Kaposetolo Paulu alumbunwine Yehova * ngwenyi apwa “Kalunga muka-kuvendejeka chosena, uze eji kutuvendejekanga muvyeseko vyetu vyosena.” (Wavaka-Kolinde 2, 1:3, 4) Ngocho Mbimbiliya yatufwelelesa ngwayo, Kalunga nahase kukafwa kala mutu kaha nawa Setu wamwilu nahase kutuvendejeka numba tupwa tuhu muukalu waunene ngachilihi.

Chipwe ngocho, hakusaka Kalunga atuvendejeke, twatela kulingako vyuma vimwe. Chapwa chachikalu kuya nakumona ndotolo kachi nge katwalishikile nenyiko. Kapolofweto Amose ahulishile ngwenyi: “Kutala vatu vavali vanahase kutambukila hamwe kachi nge kavalivwasanyine kuliwanako nyi?” (Amose 3:3, kwinyikila chamwishi) Shikaho, Visoneka vyatukolezeza ngwavyo: “Pandamenu kuli Kalunga, kaha mwapandama kuli enu.”—WaYakova 4:8.

Tunahase kutachikiza ngachilihi ngwetu Kalunga mwapandama kuli etu? Chatete, mwomwo eji kutulwezanga ngwenyi afwila kutukafwa. (Talenu  lipwata vanenyikilako.) Chamuchivali, mwomwo tuli naunjiho wamwenemwene wavatu vakushikulu vaze Kalunga avendejekele navaze ali nakuvendejeka makumbi ano.

Ngana mwavatu vavavulu vaze vali nakusaka Kalunga avakafwe makumbi ano, Mwangana Ndavichi naikiye asakile Kalunga amukafwe. Alombele kuli Yehova ngwenyi: “Ivwa kulembelela chami omu nangukulembelela ungukafwe.” Uno Kalunga amukumbulwile tahi? Eyo. Ndavichi ambile cheka ngwenyi: “Nangukafwe, kaha muchima wami unawahilila.”—Samu 28:2, 7.

MULIMO ATWAMA NAWO YESU HAKUVENDEJEKA VAZE VALI NAKULISHONA

Kalunga asakile Yesu azate mulimo wakulipwila wakuvendejeka vatu. Hamilimo yosena yize amuhanyine Kalunga, Yesu atelelele nawa ‘kukasa hajimbandu javaze vapwile nakulyonyinga mumichima, nakuvendejeka vosena vaze vapwile nakulishona.’ (Isaya 61:1, 2) Ngana muze wahanjika upolofweto, Yesu azakaminenga vatu vaze vapwile “nakufulyangila nakulemuwa naviteli.”—Mateu 11:28-30.

Yesu avendejekelenga vatu kuzachisa mazu amwaza, nakuvamona mujila yamwaza, kaha shimbu jimwe okilenga misongo yavo. Likumbi limwe, muka-mbumba alembelelele Yesu ngwenyi: “Kachi nge unasake, unahase kungutomesa.” Yesu amwivwililile keke nakwamba ngwenyi: “Ngunasake vene. Toma.” (Mako 1:40, 41) Kaha uze muka-mbumba atomene.

 Makumbi ano, MwanaKalunga keshi hano hamavuko, ngocho keshi kuhasa kutuvendejeka mutu himutuko. Oloze Ise Yehova, “muka-kuvendejeka chosena,” ali nakutwalaho lika kukafwa vaze vali muukalu. (Wavaka-Kolinde 2, 1:3) Talenu jijila jiwana jize Kalunga ali nakuzachisa hakuvendejeka vatu.

  • Mbimbiliya. “Vyuma vyosena vize vasonekele hakavanga vavisonekelele kutunangula etu, mangana kuhichila mukukakachila chetu namukuvendejeka chamuVisoneka tuhase kupwa nalutalililo.”—Wavaka-Loma 15:4.

  • Shipilitu Yajila yaKalunga. Omu mwahichile tando yayindende kufuma hakufwa chaYesu, chikungulwilo chavaka-Kulishitu chosena chengilile mulwola lwakuunda. Mwomwo ika? Mwomwo “chapwilenga nakumwivwa Yehova woma nakutwama mwaya kuvendejeka chashipilitu yajila.” (Vilinga 9:31) Shipilitu yajila yize yapwa ngolo jaKalunga, yatwama nangolo chikuma. Kalunga nahase kuyizachisa yituvendejeke mukala ukalu natumona.

  • Kulomba. Mbimbiliya yamba ngwayo: “Kanda namulizakamina hachuma numba chimweko.” Oloze “mulwezenunga Kalunga vyuma munakusaka, kaha kuunda chaKalunga chize chahambakana kunangakana chosena nachikinga michima yenu navishinganyeka vyenu.”—Wavaka-Fwilipi 4:6, 7.

  • Vakwetu Vaka-Kulishitu vanahase kupwa masepa vamwaza vaze tunahase kufwelela ngwetu navatuvendejeka nge tuli muukalu. Kaposetolo Paulu alumbunwine masepa jenyi ngwenyi ‘vanapu vaka-kuvendejeka’ mulwola ‘lwavihuli naluyando.’—Wavaka-Kolose 4:11; Wavaka-Tesolonyika 1, 3:7.

Oloze munahase kuhuhwasana numba nge vyuma kana vinahase kuzata. Twatela kushinganyeka havyakutalilaho vyavatu vaze twavulukanga hakavanga vaze vamwenenga ukalu. Ngana mwavatu kana, nayenu munahase kutachikiza ngwenu Kalunga achili lika nakutesamo lushiko lwenyi lwakwamba ngwavo: “Nangukamivendejeka nge omu pwevo eji kuvendejekanga mwanenyi.”—Isaya 66:13.

^ par. 3 Kweseka naMbimbiliya, Yehova likiko lijina lyaKalunga.