Kutala munalivwisanga kuwaha kutanga jimangazini jakalinwaha jaKaposhi Kakutalila nyi? Nge mukiko, kaha tumonenu omu munahase kukumbulula vihula vino vinakavangizaho:

Unjiho muka wamuVisoneka wasolola nge Kalunga apwa muka-kutetela?

Kalunga atachikijile ukalu vamwenenga vaIsalele vakushikulu vaze vayanjilenga muundungo muEjipitu, kaha avevwililile keke. (Kulo. 3:7; Isa. 63:9) Nayetu tunahase kwivwila vakwetu keke mwomwo vatutenga muchifwanyisa chaKalunga. Shikaho, Kalunga eji kutwivwilanga keke numba tuhu natushinganyeka ngwetu katwatelemo kutuzanga kuli ikiyeko.—wp18.3, mafwo 8-9.

Uno vyuma anangwilenga Yesu vyakafwile ngachilihi vatu vambile tato yakulimona ulumbi?

VaYuleya vavavulu vaze vapwileko mumakumbi aYesu vamwenenga vakwavo ulumbi. Yesu akafwile tumbaji twenyi vapwenganga vakulinyisa, nakuvalweza vazenekenga kulimona ulumbi navakwavo. Kaha nawa avalwezele vamonenga vakwavo kupwa hivandumbwavo.—w18.06, mafwo 9-10.

Mwomwo ika Kalunga azenekele kwitavisa Mose kwingila muLifuchi lyaLushiko, kaha natulinangulako ika?

Mose apwile nausoko wakukola naYehova. (Lushi. 34:10) Omu mwahichile myaka 40, vaIsalele vaputukile cheka kuyayavala mwomwo yakuhona kupwa nameya. Kalunga alwezele Mose ahanjike kulilolwa oloze ikiye ambachile mbwechi nakuveta kulilolwa. Yehova pamo apihililile mwomwo Mose kakavangijile jindongi jize amuhanyineko nyi pamo mwomwo katohwesele Yehova hachakukomwesa alingileko. (Kula. 20:6-12) Shikaho chuma kana chinatunangula tumone ngwetu chapwa chachilemu kwononoka Yehova nakumutohwesa.—w18.07, mafwo 13-14.

Mwomwo ika chapwila chakuhenga kutalanga vatu kumeso?

Vatu vavavulu veji kutalanga vakwavo kumeso mwomwo yamuyachi chipwe chisemwa, chipwe mwomwo yaluheto namyaka yakusemuka ali nayo mutu. Oloze twatela kulondezezanga Kalunga mwomwo ikiye katala vatu kumesoko. (Vili. 10:34, 35)—w18.08, mafwo 8-12.

Uno vaka-Kulishitu vatushinakaji vanahase kukafwa ngachilihi vakwavo?

Kalunga eji kumonanga kalama uze vanatambula milimo nakumuhana yeka kupwa lika wamulemu, kaha nawa nahase kukafwa vakwavo mujijila jeka. Pamo nahase kukafwa muka-mahyamutu uze kapwa Chinjihoko, navaze vanazeye kushipilitu, nakutetekela vilongesa vyambimbiliya chipwe kutohwesa mulimo wakwambulula.—w18.09, mafwo 8-11.

Vinoma muka veji kuzachisanga vaka-kulishitu hakunangula vatu?

Veji kuzachisanga jikati jakulweza vatu keyala yetu namapapilo akulanya vatu kukukunguluka. Vatwama nawa najitalakiti 8 najimangazini jaKaposhi Kakutalila naTonenu! Vakwechi nawa vinoma vyakufwana nge jimbuloshuwa, namikanda yivali yize veji kuzachisanga hakunangula vatu najivindiyo jiwana jakufwana nge Mwomwo Ika Twatela Kulinangwila Mbimbiliya? najivindiyo jeka.—w18.10, li. 16.

Mujila muka vaka-Kulishitu vanahase ‘kulanda muchano’ nganomu vasoneka hali Vishimo 23:23?

Numba tuhu kachasakiwa kuhana jimbongo numba vatunangule muchanoko, oloze chasakiwa kuzachisa lwola lwetu nangolo jetu mangana tuuwane.—w18.11, li. 4.

Uno vyuma alingile Hozeya kuli puwenyi Ngomele vyatunangula vyuma muka?

Ngomele alingilenga ukoji mapapa kakavulu, oloze Hozeya amukonekelele nakuzeneka kumulukulula. Shikaho muka-Kulishitu nahase kukonekela muka-mahyenyi uze nalingi ujila. Ngocho nge ava vapwevo nalunga navasavala hamwe nakulihana vyasakiwa muulo, kaveshi kuhasa cheka kulilukululako mwomwo vanalikonekela lyehi.—w18.12, li. 13.