• MWAKA ASEMUKILE: 1974

  • MULIFUCHI ASEMUKILA: MEXICO

  • CHIYOYELO CHENYI CHAKUNYIMA: CHILYANYI KAHA NAWA MUKA-KUZUNGA JINDOMBO

MUJIMBU WAKUYOYA CHAMI:

Ngwasemukilile mumbaka yaCiudad Mante, nganda yamwaza yaTamaulipas mulifuchi lyaMexico. Mumbaka kana mwatwama vatu vazumbu kaha nawa valikoji. Oloze chaluvinda hakuwana nge mwapwile ulyanyi chikuma, ngocho ngalila kana yapwile yaponde.

Twasemuka tumalunga tuvawana, kaha ami yami wamuchivali. Visemi jami vangutwalile vangumbapachise muChachi yaKatolika, kaha kutwala muze ngwapwile halizavu lyavaka-kwimba myaso vavulukilenga ngwavo parish choir. Ngwasakilenga kwivwisa Kalunga kuwaha mwomwo ngwevwilenga woma ngwami mwakangusopesa nakukanguyekelesa muhelo haya myaka yosena.

Omu ngwapwile namyaka yakusemuka yitanu, tata atusezele. Echi changuhombesele chikuma nakungukolesa kumuchima. Kangwatachikijile ovyo atuseleleleko okunyi twamuzangile chikuma. Mama afuminenga hembo hatando yayisuku kuya nakututondela mwakuyoyela.

Echi changulingishile nguputuke kuzezamanga kushikola nakuya nakulikata navakwetu vanyike vaze vapwile vakulwane hali yami. Vangulongeselenga kutukana, nakunwa makanya, nakwiva, nakuzunga jindombo kuzachisa jikonyi. Hakuwana nge ngwalimwene kupwa nguwakujikiza, ngocho ngwalilongesele kuhema chakuliveta jikonyi, nachatupanga, nachatupalakanyi, nomu mwakuzachishila vitwa. Ngwapwile jino nguchilyanyi numba tuhu ngwapwile ngukanyike. Ngwazanyinenga mukuzunga namata, kaha kakavulu vanguvulumwinenga nakunguseza kuswanga mumukwakwa oku mujimba wosena uli namanyinga. Echi chalingishilenga mama evwenga kukola kumuchima omu angumbachilenga nakungulahisa kuchipatela.

Omu ngwapwile namyaka yakusemuka 16, Jorge uze apwile sepa lyami kuunyike ejile hembo lyetu. Atulwezele ngwenyi apwile Chinjiho chaYehova, kaha asakile kushimutwila nayetu mujimbu waulemu chikuma. Aputukile kulumbununa vyuma afwelela hakuzachisa Mbimbiliya. Vyuma ahanjikile kanda nguchivitangengaho lyehi, ngocho ngwawahililile hakulinangula lijina lyaKalunga navyuma ajina kukalinga. Jorge atuhulishile numba nge natwitavila kulinangula Mbimbiliya naikiye. Kaha twetavilile.

OMU MBIMBILIYA YALUMWINE KUYOYA CHAMI:

Ngwevwile nakumuchima hwo hakutachikiza nge kunangula chakakahya kahelo kachapwa chamuMbimbiliyako. (Samu 146:4; Muka-kwambulula 9:5)  Omu ngwatachikijile vyuma kana, changukafwile ngwivwenga Kalunga woma mujila yamwenemwene. Ngwaputukile kumumona kupwa hiChisemi wazangi uze asaka vana venyi vayoyenga kanawa.

Omu ngwaputukile kuzovoloka hakulinangula Mbimbiliya, ngwamwene ngwami ngwatelelele kwalumunako vilinga vyami vyaulyanyi, nakupwa wakulinyisa. Mazu aze atwama hali Wavaka-Kolinde 1, 15:33, angukafwile chikuma. Amba ngwawo: “Kulikata navatu vavapi cheji kwenyekanga vilinga vyamwaza,” chipwe ngana muze ahanjika mazu amukwinyikila chamwishi ngwawo, “cheji kupihisanga” vilinga vyamwaza. Ngwamwene jino ngwami nge ngunakusaka kwalumuna vilinga vyami, kaha ngwatelelele kulitwamina kulikata navatu vaze vapwile nakunguhungumwisa. Ngocho ngwatungile usepa navatu vaze vapwile muchikungulwilo chavaka-Kulishitu vamuchano, vaze vakumishilenga vikokojola kuzachisa jindongi jamuMbimbiliya keshi najikonyi chipwe mujila yaulyanyiko.

