“Oku kuli shipilitu yaYehova kukiko vene kuli kulihehwa.”—KOLI. 2, 3:17.

MYASO: 49, 73

1, 2. (a) Mwomwo ika vatu vamumakumbi akaposetolo Paulu vasakiwilile kupwa vakulihehwa? (b) Kweseka namazu aPaulu, iya apwa muka-kuhana kulihehwa chamwenemwene?

VAKA-KULISHITU vatwaminenga muWangana wavaLoma muze vatu vamwenenga ngwavo vatachikijile chikuma jishimbi, nachiyulo kaha nawa ngwavo vapwile vakulihehwa. Oloze Wangana kana wapendaminyine chikuma hali vandungo vaze vapwilemo. Lwola lumwe muLoma mwapwile vandungo kafwe jipaseti 30. Echi chalingishile vatu vamuchivulu kuhakilako navaka-Kulishitu vayayavale mwomwo yakuvayanjisa nakufwila jino kusokoka muundungo kana.

2 Mikanda asonekele kaposetolo Paulu yahanjika chikuma hakulihehwa. Oloze echi kachalumbununa nge apwile nakusaka kusokola vatu muundungoko. Muchishishisa chakupendamina hachiyulo chavatu mangana chinehe kulihehwa, Paulu navakwavo vaka-Kulishitu vazachile nangolo hakwambulula mujimbu wamwaza waWangana waKalunga nakukafwa vatu vatachikize kulema chandando yakusokola yaKulishitu Yesu. Chakutalilaho,  mumukanda wamuchivali uze asonekelele vaka-Kulishitu vamuKolinde, ambile ngwenyi: “Yehova ikiye Shipilitu, kaha oku kuli shipilitu yaYehova kukiko vene kuli kulihehwa.”—Koli. 2, 3:17.

3, 4. (a) Mwomwo ika Paulu ahanjikilile mazu ahali Wavaka-Kolinde 2, 3:17? (b) Vyuma muka twatela kulinga numba tuzachise kanawa lisesa atuhana Yehova?

3 Mumukanda woumwe, Paulu ahanjikile havyuma vyasolokele kuli Mose omu ashikumukile kufuma kuPili yaShinai kuze akahanjikile nakangelo kaYehova. Omu vatu vamwene Mose vevwile woma, ngocho aliwuvile chiwuva kumeso enyi. (Kulo. 34:29, 30, 33; Koli. 2, 3:7, 13) Paulu alumbunwine ngwenyi: “Oloze omu mutu mwalumukila kuli Yehova, chiwuva navamufumisacho.” (Koli. 2, 3:16) Uno mazu ahanjikile alumbununa ika?

4 Ngana muze twamonanga muchihande chinafumuho Yehova Tengi ikiye kaha atwama nalisesa lyakulinga kala vyuma nasake. Shikaho chapwa chakutamo kwamba ngwetu oku kuli Yehova noku “kuli shipilitu yaYehova,” kukiko vene kuli kulihehwa. Hakusaka tupwenga vakulihehwa twatela ‘kwalumukila kuli Yehova,’ kulumbununa kutunga usoko naikiye. Omu vaIsalele vapwile mupambo kavamwene vyuma avalingilile Yehova kupwa vyavilemuko. Chasoloka nge vakaluhwishile michima yavo nakufwila kuzachisa lisesa lyavo hakusaka kulisuulwisa vavene.—Hepe. 3:8-10.

5. (a) Kulihehwa muka cheji kwizanga mwomwo yashipilitu yaYehova? (b) Twatachikiza ngachilihi ngwetu undungo wakumujimba kaweshi kutuhonesa kupwa nakulihehwa chakufuma kuli Yehovako? (c) Vihula muka twatela kulihulisa?

5 Kulihehwa chize cheji kwizanga mwomwo yakupwa nashipilitu yaYehova chikiko chachilemu kuhambakana kusokoka muundungo wakumujimba. Shipilitu yaYehova yeji kusokolanga vatu kushili, nakukufwa, nakukwitava chamakuli, oloze vatu kaveshi kuhasa kulinga vyuma kanako. (Loma 6:23; 8:2) Chikupu vene, echi hikulihehwa chachinene. Mutu nahase kupwa nakulihehwa kana kwosena okwo ali, mukamenga chipwe nge vanamukwate undungo. (Kupu. 39:20-23) Omu mukiko chapwile nakuli ndumbwetu Nancy Yuen naHarold King vaze vashishikile hamyaka yayivulu omu vavakashile mukamenga mwomwo yalufwelelo lwavo. Munahase kuwana mijimbu yavo ha JW Broadcasting. (Talenu haze vavuluka ngwavo INTERVIEWS AND EXPERIENCES > ENDURING TRIALS.) Jino natusolola ngachilihi ngwetu twamona kulihehwa chetu kupwa chachilemu? Vyuma muka twatela kulinga numba tuzachise kanawa lisesa vatuhana?

