“Tambukenunga nashipilitu.”—NGALE. 5:16.

MYASO: 22, 75

1, 2. Ndumbwetu umwe atachikijile ngachilihi ngwenyi kapwile wakuhya kushipilituko, kaha vyuma muka alingile?

ROBERT vamumbapachishile omu apwile namyaka 15, oloze kahakilenga mangana kuvyuma vyakushipilituko. Ambile ngwenyi: “Numba tuhu ngwazanyinenga muvyuma vyakushipilitu, oloze ngwavimwenenga kupwa nge hichilika kaha. Ngwakungulukilenga shimbu yosena, nakuzata upayiniya wakukafwa hatukweji vamwe mumwaka, ngocho ngwalimwene ngwami ngwazamine kushipilitu. Oloze kachapwile ngochoko, ngwatelelele kulingako vyuma vyeka vyavilemu.”

2 Omu Robert ambachile hakiko atachikijile jino ngwenyi kapwile wakuhya kushipilituko. Ikiye napuwenyi valihulishilenga vihula vyamuMbimbiliya. Hakuwana nge puwenyi apwile wakuhya kushipilitu, ngocho ahashilenga kukumbulula vihula kana, oloze ikiye ahonenenga kukumbulula, ngocho evwilenga sonyi. Robert ambile jino ngwenyi: “Chapwile kwijiva nge nevi ngwatachikijile vene vyauchi. Ngwalyambile ngwami, ‘Hakuwana nge yami mutwe watanga ngwatela kuhakako mangana numba ngutwaminyine kanawa puwami.’” Kahomu mukiko alingile. Ambile ngwenyi: “Ngwalinangwilenga chikuma Mbimbiliya, ngocho ngwaputukile jino kupwa nachinyingi. Echi changukafwile ngutunge usepa wakukola naYehova.”

3. (a) Vyuma muka natulinangula kuli ndumbwetu Robert? (b) Vishina muka vyavilemu natushimutwila?

 3 Nayetu tunahase kulinangula vishina vyavilemu kuli ndumbwetu Robert. Tunahase kupwa nachinyingi chamuMbimbiliya nakuyanga kukukunguluka lwola lwosena, oloze evi keshi vikiko kaha vyasakiwa hakusaka tuzovoloke kushipilituko. Numba tuhu tunazovoloka kushipilitu, oloze hakulikekesa natuwana nge twatela kutwalaho lika kukilikita numba tupwenga vakuhya kushipilitu. (Fwili. 3:16) Hakusaka tutwaleho lika kuzovoloka kushipilitu, twatela kulihulisa vihula vino vyavilemu vitatu: (1) Vyuma muka navitukafwa tumone numba nge tunakuzovoloka kushipilitu? (2) Tunahase kupwa ngachilihi vakuhya kushipilitu? (3) Uno kuhya kushipilitu nachitukafwa ngachilihi mukuyoya chetu chahakumbi hakumbi?

MWAKWIJIVILA NGWETU TUNAKUZOVOLOKA KUSHIPILITU

4. Mazu ahali Wavaka-Efwesu 4:23, 24 vawasonekela veya?

4 Omu twalihanyine kuli Kalunga twalumwineko vyuma vimwe mukuyoya chetu, kaha twalingilenga lika ngocho nomu vatumbapachishile. Visoneka vyatulweza ngwavyo, twatela ‘kupwa lika tuvavahya muvishinganyeka vyamichima yetu.’ (Efwe. 4:23, 24) Hakuwana nge katwakupukako, ngocho twatela kutwalaho lika kwalumunako vyuma vimwe mukuyoya chetu. Navangamba jaYehova vaze vanashimbula mumuchano vatela kutwalaho lika kuzovoloka kushipilitu.—Fwili. 3:12, 13.

