Kaposetolo Paulu asonekele ngwenyi, Yehova “keshi kumyechelela vamyeseke kuhambakana oho hanakumina ngolo jenuko.” (Koli. 1, 10:13) Uno echi chalumbununa nge Yehova eji kukekesanga chimweza hakumina ngolo jamutu nakumunehela vyeseko kweseka nangolo jenyi tahi?

Achishinganyekenu ukalu unahase kufumamo kachi nge mutu mwapwa navishinganyeka kana. Mwana ndumbwetu alijihile ivene, kaha ise ambile ngwenyi: ‘Uno Yehova akekeselele chimweza ngwenyi ami napuwami natumika hakufwisa mwanetu tahi? Uno ukalu kana wasolokanga mwomwo Kalunga ejivanga ngwenyi natumika tahi?’ Kutala chikupu twatela kufwelela ngwetu Yehova eji kunonekelanga vatu vyuma mujila kana tahi?

Kukekesa kanawa hamazu ahanjikile Paulu hali Wavaka-Kolinde 1, 10:13 nachitukafwa tumone nge Kalunga keshi kulinga vyuma kanako. Kakwatwama Chisoneka chasolola nge Yehova eji kukekeselanga chimweza hakumina ngolo jetu, nakusakula jino cheseko twatela kuhitamo kweseka nangolo jetuko. Mwomwo ika tunahanjikila ngocho? Tukekesenu hajijila jiwana jize najitulingisa tukukulule ngocho.

Yatete, Yehova ahanyine vatu lisesa lyakulisakwila vyakulinga. Asaka mutu himutu kulisakwila ivene vyakulinga mukuyoya. (Lushi. 30:19, 20; Yoshu. 24:15) Nge tunakusaka kulinga vyuma vyakwoloka, kaha twatela kupendamina hali Yehova atutetekele. (Vishi. 16:9) Oloze kachi nge natusakula vyuma vyakuhenga, kaha navitunehela ukalu. (Ngale. 6:7) Kachi nge Yehova eji kusakwilanga chimweza ukalu atela kumona mutu, kutala echi kacheshi kusolola nge ali nakuhonesa lisesa ahana vatu lyakulisakwila vyakulingako nyi?

Chamuchivali, Yehova keshi kutukinga ‘kulwola navyuma vyakwiza mukukasumunako.’ (Kwambu. 9:11) Shimbu jimwe ponde yinahase kutusolokela mwomwo yakupwa kuchihela halwola lwakuhenga. Yesu ahanjikile vyaponde yasolokelele vatu 18 vaze vafwile omu kaposhi avaholokelele, oloze kambile ngwenyi Kalunga ikiye alingishile ukalu kanako. (Luka 13:1-5) Shikaho nachipwa chakuhenga kushinganyeka ngwetu Kalunga eji kusakwilanga chimweza vatu vatela kufwa kupondeko.

Chamuchitatu, mutu himutu asakiwa kulama kulonga chenyi kuli Yehova. Tachikizenu ngwenu Satana avangijikilile vosena vaze veji kuzachilanga Kalunga, ngwenyi kaveshi kuhasa kupwa lika vakushishika nge vali muchesekoko. (Yopa 1:9-11; 2:4; Kuso. 12:10) Kachi nge Yehova eji kutukinganga kuvyeseko vimwe mwomwo ngwenyi  katweshi kuhasa kuvifungululako, kaha mazu aSatana nawapwa amuchano akwamba ngwenyi, vatu veji kuzachilanga Kalunga mangana vanganyalileho kaha.

Chamuchiwana, Yehova katachikiza vyuma vyosena vyeji kutusolokelangako. Vishinganyeka vyakwamba ngwavo Kalunga eji kusakwilanga vatu vyeseko, vyalumbununa nge atachikijila chimweza vyuma vyosena vyakulutwe. Oloze Mbimbiliya kayahanjika ngochoko. Kalunga nahase vene kutachikiza vyuma vyakulutwe. (Isa. 46:10) Oloze Mbimbiliya yasolola ngwayo eji kusakulanga vyuma vimwe vize atela kutachikijila chimweza. (Kupu. 18:20, 21; 22:12) Echi cheji kutulingisanga tuzachise kanawa lisesa lyetu lyakusakula vyakulinga. Chapundu vene, omu mukiko atela kupwa Kalunga uze avumbika lisesa lyavatu.—Lushi. 32:4; Koli. 2, 3:17.

