“Avevwililile keke . . . Kaha aputukile kuvanangula vyuma vyavivulu.”—MAKO 6:34.

MWASO 70 Tondenunga Vaze Vatela

VYUMA NATUSHIMUTWILA *

1. Uhashi muka wakulipwila atwama nawo Yesu? Lumbununenu.

YESU atwama nauhashi wakutachikiza ukalu tweji kumonanga etu vatu vakuhona kukupuka. Omu Yesu apwile hano hamavu ‘awahilililenga navaze vawahililile nakulila navaze vapwile nakulila.’ (Loma 12:15) Chakutalilaho, omu tumbaji twenyi 70 vawahililile mwomwo yakuzata natwima mumulimo wakwambulula, “Yesu awahililile chikuma.” (Luka 10:17-21) Kahomu afwile Lazalu, Yesu amwene masepa jaLazalu navausoko wenyi vali nakulyonyinga, ngocho Yesu “alishishimwine nakulyonyinga chikuma.”—Yowa. 11:33.

2. Chuma muka chakafwile Yesu evwile vatu keke nakuvatetela?

2 Chuma muka chakafwile Yesu mangana evwile vatu vakuhona kukupuka keke nakuvatetela? Chuma chachilemu chamukafwile shina kuzanga vatu. Ngana muze twashimutwilanga muchihande chinafumuho, Yesu “evwililenga kuwaha vana vavatu.” (Vishi. 8:31) Kuzanga vatu chamulingishile afwile kutachikiza kanawa vishinganyeka vyavo. Kaposetolo Yowano ambile ngwenyi: “[Yesu] atachikijile vyuma vyapwile mumichima yavatu.” (Yowa. 2:25) Yesu azakaminenga chikuma vatu. Omu vatu vamwene zangi yize Yesu avasolwelelele chavalingishile vetavile mujimbu waWangana uze avambulilile. Nge natuzakamanga vatu, kaha nachivalingisa vevwilile mujimbu natuvambulila.—Chimo. 2, 4:5.

3-4. (a) Uno kuzakama vatu nachitulingisa tumone ngachilihi mulimo wetu wakwambulula? (b) Vyuma muka natushimutwila muchihande chino?

3 Kaposetolo Paulu atachikijile ngwenyi apwile namulimo waunene wakwambulula mujimbu, kahomu mukiko chapwa nakuli etu. (Koli. 1, 9:16) Chipwe ngocho, nge twazakama vatu, kaha katweshi kumona mulimo wetu kupwa hichilika kahako, oloze natusolola hatoma ngwetu twazakama vatu nakufwila kuvakafwa. Twatachikiza ngwetu “kuhana cheji kunehanga kuwahilila chikuma kuhambakana kutambula.” (Vili. 20:35) Kwanukanga chishina  kanechi lwola lwosena nachitukafwa tulivwise kuwaha mulimo wakwambulula.

4 Muchihande chino natushimutwila omu tunahase kuzakaminamo vatu tweji kuwananga muwande. Chatete, natushimutwila havyuma natulinangula kuli Yesu mujila amwenenengamo vatu. Kufumaho natushimutwila hajijila jiwana tunahase kumulondezezelamo.—Petu. 1, 2:21.

YESU AZAKAMINENGA VATU MUMULIMO WAKWAMBULULA

Kuzakama vatu chikiko chalingishile Yesu avambulile mujimbu wakuvavendejeka (Talenu palangalafu 5-6)

5-6. (a) Vatu muka vaze Yesu evwililile keke? (b) Mwomwo ika Yesu evwilililenga keke vatu vaze ambulililenga, nganomu chahanjikilile chimweza chisoneka chaIsaya 61:1, 2?

5 Tuchitalenu omu Yesu azakaminyinengamo vatu. Likumbi limwe, Yesu natumbaji twenyi vazachile chikuma mumulimo wakwambulula, kaha vazeyele mwomwo ‘kavapwile nalwola lwakulyako.’ Shikaho, Yesu alwezele tumbaji twenyi vayenga “kuchihela kwakuhona vatu kwauka wavo” mangana ‘vakanokeko chindende.’ Oloze liyongomena lyavatu lyalivangile kuya kuchihela kuze Yesu natumbaji twenyi vapwile nakuya. Uno Yesu alingile ngachilihi omu amwene vatu vanahete lyehi kuchihela kana? Mbimbiliya ngwayo, “avevwililile keke * mwomwo vapwile nge mikoko vakuzeneka kafunga. Kaha aputukile kuvanangula vyuma vyavivulu.”—Mako 6:30-34.