5. Vihula muka navitukafwa tulikekese etu vavene tumone numba nge tunakuzovoloka kushipilitu?

5 Hakusaka tupwenga lika vakuhya kushipilitu, twatela kulikekesa yetu vavene. Tuvosena vanyike navakulwane twatela kulihulisa vihula vino: ‘Kutala ngweji kukilikitanga nangolo mangana nguzovoloke kushipilitu tahi? Uno ngukwechi vilinga ngana vyaKulishitu tahi? Uno vilinga vyami nge nguli kukukunguluka vyeji kungusololanga nge nguwakuhya kushipilitu tahi? Uno vyuma ngweji kuhanjikanga vyasolola ngachilihi vyuma ngwafwila? Uno jila ngweji kulinangwilangamo, navwaliso nakulilenga chami chipwe vyuma ngweji kulinganga nge vananguhuhumuna vyeji kusololanga vyuma muka hali yami? Ngweji kulinganga ngachilihi nge nguli mucheseko? Kutala ngunazovoloka chikuma nakupwa jino muka-Kulishitu wakuhya tahi?’ (Efwe. 4:13) Kukumbulula vihula kana nachitukafwa tumone numba nge tunakuzovoloka kushipilitu chipwe nduma.

6. Hakusaka tumone kuzovoloka chetu, vyuma vyeka muka twatela kulinga?

6 Shimbu jimwe twasakiwa kutukafwa kuli vakwetu mangana tuzovoloke kushipilitu. Kaposetolo Paulu ahanjikile ngwenyi, mutu wakumujimba keshi kuhasa kutachikiza numba nge vyuma ali nakulinga vyavipiko. Oloze mutu wakushipilitu atachikiza ngwenyi, Kalunga ahunga mutu wavilinga vyavipi. (Koli. 1, 2:14-16; 3:1-3) Vakulwane vaze vakwechi vishinganyeka ngana vyaKulishitu veji kumonanga numba nge mutu naputuka kupwa navishinganyeka vyavipi. Kachi nge vakulwane vanatukafwe, kutala tweji kwivwililanga nakukavangiza vyuma navatulweza tahi? Kwivwilila kuvyuma navatulweza nachitukafwa tuzovoloke kushipilitu.—Kwambu. 7:5, 9.

FWILENU KUPWA VAKUHYA KUSHIPILITU

7. Mwomwo ika natwambila ngwetu chinyingi chamuMbimbiliya keshi chikiko kaha chasakiwa numba tuzovoloke kushipilituko?

7 Tachikizenu ngwenu kupwa kaha nachinyingi chamuMbimbiliya kacheshi kumikafwa mupwenga vakuhya kushipilituko. Mwangana Solomone apwile nachinyingi chachivulu chakutachikiza Yehova. Mazu ahanjikilenga vejile nakuwasoneka muMbimbiliya. Oloze kumakumishilo ahonene kutwalaho lika kushishika kuli Yehova. (Vamya. 1, 4:29, 30; 11:4-6) Muchishishisa chakupwa kaha nachinyingi chamuMbimbiliya, twatela kuzata nangolo tuzovoloke kushipilitu. (Kolo. 2:6, 7) Uno tunahase kulinga ngachilihi ngocho?

8, 9. (a) Vyuma muka navitukafwa tuzovoloke kushipilitu? (b) Vyuma muka tweji kufwilanga kulinga omu tweji kulinangulanga nakushinganyeka havyuma natulinangula? (Talenu muvwimbimbi wakulivanga.)

 8 Paulu akolezezele vakwavo vaka-Kulishitu vamulikulukaji lyamyaka lyakulivanga vatwaleho lika kuzovoloka kushipilitu. Avalwezele ngwenyi ‘valihakeho mangana vakule.’ (Hepe. 6:1) Vyuma muka twatela kulinga makumbi ano mangana tukavangize mazu ahanjikile Paulu? Chuma chimwe twatela kulinga shina kulinangula mukanda ‘waTwamenunga muZangi yaKalunga.’ Nge namutanga mukanda kana nakuukumisa, nachimikafwa mumone vishina vyamuMbimbiliya mwatela kukavangiza mukuyoya chenu. Oloze nge munaukumisa lyehi kaha munahase kuputuka kutanga mukanda weka. (Kolo. 1:23) Kutala mweji kushinganyekanga havyuma munatange nakulomba Yehova amikafwe muvizachise mukuyoya chenu tahi?