Jino mazu ahanjikile Paulu atalisa mulihi akwamba ngwenyi: “Kalunga. . . keshi kumyechelela vamyeseke kuhambakana oho hanakumina ngolo jenuko”? Paulu alumbunwine vyuma eji kulinganga Yehova nge tuli mucheseko keshi nge shimbu kanda tupwenga muchesekoko. Mazu kana atufwelelesa nge, Yehova mwatuzamikisanga mukala cheseko nachituwana. (Samu 55:22) Mazu aPaulu akuvendejeka azama havishina vino vivali vyavilemu.

Chatete, vyeseko tweji kumonanga “vyeji kuwananga vatu vosena.” Echi chasolola nge vatu vosena veji kuhitanga muvyeseko. Kachi nge natupendamina hali Kalunga, kaha nahase kutukafwa tumike muukalu kana nakupwa lika vakushishika kuli Yehova. (Petu. 1, 5:8, 9) Hali Wavaka-Kolinde 1, 10:13, Paulu avulukile vyeseko vize vamwene vaIsalele mupambo. (Koli. 1, 10:6-11) Vyeseko vize vamwene vavimonaho lyehi nakuvatu veka, kaha nawa kavyapwile vyavikalu chikumako. Oloze Paulu ahanjikile mapapa kawana ngwenyi “vamwe” valikangile. Chaluvinda hakuwana nge vaIsalele vamwe kavapendaminyine hali Kalungako, ngocho valingile shili.

Chamuchivali, “Kalunga apwa wakushishika.” Nge natukekesa omu Kalunga nazakaminangamo vatu jenyi, nachitukafwa tumone ngwetu eji kusolwelanga zangi yenyi yakwilila kuli vaze “vamuzanga nakulama jishimbi jenyi.” (Lushi. 7:9) Cheji kutukafwanga nawa tufwelele ngwetu Kalunga eji kulamanga jishimbi jenyi. (Yoshu. 23:14) Kweseka navyuma tunashimutwila vize vinasolola omu Kalunga azakaminyinyinemo vangamba jenyi kunyima, chinatukafwe tukukulule ngwetu vaze vamuzanga nakumwononoka vanahase kufwelela ngwavo mwatesamo mazu ashika, ngwenyi: (1) Keshi kukechelela vyeseko vivashinyinyike kuhambakana oho hakumina ngolo javoko, kaha nawa (2) ‘mwavasela kuulovokelo’ mangana vomike.

Yehova “eji kutuvendejekanga muvyeseko vyetu vyosena”

Uno Yehova eji kusela ngachilihi ulovokelo vaze vapendamina hali ikiye kachi nge vali mucheseko? Yehova nahase vene kufumisa mutu mucheseko nge nasake. Oloze Paulu ahanjikile ngwenyi: “[Yehova] mwamisela nawa kuulovokelo mangana muhase kumika.” Shikaho shimbu jimwe eji kutusela “kuulovokelo” hakutukafwa muvyuma vyasakiwa mangana tumike mucheseko tulimo. Tutalenu hajijila jimwe jize Yehova eji kuzachisanga mangana atusele kuulovokelo:

  • “Eji kutuvendejekanga muvyeseko vyetu vyosena.” (Koli. 2, 1:3, 4) Yehova nahase kuunjisa michima yetu navishinganyeka vyetu kuhichila muMazu enyi, nashipilitu yenyi namuvyakulya vyakushipilitu vize vanakutuhananga kuli ndungo wakushishika.—Mateu 24:45; Yowa. 14:16, kwinyikila chamwishi, Loma 15:4

  • Nahase kututwaminyina nashipilitu yenyi yajila. (Yowa. 14:26) Nge tuli mucheseko, shipilitu yinahase kutukafwa twanuke mijimbu yamuMbimbiliya najindongi, vize jino navitukafwa tusakule kanawa vyuma twatela kulinga.

  • Nahase kuzachisa vangelo vatukafwe.—Hepe. 1:14.

  • Nahase kuzachisa vandumbwetu ‘vatukolezeze’ kuhichila muvilinga namumazu avo.—Kolo. 4:11, kwinyikila chamwishi.

Jino tunahase kukukulula ngwetu ngachilihi kweseka namazu ahanjikile Paulu aze atwama hali Wavaka-Kolinde 1, 10:13? Yehova keshi kutachikijila chimweza cheseko mwakahitamo mutuko. Oloze kachi nge tuli muvyeseko, kaha twatela kutachikiza ngwetu nge natufwelela muli Yehova kaha keshi kwechelela vyeseko kana vitufungululeko, oloze mwatusela kuulovokelo mangana tuhase kumika. Kushinganyeka hamazu kana chatela kutukolezeza chikupu.