6 Chuma muka chalingishile Yesu evwile keke vatu kana? Amwene ngwenyi vatu kana “vapwile nge mikoko vakuzeneka kafunga.” Pamo Yesu amwene ngwenyi vatu kana vapwile vaka-kuhutwa, kaha nawa vazachilenga jola jajivulu mangana vawane vyuma vyakulikafwa navyo mutanga. Kaha nawa veka pamo vapwile nakumona ukalu mwomwo yakufwisa vausoko wavo. Kala mweshomwo chapwile, Yesu atachikijile kanawa ukalu wavo. Ngana muze twalinangulanga muchihande chinafumuho, Yesu naikiye pamo ahichile muukalu woumwe. Hakuwana nge Yesu azakaminenga chikuma vatu, ngocho afwilililile kuvambulila mujimbu wakuvavendejeka.—Tangenu Isaya 61:1, 2.

7. Tweji kulondezezanga ngachilihi Yesu?

 7 Vyuma muka natulinangula kuli Yesu? Ngana muze chapwile kuli Yesu, nayetu vatujingilika kuvatu vaze vali “nge mikoko vakuzeneka kafunga.” Vatu kana vali nakumona ukalu wakulisezaseza. Shikaho twatela kuvambulila mujimbu waWangana. (Kuso. 14:6) Tweji kulondezezanga Mwata wetu hakwambulila vatu mujimbu wamwaza mwomwo tweji kwivwilanga “keke vaka-kukalikiza navaka-kuhutwa.” (Samu 72:13) Tweji kwivwilanga keke vatu, ngocho twafwila kuvakafwa.

OMU TUNAHASE KUSOLOLA NGWETU TWAZAKAMA VATU

Tachikizenu ukalu wamutu himutu (Talenu palangalafu 8-9)

8. Uno natusolola ngachilihi ngwetu twazakama vatu vaze tweji kwambulilanga? Hanenu chakutalilaho.

8 Uno tunahase kusolola ngachilihi ngwetu twazakama vatu vaze tweji kwambulilanga? Twatela kushinganyekanga havatu vaze natuwana muwande, nakuvazakama nawa mujila yize natusaka vakwetu vatuzakaminemo. * (Mateu 7:12) Tushimutwilenu hajijila jiwana tunahase kulingilamo ngocho. Jila yatete, shinganyekenunga havyuma ali nakusakiwa mutu himutu. Mulimo wetu wakwambulula walifwana namulimo uze eji kuzatanga ndotolo. Ndotolo wamwenemwene eji kufwilanga kutachikiza vyuma ali nakusakiwa muveji himuveji. Eji kuhulisanga vihula muveji nakumwivwilila kanawa omu mwalumbununa ukalu wenyi. Muchishishisa chakuhana muveji vitumbo vize nashinganyeka kweseka nomu nalumbununa muveji, ndotolo eji kufwilanga kutachikiza ovyo vinanehe ukalu kana nakuwana jino vitumbo vyakutamo nakuhana jino uze muveji. Chochimwe nawa, nayetu katwatela kuzachisanga jila yoyimwe hakwambulila vatu vosenako, oloze twatela kushinganyekanga haukalu wamutu himutu nakumukafwa kweseka naukalu ali nawo.

9. Vyuma muka twatela kulihendako omu natupwanga muwande? Lumbununenu.

9 Nge munawane mutu muwande kamwatela kushinganyeka ngwenu munatachikiza kanawa ukalu ali nawo, chipwe vyuma afwelela novyo vyamulingisa afwelele vyuma kanako. (Vishi. 18:13) Oloze mwatela kumuhulisa vihula mujila yakuzangama mangana ahanjike vili mumuchima wenyi. (Vishi. 20:5) Nge chinahase kweseka nachisemwa chenu, kaha munahase kumuhulisa amilweze milimo azata, natanga yenyi, nokwo afuma navyuma eji kushinganyekanga havihande vimwe. Kuhulisa vatu vihula nachitukafwa twijive ovyo vali nakushinganyeka nakutukafwa tutachikize chihande twatela kushimutwila navo. Kulinga ngocho nachitukafwa tuvazakame nakuvakafwa kweseka navyuma vali nakusakiwa ngana muze alingile Yesu.—Esekesenuko Wavaka-Kolinde 1, 9:19-23.

