Kachi nge Kalunga keshi Ikiye eji kunehanga kuyandako, kaha zala yakolombolombo, nauhutu, najijita, namisongo yakutekeleka naukalu wakwiza mukukasumuna, vyeji kufumanga kulihi? Mbimbiliya yahanjika havyuma vitatu vize vyeji kunehanga ukalu kuvatu. Vyuma kana shina:

  1. Kulizanga mutu ivene, naLizangamina naLujindo. “Mutu nashinyinyika mukwavo mutu mangana amuyanjise.” (Muka-kwambulula 8:9) Vatu veji kuyandanga mwomwo yakuvayanjisa kuli vatu vakuhuka.

  2. Lwola naVyuma Vyakwiza Mukukasumuna. Vatu veji kuyandanga “mwomwo lwola navyuma vyakwiza mukukasumuna vyeji kuvawananga vosena.” (Muka-kwambulula 9:11) Kulumbununa nge vatu vanahase kupwa muponde chipwe muukalu, mwomwo yakupwa kuchihela chimwe halwola lwakuhenga chipwe kulimbenja chavo vavene.

  3. Muka-Kuyula Kaye waKuhuka. Mbimbiliya yasolola hatoma owo eji kulingisanga vatu vayande chikuma. Yamba ngwayo: “Kaye kosena katwama mumavoko ayauze wakuhuka.” (WaYowano 1, 5:19) Ou “wakuhuka” vanavuluka ikiye Satana Liyavolo uze apwa mutu wangolo wakushipilitu. Hakavanga apwile kangelo kaKalunga, oloze “kazamine mumuchanoko.” (Yowano 8:44) Kutwala muze, vangelo vamwe valikangile kuli Kalunga nakulipanjika kuli Satana, mwomwo yakufwila kulinga vyuma vasakile vavene, ngocho vapwa jino vandemone. (Kuputuka 6:1-5) Kufuma halwola alikangile Satana navandemone jenyi, vanazatenga nangolo nakuhungumwisa vatu mangana vayule vakwavo mujila yakuhenga. Vyuma kana vinakusoloka chikumanyi mumakumbi ano. Oholyapwa jino, Satana Liyavolo ali namatoto chikuma kaha “ali nakuhungumwisa vatu vosena hamavu,” kaha nalingisa kupwenga “lamba hamavu.” (Kusoloka 12:9, 12) Chikupu vene, Satana apwa muka-kuyula wamupi. Eji kwivwanga kuwaha nge mwamona vatu vanakuyanda. Pundu vene, Satana ikiye eji kulingisanga vatu vayande, keshi Kalungako.

SHINGANYEKENU HACHUMECHI: Mutu wakuhuka chikuma ikiye kaha nahase kulingisa vatu vakuzeneka mulonga vayande. Mbimbiliya yamba ngwayo: “Kalunga ikiye zangi.” (WaYowano 1, 4:8) Hakuwana nge Kalunga atwama namuchima wazangi, ngocho “nachipwa chakuhenga kuli Kalunga wamuchano kulinga vyuma vyavipi, chipwe ou Wangolo Josena kulinga vyuma vyakuhenga.”—Yopa 34:10.

Tuyokutuyoku nawa, munahase kuhulisa ngwenu: ‘Uno Kalunga Wangolo josena mwetavisa Satana ayule palanga nakumwaka uka?’ Nganomu munamono, Kalunga ahunga upi wosena kaha eji kwivwanga kupihya nge tuli nakuyanda. Mazu enyi atufwelelesa ngwawo: “Mbilenu kulizakamina chenu chosena hali ikiye, mwomwo amizakama.” (WaPetulu 1, 5:7) Kalunga atuzanga chikuma, kaha akwechi ngolo jakufumisako kuyanda chosena nachiyulo chakuhenga. Omu mukiko natushimutwila muchihande chinakavangizaho. *

^ par. 7 Nge muli nakusaka mijimbu yayivulu, kutalisa kuvyuma vyalingisa Kalunga etavise kuyanda, kaha talenu kapetulu 11 mumukanda wakwamba ngwavo Mbimbiliya Nayitunangula Vyuma Muka? vasoneka kuli Vinjiho jaYehova munahase nawa kuututulula ha www.jw.org/lue.