KAPOKOLA umwe angwambile ngwenyi, “Ove lunga wapwa uwakukenyuka. Unaseze pwevo lyove wakafumbakaji namwanove wamundende. Uno iya mwavazakama nakuvalisa? Kana kwitava chove mangana ukinduluke kwimbo!” Ami ngwamukumbulwile ngwami: “Kangwasezele tanga yamiko. Ngunavaseze mwomwo yenu munangukase. Uno munangukashila ika?” Ikiye angukumbulwile ngwenyi: “Kachi nge walingangako mulonga weka kachi tunakweche, oloze jino hakupwa uChinjiho, unalingi mulonga waunene chikuma.”

Vyuma kanevi vyasolokele mumwaka wa 1959 mukamenga munganda yaIrkutsk muRussia. Manenu ngumilweze ovyo ami napuwami Maria twalisuwililile ‘kuyanda mwomwo yakwoloka,’ nanganyo twawanyine mwomwo yakulama kulonga chetu.—Petu. 1, 3:13, 14.

Ngwasemukile mu 1933 muUkraine mungalila yaZolotniki. Kaha mu 1937 mama wakanyike namuka-zuvo yenyi vaze vapwile Vinjiho vatutambukilile kufuma kuFrance, kaha vatuselelele mukanda waGovernment naDeliverance, yize vasoneka kuli vaWatch Tower Society. Omu tata atangile yize mikanda, lufwelelo lwenyi muli Kalunga lwazamine cheka. Oloze chaluvinda kuheta mu 1939 tata avijile chikuma kaha afwile. Shimbu kanda afwenga alwezele mama ngwenyi: “Ou ukiko muchano. Unangule vana vautachikize.”

KWAMBULWILA MUSIBERIA

Kuheta mu April 1951 vaka-fulumende vafumishile Vinjiho kumulauko waSoviet Union nakuvatwala kuSiberia. Ami namama nasongo yami walunga Grigory vatuhangile muUkraine. Omu twatambukile jikilomita 6,000 namasuhwa twahetele jino munganda yaTulun muSiberia. Omu mwahichile vyalumingo vivali, yayami Bogdan vamutwalile muchilombo chavafunge munganda yaAngarsk. Kaha vamutomenene apike myaka 25.

Ami namama nasongo yami Grigory twambulwililenga muTulun, oloze twalingilenga ngocho mujila yakuzangama. Chakutalilaho, twahulishilenga ngwetu, “Veya munevu ngwavo vanakulanjisako ngombe mwane?” Kachi nge tunawane mutu ali nakulanjisa ngombe, kaha twamulwezelenga omu ngombe vamutenga mujila yakukomwesa nakuputuka kushimutwila hali Tengi. Nakushimbula chiku, lipapilo lyamijimbu limwe lyahanjikile ngwalyo, Vinjiho veji kulisololanga nge vali nakutonda vangombe, olozenyi etu twapwile nakutonda vatu vaze vapwa nge mikoko. Chapundu vene, vatu kana twavawanyinenga. Twalivwishilenga kuwaha kulinangula Mbimbiliya navatu vakulinyisa kaha nawa vachisambo mungalila yize kavambulwililengako. Makumbi ano, muTulun muli chikungulwilo chize chili navaka-kwambulula vakuzomboka 100.

 OMU LUFWELELO LWAMARIA VALWESEKELE

Puwami Maria alinangwilile muchano muUkraine halwola lwaJita yaKaye yamuchivali. Omu apwile namyaka 18, kapokola umwe aputukile kumushinjila alinge nenyi ujila, oloze akanyinenga. Likumbi limwe omu akindulukile hembo, awanyine uze kapokola nasavala hakahela. Oloze Maria achinyine. Uze kapokola apihililile chikuma, kaha amwambile ngwenyi mwamukashisa mwomwo yakupwa Chinjiho. Kaha mu 1952, Maria vamuhakile mukamenga apike hamyaka 10. Evwile nge muze evwile Yosefwe uze vahakile mukamenga hakulama kulonga chenyi. (Kupu. 39:12, 20) Nyamutekenya uze afumishile Maria kuzango yakusopela nakumutwala kukamenga ahanjikile ngwenyi: “Kanda kulizakaminako, vatu vavavulu veji kuyanga mukamenga, kaha veji kukindulukanga hanga vachili naulemu wavo.” Mazu kana amukolezezele chikuma.