9 Tachikizenu ngwenu omu natulinangula, twatela kufwila kwivwisa Yehova kuwaha nakukavangiza jishimbi jenyi. (Samu 40:8; 119:97) Kaha nawa twatela kuzata nangolo tukane vyuma vize navituhonesa kuzovoloka.—Chitu. 2:11, 12.

10. Vyuma muka vatela kulinga vakweze mangana vapwenga vakuhya kushipilitu?

10 Kachi nge muvakweze, kutala mwalitomena vyakulinga vyakushipilitu tahi? Hakukunguluka chachihanda ndumbwetu uze azachila haMbetele eji kushimutwilanga navaze navaya kulumbapachiso shimbu kanda kukunguluka chiputuke. Vatu vavavulu vaze veji kumbapachisanga vapwa vakweze. Ou ndumbwetu eji kuvahulisanga vamulweze vyuma vyakushipilitu valitomena. Vakweze vavavulu veji kukumbululanga mujila yize nayisolola nge vanakufwila kuzachila Yehova. Chakutalilaho, vamwe veji kuhanjikanga ngwavo vali nakusaka kukazata mulimo washimbu yosena, chipwe kuya nakuzachila kuze kuli nakusakiwa vaka-kwambulula mujimbu waWangana. Oloze shimbu jimwe vakweze vamwe veji kusolokanga nge kavejivile vyakulingako. Uno echi cheji kusololanga nge kavalitomenene kulinga vyuma vyakushipilituko tahi? Shikaho vakweze vatela kulihulisa ngwavo: ‘Kutala ngweji kwazananga muvyuma vyakushipilitu mangana ngwivwise kaha visemi jami kuwaha tahi? Uno nguli nakupandama kuli Kalunga hakutunga usoko wakukola naikiye tahi?’ Tuvosena vanyike navakulwane twatela kulitomena kulinga vyuma vyakushipilitu. Kulinga vyuma kana nachitukafwa tuvosena tupwenga vakuhya kushipilitu.—Kwambu. 12:1, 13.

11. (a) Vyuma muka twatela kulinga hakusaka tuzovoloke kushipilitu? (b) Chakutalilaho muka chamuMbimbiliya twatela kulondezeza?

11 Kachi nge tunamono vyuma vize twatela kuzachilaho, kaha twatela kulinga vyuma vize navitukafwa tutwaleho kuzovoloka. Kupwa vakuhya kushipilitu chapwa chachilemu chikuma. Kuyoya chetu chapendamina havyuma vyakushipilitu. (Loma 8:6-8) Kuhya kushipilitu kachasakiwa kupwa tuvakukupukako. Shipilitu yaYehova yikiko nayitukafwa mangana tuzovoloke. Chipwe ngocho, twatela kuzata nangolo. Ndumbwetu John Barr uze apwilenga muLizavu Lyakutwaminyina ahanjikile hamukanda waLuka 13:24 ngwenyi: “Vatu vamwe veji kuhonanga kwingila muchikolo chachindende mwomwo kavazata nangoloko.” Twatela kupwa ngana mwaYakova uze atwalileho kulipika nakangelo swi nomu amukiswile. (Kupu. 32:26-28) Numba tuhu twatela kulivwisa kuwaha kutanga Mbimbiliya, oloze katwatela kuyitanga ngana mwamikanda yakukaye yize veji kutangilanga kaha chisekeko. Twatela kuyitanga nakufwila kulinangula vishina vyavilemu natuwana hakutanga.

12, 13. (a) Vyuma muka navitukafwa tukavangize mazu ahali Wavaka-Loma 15:5? (b) Uno chakutalilaho chaPetulu navyuma ahanjikile navitukafwa ngachilihi? (c) Vyuma muka mwatela kulinga numba muzovoloke kushipilitu? (Talenu lipwata lyakwamba ngwavo, “Vimwatela Kulinga Mangana Muzovoloke Kushipilitu.”)