Achishinganyekenu omu chili chiyoyelo chamutu uze namwambulila (Talenu palangalafu 10-11)

10-11. Kweseka nachisoneka chaWavaka-Kolinde 2, 4:7, 8, jila muka yamuchivali tunahase kusolwelamo ngwetu twazakama vakwetu? Hanenu chakutalilaho.

10 Jila yamuchivali, esekenu kushinganyekanga omu chili chiyoyelo chavo. Shimbu jimwe tunahase kutachikiza chiyoyelo chavo  mwomwo nayetu tweji kumonanga ukalu hakuwana nge tuvosena katwakupukako. (Koli. 1, 10:13) Twatachikiza ngwetu makumbi ano kuyoya chinakaluhwa oloze tuli nakuyoya mwomwo yakutukafwa kuli Yehova. (Tangenu Wavaka-Kolinde 2, 4:7, 8.) Oloze tachikizenu ngwenu vatu vaze kavapwa masepa jaYehovako vali nakumona ukalu waunene chikuma. Shikaho vatu vangana tweji kuvevwilanga keke nakufwila kuvambulila “mujimbu wamwaza wavyuma vyamwenemwene” ngana muze alingile Yesu.—Isa. 52:7.

11 Achitalenu hachakutalilaho chandumbwetu Sergey. Shimbu kanda alinangula muchano, apwilenga wasonyi chikuma. Chamukaluhwililenga kuhanjika navatu. Mukuhita chalwola etavilile kulinangula Mbimbiliya. Sergey ambile ngwenyi: “Omu ngwapwile nakulinangula Mbimbiliya ngwatachikijile jino ngwami vaka-Kulishitu vatwama namulimo wakulwezako vakwavo vyuma vafwelela. Oloze ngwatachikijile ngwami aminyi kangweshi kuhasa kuzata mulimo kanako.” Chipwe ngocho, ashinganyekelenga chikuma haukalu veji kumonanga vatu vaze kavatachikiza Yehovako. Ambile ngwenyi: “Vyuma vize ngwalinangwile vyangulingishile ngupwenga wakuwahilila nakutwama mukuunda. Ngwatachikijile ngwami vatu vavavulu vatelele kwivwa mujimbu kana.” Omu Sergey atwalileho kushinganyeka hachuma kana chamulingishile apwenga namuchima wakeke nakufwila kwambulilako vakwavo. Sergey ambile ngwenyi: “Ngwalikomokelele chikuma mwomwo kwambulilako vakwetu changukafwile ngupwenga wakumika nakuzamisa nawa lufwelelo lwami.” *

Vatu vamwe kaveshi kuzovoloka washi kushipilituko (Talenu palangalafu 12-13)

12-13. Mwomwo ika twatela kutalilila chikoki vatu vaze tweji kunangulanga? Hanenu chakutalilaho.

12 Jila yamuchitatu, talililenunga chikoki vatu vaze mweji kunangulanga. Mwatela kwanuka ngwenu vatu vaze mweji kunangulanga pamo kavatachikiza vyuma vyamuchano vize mwatachikiza enuko. Kaha nawa vavavulu vazanga chikuma vyuma vafwelela, shikaho vamona ngwavo vyuma veji kulinangulanga kumauka avo vikiko vyeji kuvalingisanga vapwenga vakulinunga mutanga yavo, namuchisemwa chavo  namuchitungilo chavo. Jino tunahase kuvakafwa ngachilihi?