Kufuma mu 1952 nakuheta mu 1956, Maria apwile muchilombo chakuyanjishila vafunge kwakamwihi nanganda yaGorkiy (yize vanakuvuluka jino ngwavo Nizhniy Novgorod) muRussia. Vamuhanyine mulimo wakuvunya mitondo numba kututa tuhu ngachilihi. Ngocho avijilenga, oloze kuheta mu 1956 vamufumishilemo, kaha ayile kuTulun.

VANGUTUMINE KWAKUSUKU NAKUSEZA PUWAMI NAVANA VAMI

Ndumbwami umwe muTulun angulwezele ngwenyi kuli ndumbwetu umwe apwile nakwiza, lijina lyenyi ikiye Maria. Ngocho ngwambachile kinga nakuya kuchitulilo chajiminyau mangana ngukamutambwokese nakumumbachisako viteli. Omu ngwamumwene ngwamuzangile chikuma. Ngocho ngwamulwezele ngwami tulimbate, oloze akanyinenga. Mukuhita chalwola etavile, kaha twalimbachile mu 1957. Omu mwahichile mwaka umwe, twasemene mwana wapwevo Irina. Chipwe ngocho, kangwatwamine nenyi lwola lwalusukuko. Vangukashile mu 1959 mwomwo yakupulita mikanda yahanjika haMbimbiliya. Vanguhakile mukamenga kauka wami hatukweji 6. Kulomba, nakwimba myaso yaWangana, nakushinganyeka omu nangukalivwisa kuwaha mulimo wakwambulula nge vanangufumisamo, vikiko vyangukafwile nguhone kulizakamina chikuma.

Nguli muchilombo chavafunge mu 1962

Omu ngwapwile mukamenga, muka-kuhehwojola mijimbu umwe angwambile ngwenyi, “Kalinwomu tuminongese muvosena.” Ngwamukumbulwile ngwami, “Yesu ambile ngwenyi mujimbu wamwaza waWangana navakawambulula kumafuchi osena, kaha mutu naumwe wauchi mwauhonesa.” Uze lunga asakile kungukunyula mangana ngukane lufwelelo lwami, ngana muze ngwahanjikanga kumaputukilo achino chihande. Omu ahonene kungukunyula, apihililile nakunguhaka mukamenga ngupike hamyaka 7 muchilombo chakuyanjishila vafunge kwakamwihi nanganda yaSaransk. Shimbu kanda nguhete kuchilombo kana, vangulwezele ngwavo puwami nasapuluka mwana mukwavo wapwevo, Olga. Numba tuhu ngwapwile kwakusuku natanga yami, oloze kutachikiza ngwami tuvosena napuwami twapwile lika vakulonga kuli Yehova changuvendejekele.

Maria navana vetu vaOlga naIrina mu 1965

Maria ejilenga nakungumona mwaka himwaka, numba tuhu atambukilenga makumbi 12 namasuhwa kufuma kuTulun nakwiza kuSaransk. Anguhichikilenga sapato jajihya muze aswekelenga jimangazini jajihya jaKaposhi Kakutalila. Mwaka umwe ngwevwile kuwaha chikuma mwomwo ejile hamwe navana vetu vavali nakungumona. Ngwawahililile hakuvamona nakupwa navo.

KUNUNGULUKA NAKUMONA VYESEKO VIKWAVO

Mu 1966 vangusokwele mukamenga kaha ngwayile natanga yami kuArmavir kwakamwihi naKalungalwiji  Wilava. Oku kukiko twakasemenene vana vetu vamalunga vaYaroslav naPavel.

Nakushimbula chiku tupokola vaputukile kwiza hembo lyetu nakutonda mikanda yahanjika haMbimbiliya. Vasanjilenga kwosena nakuze twatulikililenga vyakulya vyavangombe. Halwola lumwe omu tupokola vapwile nakusandasanda, vaputukile kutukuchila namusana kaha uvwalo wavo wakwachile lukungu. Maria avevwililile keke mwomwo vapwile nakuzata kaha mulimo wakuvakanjikiza. Avahanyine vyakunwa vizekemena, nachakutotomwesa lukungu hauvwalo wavo, nameya akusana namatwayi akulipukuchisa. Omu ejile mukulwane wavo, vaze tupokola vamulwezele vyuma avalingilile puwami. Hakufuma hembo uze mukulwane wavo amwesele kukanwa nakutusalisa. Twawahililile hakumona vyuma vyamwaza vyeji kwizanga nge natufungulula “upi hakulinganga mwamwaza.”—Loma 12:21.