Mazu akwavo angukafwile shina aze atwama hali Wavaka-Loma 12:17-19, akwamba ngwawo: “Kanda namuhilwisa upi kumutu namilingi mwamupiko. . . . Kachi nge chinahase, kweseka nomu namuhashila, twamenunga mukuunda navatu vosena. Kanda namulinga sambanjingako, . . . mwomwo vasoneka ngwavo: ‘“Kulinga sambanjinga chinapu chami, ami nangukavashishishilamo.” Omu mukiko mwanambe Yehova.’” Ngwetavilile jino ngwami Yehova mwakafumisako vilinga vyavipi mujila asaka nahalwola atongola. Ngwaputukile kwalumuna kuyoya chami chikoki chikoki.

Kangweshi kukavulyama vyuma vyangusolokelele likumbi limwe nachingoloshi omu ngwapwile nakukinduluka kwimboko. Likumbi kana, lizavu lyavaka-kole lize twazungilenga nalyo lyangulukukile, kaha mukulwane wavo anguvetele hanyima nakutambakana ngwenyi, “Lilwile ove ivene!” Halwola kana ngwalombele kuli Yehova mukavatu mangana angukafwe ngumike. Numba tuhu ngwevwile kupihya nakusaka kachi ngulinge sambanjinga, oloze ngwalitwaminyinyine nakuliyila kwami. Kaha lichako ngwawanyine uze mukulwane walizavu ali ukawenyi. Ngwapihililile chikuma nakusaka kulinga sambanjinga, oloze ngwalombele cheka kuli Yehova uholela mangana angukafwe. Ngwalikomokelele chikuma hakumona uze mukulwane mweza kuli ami nakwamba ngwenyi: “Ngukonekeleko havyuma vyasolokanga zau nachingoloshi. Kuhanjika muchano, nayami ngunakusaka kupwa ngana mwayove. Nguli nakusaka kulinangula Mbimbiliya.” Ngwevwile kuwaha chikuma hakuwana nge ngwahonesele muchima wami wamatoto. Echi chamulingishile aputuke kulinangula Mbimbiliya.

Chaluvinda halwola kana, vaka-tanga yami kavatwalileho lika kulinangula Mbimbiliyako. Oloze ami ngwafwililile kutwalaho lika kulinangula, nakuhona kwechelela kala mutu chipwe kala chuma chinguhoneseko. Ngwatachikijile ngwami kulikata navatu jaKalunga nachingukafwa nguhone kuhomba nakupwa natanga yize ngwasakile. Ngwatwalileho lika kuzovoloka, kaha kuheta mu 1991, vangumbapachishile nakupwa nguChinjiho chaYehova.

OMU NGUNANGANYALA:

Ngwapwile namuchima wamatoto, naulyanyi nawakushinyinyika vakwetu. Oloze Mazu aKalunga anangukafwe ngwalumune kuyoya chami. Oholyapwa jino ngweji kwambululanga mujimbu wamuMbimbiliya kuli kala mutu uze mwasaka kwivwilila. Hamyaka 23 yinahichimo, ngunapunga nakuzata mulimo wakwambulula washimbu yosena.

Lwola lumwe nawa, ngwazachililenga haofesi yamutango yaVinjiho jaYehova yamulifuchi lyaMexico. Kahomu ngwapwile haze, ngwawanyine Claudia, mwanapwevo uze apwile nyamalikita, kaha kuheta mu 1999 twalimbachile. Ngweji kusakwililanga Yehova hakunguhana ou pwevo wakushishika.

Twayile nakuzachila chikungulwilo chazachisa Lilimi lyaTuveveve chamulifuchi lyaMexico kuze twakakafwile tuveveve valinangule vyaYehova. Kufumaho, vatulwezele kuya kuBelize mangana tukanangule Mbimbiliya vatu vakulifuchi kana. Numba tuhu twashiwisa chikuma chiyoyelo chetu, oloze twapwa vakuwahilila. Katweshi kuhasa kuchalumuna mwekako.

Mukuhita chalwola, mama aputukile cheka kulinangula Mbimbiliya, kaha vamumbapachishile. Kaha yayami napuwenyi, navana vavo navakiko vapwa jino Vinjiho jaYehova. Kaha nawa masepa jami vamwe vaze ngwambulililenga mujimbu waWangana navakiko vali nakuzachila Yehova.

Oloze chaluvinda, vakwetu vamwe mutanga yetu vafwa mwomwo yakuhona kwecha vilinga vyaulyanyi. Nge nayami nawa ngwatwalileho lika navilinga kana, kachi pamo oholyapwa ngwafwa lyehi. Ngweji kusakwililanga chikuma Yehova hakungukafwa ngupandame kuli ikiye, nakuli vaka-kumulemesa vaze vangunangwilenga namuchima wakutalilila chikoki nalikoji nguzachisenga jindongi jamuMbimbiliya mukuyoya chami.