“Tulihakenunga michima navakwetu . . . , tulikolezezenunga navakwetu, chikumanyi omu munamono ngwenu likumbi kana linapandama kwakamwihi.”—HEPE. 10:24, 25.

MYASO: 90, 87

1. Mwomwo ika kaposetolo Paulu akolezezele vaka-Kulishitu vavaHepeleu vakulivanga mangana vakolezezenga ‘chikuma’ vakwavo?

MWOMWO ika twatela kulikolezezela chikuma navakwetu? Kukumbulula tunahase kuchiwana mumukanda uze kaposetolo Paulu asonekelele vaka-Kulishitu vavaHepeleu. Avalwezele ngwenyi: “Tulihakenunga michima navakwetu mangana tulikolezeze tusolole zangi navilinga vyamwenemwene. Kaha kanda natusuvilila kulikungulwila hamweko, nganomu vatu vamwe vatwama nachijililo kana, oloze tulikolezezenunga navakwetu, chikumanyi omu munamono ngwenu likumbi kana linapandama kwakamwihi.” (Hepe. 10:24, 25) Omu mwahichile kafwe myaka yitanu, vaka-Kulishitu vavaYuleya vaze vatwaminenga muYelusalema vamwene katachikijilo kakusolola nge “likumbi lyaYehova” linapandama ngana muze avalwezele Yesu, ngocho vatelelele kufuma munganda kana. (Vili. 2:19, 20; Luka 21:20-22) Likumbi kana lyejile mu 70 C.E. omu vaLoma valukukile Yelusalema.

2. Mwomwo ika twatela kukolezezela chikuma vakwetu makumbi ano?

2 Namakumbi ano, twatachikiza ngwetu ‘likumbi lyaYehova lyalinene, lyakwivwisa woma’ linapandama. (Yowe. 2:11) Kapolofweto  Zefwanyiya ambile ngwenyi: “Likumbi lyaYehova lyalinene lili hakamwihi. Lili hakamwihi, kaha lili nakwiza washiwashi.” (Zefwa. 1:14) Shikaho, twatela kwanukanga mazu akaposetolo Paulu akwamba ngwenyi: “Tulizakamenunga navakwetu mangana tulikolezeze tusolole zangi navilinga vyamwenemwene.” (Hepe. 10:24, kwinyikila chamwishi) Twatela kuzakama chikuma vandumbwetu mangana tuvakolezezenga lwola lwosena.

VATU MUKA TWATELA KUKOLEZEZA?

3. Vyuma muka asonekele kaposetolo Paulu kutalisa kukulikolezeza? (Talenu muvwimbimbi wakulivanga.)

3 Mbimbiliya yamba ngwayo: “Kulizakamina chamutu nachilemuwisa muchima wenyi, oloze mazu amwaza nawahizumuna muchima wenyi.” (Vishi. 12:25) Mazu kana apwa amuchano mwomwo tuvosena twasakiwa kutukolezeza. Paulu alumbunwine ngwenyi vaze veji kukolezezanga vakwavo navakiko vasakiwa kuvakolezeza. Asonekelele vaka-Kulishitu vapwile muLoma ngwenyi: “Ngunafwila kumimona, mangana ngwami ngumihaneko wana wakushipilitu, mangana nayenu muzame mbe, mokomoko ngwami mangana tuhase kulikolezeza, mutu himutu nalufwelelo lwamukwavo, elu lwayenu nalwelu lwayami.” (Loma 1:11, 12) Numba tuhu Paulu akolezezelenga vakwavo oloze lwola lumwe naikiye asakiwilenga kumukolezeza.—Tangenu Wavaka-Loma 15:30-32.

4, 5. Veya twatela kukolezeza makumbi ano, kaha mwomwo ika?