Chamokomoko nakutulukuka, twatwalilengaho kwambulula muArmavir. Twakafwilenga nawa lizavu lyavaka-kwambulula lyapwile mumbaka twalihachile nayo yaKurganinsk. Ngweji kwivwanga kuwaha chikuma hakutachikiza ngwami muArmavir muli jino vikungulwilo 6, kaha muKurganinsk muli vikungulwilo viwana.

Shimbu jimwe twazeyelenga kushipilitu. Oloze tweji kumusakwililanga Yehova hakuzachisa vandumbwetu vakushishika vaze vatuhuhumwinenga nakutujikijisa kushipilitu. (Samu 130:3) Twapwile nawa mucheseko chachinene omu fulumende yatumine vatu mangana vezenga muchikungulwilo chakuhona etu kuchitachikiza. Valyongelenga kupwa vaka-kwambulula vatwima chikuma kaha vazachilenga nangolo muwande. Vamwe vavatongwelenga vazate namilimo yimwe yamuliuka. Oloze mukuhita chalwola twatachikijile jino ngwetu vapwile vandoji.

Kuheta mu 1978, Maria emichile lijimo omu apwile namyaka 45. Hakuwana nge avijilenga chikuma musongo wamuchima, vandotolo valizakaminyine ngwavo nachikamukaluhwila kusapuluka, kaha vamulwezele alifumise lijimo, oloze ikiye akanyine. Vandotolo vaputukile kumukavangiza kwosenokwo ayilenga muchipatela nakusaka kumutuva ndongo mangana lijimo lifume. Oloze Maria afumine muchipatela mangana akinge mwana apwile mujimo.

Vaka-fulumende vatulwezele tufume munganda twapwile nakutwama. Kaha twayile kungalila yapwile kwakamwihi nanganda yaTallinn muEstonia, lifuchi lize lyapwile muchiyulo chavaka-Soviet Union. Numba tuhu vandotolo vambile ngwavo Maria mwakamona ukalu hakusapuluka, oloze omu twapwile muTallinn, asemene mwana walunga wamukangule uze twalukile ngwetu Vitaly.

Kufumaho twanungulukilile kuNezlobnaya kusulo yalifuchi lyaRussia. Twambulwilenga mukuzangama mujimbaka twalihachile najo muze mwejilenga vatu vakufuma kujingalila josena. Vatu vavavulu vejilenga mujimbaka kana nakulihizumuna, veka nakuvoka, oloze hakuvambulwila vakindulukilenga nalutalililo lwakuyoya chamyaka yosena.

KUNANGULA VANA VETU VAZANGE YEHOVA

Twazachilenga nangolo mangana tunangule vana vetu vazange Yehova nakufwila kumuzachila. Shikaho kakavulu twasanyikilenga vandumbwetu vakuhya kushipilitu vezenga hembo lyetu, chikumanyi songo yami Grigory uze azachile mwakalama wakutambwojoka kufuma mu 1970 nakuheta mu 1995. Twevwilenga kuwaha omu atutambukililenga mwomwo apwile wachisambo kaha nawa walyepe. Nge tuli navangeji, twashimutwililenga vihande vyamuMbimbiliya, ngocho vana vetu vazangilenga chikuma mijimbu yakushikulu yize yatwama muMbimbiliya.

Vana vami vamalunga namapwevo javo.

