Kutala yenu chipwe mutu wamutanga yenu vamulukukaho lyehi kuvihwanga tahi? Kutala nayenu munalizakamina ngwenu pamo namukengila muukalu kana tahi? Vatu vanawane nge uhwanga “hiukalu uze unakutohwelako lika mukaye kosena.” Talenu havyakutalilaho vino.

UKENYA WAMUTANGA NAKUPIKA MAPWEVO: Liuka lyaUnited Nations lyambile ngwalyo: “Hamapwevo vatatu, umwe vamuvetaho lyehi chipwe kumupika kuli kausoko kenyi chipwe mutu uze azanga.” Chaluvinda, vanawane nge “hamapwevo 5, umwe navakamupika chipwe navakasaka kumupika.”

ULYANYI: Mijimbu yasolola nge muUnited States muli mazavu avihwanga akuhambakana 30,000. Kaha muLatin America, kafwe mutu umwe havatu vatatu ambululaho lyehi ngwenyi vamulukukaho lyehi kuvihwanga.

KUJIHA VATU: Vanawane nge mumwaka umwe wakalinwomu, vatu vakuheta kuchimbwa chamiliyoni vavajihile kuhambakana vatu vaze vajihile mujita. Kusulo yaAfrica namuCentral America vatu vavavulu vanavajihi chikuma kuhambakana jiavalenji jiwana hakuvesekesa kuvatu vaze vanakujiha mukaye kosena. MuLatin America, vatu vakuhambakana 100,000 vavajihile mumwaka umwe, kaha muBrazil vajihile vatu vakuheta ku 50,000. Kutala uhwanga kanou unahase kukuma tahi?

KUTALA ULYANYI UNAHASE KUKUMA TAHI?

Mwomwo ika uhwanga unavulila ngana? Vanawane vyuma vyavivulu vize vinakulingisa uhwanga ulisale. Vyuma kana shina: Chihandwa chili hachiyoyelo chavatu chize chinakuneha kulizakamina navikokojola, nakumona kuyoya chavakwavo kupwa chamokomoko, nakunwa chikuma wala, namaundu akupendesa chipwe lyamba, naulyanyi uze vanyike vanakumonanga kuli vakulwane kaha nawa vatu vaze vanakwazana muvilinga vyaulyanyi kaveshi nakuvazangamisako.

Mumafuchi amwe mukaye, vaneseka kukehesako ulyanyi. Mumbaka yaSão Paulo muBrazil muze mwatwama vatu vavavulu chikuma, kuvula chavatu vaze vafwilenga kuvihwanga chakehele najipaseti 80 mumyaka 10 yinakumu ngana. Oloze vatu chivafwa lika mumbaka kana, kaha havatu 100,000 hali nakufwa vatu 10. Uno chuma muka chinahase kukumisa ulyanyi?

Chuma nachikafwa vatu shina kwalumuna vishinganyeka navilinga vyavo. Vihwanga vatela kwecha vilinga vyavo vyakufwana nge kulivwimba, chipululu, nalifwi nakupwa jino navilinga vyamwaza vyakufwana nge zangi, nakavumbi, nakuzakama vakwavo, numba jino uhwanga ukume.

Vyuma muka navikafwa mutu alumune vilinga vyenyi? Achitalenu havyuma yanangula Mbimbiliya:

  • “Kuzanga Kalunga chalumbununa kulamanga jishimbi jenyi.”—WaYowano 1, 5:3.

  • “Kumwivwa Yehova woma chalumbununa kuhunga upi.” *Vishimo 8:13.

Kuzanga Kalunga nakuhona kulinga vyuma vize ahunga, chinahase kukafwa mutu wavilinga vyaulyanyi alumune chiyoyelo chenyi navilinga vyenyi. Kutala chikupu chuma kana chinahase kusoloka tahi?

 Achishinganyekenu hali Alex, * uze natwame mukamenga muBrazil hamyaka 19 mwomwo yakulukukanga vatu. Kuheta mumwaka wa 2000, ejile nakupwa Chinjiho chaYehova hanyima yakulinangula Mbimbiliya naVinjiho. Kutala alitwamina chikupu vilinga vyenyi vyaulyanyi tahi? Eyo, mwomwo eji kuliveyanga chikuma havyuma vyavipi alingilenga. Ambile ngwenyi: “Ngunazange chikuma Kalunga hakungukafwa ngumone chikupu ngwami nangukonekela. Kuzanga chikuma Yehova chinangukafwe ngwalumune vilinga vyami.”