KULIHEHWA CHAKULI KALUNGA CHAPWA CHACHILEMU

6. VaIsalele vasolwele ngachilihi nge kavasakwililile Yehova halisesa avahanyineko?

6 Kumona kulihehwa twatwama nacho kupwa chachilemu nachitulingisa tusakwilile uze atuhanacho. VaIsalele kavasakwililile Yehova hakuvasokola muundungo muEjipituko. Omu mwahichile tukweji vavandende kufuma hakuvasokola, vaIsalele vaputukile kwanuka vyakulya vize valilenga muEjipitu, nakuyayavala hakulya chize avahanyinenga Yehova nakufwila kukinduluka cheka kuEjipitu. Vamwenenga vaishi, namatende, namahapwa, najisapwola, natulumingu kupwa vyavilemu kuhambakana lisesa lize vapwile nalyo lyakulemesa Kalunga wamuchano Yehova. Numba tuhu valimbenjele oloze Yehova kapihililile navoko. (Kula. 11:5, 6, 10; 14:3, 4) Vyuma muka natulinangulako?

7. Paulu akavangijile ngachilihi mazu aze ahanjikile hali Wavaka-Kolinde 2, 6:1 mukuyoya chenyi, kaha natumulondezeza ngachilihi?

7 Kaposetolo Paulu akolezezele vaka-Kulishitu ngwenyi kavatela kuhombwanyisa lisesa lize Yehova Kalunga atuhana kuhichila muli  Mwanenyi Yesu Kulishituko. (Tangenu Wavaka-Kolinde 2, 6:1.) Hakuwana nge Paulu kapwile wakukupukako kaha nawa apwile muundungo washili nakufwa, ngocho evwilenga kupihya chikuma. Chipwe ngocho, ambile ngwenyi: “Ngunamusakwilila Kalunga kuhichila muli Yesu Kulishitu Mwata wetu!” Mwomwo ika ahanjikilile mazu kana? Alwezele vakwavo vaka-Kulishitu ngwenyi: “Mwomwo lushimbi lwashipilitu yize yeji kuhananga kuyoya hakulikata naKulishitu Yesu, lunamilingisa lyehi kupwa vakulihehwa kulushimbi lwashili nakufwa.” (Loma 7:24, 25; 8:2) Chakutalilaho chakaposetolo Paulu nachitukafwa tuhone kuhombwanyisanga kulihehwa atuhana Yehova nakuchilingisa chiyenga mwangana vene. Wana wandando yakusokola nautukafwa tuzachile Kalunga nakuwahilila nakupwa nachivezu chitoma.—Samu 40:8.

Kutala muli nakuzachisa kulihehwa chenu hakutandakanyisa mulimo waWangana tahi nyi hakulinga vyuma mwasaka enu vavene? (Talenu palangalafu 8-10)

8, 9. (a) Kaposetolo Petulu atuhuhumuna tulihende kuvyuma muka? (b) Ukalu muka vali nakumona vakweze makumbi ano?

8 Hakusaka tusolole kusakwilila chetu, twatela nawa kulihenda kukuzachisa lisesa lyetu mujila yayipi. Kaposetolo Petulu atuhuhumuna tuhone kuzachisanga kulihehwa chetu kupwa kanyinyilo kakulinga vyuma twafwila. (Tangenu WaPetulu 1, 2:16.) Kuhuhumuna kana chatela kutwanukisa vyuma valingile vaIsalele mupambo. Kaha nawa, ukalu wavo unahase kutusolokela nayetu. Satana nakaye kenyi veji kuhungumwisanga vatu vafwile jivwaliso nakulilenga vali nakusungumuka vatu, nakufwa hakulya nakunwa, naviseke navyuma vyeka. Kaha nawa vaka-kusekasana veji kusololanga vyuma mujila yamwaza mangana vakunyule vatu valande navyuma vize kavasakanga kulandako. Echi chinahase kutulingisa tuzachise kulihehwa chetu mujila yayipi nge katwazangamineko.

9 Mazu asonekele Petulu anahase nawa kutukafwa namuvyuma vyeka vyakufwana nge kutanga shikola, nakwingila milimo. Chakutalilaho, makumbi ano vakweze vavavulu vali nakuvashinyinyika vayenga kumashikola ahelu. Veji kuvakunyulanga vafwelele ngwavo kuya kumashikola nachikavakafwa vakapwe hamilimo yayinene yajimbongo jajivulu. Hakuwana nge vakweze vasaka kukapwa nachiyoyelo chamwaza kulutwe, vanahase kwitavila vishinganyeka kana. Uno vyuma muka vatela kwanuka ava vakweze hohamwe navisemi javo?