4 Vandumbwetu vaze veji kulisuulanga kuzachila Yehova vasakiwa kuvasangejeka. Havatu kana hatwama navapayiniya vaze vali nakuzachila Kalunga nakashishi. Vavavulu vanalisuula kwashiwisa chiyoyelo chavo mangana vazate mulimo kana. Omu mukiko valinga navamishonali, navaka-kuzachila haMbetele, natulama vakujinguluka napwevo javo, navaze vazachila hajiofesi javaka-kwalumuna mikanda mangana vapwenga nalwola lwaluvulu lwakuzata mulimo wajila. Shikaho vasakiwa kuvakolezezanga. Vandumbwetu vaze vazanga mulimo washimbu yosena, oloze vahona mwomwo yaukalu umwe, navakiko vasakiwa kuvakolezeza.

5 Vandumbwetu veka nawa valisuula kutwama ujike mwomwo yakwononoka lushimbi lwakusombokela chipwe kumbachila “muli Mwata kaha.” Ngocho twatela kuvakolezezanga. (Koli. 1, 7:39) Vandumbwetu nawa vatela kusangejekanga mapwevo javo hamilimo veji kukilikitanga. (Vishi. 31:28, 31) Navandumbwetu vaze veji kumikanga muvyeseko chipwe mumisongo, navakiko vasakiwa kuvakolezeza. (Teso. 2, 1:3-5) Yehova naKulishitu veji kuvendejekanga ava vandumbwetu vakushishika tunavuluka.—Tangenu Wavaka-Tesolonyika 2, 2:16, 17.

TULAMA VEJI KUTUKOLEZEZANGA

6. Mulimo muka vatwama nawo tulama kweseka nachisoneka chaIsaya 32:1, 2?

6 Tangenu Isaya 32:1, 2. Yesu Kulishitu eji kukolezezanga nakutwaminyina vaze vanahombo kuhichila muli vandumbwenyi vawavisa ‘navilolo’ vamuutanga wamikoko veka. Echi chinakulumbununa nge ava tulama kavatela kupwanga “vamyata” halufwelelo lwavandumbwavoko oloze ‘vakwavo muvazachila hamwe’ mangana vapwenga vakuwahilila.—Koli. 2, 1:24.

7, 8. Vyuma vyeka muka vatela kulinga tulama muchishishisa chakukolezeza kaha vandumbwavo namazu?

7 Kaposetolo Paulu atusela chakutalilaho chamwaza chize twatela kulondezeza. Asonekelele vaka-Kulishitu vamuTesolonyika vaze vayanjishilenga ngwenyi: “Etu hakumizanga chikuma, twafwililile kumihana mujimbu wamwaza waKalunga, namyono yetu nawa, mwomwo twamizangile chikuma.”—Teso. 1, 2:8.

8 Paulu atachikijile ngwenyi katwatela kukolezezanga vakwetu namazu kahako. Ngocho  alwezele vakulwane vamuEfwesu ngwenyi: “Nayenu nawa mukilikitenga chikuma nakukafwa vaze vazeya, kaha mwatela kwanukanga nawa mazu aMwata Yesu, omu ambile ivene ngwenyi: ‘Kuhana cheji kunehanga kuwahilila chikuma kuhambakana kutambula.’” (Vili. 20:35) Paulu kafwililile kukolezeza vandumbwenyi namazu kahako, oloze alisuwile ‘kuzachisa vyuma vyenyi nakulihana ivene mwosena hali vakiko.’ (Koli. 2, 12:15) Chochimwe nawa, tulama kavatela kukolezezanga vandumbwavo namazu kahako oloze vatela nawa kuvazakama mujijila jakulisezaseza.—Koli. 1, 14:3.

9. Chuma muka vatela kwanuka tulama nge vali nakuhanjikila vandumbwavo?

9 Lwola lumwe kulikolezeza chasakiwa kuhanjikila mutu. Chipwe ngocho, tulama vatela kulondezezanga chakutalilaho chamuMbimbiliya chize nachivakafwa vahanjikile vandumbwavo mujila yamwaza. Chakutalilaho omu Yesu vamusangwile, ahanjikilile vikungulwilo vimwe vyamuAsia Minor. Chipwe ngocho, shimbu kanda avahanjikile avangililile kusangejeka vikungulwilo vyamuEfwesu, naPelengamu, naTulachila. (Kuso. 2:1-5, 12, 13, 18, 19) Alwezele nawa chikungulwilo chamuLauchiseya ngwenyi: “Vosena vaze ngwazanga ngweji kuvahanjikilanga nakuvazangamisa. Shikaho zata natwima mangana upihilile nakwalumuka.” (Kuso. 3:19) Tulama vatela kulondezezanga Kulishitu nge vali nakuhanjikila vandumbwavo.

