Mbimbiliya yatwama navyakumwenesa vyakulipwila vyavivulu vize vyatukafwa twijive vyuma vyatwama mwilu. Tunamilombo muhunanane havyakumwenesa kana. Numba tuhu vyuma vimwe vanalumbununa muvyakumwenesa kana vyapwa vyachifwanyisa, oloze vinahase kumikafwa mushinganyeke hali vaze vatwama mwilu nomu vanahase kumikafwa.

YEHOVA APWA WAKULITULAHO

“Litanda lili muchihela chalyo mwilu. Halitanda kana hapwile umwe atwamineho. Uze atwamineho asolokele nge lilolwa lyayashipili nalilolwa lyasachiu, kaha kulitanda lize kwajingulukile kongolo uze asolokele nge limelate.”—Kusoloka 4:2, 3.

“Kuli ikiye kwamunyikile jingulwishi nge kongolo uze ali mulivwi halikumbi lyavula. Omu mukiko chapwile kumunyika chize chamunyikile jingulwishi. Chafwanyine nge upahu waYehova.”—Ezekele 1:27, 28.

Evi vyakumwenesa vamwenesele kaposetolo Yowano nakapolofweto Ezekele, vyasolola upahu waKalunga Wakulitulaho Yehova, navyuma vize tunahase kuhumikiza vyakufwana nge malolwa akuvyakuma, nakongolo, nalitanda lyawata. Vyasolola nawa nge Yehova apwa wakwivwisa woma, wamwaza kaha nawa wakuunda.

Vyakumwenesa kanevi vyasolola Kalunga vyalitombola namazu aze asonekele muka-kwimba jisamu akwamba ngwenyi: “Yehova apwa wamunene, kaha atamo kumwalisa. Apwa wakwivwisa woma chikuma kuhambakana tulunga veka vosena. Tulunga twavatu veka naveka vosena vapwa vamokomoko, oloze Yehova ikiye atengele melu. Ukelenga naluvaji vili kumeso enyi. Ngolo naulangaji vili muchihela chenyi chajila.”—Samu 96:4-6.

Numba tuhu Yehova apwa Wakulitulaho, oloze atulweza tulombenga kuli ikiye mwomwo eji kutwivwililanga. (Samu 65:2) Kalunga atuzanga nakutuzakama chikuma, kahechi chikiko chalingishile kaposetolo Yowano asoneke ngwenyi: “Kalunga ikiye zangi.”—WaYowano 1, 4:8.

YESU ATWAMA HAMWE NAKALUNGA

“Hakuwana nge [kambaji Setefwano uze apwile muka-Kulishitu] azalile nashipilitu yajila, atalile mwilu, kaha amwene upahu waKalunga, naYesu nawa nemana kulivoko lyachilyo lyaKalunga, kaha ambile ngwenyi: ‘Talenu! Ngunamono mwilu munasokoloka, naMwanamutu nawa nemana kulivoko lyachilyo lyaKalunga.’”—Vilinga 7:55, 56.

Halwola luze Setefwano amwene chakumwenesa kana, Yesu te vanamujihi lyehi kuli vatwamina vavaYuleya vaze apwile nakwambulila Setefwano. Chakumwenesa kana chasolwele nge Yesu apwile wamutonyi kaha nawa vamusangwile nakumuzezula helu. Kaposetolo Paulu asonekele ngwenyi: “[Yehova] asangwile [Yesu] kuvafu nakumutwamisa kulivoko lyenyi lyachilyo muvihela vyamwilu, vihela vyakuhambakana chikuma jifulumende josena,  namawata osena, nangolo josena, nautwamina wosena, namajina osena aze valuka, keshi nge mukatwamino kamyaka yino kahako, oloze namuli kaze kali nakwiza nawa.”—Wavaka-Efwesu 1:20, 21.

