“Ihulenu . . . tujila vahelu, kaha navamilweza. Iyaze hali ava nazeneka kutachikiza ngwenyi livoko lyaYehova likiko linalingi chuma kanechi?”—Yopa 12:7, 9.

MYAKA yakuhambaka 3,000 kunyima, kakuluka Yopa amwene ngwenyi tujila veji kutunangulanga vyavivulu vyakupandama kuvyuma atenga Kalunga. Vatu vavavulu veji kuzachisanga tujila muvifwanyisa namutushimutwiji twavo. Mbimbiliya nayikiko yazachisa tujila hakutunangula vyuma vyavilemu vyamukuyoya navyausoko wetu naKalunga. Tutalenu havyakutalilaho vyavindende.

OKWO TUPYASA VEJI KUTUNGILANGA MASWA AVO

Kapyasa

Vatu vamuYelusalema vatachikijile kanawa tupyasa mwomwo tujila kana vatungilenga maswa avo mujisenge jajizuvo. Tupyasa vamwe vatungile maswa avo mutembele yize atungile Solomone. Chasoloka nge tupyasa vaze vatungilile maswa avo mutembele vapwile vakukingiwa, mwomwo valelelenga vana vavo chakuzeneka wakuvatangula.

Muka-kwimba Samu 84 uze apwile mwana Kola uze nawa azachililenga hatembele chalumingo chimwe mutukweji 6, amwenenga maswa kana mutembele. Asakile kutwama hatembele ngana mwakapyasa uze atungilile limbo lyenyi muzuvo yaYehova. Ambile ngwenyi: “Ove Yehova wamayongomena, Tavanaku yove yayinene omwo yawaha! Ngunasake chikuma, ngunalehuka hakufwila kuya kuvipango vyaYehova . . . Natujila veji kutwamanga kuze, natupyasa veji kutungilangako maswa avo, kuze veji kulaminanga vana vavo, kwakamwihi nalijiko lyove lyakulumbila lyalinene, ove Yehova wamayongomena, Ove Mwangana wami, ove Kalunga kami.” (Samu 84:1-3) Kutala etu navana vetu twafwila kupwa hamwe nachikungulwilo chavatu jaKalunga tahi?—Samu 26:8, 12.

NDALANGIMBU ATACHIKIZA LWOLA LWENYI

Kapolofweto Yelemiya asonekele ngwenyi, “ndalangimbu atachikiza ngonde yenyi.” Atachikijile kanawa omu veji kwalukanga vandalangimbu nakupulasana muLifuchi lyaLushiko. Kuchivatuko chavula, vandalangimbu vatoma vakuhambakana 300,000 veji kufumanga muAfrica nakuya kuEurope hakukavangiza kalwiji Yotau. Hangonde yanonga veji kukindulukanga kuze veji kusemenanga. Ngana mwatujila vakwavo, vandalangimbu “valama lwola lwavo lwakukinduluka.”—Yelemiya 8:7.

Mukanda vavuluka ngwavo Collins Atlas of Bird Migration wamba ngwawo: “Chuma chakukomwesa chakutalisa kutujila shina chakwamba nge veji kwalukanga chakuzeneka navavene kuchitachikiza.” Yehova Kalunga ahana tujila uhashi wakutachikiza ngonde yakwalukila kweka, oloze vatu avahana uhashi wakutachikiza lwola najingonde. (Luka 12:54-56) Kutachikiza Kalunga cheji kukafwanga vatu vejive ulumbunwiso wavyuma vinakusoloka makumbi ano, oloze tujila kavatwama nauhashi kanako. VaIsalele vamumakumbi aYelemiya kavahakile mangana kuulumbunwiso wavyuma vamweneko. Kalunga ahanjikile ukalu vapwile nawo ngwenyi: “Vanakane mazu aYehova, kaha mangana mukaze vali nawo?”—Yelemiya 8:9.

 Makumbi ano tunakumona vinjikizo vyavivulu vyakusolola nge tuli nakuyoyela mulwola luze Mbimbiliya yavuluka ngwayo “makumbi akukuminyina.” (WaChimoteu 2, 3:1-5) Kutala namulondezeza vandalangimbu hakutachikiza ‘jingonde’ tahi?