12 Nge natukilikita mangana tuzovoloke kushipilitu, kaha shipilitu yajila nayitukafwa twalumune vishinganyeka vyetu. Echi nachitukafwa tuputuke kushinganyeke ngana mwaKulishitu. (Loma 15:5) Kaha nawa nachitukafwa tumbile vilinga vyavipi nakupwa navilinga vize navivwisa  Kalunga kuwaha. (Ngale. 5:16, 22, 23) Nge natumona ngwetu chinakutukaluhwila kwecha vilinga chipwe vishinganyeka vyavipi, kaha katwatela kuzeyako. Lombenunga Yehova amihane shipilitu mangana yimikafwe mushinganyekenga havyuma vyamwaza. (Luka 11:13) Achanukenu chakutalilaho chaPetulu. Kakavulu kalingilenga vyuma ngana muze atela kulinga mutu wakuhya kushipilituko. (Mateu 16:22, 23; Luka 22:34, 54-62; Ngale. 2:11-14) Oloze kazeyeleko. Kutwala muze Yehova amukafwile aputuke kushinganyeka ngana mwaKulishitu. Nayetu tunahase kulinga mwomumwe.

13 Mukuhita chalwola, Petulu avulukile vyuma vize twatela kuzachilaho. (Tangenu WaPetulu 2, 1:5-8.) Nge ‘natuzata nangolo’ mangana tupwenga navilinga vyakufwana nge muchima wakulikanyisa, nalukakachila, nakuzanga vandumbwetu, kaha natuzovoloka nakuhya kushipilitu. Hakumbi hakumbi mwatela kulihulisanga ngwenu: ‘Vyuma muka ngwatela kulinga lelo mangana nguzovoloke kushipilitu?’

TWALENUHO KUZOVOLOKA HAKUMBI HAKUMBI

14. Uno kuhya kushipilitu nachitukafwa ngachilihi mukuyoya chetu?

14 Nge natupwa navishinganyeka ngana vyaKulishitu, nachitukafwa tupwenga nahanjikiso yamwaza kumilimo, nakushikola nakutukafwa nawa kusakula vyuma vyamwaza vyakulinga mukuyoya chetu chahakumbi hakumbi. Kulinga vyuma kana nachisolola nge tweji kukavangizanga Kulishitu. Hakupwa tuvaka-Kulishitu, katwatela kwechelela kala chuma chituhonese kupwa nausoko wamwaza naSetu wamwilu Yehovako. Nge tuli muvyeseko, vilinga vyetu vyamwaza navitukafwa tuhonese vyeseko kana. Kachi nge tuli nakusakula vyakulinga, kaha twatela kushinganyeka havihula vino: ‘Jindongi muka jamuMbimbiliya najingukafwa ngusakule kanawa vyakulinga? Nge Kulishitu ikiye apwanga muukalu kana kachi nalingi ngachilihi? Vyuma muka twatela kusakula kulinga vize navivwisa Yehova kuwaha?’ Hakusaka tukumbulule vihula kana, tutalenu havyakutalilaho vimwe. Muvyakutalilaho vyosena natuzachisa jindongi jamuVisoneka mangana tumone omu tunahase kusakula kanawa vyakulinga vize navivwisa Yehova kuwaha.

15, 16. Hanenu vyakutalilaho vize navisolola omu kupwa navishinganyeka ngana vyaKulishitu nachitukafwa (a) tusakule wakulimbata nenyi. (b) tusakule vatu vakulikata navo.

15 Kusakula mutu wakulimbata nenyi. Vyuma navitukafwa shina mazu atwama hali Wavaka-Kolinde 2, 6:14, 15. (Tangenu.) Mazu aze ahanjikile Paulu asolola hatoma ngwawo, mutu wakushipilitu keshi kuhasa kupwa muchivwasano namutu wakumujimbako. Uno mutu nahase kuzachisa ngachilihi mazu kana hakusakula wakulimbata nenyi?

16 Vatu vakulikata navo. Achitalenu mazu atwama hali Wavaka-Kolinde 1, 15:33. (Tangenu.) Mutu uze azanga mazu aKalunga keshi kuhasa kulikata navatu vaze navamulingisa azeye kushipilituko. Vihula muka navitukafwa tukavangize kanawa mazu ali muchisoneka kana? Chakutalilaho, uno mazu kana nanguwakavangiza ngachilihi hakuzachisa shinga yami namakina eka? Nangulinga ngachilihi nge vatu vaze kangwatachikizako navangulweza tuheme kuhema chahamakina?