UNO KUKOLEZEZA HIMULIMO WATULAMA KAHA TAHI?

Enu visemi, kutala muli nakunangula vana venu vakolezezenga vandumbwavo tahi? (Talenu palangalafu 10)

10. Uno natuhasa kulikolezeza ngachilihi navakwetu?

10 Mulimo wakukolezeza kawapwa watulama kahako. Paulu akolezezele vaka-Kulishitu vosena vahanjikenga mazu ‘amwaza kaha, akutunga vakwavo halwola navasakiwa kuvakafwa, mangana ahase kuvanganyalisa.’ (Efwe. 4:29) Tuvosena twatela kufwila kutachikiza ukalu vali nawo vakwetu mangana tuvakafwe. Paulu ahanjikililile vaka-Kulishitu vavaHepeleu ngwenyi: “Jikijisenu mavoko aze analingi  mbwambwala namambuli aze anazeye, kaha sungamisenu lika jijila jakutambukamo namahinji enu, mangana chize chinatenguka chihone kufuma mulinungilo lyacho, oloze mangana vachihindule.” (Hepe. 12:12, 13) Tuvosena vanyike navakulwane, tunahase kukolezeza vandumbwetu.

11. Mahongo vamukolezezele ngachilihi omu ahombele?

11 Ndumbwetu Mahongo, * uze apwile naukalu wakuhomba ambile ngwenyi: “Omu likumbi limwe ngwapwile nakulomba kuli Yehova mangana angukafwe, ngwaliwanyine nandumbwetu wapwevo wamukulwane uze anguzakamine chikuma. Angulwezele ngwenyi naikiye ukalu kana wamusolokelaho lyehi, kahechi changukolezezele chikuma.” Ou ndumbwetu wamukulwane pamo katachikijile ngwenyi mazu ahanjikile akolezezele Mahongoko.

12, 13. Uno mazu ahali Wavaka-Fwilipi 2:1-4 anahase kutukafwa ngachilihi hakukolezeza vakwetu?

12 Paulu asonekelele vaka-Kulishitu vamuchikungulwilo chamuFwilipi ngwenyi: “Jino kachi nge muli nakulikolezeza muli Kulishitu, kachi nge muli nakulivendejeka muzangi, kachi nge muli nakulikata kushipilitu, kachi nge muli nakulizanga nakulivwila keke, kaha ngulingisenu nguwahilile chikuma hakupwa navishinganyeka vyovimwe, nahakupwa nazangi yoyimwe, nahakulinunga hamwe, nahakushinganyeka mwomumwe. Kanda kulinga chuma numba chimwe namuchima wakulikindukilako, chipwe namuchima wakulitohwesa chamokomokoko, oloze linyisenunga nakumona vakwenu ngwenu vamihambakana enu. Kanda kuhakanga kulutwe vyuma mwasaka enu kahako, oloze navyuma vasaka vakwenu nawa.”—Fwili. 2:1-4.

13 Ngocho tuvosena twatela kuzakamanga vakwetu “nakulivendejeka muzangi, nakulikata kushipilitu, nakulizanga nakulivwila keke,” mangana tulikolezezenga navandumbwetu.

MWAKUKOLEZEZELA VAKWETU

14. Tunahase kukolezeza ngachilihi vandumbwetu?

14 Kutachikiza ngwetu vandumbwetu vaze twakolezezele kunyima vachili lika nakuzachila Yehova nakashishi chinahase kutwivwisa kuwaha chikuma. Omu mukiko chapwile nakuli kaposetolo Yowano uze asonekele ngwenyi: “Kakweshi chuma cheka nachingulingisa nguwahilile chikuma kuhambakanechi chakwivwa ngwavo: vana vami vali nakutambuka lika mumuchano.” (Yowa. 3, 4) Vapayiniya nawa veji kwivwanga kuwaha hakutachikiza ngwavo vatu vaze vanangwilenga Mbimbiliya vali jino mumuchano, kaha vamwe vali nakuzata upayiniya. Vapayiniya vaze vanahombo tunahase kuvakolezeza hakuvanukisa vyuma valivwishilenga kuwaha kunyima.