Visoneka kavyahanjika kaha hachihela chenyi chamwiluko, oloze vyasolola nawa nge Yesu azakama chikuma vatu ngana mwaYehova. Omu apwile hano hamavu, Yesu ahindwilenga vaka-kuviza, nakuka vitonji, nakusangula vafu. Hakwecha mwono wenyi hali etu, asolwele nge azangile chikuma Kalunga navatu. (Wavaka-Efwesu 2:4, 5) Hakuwana nge Yesu emana kulivoko lyaKalunga lyachilyo, ngocho kalinwomu azachise ngolo jenyi hakulingila vatu vakwononoka vosena vyuma vyamwaza.

VANGELO VEJI KUZACHILANGA KALUNGA

Kapolofweto Ndanyele atalile “lika palanga nomu vahakile matanda muvihela vyawo, kaha ou Napungako Kufuma Kushikulu [Yehova] atwamine. . . . Kaha kwapwile makombakaji namakombakaji aze amuzachililenga, tununu natununu vaze vemanyine kumeso enyi.”—Ndanyele 7:9, 10.

Muchakumwenesa kana, Ndanyele kamwene kaha kangelo umweko, oloze amwene mayongomena avangelo. Chakumwenesa kana chapwile chakwivwisa woma chikupu. Vangelo vapwa vatu vakushipilitu, vamangana kaha nawa vangolo. Vatwama muvihanda vivali, vaselafwe navakeluve. Vangelo vavavuluka muMbimbiliya mapapa 250 nakuhambakanaho.

Vangelo kavapwa vatu vaze vayoyelaho lyehi hano hamavuko. Kalunga alivangile kutenga vangelo shimbu kanda atenge vatu. Omu Kalunga apwile nakutenga ano mavu, vangelo vapwile nakumona, oku vali nakulikuwa nakusakwilila jikushi.—Yopa 38:4-7.

Jila yimwe yize vangelo vakushishika veji kuzachilangamo Kalunga shina, yakwazana mumulimo wakulipwila wakwambulula mujimbu wamwaza waWangana waKalunga uze vali nakuzata hano hamavu makumbi ano. (Mateu 24:14) Kukilikita chavo vachisolwele muchakumwenesa chize amwene kaposetolo Yowano uze asonekele ngwenyi: “Ngwamwene kangelo mukwavo ali nakutuka muutangatanga, apwile namujimbu wamwaza wahaya myaka yosena wakwambulila vaze vatwama hamavu, navaka-mafuchi osena, navaka-miyachi yosena, navaka-malimi osena, navatu veka naveka vosena.” (Kusoloka 14:6) Numba tuhu vangelo kavahanjika cheka navatu ngana muze chapwile kunyimako, oloze vali nakukafwa vaze vanakwambulula mujimbu wamwaza vawane vatu vamichima yamwaza.

 SATANA ALI NAKUHUNGUMWISA VATU VAVAVULU

“Kaha mwilu mwepukile jita: Mikayele [Yesu Kulishitu] navangelo jenyi valwile jita nayauze chazangombe, kaha uze chazangombe navangelo jenyi valwile jita, oloze vahonene kufungulula, kaha mwilu kavawanyinemo cheka chihela chavoko. Ngocho uze chazangombe wamunene vamumbilile hamavu, uze linoka wakushikulu, uze vavuluka ngwavo Liyavolo kaha nawa Satana, uze ali nakuhungumwisa vatu vosena hamavu. Vamumbilile hamavu, navangelo jenyi nawa vavambilile naikiye hamwe.”—Kusoloka 12:7-9.

Mwilu kamwapwilenga lika kuundako. Kufuma vene haze vatengele vatu, kangelo umwe uze asakile vatu valemesenga ikiye, alikangile kuli Yehova nakupwa Satana, kulumbununa “Muka-kulikanga.” Kutwala muze vangelo veka vamukundwijile, kaha vavavulukile jino ngwavo vandemone. Hakuwana nge ava vangelo vapwa vavapi, ngocho vali nakufumbukila Yehova nakuhungumwisa vatu vavavulu valikange kujindongi jaYehova.

