Vangelo vakushishika vafwila kukafwa vatu, kaha nawa veji kuzatanga nangolo mangana valinge mwaya muchima waYehova. Omu Kalunga atengele mavu, vangelo “vawahililile nakutwa hamwe jingunda, [kaha] vana vaKalunga vosena vaputukile kulikuwa nakusakwilila jikushi.” (Yopa 38:4, 7) Kufuma vene kushikulu, vangelo vanafwilanga ‘kuhengwojola’ muupolofweto wakuvuluka vyuma navikasoloka hano hamavu kulutwe.—WaPetulu 1, 1:11, 12.

Mbimbiliya yahanjika ngwayo hakusaka Kalunga atesemo vyuma ajina, shimbu jimwe vangelo vanakinginga vaka-kulemesa Kalunga vamuchano. (Samu 34:7) Chakutalilaho:

  • Omu Yehova anongesele nganda yakuhuka yaSotome naNgomola, kangelo akafwile lunga wakwoloka Lote natanga yenyi mangana vafume munganda kana.—Kuputuka 19:1, 15-26.

  • Munganda yakushikulu yaMbavilone mwapwile vakweze vatatu vavaHepeleu vaze vambilile mulilungu lyakakahya, oloze Kalunga atumine “kangelo kenyi ezenga nakuyovola vangamba jenyi.”—Ndanyele 3:19-28.

  • Omu Ndanyele apwile muwina wavandumba haufuku wamuundu ambile ngwenyi kavamulileko mwomwo ‘Kalunga atumanga kangelo kenyi, kaha asokanga kutunwa twavandumba.’—Ndanyele 6:16, 22.

Mijimbu yasolola nge vangelo vanakafwenga vatu vakushishika

VANGELO VAKAFWILE CHIKUNGULWILO CHAVAKA-KULISHITU VAKULIVANGA

Shimbu jimwe vangelo vakafwilenga chikungulwilo chavaka-Kulishitu vakulivanga mumulimo wakwambulula hakusaka kutesamo vyuma ajinyine Yehova. Chakutalilaho:

  • Kangelo umwe asokolwele vikolo vyakamenga nakulweza vaposetolo vatwaleho lika kwambulwila mutembele.—Vilinga 5:17-21.

  • Kangelo alwezele muka-kwambulula mujimbu wamwaza Fwilipu ayenga mupambo yakufuma kuYelusalema nakuya kuNgaza mangana akambulile chilolo umwe wakaEchopa uze ayile kuYelusalema nakulemesa Kalunga.—Vilinga 8:26-33.

  • Omu Kalunga etavishile vaka-mafuchi eka kupwa vaka-Kulishitu, kangelo asolokele kuli Kolonelyu kapitau kamaswalale javaLoma muchakumwenesa nakumulweza asanyike kaposetolo Petulu ezenga kuzuvo yenyi.—Vilinga 10:3-5.

  • Omu kaposetolo Petulu vamukashile mukamenga, kangelo ejile nakumufumisamo.—Vilinga 12:1-11.

 VANGELO VANAHASE KUMIKAFWA NGACHILIHI?

Makumbi ano, kakweshi unjiho wakusolola nge Kalunga ali nakuzachisa vangelo vakafwe vatu mujila yakukomwesa ngana muze vavavuluka muMbimbiliyako. Chipwe ngocho, Yesu ahanjikile kutalisa kumakumbi ano ngwenyi: “Mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena, numbanyi kukuma chikeze.” (Mateu 24:14) Uno mwatachikiza ngwenu tumbaji twaKulishitu vali nakuvatwaminyina kuli vangelo hakuzata ou mulimo tahi?

Vangelo veji kutukafwanga kwambulula mujimbu wamwaza mukaye kosena

Mukanda waKusoloka wamba ngwawo, vangelo navakafwanga vatu mukaye kosena mangana valinangula vyaYehova Kalunga navyuma ajina kukalingila vatu. Kaposetolo Yowano asonekele ngwenyi: “Ngwamwene kangelo mukwavo ali nakutuka muutangatanga, apwile namujimbu wamwaza wahaya myaka yosena wakwambulila vaze vatwama hamavu, navaka-mafuchi osena, navaka-miyachi yosena, navaka-malimi osena, navatu veka naveka vosena. Apwile nakuhanjika nalizu lyakukanguka ngwenyi: ‘Mwivwenu Kalunga woma, mutohwesenu ikiye, mwomwo ola yakusopesa chenyi yinahete, ngocho lemesenu Uze atangile lilu, namavu, nakalungalwiji, natuselwoke vameya.’” (Kusoloka 14:6, 7) Vyakutalilaho vyavivulu vyamakumbi ano vili nakusolola chikupu nge vangelo vali nakukundwiza mulimo wakwambulula mujimbu waWangana mukaye kosena. Chikupu vene, nge muka-shili umwe napihilila nakwalumuka nakukinduluka kuli Yehova, “vangelo jaKalunga veji kuwahililanga.”—Luka 15:10.

Vyuma muka navikasoloka omu mulimo wakwambulula naukakuma? Vangelo vaze vapwa “vaka-jita vamwilu” navakakafwa Yesu Kulishitu uze apwa Mwangana wavamyangana hakulwa “jita yahalikumbi lyalinene lyaKalunga Wangolo Josena” haAlamangetone. (Kusoloka 16:14-16; 19:14-16) Vangelo vangolo navakasopesa vaka-kole jaKalunga omu Mwata Yesu ‘mwakazangamisa vaze . . . vanakane kwononoka kumujimbu wamwaza wakuvuluka Mwata wetu Yesu.’—Wavaka-Tesolonyika 2, 1:7, 8.

Mwatela kufwelela chikupu ngwenu vangelo veji kumizakamanga chikuma. Veji kuzakamanga chikuma vatu vaze vafwila kuzachila Kalunga, kaha Yehova eji kuvazachisanga mangana vahase kukolezeza nakukinga vangamba jenyi vakushishika hano hamavu.—WavaHepeleu 1:14.

Shikaho tuvosena tukwechi vyuma vyavilemu chikuma vize twatela kusakula. Kutala natwononokanga nakwivwilila kumujimbu wamwaza uze vali nakwambulula mukaye kosena tahi? Vinjiho jaYehova vamungalila yenu navawahilila kumikafwa mutachikize omu vangelo jaKalunga vangolo vanahase kumikafwa.