13 Achishinganyekenu hachuma chino: Vyuma muka vyeji kusolokanga nge chalo chinafu? Nge chalo chinafu kaveshi kuchipuzula hahaze veneko oloze veji kutwalililaho lika kuchizachisa halwola vali nakutunga chachihya palanga nomu nachikuma numba jino vapuzule chize chamwaka. Omu mukiko chapwa nakuli vatu vaze tweji kunangulanga, shimbu kanda valitwamine kufwelela vyuma valinangula, twatela kuvangila kuvakafwa vamone kulema chamuchano uze tuli nakuvanangula uze kavatachikijile hakavangako. Kulinga ngocho nachivakafwa jino valitwamine kufwelela vyuma valinangula kumauka avo. Chipwe ngocho, hakusaka mutu alinge chuma kana chasakiwa lwola.—Loma 12:2.

14-15. Tunahase kukafwa ngachilihi vatu vaze kavatachikiza ngwavo natukatwama hano hamavu muPalachise chipwe vaze kavatachikiza vyuma vyavivulu hachihande kanako? Hanenu chakutalilaho.

14 Kachi nge natutalililanga chikoki vatu natuwananga muwande, kaha katweshi kushinganyekanga ngwetu navetavila vyuma natuvambulila halwola lwatete natushimutwila navoko. Oloze kupwa namuchima wakuzakama nachitulingisa tuvakafwe chikoki chikoki mangana vashinganyeke havyuma yanangula Mbimbiliya. Chakutalilaho, achishinganyekenu omu munahase kukafwa mutu mangana atachikize vyalutalililo lwakukayoyela mupalachise hano hamavu. Vatu vavavulu kavatachikiza vyuma vyavivulu hachihande kanako, kaha veka kavatachikiza chuma numba chimweko. Pamo vafwelela ngwavo kufwa chikiko chapwa makumishilo akuyoya. Chipwe pamo vashinganyeka ngwavo vatu vavilinga vyamwaza veji kuyanga mwilu nge vanafu. Uno tunahase kukafwa ngachilihi vatu kana?

15 Ndumbwetu umwe walunga ahanjikile vyuma eji kulinganga hakukafwa vatu vatachikize vyalutalililo kana. Chatete, eji kuvangilanga kutanga mukanda waKuputuka 1:28. Kufumaho eji kuhulisanga mwenyazuvo ngwenyi, uno Kalunga asakile vatu vatwame kulihi, kaha nawa vapwenga nachiyoyelo chakufwana ngachilihi? Vatu vavavulu veji kukumbululanga ngwavo, “Hano hamavu, kaha nawa vayoye mujila yamwaza.” Kufumaho eji kutanganga mukanda waIsaya 55:11, nakuhulisa ngwenyi, kutala Kalunga alumuna vyuma ajinyine kulinga tahi? Kakavulu veji kukumbululanga ngwavo nduma. Chamakumishilo, eji kutanganga mukanda waSamu 37:10, 11 nakuhulisa ngwenyi, uno chiyoyelo chavatu nachikapwa ngachilihi kulutwe? Kuzachisa Mbimbiliya mujila kaneyi chinamulingisa akafwe vatu vavavulu vatachikize jino ngwavo Kalunga asaka vatu vakayoye haya myaka yosena hano hamavu muPalachise.

Kusonekela mutu mukanda yinahase kupwa jila yimwe yakumusolwelamo likoji nakumukolezeza (Talenu palangalafu 16-17

16-17. Kweseka namazu ahali Vishimo 3:27, tunahase kuzakama ngachilihi vatu natwambulila? Hanenu chakutalilaho.

16 Jila yamuchiwana, shinganyekenu vyuma munahase kulinga mangana musolole ngwenu mwazakama vatu kana. Chakutalilaho, mwatela kukekesa mumone numba nge munatambukila vatu kana halwola luze vali namilimo. Nge mukiko, kaha mwatela kulikonekela nakuvashika likumbi lyeka. Kachi nge mwenyazuvo  ali nakusaka kumukafwako milimo yimwe yayindende, chipwe nge atwama muluuta mwomwo yamisongo chipwe ushinakaji, kaha ali nakusaka kumuzachilako kamulimo kamwe tunahase kuvakafwa.—Tangenu Vishimo 3:27.