NGONGA EJI KUMWENANGA VYUMA HAHASUKU

Ngonga

Ngonga vamuvuluka mapapa kakavulu muMbimbiliya, kaha eji kusolokanga chikuma muLifuchi lyaLushiko. Mbimbiliya yamba ngwayo, ngonga eji kupwanga kwilu kuuswa wenyi, kuze eji “kutalatalilanga kulya chenyi. Meso enyi eji kumwenanga vyuma hahasuku.” (Yopa 39:27-29) Meso enyi eji kumonanga nambwanda uze ali hahasuku kafwe tunda yakilomita yimwe.

Ngana muze ngonga eji “kumwenanga vyuma hahasuku,” naYehova akwechi uhashi wakumona vyuma vili kulutwe chikuma. Evi vikiko vyalingishile Yehova Kalunga ambenga ngwenyi: “Kufuma vene kumaputukilo, ngweji kwambululanga vyuma vyakulutwe, kufuma kushikulu ngweji kwambululanga vyuma vize kanda visoloke.” (Isaya 46:10) Nge natukavangiza vyuma mwatuhuhumuna Yehova, kaha natunganyala kumanganenyi akukomwesa nakuuhashi wenyi wakumwena vyuma hahasuku.—Isaya 48:17, 18.

Mbimbiliya yesekesa vaze vafwelela Kalunga kuli vangonga. Yamba ngwayo: “Vaze vatalilila kuli Yehova navakakwata ngolo. Navakatuka namavava nge vangonga.” (Isaya 40:31) Ngonga eji kutukanga hakuzachisa peho yizuma. Nge nawane peho kana, eji kutanduulanga mavava enyi nakujinguluka haze hali yize peho, kahechi cheji kumulingisanga azezuke chikuma helu. Ngonga keshi kupendamina kaha hangolo jenyi hakutuka nahakuzajika mavava enyi hatando yayisukuko. Ngocho navaze vafwelela Yehova veji kupendaminanga hali ikiye uze avashika kuvahana “ngolo jakuhambakana jize javatu.”—Wavaka-Kolinde 2, 4:7, 8.

“OMU CHALI EJI KUKUNGULWILANGA VANA VENYI MUMAVAVA ENYI”

Chali navana venyi

Omu Yesu apwile hakamwihi nakufwa, emanyine ndundulu nakutala nganda yavaYuleya. Alyonyingile ngwenyi: “Ove Yelusalema, ove Yelusalema, ove muka-kujiha vapolofweto, ove muka-kwasa malolwa vaze vanatumu kuli ove. Ngwasakile mapapa kakavulu kukungulula vana vove nge omu chali eji kukungulwilanga vana venyi mumavava enyi. Oloze enu kamwasakileko.”—Mateu 23:37.

Uhashi umwe wakukomwesa vatwama nawo tujila shina wakufwila kukinga vana vavo. Tujila vaze veji kutungilanga uswa wavo hamavu vatela kupwa vakuvanguluka chikuma kuponde. Nge chali namono chiselele ali nakulijinga mwilu, eji kusanyikanga vana venyi, kaha veji kulahilanga kuli ikiye nakuswama mumavava enyi. Mumavava enyi nawa veji kuswamangamo nge kuli vula chipwe nge kuli musana. NaYesu asakile vaze vatwaminenga muYelusalema vayenga kuli ikiye avakinge. Makumbi ano, Yesu atulanya tuyenga kuli ikiye atuhizumune nakutukinga kuchina natulemuwa naviteli vize vyeji kutulemuwisanga hakumbi hakumbi.—Mateu 11:28, 29.

Chikupu vene, tunahase kulinangula vyuma vyavivulu kutujila. Shikaho omu namuvamonanga, anukenu omu Visoneka vyahanjika hali vakiko. Tupyasa vatela kumikafwa mumone vihela vyakulemesela Yehova kupwa vyavilemu. Kaha nawa fwelelenu Kalunga uze nahase kumihana lutalililo luze lunahase kumilingisa mutuke nge ngonga. Yenu kuli Yesu uze mwamihana muchano wakushipilitu uze naumikinga ngana muze chali eji kukinganga vana venyi. Kaha nawa ndalangimbu atela kumyanukisa mupwenga vakuvanguluka nakutachikiza ulumbunwiso wavyuma vili nakusoloka mukaye makumbi ano.