10. Vyuma muka twatela kwanuka kutalisa kulisesa lyetu nge tuli nakusakula vyakulinga?

10 Vatu vamwe vashinganyeka ngwavo hakuwana nge mutu akwechi lisesa lyakulisakwila vyakulinga, ngocho nahase kulisakwila kulinga kala chuma, chikalu kaha chivezu chenyi chinamwitavisa. Pamo veji kushinganyekanga ngocho mwomwo yamazu aPaulu aze asonekelele vaka-Kulishitu vamuKolinde havyakulya ngwenyi: “Kulihehwa chami navachisopesela ikaze kuchivezu chamutu weka?” (Koli. 1, 10:29) Numba tuhu twatwama nalisesa lyakulisakwila kutanga shikola nakwingila milimo, oloze twatela kwanuka ngwetu lisesa lyetu lyatwama noho lyakumina kaha nawa vyuma natusakula navitunehela nganyo chipwe ukalu. Echi chikiko chalingishile kaposetolo Paulu asoneke ngwenyi: “Vyuma vyosena vavitavisa mujishimbi, oloze keshi vyosena vika-kunganyalisako. Vyuma vyosena vavitavisa mujishimbi, oloze keshi vyosena vika-kutungako.” (Koli. 1, 10:23) Echi chatela kutukafwa tutachikize ngwetu numba tuhu twatwama nalisesa lyakusakwila vyakulinga mukuyoya chetu, oloze kuliko vyuma vyeka vyavilemu vize twatela kulinga.

 KUZACHISA KANAWA LISESA LYETU HAKUZACHILA YEHOVA

11. Mwomwo ika Yehova naYesu vatusokwela?

11 Omu Petulu ahuhumwine vatu vahone kuzachisa lisesa lyavo mujila yayipi, avalwezele nawa jila vatela kulizachishilamo. Atukolezeza tuzachise lisesa lyetu ‘hakupwa tuvandungo jaKalunga.’ Echi chikiko chalingisa Yehova atusokole kushili nakufwa kuhichila muli Yesu, mwomwo asaka tulihane ‘nakupwa tuvandungo jaKalunga’ mukuyoya chetu chosena.

12. Vyuma muka natulinangula kuli Nowa natanga yenyi?

12 Chuma nachitukafwa tuhone kuzachisa kulihehwa chetu mujila yayipi, nakuhona kupwa tuvandungo kuvyuma vyamukaye, shina kwazananga chikuma mumilimo yakushipilitu. (Ngale. 5:16) Tuchitalenu hachakutalilaho chakakuluka yetu Nowa natanga yenyi. Vatwaminenga munganda muze mwapwilenga vilinga vyavipi. Chipwe ngocho, vakiko kavapwile navilinga kanako. Vyuma muka vyavakafwile? Vafwililile kuzata mulimo avahanyine Yehova wakutunga wato, nakukungulula vyakulya vyavo nevi vyatunyama, nakwambulila vatu mujimbu wakunongesa. Mbimbiliya ngwayo: “Nowa alingile kweseka namuze vamulwezele kuli Kalunga. Alingile vene ngocho.” (Kupu. 6:22) Nganyo muka yafuminemo? Nowa natanga yenyi vayovokele.—Hepe. 11:7.

13. Mulimo muka azachilenga Yesu uze nawa aselelele vaka-kumukavangiza?

13 Mulimo muka atuhana Yehova makumbi ano? Hakupwa tutumbaji twaKulishitu, Kalunga atuhana mulimo waulemu wakwambulula. (Tangenu Luka 4:18, 19.) Makumbi ano, vatu vavavulu vanavelavisa vishinganyeka kuli kalunga wakatwamino kamyaka yino, kaha nawa vali muundungo wakufwila vyuma vyamukuyoya, nakupwa mukwitava chamakuli, navyuma vyeka. (Koli. 2, 4:4) Shikaho twatela kulondezeza Yesu hakukafwa vatu vatachikize Yehova Kalunga uze eji kuhananga vatu kulihehwa chamwenemwene nakumulemesa. (Mateu 28:19, 20) Chipwe ngocho, mulimo kana kawapwa wawashiko mwomwo yaukalu tweji kumonanga. Mumafuchi amwe, vatu kavasaka kulinangula vyaKalungako, kaha nawa veka veji kupihililanga hakuvambulila. Shikaho twatela  kulihulisa ngwetu: ‘Kutala ngwatela kuzachisa kulihehwa chami hakutandakanyisa mulimo waWangana tahi?’