15. Mujila muka tunahase kukolezezelamo vaze vali nakuzachila Yehova nakashishi?

15 Tulama vakujinguluka vavavulu namapwevo javo nawa veji kuwahililanga hakuvasonekela mikanda yakuvasakwilila kufuma kuvikungulwilo vize veji kutambukilanga. Omu mukiko veji kwivwanga natulama muchikungulwilo, navamishonali, navapayiniya, navaka-Mbetele nge navavasangejeka hamilimo veji kuzatanga.

TULIKOLEZEZENUNGA NAVANDUMBWETU

16. Uno kukolezeza vakwetu chapwa chachikalu tahi?

16 Nachipwa chakuhenga kushinganyeka ngwetu katweshi kuhasa kukolezeza vakwetu mwomwo katwatachikiza kuhanjikako. Kukolezeza kachapwa chachikaluko mwomwo tunahase kukolezeza mutu numba vene hakumwesa kaha kukanwa nge tunakumumeneka. Nge mutu tunameneka keshi kumwesako, kaha natutachikiza ngwetu ali naukalu ngocho ali nakusakiwa kumukafwa.—Yako. 1:19.

17. Ndumbwetu umwe wamukweze vamukafwile ngachilihi omu ahombele?

17 Ndumbwetu wamukweze Henri ahombele chikuma omu vausoko wenyi kuhakilako naise  uze apwile kalama muchikungulwilo vasezele muchano. Ou ndumbwetu vamukolezezele kuli kalama wakujinguluka uze ayile nenyi kuzuvo yakulila mangana vakanwe kofi. Echi chakafwile Henri akasunuke kwambulula ukalu wenyi. Kahomu vakumishile kushimutwila, Henri amwene jino ngwenyi nge mwatwalaho lika kuzachila Yehova, kaha vausoko wenyi navakinduluka cheka mumuchano. Visoneka vyamuvendejekele chikuma shina, Samu 46; naZefwanyiya 3:17; naMako 10:29, 30.

Tuvosena tunahase kulitunga nakulikolezeza navakwetu (Talenu palangalafu 18)

18. (a) Vyuma muka asonekele Mwangana Solomone? (b) Jila muka avulukile kaposetolo Paulu yakulikolezezelamo navandumbwetu?

18 Mujimbu waMahongo nou waHenri, unahase kutukafwa tukolezezenga vakwetu. Mwangana Solomone asonekele ngwenyi: “Mazu akuhanjika halwola lwakutamo anapu amwaza. Muchima weji kuwahililanga nge kumeso kunataunuka, mujimbu wamwaza weji kuhizumunanga vifuwa” (Vishi. 15:23, 30) Kaha nawa kutanganga mangazini yaKaposhi Kakutalila namijimbu yahakeyala yetu yainternet chinahase kuvendejeka vaze vanahombo. Paulu nawa ambile ngwenyi, kwimbila hamwe myaso navaze vanahombo chinahase kuvakolezeza. Ambile ngwenyi: “Linangulenunga lika navakwenu nakulikolezezanga najisamu, namyaso yakwalisa Kalunga, namyaso yakushipilitu yakwimba nakusakwilila, nakwimbanga myaso mumichima yenu kuli Yehova.” Kolo. 3:16; Vili. 16:25.

19. Mwomwo ika twatela kutwalaho lika kulikolezeza chikuma navandumbwetu, kaha vyuma muka twatela kulinga?

19 Omu likumbi lyaYehova ‘linakupandama kwakamwihi’ twatela kulikolezeza chikuma navandumbwetu. (Hepe. 10:25) Paulu alwezele vakwavo vaka-Kulishitu ngwenyi, “Likolezezenunga navakwenu, nakulitunganga nawa navakwenu nganomu vene muli nakulinga.”—Teso. 1, 5:11.

^ par. 11 Majina vanawalumuna.