César, lunga wakuBrazil, azachishilenga uta hakulukuka vatu nakupupa vikumba vyavo. Omu mukiko alingilenga hamyaka 15. Vyuma muka vyamukafwile alumuke? Omu apwile mukamenga, vamutambukilile kuli Vinjiho jaYehova, kaha aputukile kulinangula Mbimbiliya. César ambile ngwenyi: “Elu lwapwile lwola lwatete kutachikiza mwalumbunukila kuyoya. Ngwazangile Kalunga. Ngwalinangwile nawa kwivwa Yehova woma nakuhona kulinga vyuma vyavipi vize navimwivwisa kupihya. Ngwasakile kusolola kusakwilila chami halikoji angusolwelele Kalunga. Kuzanga Kalunga nakumwivwa woma changulingishile ngwalumune vilinga vyami vyavipi.”

Linangulenu vyuma vize navimikafwa mukatemo kutwama mukaye kakuhona ulyanyi

Uno mijimbu kaneyi yatunangula vyuma muka? Yatunangula nge Mbimbiliya yikwechi ngolo jakwalumuna kuyoya chavatu navishinganyeka vyavo. (Wavaka-Efwesu 4:23) Alex uze twavulukanga hakavanga ambile cheka ngwenyi: “Vyuma ngwalinangwile muMbimbiliya vyapwile nge meya amwaza aze vangumwangililile nakutomesa vishinganyeka vyami vyavipi chindende chindende. Kaha nawa kangwashinganyekele ngwami ngunahase kwecha vilinga kanako.” Chikupu vene, kachi nge natulinangulanga mazu amuMbimbiliya, kaha anahase kufumisa vishinganyeka vyavipi mumichima yetu. Mazu aKalunga akwechi ngolo jakututomesa. (Wavaka-Efwesu 5:26) Echi nachilingisa vatu vaulyanyi nalifwi valumune vilinga vyavo nakupwa jino valikoji nakutwama mukuunda navakwavo. (Wavaka-Loma 12:18) Vatu veji kutwamanga mukuunda mukuyoya chavo chosena mwomwo yakukavangiza jindongi jamuMbimbiliya.—Isaya 48:18.

Vinjiho jaYehova vakuhambakana ha 8 miliyoni mumafuchi akuhambakana ha 240, vanawane mwakukumishila uhwanga. Vatu vakumiyachi yosena, naviyoyelo vyakulisezaseza, navisemwa vyakulisezaseza vanalinangula kuzanga Yehova, nakumwivwa woma, nakulizanga navakwavo nakutwama mukuunda muwanawakwavo wamukaye kosena. (WaPetulu 1, 4:8) Echi chinasolola chikupu nge kaye kakuzeneka ulyanyi kanahase kupwako.

KAYE KAKUZENEKA ULYANYI KALI HAKAMWIHI

Mbimbiliya yatufwelelesa ngwayo Kalunga kalinwomu afumiseko ulyanyi wosena. “Likumbi lyakusopesa nalyeli lyakunongesa vaka-kuzamukila Kalunga” kalinwomu lizenga nakufumisako kaye kano kanazale naulyanyi. (WaPetulu 2, 3:5-7) Kakweshi kukapwa vaka-ukenya vaze navakayanjisanga vakwavoko. Tunatachikiza ngachilihi ngwetu Kalunga asaka kukafumisako ulyanyi?

Mbimbiliya yamba ngwayo, Kalunga “ahunga weshowo azanga ulyanyi.” (Samu 11:5) Tengi azanga kuunda nachiyulo. (Samu 33:5; 37:28) Echi chikiko nachikamulingisa akahone kwechelela vatu vaulyanyi vakatwaleho lika kuyanjisa vakwavo.

Enga, kalinwomu kaye kakahya kakuunda kezenga. (Samu 37:11; 72:14) Kutala kamweshi nakusaka kulinangula vyuma vize navimilingisa mukatemo kutwama mukaye kakuhona ulyanyi tahi?

^ par. 12 Mbimbiliya yasolola nge lijina lyaKalunga ikiye Yehova.

^ par. 14 Majina vanawalumuna.