mumwaka wosena uno, tutwalenuho lika kulikolezeza navandumbwetu hakupwanga kukukunguluka chosena chize eji kutuwahishilanga Yehova. Hakuwana nge kukuma chakaye chinapandama, ngocho kupwanga kukukunguluka nachitukafwa tupwenga vakulinyisa, nakupwa vakumika nakulizanga nawa navandumbwetu. (Teso. 1, 5:8-11) Shikaho tutwalenuho lika kusolola ngwetu twasakwilila chikuma Yehova naMwanenyi hazangi vatusolwela.—Tangenu Yowano 3:16.

MWASO 126 Tonenunga, Zamenunga Mbe, Jikizenunga

^ par. 5 Chilika chaKwanuka Kufwa chaKulishitu nachikapwako lyaChitanu nachingoloshi haApril 19, 2019. Nachikapwa hikukunguluka chakulipwila chikuma. Vyuma muka vyeji kutulingisanga tupwenga kuchilika kana? Twafwelela ngwetu mwomwo twasaka kwivwisa Yehova kuwaha. Muchihande chino natushimutwila havyuma vize vyeji kutulingisanga tupwenga kuchilika chaKwanuka Kufwa chaKulishitu nakukukunguluka chize tweji kupwanga nacho chalumingo hichalumingo.

^ par. 50 MUVWIMBIMBI WAHALIPAPILO LYAHELU: Mukaye kosena mayevuyevu avatu veji kwizanga kuchilika chaKulya chaMwata chaChingoloshi

^ par. 52 MAZU AKULUMBUNUNA MUVWIMBIMBI: Ndumbwetu uze vanakase mukamenga mwomwo yavyuma afwelela vanamukolezeza namazu ali mumukanda vanamusonekela. Ou ndumbwetu nawahilila chikuma hakutachikiza ngwenyi, vaka-tanga yenyi kavamuvulyamineko. Kaha namono nawa ngwenyi vachili nakutwalaho lika kushishika kuli Yehova chamokomoko navikokojola vyamapolitiki vize vili mungalila yavo.