17 Ndumbwetu umwe wapwevo anganyalile mwamunene mwomwo yakupwa namuchima walikoji. Kupwa namuchima wakuzakama chalingishile ou ndumbwetu asonekele tanga yimwe mukanda wakuvavendejeka omu vafwishile mwanavo. Mumukanda kana asonekelemo mazu akuvendejeka amuMbimbiliya. Uno yize tanga yevwile ngachilihi? Naye yauze mwana afwile ambile ngwenyi: “Zau ngwapwanga nakwivwa kupihya chikuma, oloze mukanda watusonekelanga unatukafwe chikuma. Ngwasakwililako chikuma hamukanda kana mwomwo unatuvendejeka. Zau ngwautanganga kafwe mapapa 20. Ngwawahililanga chikuma mwomwo mukanda kana wangukolezezanga. Shikaho tunakusakwilila chikuma.” Chakuzeneka kukakasana, kushinganyekelangako vatu vaze vali nakuyanda nakufwila kuvakafwa chinahase kuneha nganyo yayinene.

ZATENU NOHO HAKUMINA NGOLO JENU

18. Kweseka namukanda Wavaka-Kolinde 1, 3:6, 7, vyuma muka twatela kwanukanga shimbu yosena kutalisa kumulimo wetu wakwambulula, kaha mwomwo ika?

18 Omu natuzatanga mumulimo wakwambulula twatela kuzata kweseka noho hakumina ngolo jetu. Tweji kukafwanga vakwetu valinangule vyaKalunga, oloze keshi yetu tweji kuzatanga mulimo waunene chikumako. Shikaho katwatela kulitwamina kwambulula kachi nge vatu kaveshi nakwakula kanawa kumujimbu natuvambulilako. (Tangenu Wavaka-Kolinde 1, 3:6, 7.) Yehova ikiye eji kukokanga vatu vezenga kuli ikiye. (Yowa. 6:44) Shikaho vatu vanahase kwitavila mujimbu uze natuvambulila kweseka nakuzanga chavo. (Mateu 13:4-8) Anukenu ngwenu vatu vavavulu kavetavilile mujimbu avambulilile Yesuko, numba tuhu Yesu apwile muka-kunangula wamunene. Shikaho katwatela kwivwanga kupihya kachi nge vatu navakana kwivwilila kumujimbu natuvambulilako.

19. Vyuma muka vyamwaza natunganyala kachi nge natuzakamanga vatu mumulimo wakwambulula?

19 Kachi nge natuzakamanga vatu natwambulilanga, kaha natunganyala mwamunene. Natulivwisanga kuwaha chikuma kuzata mulimo wakwambulula. Kaha nawa natumona nganyo yeji kufumanga hakuhana. Kulinga ngocho nachikafwa vatu “[va]michima yamwaza yakusaka kuyoya chahaya myaka yosena” vetavile mujimbu wamwaza. (Vili. 13:48) Shikaho “heshoho natuwanyina lwola lwakulinga ngocho, tulingenunga vyuma vyamwaza kuli vosena.” (Ngale. 6:10) Kaha natupwa vakuwahilila chikuma hakutachikiza ngwetu tuli nakuneha kavumbi kuli Setu wamwilu.—Mateu 5:16.

MWASO 64 Kulivwisa Kuwaha Kuzata Mulimo Wakwaha

^ par. 5 Kachi nge natuzakamanga vatu natuwananga muwande, kaha natupwa vakuwahilila, nakulingisa nawa vatu vevwilile chikuma kumujimbu natuvambulila. Uno chinahase kupwa ngachilihi ngocho? Muchihande chino natushimutwila vyuma natulinangula kuli Yesu, kaha nawa natushimutwila hajijila jiwana jize tunahase kuzakaminamo vatu vaze tweji kuwananga muwande.

^ par. 5 LIZU VANALUMBUNUNA: Keke. Eli lizu valizachisa muMbimbiliya kulumbununa kutetela mutu uze ali nakuyanda chipwe uze vali nakuyanjisa. Muchima kana unahase kulingisa mutu afwile kukafwa vakwavo kweseka noho hakumina ngolo jenyi.

^ par. 8 Talenu chihande chakwamba ngwavo, “Sololenunga Vilinga Vyamwaza Omu Namupwanga muMulimo waMuwande” muKaposhi Kakutalila waMay 15, 2014.

^ par. 11 Talenu Kaposhi Kakutalila waAugust 1, 2011 waChingeleshi, mafwo 21-22.