14, 15. Milimo muka vali nakulisuula kuzata vangamba jaYehova? (Talenu muvwimbimbi wakulivanga.)

14 Tweji kwivwanga kuwaha kumona vandumbwetu vavavulu vanashiwisa chiyoyelo chavo mangana vazate mulimo washimbu yosena mwomwo yakutachikiza ngwavo kukuma chinapandama. (Koli. 1, 9:19, 23) Vamwe veji kuzachilanga mujingalila javo, kaha veka veji kuyanga kuze kuli nakusakiwa vaka-kwambulula. Mumyaka yitanu yinahichimo, vatu vakuzomboka 250,000 vanalisonekesanga upayiniya. Ngocho oholyapwa jino kuli vapayiniya vashimbu yosena vakuzomboka 1,100,000. Vandumbwetu kana vali nakuzachisa kanawa kulihehwa chavo mwomwo vanasakula kuzachila Yehova.—Samu 110:3.

15 Vyuma muka vinakafwenga ava vandumbwetu vazachise kanawa kulihehwa chavo? Tuchitalenu hachakutalilaho chaJohn naJudith vaze vanazachila mumafuchi amavulu hamyaka 30. Vambile ngwavo kuShikola yaMulimo wauPayiniya yize yaputukile mu 1977, vaka-shikola vavakolezezele valisuule kuya nakuzachila kuze kwapwile nakusakiwa kukafwa. Echi chalingishile John ashiwiseko chiyoyelo chenyi. Omu vahetele mulifuchi muze vayile nakuzachila, vamwene nge kulomba nakupendamina hali Yehova chavakafwile vahonese ukalu wakufwana nge kulinangula lilimi lyeka, nakulijilisa chisemwa chakulifuchi kana, nakwalumuka chajingonde. Kutala vapwile vakuwahilila tahi? John ambile ngwenyi: “Ngwevwile kuwaha chikuma mwomwo ngwamwene ngwami ou ukiko mulimo wamwaza chikuma kuhambakana milimo yosena. Ngwamwene Yehova kupwa himutu ivene, kaha nawa chisemi wazangi. Kaha nawa ngwevwishishile jino kanawa mazu ahali WaYakova 4:8 akwamba ngwavo: ‘Pandamenu kuli Kalunga, kaha mwapandama kuli enu.’ Ngwatachikijile ngwami ngunawane vyuma vyavilemu vize ngwapwile nakutonda mukuyoya chami chosena.”

16. Uno vandumbwetu vavavulu vanazachisa ngachilihi kulihehwa chavo?

16 Vandumbwetu vamwe kavahasa kushimbula mumulimo washimbu yosena nganomu vanalingi vaJohn naJudith koko. Chipwe ngocho, veji kulisuulanga kuzata mulimo wakulisakila wakutungatunga wamuliuka. Chakutalilaho, omu vapwile nakutunga chikota chetu muWarwick New York vandumbwetu kafwe 27,000 vayilenga nakukafwa. Vamwe valingilenga ngocho havyalumingo vyavindende, veka hatukweji, kaha vakwavo hamwaka wamuundu nakuzombokaho. Vandumbwetu vavavulu valisuwile kuseza milimo yavo nakuya nakukafwa. Ava vandumbwetu vatusela chakutalilaho chize twatela kulondezeza mwomwo vazachishile kulihehwa chavo hakwalisa nakuvumbika Yehova Kalunga uze eji kuhananga wakulihehwa chamwenemwene.

17. Vyuma muka vyamwaza navakalivwisa kuwaha vaze vali nakuzachisa kanawa kulihehwa chavo?

17 Twapwa tuvakuwahilila chikuma mwomwo tunatachikiza Yehova, kaha nawa twapwa tuvakulihehwa mwomwo twatachikiza muchano. Shikaho twatela kusakulanga kulinga vyuma vize navisolola nge twamona kulihehwa chetu kupwa chachilemu. Muchishishisa chakuzachisa kulihehwa chetu mujila yayipi, twatela kuchizachisa hakuzachila Yehova kweseka noho hakumina ngolo jetu. Nge natulinga ngocho, kaha natukalivwisa kuwaha vyuma atufwelelesa Yehova vize ambile ngwenyi: “Vyuma vyakutenga navikiko nawa vakavilingise kupwa vyakulihehwa kuundungo wakuya nakupola, nakwingila mukulihehwa chaupahu chavana vaKalunga.”—Loma 8:21.