Satana navandemone jenyi vatwama navilinga vyavipi kaha nawa vikenya. Vapwa vaka-kole javatu, kaha veji kunehanga kuyanda hano hamavu. Chakutalilaho, Satana ajihile vimuna navangamba jalunga wakushishika Yopa. Kufumaho ajihile vana vaYopa 10 ‘napeho yanyamanganda’ yize yashiwile zuvo vapwilemo. Kaha nawa Satana avetele Yopa “namahute amapi kufumisa muvilyachilo vyenyi swi namumbambamutwe.”—Yopa 1:7-19; 2:7.

Kalinwomu Satana vamufumiseko. Kufuma vene haze vamumbilile hano hamavu, atachikiza ngwenyi “ali kaha nakashimbu kakandende.” (Kusoloka 12:12) Satana navamufumisako, ou unapu himujimbu wamwaza.

VAZE VASAKULA HANO HAMAVU

“Wamulanjilile Kalunga vatu vakufuma kumiyachi yosena, nakumalimi osena, nakuvatu veka naveka, nakumafuchi osena. Wavalingishile kupwa wangana, kupwa vapilishitu kuli Kalunga, kaha navakapwanga vamyangana nakuyula mavu.”—Kusoloka 5:9, 10.

Ngana muze Yesu vamusangwile nakuya mwilu, mukiko chapwa nakuli vatu vamwe. Yesu alwezele vaposetolo jenyi vakushishika ngwenyi: “Nguli nakuya nakumiwahishila chihela chenu. Kaha nawa, . . . nangwiza cheka nakumitambula mukatwame kuze ngwatwama ami, mangana kuze nguli ami nayenu nawa mukatwamengako.”—Yowano 14:2, 3.

 Vaze veji kuyanga mwilu, veji kuyilangamo vyuma vimwe. Navakayula hamwe naYesu mufulumende yaWangana yize nayikayula vatu vosena hano hamavu nakuvakisula. Ou ukiko Wangana uze Yesu alwezele vaka-kumukavangiza valombenga ngwavo: “Ove Setu uli mwilu, lijina lyove lipwenga lyajila. Wangana wove wizenga. Mwaya muchima wove mulingiwe mwilu, nahamavu nawa.”—Mateu 6:9, 10.

MILIMO NAVAKAZATA VAZE NAVAKAYA MWILU

Kaposetolo Yowano asonekele ngwenyi: “Ngwevwile lizu lyakukanguka lyakufuma kulitanda ngwalyo: ‘Talenu! Mbalaka yaKalunga yili navatu hamwe, . . . mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.’”—Kusoloka 21:3, 4.

Echi chakumwenesa chaupolofweto chenyikila kulwola luze Wangana waKalunga, uze navakayula kuli Yesu navaze navakaya mwilu hanyima yakuvasangula, navakafumisako chiyulo chaSatana nakulingisa jino mavu kupwa palachise. Vyuma vyosena vize vyaneha kukola nakulishona kuvatu navikakuma. Nakufwa nawa kacheshi kukapwako chekako.

Nyi ngachilihi vatu vaze vafwa, vaze kaveshi kukasanguka nakuya mwiluko? Kulutwe, navakiko navakavasangula nakukayoya haya myaka yosena muPalachise hano hamavu.—Luka 23:43.

Vyakumwenesa vyosenevi vinasolola nge Yehova Kalunga, naMwanenyi Yesu Kulishitu, hamwe kaha navangelo vakushishika navaze vasakula hano hamavu vatuzakama chikuma kaha nawa vasaka tuyoyenga kanawa. Hakusaka mutachikize milimo yayivulu navakazata, hulisenu Vinjiho jaYehova chipwe kuya hakeyala yetu ya www.jw.org, nakututulula mukanda wakwamba ngwavo Uno Chikupu Mbimbiliya Yanangula Vyuma Muka?