Kutala vyuma ngweji kusakulanga kulinga navingukafwa nguzovoloke tahi? (Talenu palangalafu 17)

17-19. Uno kuhya kushipilitu nachitukafwa ngachilihi (a) tuhone kufwila vyuma vyamokomoko? (b) tulitomene vyakulinga mukuyoya? (c) tuhonese vikokojola?

17 Vyuma vize navituzeyesa kushipilitu. Mazu asonekele Paulu apwile akuhuhumuna vakwavo vaka-Kulishitu. (Tangenu WavaHepeleu 6:1.) Uno  “vilinga vyakufwa” twatela kulihendako vyapwa vika? Vilinga kana vyapwa kala vyuma vyamokomoko mwomwo kavyatukafwa tuzovoloke kushipilituko. Kutachikiza chuma kana nachitukafwa tukumbulule vihula vyakufwana nge: ‘Uno vyuma kana vyatwama hamukana wavilinga vyakufwa tahi? Kutala ngwatela kwingila muchivwasano chakusekasana tahi? Mwomwo ika kangwatela kwazanyina mumauka aze asaka kwolola vyuma mukayeko?’

Kutala vyuma ngweji kusakulanga kulinga navingukafwa ngulitomene kuzata vyuma vyakushipilitu tahi? (Talenu palangalafu 18)

18 Kulitomena vyuma vyakushipilitu. Mazu ahanjikile Yesu muChihande ChahaPili atulweza vyuma twatela kulinga hakusakula vyakulinga. (Mateu 6:33) Mutu wakuhya kushipilitu eji kufwilanga kulitomena kulinga vyuma vyakushipilitu. Kushinganyeka chikuma hajindongi kana nachitukafwa tukumbulule vihula vyakufwana nge: ‘Kutala ngwatela kufwila kuya kumashikola ahelu tahi? Uno ngwatela kwitavila kala milimo navangulweza kuzata tahi?’

Kutala vyuma ngweji kusakulanga kulinga navingukafwa ‘ngutwame mukuunda navatu vosena’ tahi? (Talenu palangalafu 19)

19 Vikokojola. Uno mazu aze Paulu asonekelelele vandumbwenyi muchikungulwilo chamuLoma nawatukafwa ngachilihi nge tunalikokojwesa? (Loma 12:18) Hakuwana nge tweji kukavangizanga Kulishitu, twasaka ‘kutwamanga mukuunda navatu vosena.’ Vyuma muka tweji kulinganga kachi nge tunalikokojwesa? Kutala cheji kutukaluhwilanga kukonekela vakwetu tahi nyi tweji kufwila kutwama “mukuunda navatu vosena.”—Yako. 3:18.

20. Mwomwo ika muli nakufwila kupwa vakuhya kushipilitu?

20 Evi hivyakutalilaho vimwe vize vinasolola omu jindongi jamuMbimbiliya jinahase kutukafwa tusakule kanawa vyakulinga vize navisolola nge vanakututwaminyina kushipilitu yaKalunga. Kupwa vakuhya kushipilitu nachitukafwa tusakule vyakulinga vize navitusuulwisa mukuyoya chetu chahakumbi hakumbi. Robert uze twavulukanga kumaputukilo ambile ngwenyi: “Omu ngwatungile usoko wakukola naYehova ngwapwile jino mutwe watanga, kaha nawa chisemi wamwenemwene. Ngocho ngwapwile nguwakusuuluka mukuyoya chami.” Nayetu nawa tunahase kulivwisa kuwaha usoko naYehova kachi nge natutwalaho lika kuzovoloka kushipilitu. Nge natupwa vakuhya kushipilitu nachitukafwa tupwenga vakuwahilila oholyapwa nakukapwa nawa ‘nakuyoya chamwenemwene’ kulutwe.—Chimo. 1, 6:19.