Kufuma kuchimoswe nakuya kuchilyo, mukana wakunyima: Yaroslav, Pavel, Jr., Vitaly

Mukana wakulutwe: Alyona, Raya, Svetlana

 Mu 1987, mwanetu walunga Yaroslav ayile nakutwama munganda yaRiga muLatvia, kuze vetavishile mulimo wetu wakwambulula. Oloze omu akanyine kwingila mulimo wauswalale, vamuhakile mukamenga hamwaka umwe nachimbwa, kaha apikililenga mujinjele jakulisezaseza 9. Vyuma ngwamulwezelenga haukalu ngwamwene omu ngwapwilenga mukamenga vikiko vyamukafwile omike. Kutwala muze aputukile kuzata upayiniya. Kuheta mu 1990, mwanetu Pavel uze apwile namyaka 19, asakile kuya nakuzachila upayiniya kulitungu lyaSakhalin, kunote yalifuchi lyaJapan. Hakavanga katwasakile ayengako mwomwo halitungu kana hapwile kaha vaka-kwambulula 20. Kaha nawa lyapwililile kwakusuku chikuma, kafwe jikilomita 9,000. Oloze kutwala muze twamwitavishile, kaha chanehele nganyo yayinene chikuma. Kuze ayile akawanyine vatu vaze vetavilile mujimbu waWangana. Hamyaka yayindende kaha, halitungu kana hapwile vikungulwilo 8. Pavel azachilililenga kuSakhalin swi namu 1995. Halwola kana twatwaminenga kaha namwanetu wamuchinyikila hembo. Pavel azangilenga kutanga Mbimbiliya putu vene kuunyike wenyi. Omu apwile namyaka 14 aputukile kuzata upayiniya, shikaho ngwazachile nenyi upayiniya hamyaka yivali. Twalivwishile kuwaha kuzachila hamwe. Kaha omu Vitaly ahetele myaka 19, ayile nakuzata upayiniya wakulipwila.

Mu 1952, kapokola umwe alwezele Maria ngwenyi: “Kana lufwelelo lwove nge pimbi natukuhaka mukamenga hamyaka 10. Kaha halwola mukafumamo naukapwa ukashinakaji, ngocho kaweshi kukapwa namuka-kukulamako.” Oloze omu keshi mukiko chapwileko. Kalunga ketu Yehova navana vetu navatu vaze twanangwilenga muchano veji kutuzakamanga chikuma. Ami naMaria twalivwishilenga kuwaha kutambukila vihela vazachililenga vana vetu. Twamwenenga omu vatu vaze vanangwilenga vyaYehova kuli vana vetu vasolwelenga muchima wakusakwilila.

NGWASAKWILILA YEHOVA HAVYUMAVYAMWAZA NATULINGILANGA

Mu 1991, fulumende yetavishile jino mulimo waVinjiho jaYehova. Chuma kana chasangumwine cheka twima yetu yakwambulula. Chikungulwilo chetu chalanjile sacha yakuyanga nayo nakwambulwila kujimbaka twalihachile najo kusongo yachalumingo hichalumingo.

Tuli napuwami mu 2011

Ngwapwa nguwakuwahilila mwomwo Yaroslav naPavel namapwevo javo vaAlyona naRaya vali nakuzachila haMbetele, kaha Vitaly ali nakuzata mulimo wakutambwojoka napuwenyi Svetlana. Mwanetu watwatwa wapwevo Irina atwama muGermany. Lunga lyenyi Vladimir hamwe navana vavo vatatu vapwa tulama muchikungulwilo. Mwanetu Olga atwama muEstonia, kaha kakavulu eji kungutuminanga jishinga. Chaluvinda puwami Maria afwile mu 2014. Nguli nakutalilila kulwola mwakasanguka. Oholyapwa nguli nakutwama munganda yaBelgorod, kaha vandumbwami veji kunguzakamanga chikuma.

Hamyaka ngunazachilanga Yehova ngunalinangula ngwami chasakiwa kuzata nangolo numba tulame kulonga chetu, kaha nge natulinga ngocho Yehova mwatulingisa tutwame mukuunda. Yehova atukiswile mwamunene chikuma napuwami Maria. Shimbu kanda 1991, muSoviet Union mwapwile kaha vaka-kwambulula 40,000. Oholyapwa mumafuchi osena aze apwile muchiyulo chaSoviet Union muli jino vaka-kwambulula 400,000. Nguli jino namyaka 83, kaha nguchili lika ngukalama muchikungulwilo. Yehova nangukafwenga nakunguhana ngolo jakumika. Eyo, Yehova nangulingila vyuma vyamwaza chikuma hakumika chami.—Samu 13:5, 6.